1-2. Nso ke ana owo anam mbemiso enye anade baptism?

 KE UFAN̄ isua ition emi ebede, se ibede owo miliọn kiet ẹna baptism ẹnyụn̄ ẹdi Mme Ntiense Jehovah. Ẹkekpep ediwak mmọ n̄kpọ “toto ke nsek” nte ekedide ye Timothy emi ekedide mbet Christ ke eyo mme apostle. (2 Tim. 3:14, 15) Ndusụk ẹkekpep ke ẹma ẹkekpon owo, ndusụk ke eyo usọn̄. Ibịghike akanian̄wan isua 97 emi ekesikpepde Bible ye Mme Ntiense Jehovah akana baptism!

² Ekpedi ke ekpep Bible ye Mme Ntiense Jehovah mîdịghe ete ye eka fo emi ẹdide Mme Ntiense Jehovah ẹkpep fi n̄kpọ, ndi ke ekere ndina baptism? Edi ntre, eti n̄kpọ ke aduak oro! Edi mbemiso anade baptism, ana ayak idem kan̄a ọnọ Jehovah. Ibuotikọ emi eyeneme se ndiyak idem nnọ Jehovah ọwọrọde, oyonyụn̄ an̄wam fi okụt ke ekpedi emeben̄e idem ndiyak idem nnọ Jehovah nnyụn̄ nna baptism, ke ufọn idụhe ndidọhọ yak ibet kan̄a.

NDIYAK IDEM NNỌ JEHOVAH ỌWỌRỌ NSO?

3. Nọ uwụtn̄kpọ mme owo ke Bible emi ẹkeyakde ẹnọ Abasi.

³ Ke Bible, ndiyak owo nnọ Jehovah ọkọwọrọ ke ẹmek owo oro yak anam san̄asan̄a utom. Israel ekedi idụt emi ẹkeyakde ẹnọ Jehovah. Edi ama enyene ndusụk owo ke idụt oro emi ẹkeyakde ẹnọ Jehovah ke san̄asan̄a usụn̄. Ke uwụtn̄kpọ, Aaron ama adian “edisana idiọn̄ọ uyakidem nnọ” emi ekedide nsemnsem ubak gold ke iso mbọbọ ibuot esie. Gold oro okowụt ke ẹma ẹmek enye anam san̄asan̄a utom ọnọ Jehovah, oro edi, edi akwa oku ke Israel. (Lev. 8:9) Mme Nazirite n̄ko ẹkedi  mbon emi ẹkeyakde idem ẹnọ Jehovah ke san̄asan̄a usụn̄. Ẹda ikọ oro “Nazirite” ẹto ikọ Hebrew emi nazirʹ, emi ọwọrọde “San̄asan̄a Owo,” m̀mê “Owo Emi Ẹma Ẹkeyak Ẹnọ Abasi.” Akana mme Nazirite ẹnịm san̄asan̄a ewụhọ emi ẹkenọde mmọ ke Ibet Moses.​—Num. 6:2-8.

4. (a) Ama ayak idem ọnọ Jehovah, nso idi san̄asan̄a n̄kpọ emi anade anam? (b) ‘Ndikan̄’ idemfo ọwọrọ nso? (Se ndise n̄ko.)

⁴ Ama ayak idem ọnọ Jehovah, afo ebiere ndidi mbet Jesus Christ onyụn̄ anam uduak Jehovah edi akpan n̄kpọ akan ke uwem fo. Nso ke ana anam ke ntak oro? Jesus ọkọdọhọ ete: “Edieke owo ekededi oyomde nditiene mi, yak enye akan̄ idemesie.” (Matt. 16:24) Ikọ Greek oro ẹkabarede nte “yak enye akan̄ idemesie” ekeme n̄ko ndiwọrọ “ana enye esịn idemesie n̄kpọ.” Ama ayak idem ọnọ Jehovah, ana esịn n̄kpọ ekededi emi mîkemke ye uduak esie. (2 Cor. 5:14, 15) Oro ọwọrọ ke ana esịn ndinam “mme utom obụkidem” utọ nte oburobụt idan̄. (Gal. 5:19-21; 1 Cor. 6:18) Ndi uwem ọyọsọn̄ fi ke ntak oro? Idisọn̄ke edieke amade Jehovah onyụn̄ enen̄erede enịm ke mme ibet esie ẹdi ke ufọn fo. (Ps. 119:97; Isa. 48:17, 18) Brọda Nicholas ọdọhọ ntem aban̄a utọ uwem oro: “Emekeme ndida nte Jehovah ọdọhọde idu uwem nte ukwak ufọk-n̄kpọkọbi emi mîyakke ọwọrọ edinam se akpamade, mîdịghe ada nte ukwak emi mîyakke ekpe ọwọrọ ke ufọk ekpe edita fi.”

5. (a) Didie ke ediyak idem ọnọ Jehovah? (b) Tịn̄ nte ndiyak idem nnọ Jehovah okpụhọrede ye ndina baptism. (Se ndise n̄ko.)

⁵ Didie ke ediyak idem ọnọ Jehovah? Edi afo ndibọn̄ akam n̄n̄wọn̄ọ nnọ enye ke enye ikpọn̄ ke edituak ibuot ọnọ, ke ndinam uduak esie edidi akpa ke uwem fo. Oro ọwọrọ ke ọn̄wọn̄ọ ọnọ Jehovah ndika iso mma enye “ke ofụri esịt fo ye ke ofụri ukpọn̄ fo ye ke ofụri ekikere fo ye ke ofụri ukeme fo.” (Mark 12:30)  Ini ayakde idem ọnọ Jehovah, edidi sụk fi, sụk Jehovah. Edi baptism itiehe ntre; enye oro edidi ke eferife. Enye oro ediwụt kpukpru mbon emi ẹdikụtde nte anade baptism ke ama ayayak idem ọnọ Jehovah. Se edin̄wọn̄ọde ini ayakde idem ọnọ Jehovah idịghe n̄kpọ mbre-o, ntre ana odomo ofụri ukeme fo ndinam se edin̄wọn̄ọde oro, Jehovah onyụn̄ odori enyịn ke ayanam.​—Eccl. 5:4, 5.

NTAK EMI AKPAYAKDE IDEM ỌNỌ JEHOVAH?

6. Nso isinam owo ebiere ndiyak idem nnọ Jehovah?

⁶ Ima emi amade Jehovah edi akpan ntak emi anamde ayak idem ọnọ enye. Idịghe nte etiede fi ke idem edi n̄kukụre ntak emi anamde ama enye. Utu ke oro, “nnennen ifiọk” ye “ifiọk emi spirit esie ọnọde,” oro edi mme n̄kpọ emi ekpepde aban̄a Jehovah ẹnam etetịm ama enye. (Col. 1:9) Se ekpepde ke Ikọ Abasi anam enen̄ede enịm (1) ke Jehovah do, (2) ke enye ọkọnọ spirit esie ẹda ẹwet Bible, ye (3) ke enye ada esop esie anam se enye aduakde.

7. Nso ke ikpanam mbemiso iyakde idem inọ Jehovah?

⁷ Akpana mbon emi ẹyakde idem ẹnọ Jehovah ẹdiọn̄ọ mme akpan n̄kpọ emi Ikọ Abasi ekpepde ẹnyụn̄ ẹdu uwem nte Jehovah oyomde mmọ ẹdu. Mmọ ẹsitịn̄ se mmọ ẹnịmde ẹnọ mbon en̄wen adan̄a nte mmọ ẹkemede. (Matt. 28:19, 20) Edi eyo esiere, mmọ ẹtetịm ẹma Jehovah, se inyụn̄ inen̄erede idọn̄ mmọ edi ndituak ibuot nnọ enye ikpọn̄. Ndi idịghe se afo n̄ko anamde edi oro? Akpama Abasi utọ ima oro, udûdaha ndiyak idem nnọ enye nnyụn̄ nna baptism nte n̄kpọ emi anamde man enem ete ye eka fo m̀mê owo emi ekpepde fi Bible esịt, mîdịghe sia edide mme ufan fo ẹna, afo ete inyụn̄ itiene ina.

8. Didie ke afo ndima se Jehovah anamde ọnọ fi edin̄wam fi ebiere ndiyak idem nnọ enye? (Psalm 116:12-14)

 ⁸ Ama etie ekere kpukpru se Jehovah anamde ọnọ fi, esịt eyenem fi, inemesịt oro ayanam ọdọn̄ fi ndiyak idem nnọ enye. (Kot Psalm 116:12-14.) Bible okot Jehovah Andinọ “kpukpru nti enọ ye kpukpru enọ eke ẹfọnde ẹma.” Bible enen ndikot enye ntre. (Jas. 1:17) Akakan enọ emi enye ọnọde nnyịn edi enye ndikayak Jesus Eyen esie akpa ọnọ nnyịn. Idịghe ekpri n̄kpọ ke Jehovah akanam oro. Jesus ndikakpa mfak fi anam fi etetịm ekpere Jehovah. Jehovah onyụn̄ anam enyene idotenyịn ndidu uwem ke nsinsi. (1 John 4:9, 10, 19) Jesus ndikakpa mfak fi edi akakan usụn̄ emi Jehovah owụtde ke imama fi. Jehovah onyụn̄ ọdiọn̄ fi ke ata ediwak usụn̄. Usụn̄ kiet mi ekemede ndiwụt ke amama se Jehovah anamde ọnọ fi oro edi ndiyak idem nnọ enye. (Deut. 16:17; 2 Cor. 5:15) Ẹneme nte ikemede ndiwụt ke imama se Abasi anamde ọnọ nnyịn ke n̄wed Du Ata Uwem ke Nsinsi! ukpepn̄kpọ 46, ọyọhọ n̄kpọ 4. Ukpepn̄kpọ oro enyene vidio a-minit ita emi ibuotikọ edide, Didie ke Ekeme Ndinọ Jehovah Enọ?

NDI EMEBEN̄E IDEM NDIYAK IDEM NNỌ JEHOVAH NNYỤN̄ NNA BAPTISM?

9. Ntak emi owo mîkpekereke ke ana iyak idem inọ Jehovah mbak ubọkn̄ka imọ ye mbon en̄wen idibe ikpọn̄ imọ?

⁹ Emekeme ndikere ke uben̄eke idem kan̄a ndiyak idem nnọ Jehovah nnyụn̄ nna baptism. Ekeme ndidi enyene mme n̄kpọ emi anade okpụhọde man ekeme ndidu uwem nte Jehovah oyomde, mîdịghe edi se ebetde kan̄a man ekeme ndinam se idin̄wamde fi etetịm ọbuọt idem ye enye. (Col. 2:6, 7) Owo idịghe ukem. Owo iba ẹkeme ndikpep Bible, kiet ọsọp anam n̄kpọ Abasi, kiet isọpke. Ndusụk uyen ẹsibak ẹyak idem ẹnọ Jehovah ẹnyụn̄ ẹna baptism, ndusụk ibakke. Domo ndidiọn̄ọ se anade okpụhọde ye se anade anam ọfọn akan nte ekesinamde. Edi kûnam ube ukeme fo, kûnyụn̄ umen idem ukodomo ye owo en̄wen.​—Gal. 6:4, 5.

10. Nso ke ekeme ndinam edieke okụtde ete ke uben̄eke idem kan̄a ndiyak idem nnọ Jehovah nnyụn̄ nna baptism? (Se n̄ko ekebe emi, “ Se Ẹwetde Ẹnọ Mbon Emi Ete ye Eka Mmọ Ẹdide Ntiense Jehovah.”)

¹⁰ Idem ekpededi emedikụt ke uben̄eke idem kan̄a ndiyak idem nnọ Jehovah, kûdọhọ yak ision̄o idem ikpọn̄. Yak osụk esịne ke otu se aduakde ndinam. Bọn̄ akam dọhọ Jehovah an̄wam fi okpụhọde se anade okpụhọde. (Phil. 2:13; 3:16) Nen̄ede nịm ke enye oyokop akam fo oro onyụn̄ an̄wam fi.​—1 John 5:14.

NTAK EMI NDUSỤK OWO ẸSIDỌHỌDE YAK IBET KAN̄A

11. Didie ke Jehovah edin̄wam nnyịn ika iso isọn̄ọ ida ye enye?

¹¹ Ndusụk owo ẹdi se ẹyakde idem ẹnọ Jehovah ẹnyụn̄ ẹna baptism, edi ẹsụk ẹdọhọ yak ibet kan̄a. Ekeme ndidi idem enyek mmọ ke mmọ ẹma ẹna baptism, mmọ ẹkeme ndikanam akwa idiọkn̄kpọ ndien ẹsio mmọ ẹfep ke esop. Ekpedi utọ ndịk oro anam fi, nen̄ede nịm ke Jehovah ọyọnọ fi kpukpru se idin̄wamde fi ‘asan̄a nte odotde ye enye, enem enye esịt ọyọhọ ọyọhọ.’ (Col. 1:10) Enye oyonyụn̄ ọnọ fi odudu ekeme ndinam nnennen n̄kpọ. Nte enye ama akan̄wan̄wam ediwak mbon eken ẹnam se inende owụt ke enye ayan̄wam fi. (1 Cor. 10:13) Enye oro anam ibat mbon emi ẹsiode ẹfep ke esop edi n̄kpata owo ifan̄ ke ẹmende ẹdomo ye ibat mbon emi ẹsọn̄ọde ẹsịne. Jehovah esin̄wam ikọt esie ẹsọn̄ọ ẹda ye enye.

12. Nso ke ikpanam man nnyịn idinam akwa idiọkn̄kpọ?

¹² Sia mînyeneke eke ọfọnde ama, idụhe eke idomo idiọkn̄kpọ mîsisịmke. (Jas. 1:14) Edi m̀mê ọyọduọ odụk m̀mê udûduọhọ, enye oro esịne fi ke ubọk. Yak isio akpanikọ itịn̄ inọ fi,  afo edibiere nte edidude uwem fo. Emekeme ndikpep ndimụm idem n̄kama kpa ye emi ndusụk owo ẹkerede ke utọ n̄kpọ oro ikemeke nditịbe. Idomo idiọkn̄kpọ okponyụn̄ edi, eyekeme ndibe. Se idin̄wamde fi edi ndisibọn̄ akam kpukpru usen. Nyene ini emi esitiede ke idemfo ekpep Ikọ Abasi nyụn̄ kụt ete ke n̄kpọ ndomokiet ikpanke fi. Sidụk mbono esop. Tịn̄ se enịmde nọ mbon en̄wen. Ama anam se ibatde emi kpukpru ini, eyekeme ndinam se ọkọn̄wọn̄ọde ọnọ Jehovah ini akayakde idem ọnọ enye. Kûnyụn̄ ufre ke Jehovah ayan̄wam fi anam se ọkọn̄wọn̄ọde oro.​—Gal. 5:16.

13. Ewe eti n̄kpọ ke Joseph akanam emi ikpekpebede?

¹³ Akpababak ebiere se edinamde idomo ekpedi, idinen̄ekede isọn̄ fi ndinam se ọkọn̄wọn̄ọde ọnọ Abasi ini akayakde idem ọnọ enye. Bible etịn̄ aban̄a owo ifan̄ emi ẹkenamde se isụk itịn̄de oro kpa ye emi mmọ n̄ko mîkọfọnke ima. Ke uwụtn̄kpọ, n̄wan Potiphar ama esidomo ediwak ini ndinam Joseph adan̄ ye enye. Edi Joseph ama ọdiọn̄ọ se enye edinamde utọ idomo oro ekpedi. Bible ọdọhọ nnyịn ke “enye [ama] esịn” onyụn̄ ọdọhọ ete: “N̄keme didie ndinam utọ akwa idiọkn̄kpọ emi nnyụn̄ ndue Abasi?” (Gen. 39:8-10) Imenen̄ede ikụt ke Joseph ama ọdọdiọn̄ọ se enye edinamde mbemiso n̄wan Potiphar emende idomo esie oro edi. Enye oro akanam afiak emem enye utom ndinam nnennen n̄kpọ ini ata ata idomo ekedide.

14. Nso idin̄wam nnyịn ikan idomo?

¹⁴ Didie ke ekeme ndisọn̄ọ nda ye Jehovah ini idomo esịmde fi ukem nte Joseph? Tọn̄ọ idahaemi biere se edinamde idomo ekpedi. Kpep ndidi ama okụt se Jehovah asuade afo esịn inikiet inikiet; kûyayak esịne fi ke ekikere. (Ps. 97:10; 119:165) Ama anam ntre, idomo ama edi udûduọhọ sia ama ọdọdiọn̄ọ se edinamde, edinyụn̄ inam se ama ekebebiere.

15. Didie ke owo ekeme ndiwụt ke ‘imenen̄ere iyom’ Jehovah? (Mme Hebrew 11:6)

¹⁵ Emekeme ndidiọn̄ọ ke omokụt akpanikọ onyụn̄ ọdọn̄ fi ndinam n̄kpọ nnọ Jehovah ke ofụri esịt, edi osụk enyene se ikpande fi ndiyak idem nnọ Jehovah nnyụn̄ nna baptism. Emekeme ndinam se Edidem David akanamde. Emekeme ndikpe Jehovah ubọk ete: “O Abasi, dụn̄ọde mi nyụn̄ fiọk esịt mi. Domo mi se, nyụn̄ fiọk ekikere mi, nyụn̄ se m̀mê idiọk ekikere odu mi ke esịt, ndien da mi san̄a ke nsinsi usụn̄.” (Ps. 139:23, 24) Jehovah esidiọn̄ mbon emi “ẹnen̄erede ẹyom  enye.” Nte osụk anamde n̄kpọ man ekeme ndiyak idem nnọ Jehovah nnyụn̄ nna baptism owụt Jehovah ke emenen̄ede oyom enye.​—Kot Mme Hebrew 11:6.

KA ISO KPERE JEHOVAH

16-17. Didie ke Jehovah an̄wam mbon emi ete ye eka mmọ ẹdide Ntiense Jehovah ẹkabade ẹdi mme asan̄autom esie? (John 6:44)

¹⁶ Jesus ọkọdọhọ ke Jehovah akanam mme mbet imọ ẹkabade ẹdi mme asan̄autom Jehovah. (Kot John 6:44.) Kere se ikọ oro ọwọrọde ye nte ebehede fi. Jehovah okụt eti n̄kpọ ke idem kpukpru mbon emi enye anamde ẹkabade ẹdi mme asan̄autom esie. Enye ada owo emi enye anamde akabade edi asan̄autom esie nte “akpan inyene.” (Deut. 7:6) Nte enye onyụn̄ adade fi edi oro.

¹⁷ Ekeme ndidi edi uyen, ndien amamana edikụt nte ete ye eka fo ẹdide Ntiense Jehovah. Emekeme ndikere ke anam n̄kpọ Jehovah sia ẹkemaman fi ẹsịn ke esop, ke ebiet emi okponde edikụt ete ye eka fo edi oro. Ekpededi etie fi ntre, Bible ọdọhọ ete: “Ẹsan̄a ẹkpere Abasi, ndien enye ayasan̄a ekpere mbufo.” (Jas. 4:8; 1 Chron. 28:9) Afo ke idemfo ama anam n̄kpọ man ekpere Jehovah, enye iditiehe-tie ise fi-o, enye eyekpere fi n̄ko. Idịghe Jehovah ama okụt fi enye ọdọhọ “eyen owo ntem ntem edi oko,” okụre ke oro. Omokụt kpukpru mbon emi ẹdude ke esop Jehovah? Jehovah akanam owo mmọ kiet kiet edidi asan̄autom esie, sịm mbon emi ete ye eka mmọ ẹdide Ntiense Jehovah. Ke ini owo emi ete ye eka esie ẹdide Ntiense Jehovah anamde n̄kpọ man ekpere Jehovah, Jehovah esikpere enye n̄ko. Se ikokụtde edi oro ke James 4:8.​—Men 2 Thessalonica 2:13 domo.

18. Nso ke idineme ke ibuotikọ emi etienede? (Psalm 40:8)

¹⁸ Ama ayak idem ọnọ Jehovah onyụn̄ ana baptism, anam se Jesus akanamde. Enye ama ayak idem ọnọ Ete esie man anam se ededi emi Ete esie oyomde. Owo ikenyịkke-nyịk enye. (Kot Psalm 40:8; Heb. 10:7) Ke ibuotikọ emi etienede, iyeneme se idin̄wamde fi aka iso ọsọn̄ọ ada anam n̄kpọ Jehovah ke ama akana baptism.