Jack ye Marie-Line ẹdiana kiet ẹnam utom uyọhọ ini toto ke 1988. Sia mmọ ẹsikemede ndidu uwem ntiene nte n̄kpọ etiede ke ebiet ekededi emi ẹnọde mmọ ẹka, mmọ ẹma ẹnyịme ediwak utom emi ẹkenọde mmọ ke Guadeloupe ye ke French Guiana emi n̄kọk itieutom France ẹsede ẹban̄a idahaemi. Yak ibụp Jack ye Marie-Line mbụme ifan̄.

Nso ikanam mbufo ẹtọn̄ọ utom uyọhọ ini?

Marie-Line: Ini n̄kedide eyenọwọn̄ ke Guadeloupe, mma nsiwak nditiene eka mi n̄kwọrọ ikọ tọn̄ọ ke usenubọk tutu mbubreyo. Eka mi ama esisịn ifịk etieti ke n̄kpọ Abasi. Mmama mme owo etieti, ntre ekedi n̄kokụre ufọkn̄wed ke 1985, ami ntọn̄ọ usiakusụn̄.

Jack: Ini n̄kedide akparawa, mma nsiwak ndidu ye mme anam utom uyọhọ ini emi ẹkemade ukwọrọikọ etieti. Mma nsinam usiakusụn̄ unọ un̄wam ke utren̄wed. Ndusụk ini ke utịturua, ima isidụk bọs iketiene mme asiakusụn̄ oro ikwọrọ ikọ tọn̄ọde ke usenubọk tutu esịm mbubreyo, ndien ke mbubreyo, nnyịn ika esụk ikọduọk odudu. Ama esinem nnyịn etieti ini oro.

Ke esisịt ini ebede ke mma n̄kọdọ Marie-Line ke 1988, mma mbụp idemmi nte: ‘Nnyịn inyeneke ukọ, ntak emi nnyịn mîsịnke idem ke n̄kpọ Abasi ikan emi?’ Ntre mma ntiene Marie-Line ndi asiakusụn̄. Ẹma ẹmek nnyịn mme akpan asiakusụn̄ ke isua emi eketienede ke ima ikaka Ufọkn̄wed Mme Asiakusụn̄. Ẹma ẹnọ nnyịn ikanam utom ke nsio nsio itie ke Guadeloupe mbemiso ẹkedinọde nnyịn ika French Guiana.

Ẹkpụhọ utom mbufo ediwak ini ke mme isua oro ebede. Nso in̄wam mbufo ẹkeme ndidu uwem ntiene nte n̄kpọ etiede ke mbufa itie emi ẹnọde mbufo ẹka?

Marie-Line: Nditọete ke Bethel French Guiana ẹma ẹfiọk ke itie N̄wed Abasi emi imade ikan edi Isaiah 6:8. Ntre ekesidi mmọ ẹma ẹkot nnyịn, mmọ ẹyedọhọ nnyịn mbre mbre ẹte: “Ndi ẹmeti itie N̄wed Abasi emi mbufo ẹmade ẹkan?” Ima isifiọk ke ẹmọn̄ ẹnọ nnyịn efakutom en̄wen inyụn̄ ibọrọ ite: “Se nnyịn mi! Dọn̄ nnyịn utom!”

Nnyịn isimenke akani efakutom nnyịn idomo ye obufa sia oro ekeme ndinam nnyịn ikûkop inem obufa efakutom nnyịn. Imesinyụn̄ ima nditọn̄ọ  ufan ye nditọete ke obufa itie emi ẹnọde nnyịn ika.

Jack: Ke ini edem, ndusụk mme ufan nnyịn emi ẹkemade nnyịn etieti ẹma ẹdomo ndinam nnyịn ikûwọrọ uka obufa efakutom emi ẹkedọhọde ika sia mmọ ẹkeyom nnyịn idu ikpere mmọ. Edi ini ikọkpọn̄de Guadeloupe, brọda kiet ama eti nnyịn se Jesus eketịn̄de ke Matthew 13:38 ete ke “in̄wan̄ edi ererimbot.” Ntre ini ikade efakutom en̄wen, imesiti idem nnyịn ke kpa in̄wan̄ utom kiet oro ke isụk inam utom, inamke n̄kpọ m̀mê ewe ikpehe ererimbot ke idu. Se ikam idide akpan n̄kpọ edi ke mme owo ẹdu ke efakutom emi ẹnọde nnyịn ika!

Ini isịmde obufa efakutom, imesikụt ke mme owo ke ẹdụn̄ do ẹkop inem uwem. Ntre imesidomo ndidu uwem nte mbon n̄kan̄ oro ẹdude. Udia mmọ ekeme ndikpụhọde ye eke nnyịn, edi imesitiene mmọ idia se mmọ ẹdiade inyụn̄ in̄wọn̄ se mmọ ẹn̄wọn̄de. Kpa ye oro, imesikpeme mbak nnyịn ididọn̄ọ. Imesidomo nditịn̄ nti n̄kpọ mban̄a kpukpru efakutom nnyịn.

Marie-Line: Imesikpep ediwak n̄kpọ ito nditọete ke itie emi ikade. Mmeti akpa ini emi ikesịmde French Guiana. Edịm ama edep etieti, ntre ikekere ke iyebet tutu edịm ebiere mbemiso nnyịn ikeme ndika ukwọrọikọ. Edi sista kiet ama ọdọhọ mi ete: “Ndi emeben̄e idem, ika?” Mma mbọrọ ke n̄kpaidem nte: “Idinam didie ika?” Enye ama ọbọrọ mi ete: “Men ufụkeyo fo, idiwat ke enan̄ukwak.” Nte n̄kasan̄ade ndiọn̄ọ ndikama ufụkeyo ubọk kiet n̄wat enan̄ukwak edi oro. Ekpedi n̄kekpepke, n̄kpekekemeke ndikwọrọ ikọ ke ukwọ edịm!

Ẹkpụhọ efakutom mbufo n̄kpọ nte utịm ike 15. Ndi ẹkpema nditịn̄ se isin̄wamde mbufo nnọ mbon en̄wen?

Marie-Line: Isimemke ndiwọrọ n̄ka ebiet en̄wen. Edi enen̄ede ọfọn owo enyene eti itie emi enye ediduọkde odudu enye ama ọnyọn̄ ukwọrọikọ edi.

Jack: Mmesima ndifiak nyet ndom mbakara ke esịtufọk ke obufa itie emi ikade. Ndusụk ini, nditọete ke n̄kọk itieutom ẹkpediọn̄ọ ke ekeme ndinam nnyịn ididụhe do ibịghi, mmọ ẹsidọhọ mi ẹte: “Jack, kûkpakpa ndiyet ndom mbakara isan̄ emi!”

Isisọn̄ke Marie-Line ndidọn̄ mbiomo nnyịn ke n̄kpọ ini iyomde ndika obufa efakutom! Enye esidọn̄ kpukpru n̄kpọ ke nsio nsio katọn onyụn̄ ewet “eke itie uyere mmọn̄,” “eke ubet,” “eke itie  utemudia,” ye ntre ntre adian ke mme katọn oro. Ndien ima isịm obufa ufọk nnyịn, esimem nnyịn utom ndibon mme katọn oro ke nnennen itie. Enye esiwet kpukpru se isịnede ke katọn kiet kiet man ikeme ndisọp n̄kụt se iyomde.

Marie-Line: Sia emehede nnyịn ndibon mme n̄kpọ nnyịn ke nde ke nde, imesikeme ndisọp ntọn̄ọ ukwọrọikọ.

Ẹsinam didie ẹnyene ini ‘ẹnam utom mbufo ọyọhọ ọyọhọ ẹma’?—2 Tim. 4:⁠5.

Marie-Line: Isiduọk odudu kpukpru Monday inyụn̄ itịm idem inọ mbono esop. Isika ukwọrọikọ tọn̄ọde ke Tuesday esịm Sunday.

Jack: Kpa ye oro edide enyene ibat hour emi anade inọ ke ọfiọn̄, nnyịn isiwụkke ekikere ke oro. Ukwọrọikọ enen̄ede edi akpan n̄kpọ ọnọ nnyịn. Imesidomo ndikwọrọ ikọ nnọ kpukpru owo emi isobode tọn̄ọde ke ini ikpọn̄de ufọk tutu inyọn̄ idi.

Marie-Line: Mmesikama tract idem ke ini ikade udia-uwem. Ndusụk owo ẹsididọhọ nnyịn inọ mmimọ n̄wed kpa ye oro nnyịn mîdọhọke mmọ ke idi Mme Ntiense Jehovah. Emi anam isisịne ọfọn̄ ọfọn inyụn̄ ikpeme nte inamde n̄kpọ sia mme owo ẹsise mme n̄kpọ ntem.

Jack: Nti n̄kpọ emi isinamde inọ mbọhọidụn̄ nnyịn ke isida inọ ikọ ntiense n̄ko. Mmesitan̄ pepa ke isọn̄, mmen mbio n̄kọduọn̄ọ, nnyụn̄ nda usari-mbiet n̄kpọri ikọn̄ emi ẹbehede ẹduọn̄ọ ke esịt okụre nnyịn. Mbọhọidụn̄ nnyịn ẹsikụt emi ẹnyụn̄ ẹbụp mi ndusụk ini ẹte: “Ndi ekpenyene Bible ọnọ mi?”

Ẹsiwak ndikwọrọ ikọ ke efakutom emi enen̄erede oyom usụn̄. Ndi enyene se iketịbede ini ẹkade kiet ke otu utọ efakutom oro, emi mbufo mîdifreke?

Jack: Isimemke utom ndisịm ndusụk efakutom ke Guiana. Ke urua kiet, imesiwak ndisan̄a itiat 370 ke idiọk usụn̄. Nnyịn idifreke ini ikakade St. Élie, ke akai Amazon. Ama ada nnyịn ediwak hour ndisịm do. Ikasan̄a ke ubom engine ye ke utọ moto emi ẹsiwatde ke n̄kpotụk n̄kpotụk usụn̄. N̄wakn̄kan mbon emi ẹkedụn̄de do ẹkesidọk gold. Mmọ ẹma ẹma mme n̄wed nnyịn, oro akanam ndusụk mmọ ẹnọ nnyịn n̄kpri ebok gold ima inọ mmọ n̄wed! Ke mbubreyo, ima ibre vidio esop Abasi kiet iwụt mmọ. Ediwak mbon obio oro ẹma ẹdise.

Marie-Line: Isua ifan̄ emi ebede, ẹma ẹdọhọ Jack ọnọ utịn̄ikọ Editi ke Camopi. Ikawat ke ubom engine hour inan̄ ke Akpa Oyapock ikesịm do. Ama enem tutu.

Jack: Mme itie emi mmọn̄ ọsọpde ke akpa oro ẹdi edue-ukot-akpa-itọn̄ sia ekeme ndisịp ubom. Kpa ye oro, nte ubom awatde ekpere, esiye etieti ndida n̄kụt. Edi ana awatubom ọdiọn̄ọ se enye anamde. Ima ikpep ediwak n̄kpọ ke isan̄ oro. Mme Ntiense Jehovah 6 kpọt ẹkedu do, edi n̄kpọ nte owo 50 ẹkedụk Editi oro; ndusụk mmọ ẹkedi mbon Amerindian!

Marie-Line: Mme uyen emi ẹyomde ndisịn idem nnam n̄kpọ Jehovah ẹkeme ndikop inem utom Abasi nte ikopde emi. Ana owo enen̄ede eberi edem ke Jehovah ke mme utọ ini emi; oro ayanam owo ọdọdiọn̄ ọbuọt idem ye enye. Jehovah esin̄wam nnyịn kpukpru ini.

Ẹmediọn̄ọ nsio nsio usem. Ndi esimem mbufo utom ndikpep usem?

Jack: Imemke-o. N̄kekpep mme usem oro man n̄keme ndikwọrọ ikọ nnyụn̄ n̄n̄wam nditọete ke esop. Mma nnịm Ukpepn̄kpọ Enyọn̄-Ukpeme ke usem Sranantongo * mbemiso ẹkam ẹnọde mi edikot Bible! Mma mbụp brọda kiet m̀mê se n̄ketịn̄de ama an̄wan̄a owo. Enye ama ọdọhọ ete: “Ama anam etieti, edi ndusụk se eketịn̄de ikan̄wan̄ake nnyịn.” Nditọwọn̄ ẹkenen̄ede ẹn̄wam mi; mmọ ẹma ẹsidọhọ mi mma nnam ndudue, edi ikpọ owo ikesisioroke uyo. Mma nnen̄ede n̄kpep n̄kpọ nto nditọwọn̄.

Marie-Line: Mma nnyene mbon emi n̄kekpepde Bible ke usem French, Portuguese, ye Sranantongo. Sista kiet ama ọdọhọ mi nsibem iso n̄kpep n̄kpọ ye mbon emi usem mmọ ọsọn̄de mi akan, ekem n̄kpep ye mbon emi ntịmde ndiọn̄ọ usem mmọ. Ikebịghike mma n̄kụt ufọn item sista oro.

Usen kiet, mma n̄kpep owo Bible ke usem  Sranantongo ekem n̄kpep owo efen ke usem Portuguese. Ini n̄kọtọn̄ọde ndikpep ọyọhọ owo iba oro n̄kpọ, sista emi n̄kasan̄ade kiet ama ọdọhọ mi ete: “Marie-Line, se etịn̄de in̄wan̄ake enye!” Do ke enyịn akan̄wan̄a mi ke nsem Sranantongo nnọ n̄wan Brazil utu ke Portuguese!

Nditọete ẹsima mbufo etieti ke mme itie emi ẹnọde mbufo ẹka. Ẹsinam didie ẹkpere mmọ ntre?

Jack: Mme N̄ke 11:25 ọdọhọ ke “ukpọn̄ eke atatde ubọk eyesehe.” Nnyịn isimen̄eke ndisio ini ndu ye mme owo nnyụn̄ nnam n̄kpọ nnọ mmọ. Utom okpodu ke Ufọkmbono Obio Ubọn̄, ndusụk nditọete ẹsidọhọ mi ẹte: “Yak mme asuanetop ẹnam enye oro.” Edi mmesidọhọ mmọ nte: “Ami n̄ko ndi asuanetop. Ntre utom okpodu ndinam, ana ntiene nnam.” Imọdiọn̄ọ ke kpukpru owo ẹsiyom ndinyene ini emi mmọ ẹtiede ke idem mmọ ikpọn̄, edi imesiti idem nnyịn ke inaha iyak oro akpan nnyịn ndinam nti n̄kpọ nnọ mme owo.

Marie-Line: Imesisịn ukeme iwụt nditọete nnyịn ke imekere iban̄a mmọ. Emi esinam idiọn̄ọ ini emi mmọ ẹyomde owo an̄wam ese nditọ mmọ enyịn m̀mê ekemen mmọ ke ufọkn̄wed. Imesikeme ndikpụhọ ndutịm nnyịn man inyene ini in̄wam mmọ. Ndiben̄e idem ndin̄wam mme owo ini mmọ ẹyomde un̄wam anam inen̄ede idi ufan mmọ.

Mme edidiọn̄ ewe ke mbufo ẹnyene ke ndikwọrọ ikọ ke mme itie emi ẹyomde-yom mme ọkwọrọikọ?

Jack: Utom uyọhọ ini anam inen̄ede ikop inemesịt. Ebiet emi idude esinam iwak ndikụt mme n̄kpọ emi Jehovah okobotde, emi esinam uwem enem nnyịn. Kpa ye emi mîsimemke ndusụk ini, esịt esina nnyịn sụn̄ sia imọdiọn̄ọ ke ikọt Abasi do ndin̄wam nnyịn ke ebiet ekededi emi idude.

Ini n̄kedide akparawa, ẹma ẹsịn mi ke ufọk-n̄kpọkọbi ke French Guiana ke ntak emi mmen̄kenyịmeke ndidụk ekọn̄. N̄kekereke ke usen kiet usen kiet ke nyedi isụn̄utom nnyụn̄ mfiak n̄kọkwọrọ ikọ ke mme ufọk-n̄kpọkọbi do. Jehovah ọdiọn̄ mi etieti!

Marie-Line: Se inen̄erede inam esịt adat mi edi ndinam n̄kpọ nnọ mme owo. Esịt enem nnyịn ndinam n̄kpọ Jehovah. Emi anam ami ye ebe mi inen̄ede idiana kiet. Ndusụk ini, Jack esibụp mi m̀mê ikot ebe ye n̄wan emi oyomde ẹsọn̄ọ mmọ idem ẹdidia udia ye nnyịn. Ediwak ini mmesidọhọ: “Se n̄kosụk n̄kerede edi oro!” Se isiwakde nditịbe edi oro.

Jack: Isua ifan̄ emi ebede, dọkta ama ọdọhọ ke mmenyene kansa ke ebiet emi ekperede efọk-ikịm. Kpa ye emi Marie-Line mîsiyomke ndida utọn̄ n̄kop, mmọdọhọ enye nte: “Edima, n̄kpakpa n̄kpọn̄, mmọdiọn̄ọ ke n̄kpaha usọn̄. Edi esịt enem mi sia mma nda uwem mi nnam n̄kpọ Jehovah. Ata akpan n̄kpọ edi oro.”—Gen. 25:8.

Marie-Line: Jehovah ọnọ nnyịn nsio nsio utom emi nnyịn mîkodorike enyịn, onyụn̄ ayak nnyịn inam mme n̄kpọ emi nnyịn mîkpekereke ke ikpanam tutu amama. Ediwak nti n̄kpọ ẹtịbe ke uwem nnyịn. Sia inen̄erede ibuọt idem ke Abasi, ebiet ekededi emi esop esie ẹdọhọde nnyịn ika, ke idika!