KE N̄KPỌ nte 1910, ete ye eka mi ẹma ẹwọrọ ke Tbilisi ke Georgia ẹkedụn̄ ke ekpri ufọk in̄wan̄ emi ekperede Pelly, ke Saskatchewan, ke edem usoputịn Canada. N̄kamana ke 1928. Ikedi owo itiokiet, ndien ami ndi ekperedem. Ete mi akakpa ọfiọn̄ itiokiet mbemiso mmanade, eka mi akpa ini ndide nsek. Ikebịghike, Lucy adiahaeka mi ama akpa n̄ko ke ini enye ekedide isua 17. Nick eyeneka eka mi ama emen mi ye nditọeka mi akama.

Usen kiet, ke ini n̄kosụk n̄kpepde-kpep isan̄, mbon nnyịn ẹma ẹda ẹkụt mi mmụmde isịm ayara enan̄-mbakara kiet. Idem ama enyek mmọ ke enan̄-mbakara oro ọmọn̄ atịgha mi; ntre mmọ ẹma ẹfiori ẹdọhọ nsana enye nyak, edi n̄kayakke. Sia n̄kakpade edem n̄wụt mmọ, n̄kokopke n̄kpo oro mmọ ẹkefioride. Mmọkọm Abasi ke enan̄-mbakara oro ikatịghake mi; usen oro ke mbon nnyịn ẹkediọn̄ọ ke ndi inan.

Ete kiet emi ekemehede ye nnyịn ama ọdọhọ ẹmen mi ẹkesịn ke ufọkn̄wed inan. Ntre Nick eyeneka eka mi ama emen mi ekesịn ke ufọkn̄wed inan ke Saskatoon ke Saskatchewan. N̄kedi isua ition kpọt ini oro. Ntre idem ama enyek mi etieti sia ufọkn̄wed oro ama enen̄ede oyom usụn̄ ọkpọn̄ ufọk nnyịn. N̄kesika ufọk ke mme usen nduọkodudu ye ke utren̄wed kpọt. Ikebịghike, mma n̄kpep usem idiọn̄ọ, ndien ama esinem mi ndibre mbre ye nditọ ufọkn̄wed nnyịn.

Ke 1939, Marion udun̄wan eka mi ama ọdọ Bill Danylchuck, ndien mmọ ẹma ẹmen mi ye Frances eyeneka mi an̄wan ẹkama. Mmọ ẹkebem iso ẹkpep Bible ye Mme Ntiense Jehovah ke ubon nnyịn. Mmọ ẹma ẹsisịn ofụri ukeme mmọ ẹkpep mi se mmọ ẹkekpepde ke Bible ke ini ndide ufọk ke  utren̄wed. Ntịn̄ akpanikọ, ama esisọn̄ mi ndineme nneme ye mmọ sia mmọ ikọdiọn̄ọke usem idiọn̄ọ. Edi mmọ ẹma ẹkụt ke mmama n̄kpọ Abasi etieti. Mma nsitiene mmọ n̄ka ukwọrọikọ sia mma n̄kụt ke mmọ ẹsinam se Bible ọdọhọde. Ikebịghike, mma nyom ndina baptism. Ke September 5, 1941, Bill ebe eyeneka mi ama enịm mi baptism ke drọm ukwak emi ẹkedọn̄de mmọn̄ ọyọhọ. Mmọn̄ oro ama ebịt etieti!

Ke n̄wed ama eketre ke 1946, ima idụk akamba mbono ke Cleveland, ke Ohio, ke U.S.A. Ke akpa usen mbono oro, nditọeka mi iban ẹkewewet se ẹtịn̄de ke mbono oro ẹnọ mi. Ke ọyọhọ usen iba, mma ndifiọk ke ẹkabade se ẹtịn̄de ke mbono oro ke usem idiọn̄ọ ẹnọ mme inan. Esịt ama enem mi tutu, sia se ẹkenemede ke mbono oro ama an̄wan̄a mi ndien. Ini oro ndien ke Ikọ Abasi ekenen̄ede an̄wan̄a mi!

Ke ọyọhọ ekọn̄ ererimbot iba ama okokụre, mme owo ẹma ẹsinen̄ede ẹnam n̄kpọ ndiwụt ke imama idụt mmimọ ikan idụt en̄wen. Ke mbono oro ama okokụre, mma mfiak nnyọn̄ ufọkn̄wed nnyụn̄ mbiere ke nditreke ndinam se Jehovah amade. Mma ntre nditiene n̄kọm ọfọn̄ etakubom, n̄kwọ ikwọ ufreidụt (national anthem), nnyụn̄ ndia usọrọ ini nduọkodudu. Mma ntre n̄ko ndidụk mme edinam ufọkabasi emi ẹkedọhọde ke ana kpukpru nnyịn idụk. N̄kpọ emi ikenemke mme titia nnyịn. Ntre mmọ ẹma ẹdomo ndisịn mi ndịk ke idem nnyụn̄ nsu nsu nnọ mi man n̄kpụhọ ekikere. Nditọ ufọkn̄wed nnyịn ẹma ẹkụt kpukpru se ikakade iso, ndien emi ama anam n̄keme ndikwọrọ ikọ nnọ mmọ. Ndusụk mmọ, utọ nte Larry Androsoff, Norman Dittrick, ye Emil Schneider ẹma ẹkabade ẹdi Mme Ntiense Jehovah, ke ẹnyụn̄ ẹnam n̄kpọ Abasi tutu esịm emi.

Mmesidomo ndikwọrọ ikọ nnọ mme inan ke obio ekededi emi n̄kade. Ke uwụtn̄kpọ, ke ini n̄kakade Montreal, mma n̄ka ebiet emi mme inan ẹsiwakde ndidu. Do, mma n̄kwọrọ ikọ nnọ Eddie Taeger, ekpri akparawa emi ekedide owo n̄ka mme inan. Eddie okodu ke esop usem idiọn̄ọ kiet ke Laval, ke Quebec tutu esịm usen emi enye akakpade isua oko. Mma nnyụn̄ n̄kụt Juan Ardanez, emi ekesidụn̄ọrede se enye ekekpepde ke Bible man ọfiọk m̀mê edi akpanikọ, ukem nte mbon Beroea eyo Bible ẹkesinamde. (Utom 17:10, 11) Enye n̄ko ama akabade edi Ntiense Jehovah, okonyụn̄ edi ebiowo ke Ottawa, ke Ontario, tutu esịm usen emi enye akakpade.

Ke 1950, mma n̄wọrọ n̄kodụn̄ ke Vancouver. Kpa ye oro mmade ndikwọrọ ikọ nnọ mme inan, tutu amama ndifreke usen emi n̄kọkwọrọde ikọ ke efak nnọ n̄wan kiet emi mîdịghe inan. Enye ekekere  Chris Spicer. Enye ama enyịme ndisitobo magazine nnyịn onyụn̄ ọdọhọ ke ikpama n̄kụt Gary ebe imọ. Ntre mma n̄ka ufọk mmọ; ima ineme Ikọ Abasi ke ata anyan ini kpa ye oro ikewetde-wet se ikenemede. Ọtọn̄ọde ke ini oro nnyịn ikekwe kiet eken aba. Edi ke isua ifan̄ ẹbede, idem ama akpa mi ndikụt mmọ ẹdide ẹdikọm mi ke akamba mbono oro ikodụkde ke Toronto, ke Ontario. Kpa usen oro ke Gary ebe esie akana baptism. Se iketịbede oro ama eti mi ke ọfọn ika iso ikwọrọ ikọ sia nnyịn idiọn̄ọke owo emi ukwọrọikọ nnyịn edinamde edifiọk Jehovah.

Ekem, mma mfiak nnyọn̄ Saskatoon. Mma kiet do ama ọdọhọ nsikpep nditọiban imọ, Jean ye Joan Rothenberger Bible. Mmọ ẹkedi amanamba, ẹkenyụn̄ ẹka ufọkn̄wed inan oro n̄kesikade. Ikebịghike, mmọ ẹma ẹsitịn̄ se mmọ ẹkpepde ke Bible ẹnọ nditọ klas mmọ. Nte ini akakade, nditọ klas mmọ ition ẹma ẹkabade ẹdi Mme Ntiense Jehovah. Kiet ke otu mmọ ekedi Eunice Colin. N̄kọdiọn̄ọ Eunice ke ufọkn̄wed inan emi n̄kakade, ini oro mma n̄kpere ndikụre n̄wed. Enye ama ọnọ mi swid akpa ini oro ikosobode, onyụn̄ ọdọhọ ke ikpama nnyịn idi ufan. Enye ekedidi ata owo idemmi; enye ke n̄kọdọ.

Ke ini eka Eunice ọkọdiọn̄ọde ke eyen esie ke ekpep Bible, enye ama ọdọhọ etubom ufọkn̄wed anam enye etre. Etubom ama ọbọ Eunice mme n̄wed emi enye ekesidade ekpep Bible. Edi Eunice ama ebiere ndika iso n̄kpep n̄kpọ mban̄a Jehovah. Ke ini Eunice okoyomde ndina baptism, ete ye eka esie ẹma ẹdọhọ enye ete: “Idịghe ufọk emi ke edidụn̄ idi Ntiense Jehovah!” Mmọ ẹma ẹbịn Eunice ẹsio ke ufọk ke ini enye ekedide isua 17, edi ubon kiet emi ẹdide Mme Ntiense Jehovah ẹma ẹmen enye ẹsịn ke ufọk. Enye ama aka iso ekpep n̄kpọ tutu enye ana baptism. Ke ini ikanamde ndọ nnyịn ke  1960, ete ye eka esie ikedịghe. Edi nte ini akakade, mmọ ẹma ẹdima nnyịn ke ntak se inịmde ye ke ntak emi ikọbọkde nditọ nnyịn ọfọn.

Ikememke utom ami ye n̄wan mi emi idide inan ndibọk nditọ itiaba emi mîdịghe inan. Edi ima ikụt ite ke imanam mmọ ẹdiọn̄ọ usem idiọn̄ọ man ikeme ndisineme nneme ye mmọ nnyụn̄ n̄kpep mmọ akpanikọ Bible. Nditọete n̄ko ẹma ẹsinen̄ede ẹn̄wam nnyịn. Ke uwụtn̄kpọ, eyenete kiet ama ewet ọnọ nnyịn ete ke eyen nnyịn kiet ke etịn̄ idiọk ikọ ke Ufọkmbono Obio Ubọn̄. Emi ama an̄wam nnyịn isọsọp itụnọ enye. Nditọ mi inan̄, James, Jerry, Nicholas, ye Steven ẹdi mbiowo. Mmọ ye iban ye nditọ mmọ ke ẹka iso ẹnam n̄kpọ Jehovah. Nicholas ye Deborah an̄wan esie ẹdu ke itie ukabade n̄wed nsịn ke usem idiọn̄ọ, ke n̄kọk itieutom Britain. Se Steven ye Shannan an̄wan esie ẹnyụn̄ ẹnamde edi oro ke n̄kọk itieutom United States.

Kansa ama owot n̄wan mi ke ini okosụhọde ọfiọn̄ kiet ndọ nnyịn ndisịm isua 40. Idotenyịn ediset ke n̄kpa ama an̄wam enye ọsọn̄ọ ada ọyọ ke ofụri ini udọn̄ọ oro. Enen̄ede ọdọn̄ mi ndifiak n̄kụt enye ke ini ẹdinamde mme owo ẹset.

Ke February 2012, mma nduọ ndorode ekikoi, n̄konyụn̄ n̄kemeke ndinam n̄kpọ aba ke idem mi. Ntre, eyen mi ye n̄wan esie ẹma ẹdimen mi n̄kodụn̄ ye mmọ. Nnyịn idu idahaemi ke esop usem idiọn̄ọ ke Calgary, nnyụn̄ ndi ebiowo do. Akpa ini ndude ke esop usem idiọn̄ọ edi emi. N̄kanam didie ndien n̄ka iso nsọn̄ idem ke esop toto ke 1946 emi n̄kodude ke esop Ikombakara? Jehovah ama ọn̄wọn̄ọ ke imọ iyese iban̄a eyenakpa. Enye ama onyụn̄ an̄wam mi ke ofụri isua oro n̄kodude ke esop Ikọmbakara. (Ps. 10:14) Mmọkọm kpukpru mbon oro ẹkenyịmede ndisiwet se ẹnamde nnọ mi ye mbon oro ẹkekpepde usem idiọn̄ọ ke ntak mi.

Ntịn̄ akpanikọ, enyene ndusụk ini emi esịt mîkesinemke mi, emi n̄koyomde nditre ndinam n̄kpọ Abasi sia mmen̄kokopke se ẹkesitịn̄de, n̄konyụn̄ n̄kerede ke owo ikereke iban̄a mbon inan. Ke ini esitiede mi n̄tre ke idem, mmesiti se Peter ọkọbọrọde Jesus ete: “Ọbọn̄, nnyịn idinyọn̄ ibịne anie? Afo enyene ikọ nsinsi uwem.” (John 6:66-68) Mmekpep ndinyene ime ukem nte ediwak nditọete eken emi ẹdide inan, emi ẹma ẹkenam n̄kpọ Jehovah ke ediwak isua. Mmonyụn̄ n̄kpep nditie mbet Jehovah ye esop esie, ndien emi ada ediwak ufọn ọsọk mi. Imenyene ediwak n̄wed idahaemi ke Usem Idiọn̄ọ Mbon America, esinyụn̄ enem mi ndidụk n̄kpri ye ikpọ mbono ke usem emi. Ke akpanikọ, esịt enem mi etieti ndinam n̄kpọ nnọ Akwa Abasi nnyịn, Jehovah.