1-2. Tịn̄ mme edidiọn̄ emi owo esinyenede enye ama ana baptism.

 OWO ndina baptism nnyụn̄ ntiene nsịne ke ubon ikọt Abasi edi n̄kpọ idatesịt. Mbon emi Jehovah emende adian idem ntre ẹyenyịme se David emi eketienede ewet Psalm eketịn̄de ete: “Owo emi afo emekde onyụn̄ anamde asan̄a ekpere, man enye okpodụn̄ ke mme okụre fo, okop inemesịt.”​—Ps. 65:4.

² Jehovah isidịghe owo eke enye esesịme enye emen esịn ke okụre esie. Ima ineme ke ibuotikọ emi ekebede ke Jehovah esimek ndikpere mbon emi ẹwụtde ke imoyom ndikpere enye. (Jas. 4:8) Ama ekpekpere Jehovah. Edi ama ayak idem ọnọ enye onyụn̄ ana baptism, edikpere enye ke san̄asan̄a usụn̄. Nịm ke ama ana baptism ama, enye ‘ayan̄wan̄a edidiọn̄ ọnọ fi tutu afo unanake baba n̄kpọ kiet.’​—Mal. 3:10; Jer. 17:7, 8.

3. Nso akpan n̄kpọ ke ana mme Christian emi ẹyakde idem ẹnọ Jehovah ẹnyụn̄ ẹnade baptism ẹnam? (Ecclesiastes 5:4, 5)

³ Ama ana baptism, ukụreke uwa-o; akpa editọn̄ọde ndida ofụri uwem fo nnam n̄kpọ nnọ Jehovah edidi oro. Oyoyom ndinam ofụri se ekekeme man anam se ọkọn̄wọn̄ọde ọnọ Jehovah ini akayakde idem ọnọ enye, idem ke ini mme idomo ye mme mfịna ẹsịmde fi. (Kot Ecclesiastes 5:4, 5.) Sia edide mbet Jesus, oyodomo nditiene uwụtn̄kpọ ye ewụhọ esie ketket nte ukeme fo edide. (Matt. 28:19, 20; 1 Pet. 2:21) Ibuotikọ emi ayan̄wam fi anam oro.

KÛYAK MME IDOMO YE MME MFỊNA ẸKPAN FI NDITIENE JESUS

4. Didie ke mme mbet Jesus ẹsimen “eto ndutụhọ”? (Luke 9:23)

⁴ Ama ana baptism ama, uwem fo iditiehe we-we-we. Jesus ama osio ọdọhọ mme mbet esie ke mmọ ẹyemen “eto ndutụ họ.” Mmọ ẹdinam ntre “ke usen ke usen,” ndomo usen kiet ntem ibehe. (Kot Luke 9:23.) Ndi ikọ Jesus ọkọwọrọ ke mme mbet esie ẹditak ke ufen? Nsa-o! Enye akakam oyom mmọ ẹnen̄ede ẹkụt ke mme mfịna ẹyesịm mmọ n̄ko, ke ididịghe edidiọn̄ edidiọn̄ kpọt. Ndusụk mfịna oro ẹkeme ndisio mmọ ndotndot mmọn̄eyet ke enyịn.​—2 Tim. 3:12.

5. Jesus ọkọn̄wọn̄ọ nso ọnọ mbon emi ẹyakde n̄kpọ atak mmọ?

⁵ Ekeme ndidi mbonubon mbufo ẹkọkọbọ fi, mîdịghe ama enyene ifet ndinyene okụk n̄kan nte enyenede idahaemi, edi afo ayak atak man n̄kpọ Abasi edi akpa ke uwem fo. (Matt. 6:33) Edi ntre, emekeme ndinen̄ede nnịm ke Jehovah okụt se anamde oro. (Heb. 6:10) Jesus ọkọdọhọ ete: “Idụhe baba owo kiet emi ọkọkpọn̄de ufọk m̀mê nditọeka iren m̀mê nditọeka iban m̀mê eka m̀mê ete m̀mê nditọ m̀mê in̄wan̄ ke ntak mi ye ke ntak eti mbụk emi mîdibọhọ n̄kpọ utịm ikikie idahaemi ke ini emi, mme ufọk ye nditọeka iren ye nditọeka iban ye eka ye nditọ ye in̄wan̄, ọkọrọ ye ukọbọ, ye nsinsi uwem ke editịm n̄kpọ emi edidide.” Anaedi omokụt ke ikọ Jesus oro edi akpanikọ. (Mark 10:29, 30) Mme edidiọn̄ emi ẹsịmde fi ẹwak ke akpanikọ ẹkan se ededi emi akayakde atak fi.​—Ps. 37:4.

6. Ntak edidide se osụk akade iso an̄wana nditre ndinam “se idọn̄de obụkidem” ke ama akana baptism?

⁶ Edisụk in̄wan̄wana nditre ndinam “se idọn̄de obụkidem” ke ama akana baptism. (1 John 2:16) Idem n̄kpọ, n̄kọ osụk edi eyen Adam, akadada idiọkn̄kpọ amana. Ekeme nditie fi ndusụk ini nte eketiede apostle Paul. Enye ekewet ete: “Mmenen̄ede ndara ibet Abasi ke ọwọn̄esịt mi, edi n̄kụt ibet efen ke ndido idem mi nte an̄wanade ye ibet oro odude mi ke esịt onyụn̄ adade mi nte mbuotekọn̄ ọnọ ibet idiọkn̄kpọ emi odude ke ndido idem mi.” (Rome 7:22, 23) Nte osụk etịmede nditre ndinam ndiọi n̄kpọ emi ẹdọn̄de fi, idem ekeme ndimem fi. Edi edieke ekerede se ọkọn̄wọn̄ọde ọnọ Jehovah ini akayakde idem ọnọ enye, oro ekeme ndin̄wam fi etetịm ebiere ke udûyakke idomo akan fi ubọk. Se idude edi ke mme idomo ẹma ẹsịm fi, se ọkọn̄wọn̄ọde ọnọ Jehovah ini akayakde idem ọnọ enye idiyakke uwem ọsọn̄ fi akaha. Didie?

7. Didie ke afo ndiyak idem nnọ Jehovah edin̄wam fi aka iso ọsọn̄ọ ada ye enye?

⁷ Ama ayak idem ọnọ Jehovah, amakan̄ idemfo. Oro ọwọrọ ke se ikpọdọdọn̄ fi m̀mê se ededi oro emekde ndinam emi mîdinemke Jehovah esịt, usan̄ake n̄kpọ ye n̄kpọ enye oro aba. (Matt. 16:24) Ntre idomo ama edi, udûdaha ubiat ini ukere m̀mê idinanam didie. Kpukpru n̄kpọ eken ibeheke fi aba, n̄kukụre se idibehede fi edi nte edisọn̄ọde ada ye Jehovah. Eyetetịm ebiere ndinam se idinemde Jehovah. Edibiet Job. Mme mfịna emi ẹkesịmde Job ẹkedi se ikemede ndinịme owo ibifịk. Kpa ye oro, enye ama ọkọn̄ ubọk ke esịt ọdọhọ ete: “Ndiduọkke nsọn̄ọnda mi!”​—Job 27:5.

8. Didie ke afo nditie n̄kere se eketịn̄de ke akam emi ọkọbọn̄de ayak idem ọnọ Jehovah edin̄wam fi akan idomo?

⁸ Ama etie ekere se eketịn̄de ke akam emi ọkọbọn̄de ayak idem ọnọ Jehovah, oro ọyọsọn̄ọ fi idem ekeme ndikan idomo ekededi. Ke uwụtn̄kpọ, ndi ọyọtọn̄ọ mbre ima ye owo emi mîdịghe n̄wan m̀mê ebe fo? Tutu amama! Ama ebebiere ke imọ ikemeke-keme ndinam utọ n̄kpọ oro. Mûyakke idiọkn̄kpọ ọdọn̄ fi kan̄a kan̄a, n̄kpọn̄ do udûtiehe ubọ ufen utịme nte okposiode idiọkn̄kpọ emi ama ọkọdọn̄ fi n̄kam ke esịt unyọn̄. ‘Ọyọwọn̄ọde’ ọkpọn̄ “afan̄ mme idiọkowo.”​—N̄ke 4:14, 15.

9. Didie ke afo nditie n̄kere se eketịn̄de ke akam emi ọkọbọn̄de ayak idem ọnọ Jehovah ekeme n̄ko ndin̄wam fi anam n̄kpọ Abasi edi akpa ke uwem fo?

⁹ Edieke ẹnọde fi utom emi mîdiyakke odụk  mbono esop kpukpru ini, enye oro? Ọmọdọdiọn̄ọ se edinamde. Anyan ini mbemiso ẹnọde fi utọ utom oro, ama ebebiere ke imọ idinyịmeke. Ntre, udûbọhọ utom emi edidide n̄kpọn̄ do afo ọduọ adaha ada, etịme, oyom nte edinamde utom oro ifiak inam n̄kpọ Jehovah edi akpa. Ama etie ekere nte Jesus ekenen̄erede ebiere ndinem Ete esie esịt, ọyọsọsọp esịn n̄kpọ ekededi emi ọdiọn̄ọde ke idinemke Abasi emi akayakde idem ọnọ, ndien ididịghe ama esịn mfịn, n̄kpọn̄ afo enyịme.​—Matt. 4:10; John 8:29.

10. Didie ke Jehovah edin̄wam fi “aka iso etiene” Jesus ke ama akana baptism?

¹⁰ Se idude edi ke mme mfịna ye mme idomo ẹnam enyene ifet ndiwụt ke emebiere ‘ndika iso ntiene’ Jesus. Nte osụk etienede Jesus, nịm ke Jehovah ayan̄wam fi. Bible ọdọhọ ete: “Abasi edi anam-akpanikọ, idinyụn̄ iyakke ẹdomo mbufo ẹbe se mbufo ẹkemede ndiyọ, edi enye oyosio usụn̄ ubọhọ ọnọ mbufo ke ini idomo man mbufo ẹkeme ndiyọ enye.”​—1 Cor. 10:13.

SE AKPANAMDE MAN AKA ISO ETIENE JESUS

11. Nso idi ata eti usụn̄ kiet emi ekemede ndika iso ntiene Jesus? (Se ndise n̄ko.)

¹¹ Jesus ama anam n̄kpọ Jehovah ke ofụri esịt. Enye ama esibọn̄ akam ọnọ Jehovah, oro akanam enye akaka iso ekpere Jehovah. (Luke 6:12) Se, ata eti usụn̄ kiet emi ekemede ndika iso ntiene Jesus ke ama akana baptism edi afo ndiyak emehe fi ndinam mme n̄kpọ emi ẹdinamde etetịm ekpere Jehovah. Bible ọdọhọ ete: “Ke udomo oro nnyịn ima ikanam n̄kọri, ẹyak nnyịn ika iso itịm isan̄a kpa ke ido emi.” (Phil. 3:16) Ke ini ke ini, oyokop mbụk nditọete nnyịn irenowo ye iban emi ẹkebierede ndisịn idem nnam n̄kpọ Abasi n̄kan nte ẹkesinamde. Ekeme ndidi mmọ  ẹma ẹka Ufọkn̄wed Mme Ọkwọrọ Obio Ubọn̄ mîdịghe ẹwọrọ ẹka ebiet emi ẹyomde-yom mme ọkwọrọ ikọ. Ekpedi se mmọ ẹkenamde oro edi se afo n̄ko ekemede ndinam, mbọk nam. Ikọt Abasi ẹsikakama enyịn ẹyom nsio nsio usụn̄ ndinam n̄kpọ nnọ Jehovah n̄kan nte ẹnamde idahaemi. (Utom 16:9) Edi se itịn̄de emi mîdịghe se ekemede ndinam idahaemi-e? Kûkere ke mbon emi ẹkemede ndinam ẹfọn ẹkan fi. Omokụt itọk uwem emi mme Christian ẹfehede mi, se idide akpan n̄kpọ edi ke inaha owo ayak idem emem enye. (Matt. 10:22) Ekpedi ke anam n̄kpọ Abasi etiene nte n̄kpọ etiede ye afo, ke onyụn̄ anam ke ofụri ukeme fo, kûkere ke inen̄ekede inyene se imọ inamde inọ Abasi. Akpan n̄kpọ kiet emi ekemede ndin̄wam fi aka iso etiene Jesus ke ama akana baptism edi oro.​—Ps. 26:1.

12-13. Nso ke ekeme ndinam ekpedi n̄kpọ Abasi inen̄ekede idọn̄ fi ndinam aba? (1 Corinth 9:16, 17) (Se n̄ko ekebe emi, “ Ka Iso Fehe Mbuba Uwem.”)

¹² Akpanam nso edieke ekerede ke akam fo editie nte n̄kpọ emi okotde-kot ke n̄wed, mîdịghe ke edika ukwọrọikọ man owo ididọhọ? Edinam didie ekpedi ndikot Bible inemke fi aba nte ekesinemde? Utọ n̄kpọ oro ekpetịbe ke ama akana baptism, kûdọhọ ke spirit Jehovah ọkpọn̄ fi. Ufọnke uma; n̄kpọ ekeme ndinen̄ede nnem fi mfịn, n̄kpọn̄ odorode fi. Ekpedi n̄kpọ Abasi inen̄ekede idọn̄ fi aba, kere uwụtn̄kpọ apostle Paul. Kpa ye emi enye ekesidomode ndikpebe Jesus, enye ama ọdiọn̄ọ ke ndusụk ini idinen̄ekede idọn̄ imọ ndinam se akpanade inam. (Kot 1 Corinth 9:16, 17.) Enye ọkọdọhọ ete: “Edi edieke mmenamke ke edinyịme esịt, nsụk nnyenyene itie akama-ukpọhọde oro ẹyakde ẹsịn mi ke ubọk.” Oro ọwọrọ ke Paul ama ebiere ndinam ofụri se Abasi ọkọdọn̄de enye m̀mê ama ọdọn̄ enye ndinam ke ebe oro m̀mê ikọdọn̄ke.

 ¹³ Imọdiọn̄ọ ke ekeme ndinen̄ede ndọn̄ fi ndinam n̄kpọ mfịn, n̄kpọn̄ inen̄ekede idọn̄. Edi kpebe Paul, kûbiere n̄kpọ utiene nte etiede fi ke idem. Biere ke imọ idinam nnennen n̄kpọ ọkpọkọm etie imọ didie ke idem. Akpaka iso anam nnennen n̄kpọ, nte ini akade iditiehe fi ntre aba ke idem. Kan̄a ke emi, ndika iso n̄kpep n̄kpọ ke idemfo, ndibọn̄ akam, ndidụk mbono esop, nnyụn̄ n̄kwọrọ ikọ ayan̄wam fi aka iso etiene Jesus ke ama akana baptism. Ama aka iso anam mme n̄kpọ oro, ọyọsọn̄ọ nditọete idem.​—1 Thess. 5:11.

“ẸKA ISO ẸDOMO ẸSE . . . ẸKA ISO ẸWỤT SE MBUFO ẸDIDE”

14. Nso ke ekpesidụn̄ọde kpukpru ini? Ntak-a? (2 Corinth 13:5)

¹⁴ Ama ana baptism, akpan n̄kpọ en̄wen emi edin̄wamde fi edi afo ndidụn̄ọde idemfo kpukpru ini. (Kot 2 Corinth 13:5.) Ke ini ke ini, fiak se uwem fo ye ido fo, se ise m̀mê ke ọbọn̄ akam kpukpru usen, ke okot Bible ke onyụn̄ ekpekpep, ke odụk mbono esop onyụn̄ aka ukwọrọikọ. Domo ndiyom nsio nsio usụn̄ emi ekemede ndinam mme n̄kpọ oro yak enenem fi onyụn̄ etetịm adia ufọn. Ke uwụtn̄kpọ, bụp idemfo mme mbụme nte: ‘Ndi mmekeme ndinam mme akpan n̄kpọ emi Bible ekpepde an̄wan̄a mbon en̄wen? Ndi enyene mme n̄kpọ emi n̄kpanamde man ukwọrọikọ enen̄ede enem mi? Ndi mmesinen̄ede ntịn̄ se nyomde ke akam? Ndi akam mi esinyụn̄ owụt ke mmeberi edem ofụri ofụri ke Jehovah? Ndi mmesidụk mbono esop kpukpru ini? Nso ke n̄kpanam man mma ndụk mbono esop, ami nnen̄ede n̄kpan̄ utọn̄ nnyụn̄ nnen̄ede ntiene nsịn idem ke se ẹnamde?’

15-16. Se iketịbede inọ brọda kiet ekpep fi nso aban̄a nte owo akpakande idomo?

¹⁵ Akpan n̄kpọ efen edi afo ndidụn̄ọde idemfo man ọdiọn̄ọ ebiet emi mûnamke ọfọn; kụt ete ke ubian̄ake idem. Brọda Robert etịn̄ se idinamde oro an̄wan̄a. Enye ọdọhọ ete: “Ini n̄kedide n̄kpọ nte isua 20, mma nnyene utom emi n̄kesisiode-sio usen nnam. Usen kiet utom akasuana, eyenan̄wan kiet emi ikesinamde utom ntre ama okot mi ufọk. Enye ọkọdọhọ ke ididu ikpọn̄, ke iyonyụn̄ inam ima. Nsonso oro n̄kọfọfiọn̄ọ ubọk nyom se n̄kpetịn̄de, se n̄ketịn̄de ikonyụn̄ inyeneke ibuot. Edi utịt utịt mma ndọhọ enye ke ndidịghe, nnyụn̄ nnọ enye ntak.” Robert ama akan idomo oro. Enye ama anam-o, edi aka ko ke enye ama akafiak etie ekere se iketịbede usen oro, enye ama okụt ke ikpokosụk inam ọfọn akan oro. Enye ọdọhọ ete: “N̄kọsọpke-sọp ndọhọ enye ke ndidịghe, n̄konyụn̄ nnen̄ekede  mfịk ikpat ntem ke isọn̄ ntịn̄ nte Joseph akanamde ye n̄wan Potiphar. (Gen. 39:7-9) Nte fi, ama akpa mi idem nte ọkọsọn̄de mi ndidọhọ enye ke ndidịghe. Se iketịbede oro ama an̄wam mi n̄kụt ke edi se nnamde se idin̄wamde mi ntetịm n̄kpere Jehovah.”

¹⁶ Afo ndidụn̄ọde idemfo nte Robert akanamde ekeme ndin̄wam fi. Idem ke ama akakan idomo ubọk, bụp idemfo: ‘Ekebịghi didie mbemiso n̄kekemede ndibe idomo oro?’ Ekpedi omokụt ebiet emi mûkanamke ọfọn, kûwowot idem, kam nem esịt nte enyịn atarade fi yak okụt utọ n̄kpọ oro. Ka iso sịn n̄kpọ oro ke akam nyụn̄ nam mme n̄kpọ emi ẹdin̄wamde fi etetịm ebiere ndidu uwem nte Jehovah oyomde.​—Ps. 139:23, 24.

17. Robert ndikesịn ndinam idiọkn̄kpọ akanam nso ufọn ọnọ enyịn̄ Jehovah?

¹⁷ Enyene n̄kpọ en̄wen emi ikpepde ito mbụk Robert. Kop nte enye akade iso ke mbụk esie oro mi: “Ke mma n̄kesịn ndika ufọk owo itieutom nnyịn oro, enye ama ọdọhọ mi ete, ‘Emebe udomo!’ Mma mbụp enye m̀mê enye oro ọwọrọ nso. Enye ọkọdọhọ ke ufan esie kiet emi edide erenowo mînyụn̄ idịghe aba Ntiense Jehovah ọkọdọhọ enye ke kpukpru n̄kparawa ye n̄kaiferi Ntiense Jehovah ẹsidi edem ekpedịbe mmọ ẹnam idiọkn̄kpọ, mmọ ẹkpekụt ifet ndinam utọ n̄kpọ oro, mmọ ẹfefehe ntem ẹnam. Ntre enye ama ọdọhọ ufan esie oro ke iyedidomo mi ise. Ekedi n̄kpọ oro enen̄ede an̄wan̄a mi, esịt enen̄ede enem mi nte mmen̄keyetke enyịn̄ Jehovah ndọk.”

18. Nso ke ebiere ndinam ke ama akana baptism? (Se n̄ko ekebe emi, “ Mme Ibuotikọ Emi Ẹdinemde Fi Ndikot.”)

¹⁸ Ama ayak idem ọnọ Jehovah onyụn̄ ana baptism, afo owụt ke oyom ndinam enyịn̄ Jehovah asana inamke n̄kpọ m̀mê nso itịbe. Nen̄ede nịm ke Jehovah ọdiọn̄ọ mme mfịna emi ẹsịmde fi ye mme idomo emi afo akande. Jehovah ayan̄wam fi okụt unen ke kpukpru se anamde man aka iso ọsọn̄ọ ada ye enye. Nịm ke enye ayada edisana spirit esie ọsọn̄ọ fi idem man aka iso ọsọn̄ọ ada ye enye. (Luke 11:11-13) Jehovah ayan̄wam fi ekeme ndika iso ntiene Jesus ke ama akana baptism.