1-2. Nso isiwak nditịbe owo ama ana baptism? Nso ke idineme?

 NDI akanam omokụt mbon emi ẹyomde ndina baptism? Udûkopke ndịk ke uyo mmọ ini mmọ ẹbọrọde mbụme iba emi ẹsibụpde mbemiso ẹnịmde owo baptism. Iso mbon mmọ ye mme ufan mmọ ẹsitie imam imam. Mbon emi ẹnade baptism ẹma ẹwọrọ ke mmọn̄, oyokop nte ẹkwakde ubọk, oyonyụn̄ okụt ke iso mmọ ẹtie idara idara. Ẹkpemen ibat mbon emi ẹyakde idem ẹnọ Jehovah Abasi ẹnyụn̄ ẹnade baptism kpukpru isua ẹbahade ke urua ke urua, mbon emi ẹnade baptism kpukpru urua ẹdi ke tọsịn.

² Ndi amana baptism? Ekpedi ke ekere ndina, ọwọrọ edi ata isio ye mbon idiọk ererimbot emi sia ‘omoyom Jehovah.’ (Ps. 14:1, 2) Ẹwet ibuotikọ emi ẹnọ fi, edide omokpon owo m̀mê ukponke. Nnyịn eken emi ima ikana baptism iyom nditetịm mbiere ndinam n̄kpọ Jehovah ke nsinsi. Ntak emi ikpanamde n̄kpọ esie awak, edi yak ineme ita kpọt.

3. Nso inam ikọt Jehovah ẹma akpanikọ ye edinen ido? (Psalm 119:128, 163)

³ Jehovah ọkọdọhọ ikọt esie “ẹma akpanikọ.” (Zech. 8:19) Jesus ama ọdọhọ mme mbet esie yak ẹyom edinen ido. (Matt. 5:6) Oro ọwọrọ ke ana enen̄ede ọdọn̄ owo ndinam se inende, se ifọnde, ye se isanade ke enyịn Abasi. Ndi amama akpanikọ ye edinen ido? Imenịm ke amama. Amasua nsu ye kpukpru ndiọi n̄kpọ ye ibak. (Kot Psalm 119:128, 163.) Owo emi osude nsu ekpebe Satan emi edide andikara ererimbot emi.  (John 8:44; 12:31) N̄kpọ kiet emi Satan ebierede ndinam edi ndibiat edisana enyịn̄ Jehovah Abasi. Toto ke ini emi Satan akanamde Adam ye Eve ẹsọn̄ ibuot ye Abasi ke In̄wan̄ Eden, ke enye ọkọtọn̄ọ ndisuan nsu mban̄a Abasi. Satan akanam etie nte ke Jehovah edi andikara emi edide ibụk ye owo n̄kari, ke Enye iyakke eti n̄kpọ esịm mme owo. (Gen. 3:1, 4, 5) Nsu Satan osụk ananam mme owo ẹkere ndiọi n̄kpọ ẹban̄a Jehovah. Edieke mme owo ‘mîmaha akpanikọ,’ Satan ekeme ndinam mmọ ẹnam se ededi emi mînenke ye kpukpru orụk ibak.—Rome 1:25-31.

4. Didie ke Jehovah owụt ke imọ idi “Abasi akpanikọ”? (Se ndise n̄ko.)

⁴ Jehovah edi “Abasi akpanikọ,” enye onyụn̄ ekpep mbon oro ẹmade enye akpanikọ. (Ps. 31:5) Ukpep oro iyakke Satan ekeme ndibian̄a mmọ aba. Jehovah ekpep ikọt esie ete ẹkûkari n̄kari ẹnyụn̄ ẹnam se inende. Utọ uwem oro anam mmọ ẹnyene ukpono, esịt onyụn̄ ana mmọ sụn̄. (N̄ke 13:5, 6) Ndi Jehovah anam ukem oro ọnọ fi nte osụk ekpepde Bible? Se osụk ekpepde anam okụt ke nte Jehovah oyomde idu uwem edi ke ufọn kpukpru owo ye afo nde. (Isa. 48:17) Ke ntak oro, nam se Jehovah ọdọhọde ke enen. (Matt. 6:33) Nam mme owo ẹdiọn̄ọ se idide akpanikọ, nyụn̄ wụt ke kpukpru se Satan etịn̄de aban̄a Jehovah Abasi nnyịn ẹdi nsu. Edinam didie iwụt?

5. Didie ke okpowụt ke amama akpanikọ ye edinen ido?

⁵ Emekeme ndidu uwem emi etiede nte ọdọhọ: “Nnịmke nsu Satan, nnịm se idide akpanikọ. Nyom Jehovah akara mi, nnyụn̄ nyom ndinam se enye ọdọhọde ke enen.” Se idin̄wamde fi anam oro edi ndibọn̄ akam nnọ Jehovah, nyak idem nnọ enye, nnyụn̄ nna baptism man ẹkụt ke ama ayak idem ọnọ enye. Ndima akpanikọ ye edinen ido edi eti ntak emi ekemede ndinam owo ebiere ndina baptism.

6. Nso ke Psalm 45:4 etịn̄ emi anamde ama Jesus Christ?

⁶ Nso inam ama Jesus Christ? Ndusụk nti ntak ẹdu ke Psalm 45:4. (Kot.) Jesus ekpep nnyịn ndinam akpanikọ, ndisụhọde idem, ndinyụn̄ mma edinen ido. Edieke amade akpanikọ ye edinen ido, ọwọrọ amama Jesus Christ n̄ko. Kere nte Jesus okowụtde ke imọ imama akpanikọ ye se inende, ifeheke owo ndomokiet enyịn. (John 18:37)  Edi didie ke Jesus ekekpep nnyịn ndisụhọde idem?

7. Nso inam ama nte Jesus osụhọrede idem?

⁷ Jesus ada se enye anamde ekpep nnyịn ndisụhọde idem. Uwụtn̄kpọ kiet edi ke akananam enye inyịmeke itoro ke n̄kpọ ndomokiet, esiyak kpukpru itoro ẹka ẹbịne Ete esie. (Mark 10:17, 18; John 5:19) Etie fi didie ke idem ndikụt utọ nsụhọdeidem oro? Imenịm ke oro anam afo ama Eyen Abasi, onyụn̄ ebiere ndikpebe enye. Se inamde Jesus osụhọde idem edi ke enye ama Ete esie emi osụhọrede idem n̄ko, onyụn̄ ekpebe enye. (Ps. 18:35; Heb. 1:3) Imekere ke oro anam fi oyom ndikpere Jesus emi ekpebede nti edu Ete esie, n̄kpọ isụhọke.

8. Ntak emi enemde nnyịn nte Jesus edide Edidem nnyịn?

⁸ Se inamde enem nnyịn nte Jesus edide Edidem nnyịn edi ke idụhe Andikara ndomokiet emi ọfọnde nte enye. Jehovah ke idemesie ekekpep enye n̄kpọ, idọn̄ke owo. Jehovah akada ubọk esie emek enye ete akara. (Isa. 50:4, 5) Kere n̄ko kpukpru se Jesus akayakde atak ke ntak emi amade nnyịn. (John 13:1) Sia Jesus edide Edidem fo, enye odot se amade. Enye ama ọdọhọ ke mbon oro ẹmade imọ ata ima, oro edi mbon emi imọ ikotde ufan imọ, ẹyenịm mme ewụhọ imọ man ẹwụt ke mmọ ẹma imọ. (John 14:15; 15:14, 15) Edi ata ukpono ndidi ufan Eyen Jehovah!

9. Nso ke baptism mme Christian ada ebiet eke Christ?

⁹ N̄kpọ kiet emi Jesus ọkọdọhọde mme mbet esie ẹnam ekedi yak mmọ ẹna baptism. (Matt. 28:19, 20) Enye ke idemesie ama ana baptism. Enyene ndusụk usụn̄ emi baptism esie okpụhọrede ye eke mme mbet esie. (Se ekebe emi, “ Nte Baptism Jesus Okpụhọrede ye Eke Mme Mbet Esie.”) Edi enyene mme usụn̄ emi baptism esie ebietde eke mmọ. Ini Jesus akanade baptism, enye okowụt ke imeben̄e idem ndinam uduak Ete imọ. (Heb. 10:7) Mme mbet Christ ẹsina baptism man ẹkụt ke mmọ ẹma ẹyak idem ẹnọ Jehovah Abasi. Baptism Jesus okowụt ke enye oyom ndida ofụri uwem esie nnam se Abasi oyomde; eke mme mbet esie owụt ukem oro. Oro ọwọrọ ke mmọ ẹtiene uwụtn̄kpọ Eteufọk mmọ.

10. Ima emi amade Jesus akpanam anam nso?

¹⁰ Afo emenyịme ke Jesus edi ikpọn̄-ikpọn̄ edibon Eyen Abasi, ke enye ke Jehovah emek akara nnyịn. Ọmọdiọn̄ọ ke enye osụhọde idem, onyụn̄ ekpebe Ete esie n̄kpọ isụhọke. Emekpep ke Bible ke enye ama ọnọ mbon emi biọn̄ ọkọdọn̄de udia, ọdọn̄ mbon emi idem ekememde esịt, onyụn̄ ọkọk mme owo udọn̄ọ. (Matt. 14:14-21) Omokụt nte enye adade esop esie usụn̄ mfịn. (Matt. 23:10) Ọmọdiọn̄ọ n̄ko ke emi enye edide Edidem nnyịn, ke se enye edinamde inọ nnyịn ini ukara Abasi edisịmde isọn̄ emi ididịghe ekpri. Didie ke okpowụt ke amama enye? Edi afo ndikpebe enye. (John 14:21) Akpan usụn̄ kiet emi ekpekpebede enye edi ndiyak idem nnọ Jehovah nnyụn̄ nna baptism.

11. Nso idi akakan ntak emi akpanamde owo ana baptism? Ntak edide ntre?

¹¹ Nso idi akakan ntak emi akpanamde owo ana baptism? Jesus ama etịn̄ ewụhọ Abasi emi edide akakan ini enye ọkọdọhọde ete: “Afo enyene ndima Jehovah Abasi fo ke ofụri esịt fo ye ke ofụri ukpọn̄ fo ye ke ofụri ekikere fo ye ke ofụri ukeme fo.” (Mark 12:30) Ndi amama Abasi nte ẹtịn̄de oro?

12. Nso inam ama Jehovah? (Se ndise n̄ko.)

¹² Ntak emi amade Jehovah awak. Kiet edi ke emedikụt ke enye edi “ntọn̄ọ uwem,” efen  edi ke “kpukpru nti enọ ye kpukpru enọ eke ẹfọnde ẹma” ẹto enye. (Ps. 36:9; Jas. 1:17) Kpukpru nti n̄kpọ emi ẹsịmde fi ẹto edima Ete nnyịn emi edide ubọk-enọ-enọ Abasi.

13. Nso inam n̄kpa emi Jesus akakpade afak nnyịn edi eti enọ?

¹³ Eti enọ kiet emi Jehovah ọnọde nnyịn edi Eyen esie emi enye akayakde edikpa afak nnyịn. Ntak idọhọde ntre? Kere adan̄a nte Jehovah ye Eyen esie ẹkperede idemmọ. Jesus ọkọdọhọ ke Ete imọ ama imọ, ke imọ imama Ete imọ n̄ko. (John 10:17; 14:31) Mmọ ẹkedu kiet ke ata ediwak biliọn isua; ekedi eyo esiere, mmọ ẹnen̄ede ẹkpere idemmọ. (N̄ke 8:22, 23, 30) Kere do ndien nte akabiakde Abasi ndiyak Eyen esie edibọ ufen onyụn̄ akpa. Ima emi Jehovah amade kpukpru owo ye afo nde idịghe ekpri, oro akanam enye enyịme ndiyak edima Eyen esie edikpa man afo ye mbon efen ẹkeme ndidu ke nsinsi. (John 3:16; Gal. 2:20) Ke otu kpukpru ntak emi inyenede ndima Abasi, enye oro edi akakan.

14. Nso idi mfọnn̄kan n̄kpọ emi ekemede ndibiere ndinam?

¹⁴ Se inamde enen̄ede ama Jehovah edi ke emekpep ediwak n̄kpọ aban̄a enye. Imenịm ke ọdọn̄ fi nditetịm n̄kpere enye idahaemi ye ke nsinsi. Omonyụn̄ ekeme ndikpere enye ntre. Jehovah ọdọhọ anam esịt adat imọ. (N̄ke 23:15, 16) Se afo etịn̄de ye se anamde ke  edida anam oro. Nte odude uwem oyowụt ke emenen̄ede ama Jehovah. (1 John 5:3) Mfọnn̄kan n̄kpọ emi ekemede ndibiere ndinam edi oro.

15. Didie ke ekeme ndiwụt ke amama Jehovah?

¹⁵ Didie ke ekeme ndiwụt ke amama Jehovah? Akpa, ana ọbọn̄ san̄asan̄a akam ayak idem ọnọ ata Abasi. (Ps. 40:8) Ekem afo ana baptism man ẹkụt ke ama ayak idem ọnọ enye. Imeneneme ke afo ndina baptism edi n̄kpọ inemesit, onyụn̄ edi akpan n̄kpọ emi adade uwem fo anam. Ama ana baptism, ọtọn̄ọ obufa uwem. Edidu ọnọ Jehovah, udụhe unọ idemfo aba. (Rome 14:8; 1 Pet. 4:1, 2) Se itịn̄de oro ekeme nditie fi nte akamba n̄kpọ. Ntre ke onyụn̄ edi. Edi edieke anade baptism, uwem eyenem fi utọ oro idụhe. Ntak idọhọde ntre?

16. Psalm 41:12 owụt ke didie ke Jehovah edidiọn̄ mbon emi ẹdade uwem mmọ ẹnam n̄kpọ ẹnọ enye?

¹⁶ Idụhe eke ọnọde owo n̄kpọ nte Jehovah. Ọkpọkọm ọnọ Jehovah nso, usiene emi enye edinọde fi ayakan se ọnọde enye. (Mark 10:29, 30) Uwem emi enye edinamde fi enyene idem ke idiọk ererimbot emi eyenyene ibuot, eyenem fi utọ oro idụhe, udunyụn̄ utuaha n̄kpọfiọk. Ntọn̄ọ akam edi oro. Obufa uwem emi Abasi edinamde fi enyene tọn̄ọ ke usen emi anade baptism ekeme ndidi n̄kpọ nsinsi. Emekeme ndika iso nnam n̄kpọ nnọ edima Ete fo ke nsinsi. Eyetetịm ama Ete fo, enye n̄ko eyetetịm ama fi, oyonyụn̄ ekeme ndidu uwem ke nsinsi nte enye odude.—Kot Psalm 41:12.

17. Nso ke ekeme ndinọ Jehovah emi enye mînyeneke kan̄a?

¹⁷ Ama ayak idem ọnọ Jehovah onyụn̄ ana baptism, ọyọnọ Ete fo n̄kpọ emi enye adade ke n̄kpọuto. Kpukpru nti n̄kpọ emi enyenede ye kpukpru ini emi okopde inemesịt ẹto Jehovah. Ke ntak oro, se afo ekemede ndinam edi afo ndinọ Andinyene enyọn̄ ye isọn̄ n̄kpọ emi enye mînyeneke kan̄a. N̄kpọ oro edi afo ndinam n̄kpọ nnọ enye ke ofụri esịt. (Job 1:8; 41:11; N̄ke 27:11) Tịn̄ akpanikọ ise, ndi enyene n̄kpọ efen emi akpadade uwem fo  anam yak ọfọn akan oro? Imenịm ke ima emi afo amade Jehovah edi akakan ntak emi akpanamde ana baptism.

18. Mme mbụme ewe ke ekeme ndibụp idemfo?

¹⁸ Ke ima iketịn̄ kpukpru emi ima, ndi ayana baptism? Afo edibọrọ mbụme enye oro. Se ikemede ndin̄wam fi edi afo ndibụp idemfo m̀mê imọ ibet nso. (Utom 8:36) Kûfre ntak ita emi ima ikeneneme. Akpa edi ke amama akpanikọ ye edinen ido. Ọyọhọ iba edi ke amama Jesus Christ. Ọyọhọ ita emi edide akakan edi ke amama Jehovah. Ntre bụp idemfo: “Ndi mmoyom ndikụt usen emi kpukpru owo ẹditịn̄de akpanikọ ẹdinyụn̄ ẹnamde se inende? Ndi mmoyom Eyen Abasi edi Edidem mi, ndi mmonyụn̄ nyom ndikpebe enye? Ndi mmoyom Jehovah edi Abasi mi, nnyụn̄ nyom ndinam n̄kpọ nnọ enye man esịt adat enye?” Edieke ọbọrọde ih ke mbụme mbita oro, nso ikpan fi ndien ndina baptism? Ebet nso?—Utom 16:33.

19. Ntak emi mûkpayakke ọmiọn̄ọ fi ndina baptism? Nọ uwụtn̄kpọ. (John 4:34)

¹⁹ Edieke ọmiọn̄ọde fi ndina baptism, kere uwụtn̄kpọ kiet emi Jesus akadade etịn̄ n̄kpọ aban̄a idemesie. (Kot John 4:34.) Jesus ọkọdọhọ ke imọ ndinam uduak Ete imọ etie nte imọ ndidia udia. Nso ikanam enye ọdọhọ ntre? Udia esifọn ye nnyịn. Jesus ama ọdiọn̄ọ ke se ededi emi Jehovah ọdọhọde inam edi ke ufọn nnyịn. Jehovah iyomke inam n̄kpọ ekededi emi ekemede ndisịn nnyịn ke fehesan̄. Ndi Jehovah oyom fi ana baptism? Ih, oyom. (Utom 2:38) Ntre nịm ke edieke anade baptism, ke edidi ke ufọn fo. Edieke edide ama okụt udia emi enemde utọ oro idụhe afo ukemeke ndime, ntak ndien ọmiọn̄ọde fi ndina baptism?

20. Nso ke idineme ke ibuotikọ emi etienede?

²⁰ Ntak emi ndusụk owo mîsimaha ndisọp nna baptism? Ediwak mmọ ẹsidọhọ ke mmimọ iben̄eke idem kan̄a. Se idude edi ke afo ndibiere ndiyak idem nnọ Jehovah nnyụn̄ nna baptism edi akakan n̄kpọ emi ekpebierede ndida uwem fo nnam. Ntre, da ini kere n̄kpọ emi, sia isidịghe owo ama ede edemede, enye adaha akana baptism. Mme n̄kpọ do se anade anam man odot ndina. Edi edieke enen̄erede ọdọn̄ fi ndina baptism, nso ke akpanam idahaemi man odot ndina? Se idinemede edi oro ke ibuotikọ emi etienede.