1-2. Nso idi ntak kiet emi akpanamde iyom ndidiọn̄ọ se idude ke n̄wed Ediyarade?

 NDI akanam owo ọnọ fi ndise esie yak ese? Nte osụk esede ndise oro aka, afo okụt ediwak iso emi mûdiọn̄ọke. Edi ndise kiet enen̄ede odụk fi enyịn sia omokụt idemfo do. Afo odomo nditi ini emi ẹkesiode ndise oro ye ebiet emi ẹkedade ẹsio. Oyodomo n̄ko nditi mbon emi ẹtienede ẹdu ke ndise oro sia ndise enye oro enen̄ede ebehe fi.

² N̄wed Ediyarade etie nte ndise oro. Awak ntak emi anamde idọhọ ntre, edi yak itịn̄ iba. Akpa edi ke ẹkewet n̄wed emi ẹnọ nnyịn. Ata akpa ufan̄ikọ ke n̄wed oro ọdọhọ: “Ediyarade emi otode Jesus Christ, emi Abasi ọkọnọde enye, ete owụt ifịn esie mme n̄kpọ eke ẹditịbede ke mîbịghike.” (Edi. 1:1) Omokụt do ke owo ikewetke n̄wed oro inọ ofụri ererimbot, ke ẹkewet ẹnọ mbon emi ẹma ẹkeyak idem ẹnọ Abasi. Sia idide ikọt Abasi, ikpanaha akpa nnyịn idem ndidiọn̄ọ ke imetiene inam mme prọfesi n̄wed emi ẹsu. Oro etie nte nnyịn nditiene n̄kụt idem nnyịn ke esịt “ndise” nte iketịn̄de ke akpa ikpehe.

3-4. N̄wed Ediyarade owụt ke mme prọfesi emi ẹdude ke esịt esie ẹdisu ini ewe? Oro akpanam inam nso?

³ Ọyọhọ ntak iba aban̄a ini emi mme prọfesi oro ẹdisude. Apostle John ama anam idiọn̄ọ ini emi mmọ ẹdisude ini enye ọkọdọhọde ete: “N̄kodu ke usen Ọbọn̄ ke odudu spirit.” (Edi. 1:10) John ama ọsọn̄ ini enye ekewetde mme ikọ oro ke n̄kpọ nte isua 96 eyo mme apostle, ndien “usen Ọbọn̄” ikekpereke-kpere ndidi ini oro. (Matt. 25:​14, 19; Luke 19:12) Prọfesi Bible anam idiọn̄ọ  ke “usen Ọbọn̄” ọkọtọn̄ọ ke isua 1914 emi Jesus ọkọtọn̄ọde ukara ke heaven. Ọtọn̄ọde ke isua oro ka iso, mme prọfesi emi ẹban̄ade ikọt Abasi ke n̄wed Ediyarade ẹma ẹtọn̄ọ ndisu. Oro ọwọrọ ke ini emi idude mi edi “usen Ọbọn̄”!

⁴ Sia idude ke utọ akpan ini emi, nnyịn idi mbon emi ikpakam inen̄erede itịn̄ enyịn inam se ẹtịn̄de ke Ediyarade 1:3 ẹte: “Owo emi okotde ntịn̄nnịm ikọ emi uyo ọwọrọ ye mmọ emi ẹkopde ntịn̄nnịm ikọ emi, ẹnyụn̄ ẹnịmde mme n̄kpọ eke ẹwetde ke esịt, ẹkop inemesịt koro ini oro ẹkenịmde emekpere.” Ana ikot mme ikọ prọfesi emi ‘uyo ọwọrọ,’ ‘ikop’ se prọfesi oro etịn̄de, inyụn̄ ‘inịm’ m̀mê inam se enye ọdọhọde. Nso idi ndusụk se prọfesi oro etịn̄de emi anade inam?

5. Didie ke n̄wed Ediyarade owụt ke edi se ikụtde ite ke Jehovah enyịme se inamde inọ enye?

⁵ Ọtọn̄ọde ke akpa ibuot ke n̄wed Ediyarade ke nnyịn ikụt ke Jesus ke okụt se ikade iso ke kpukpru esop. (Edi. 1:​12-16, 20; 2:1) Jesus ama ọnọ etop ẹsọk esop itiaba ke Asia Minor man mmọ ẹdiọn̄ọ ke imọ ke ikụt se ikade iso ke mme esop oro. Ke mme etop oro, enye ama etịn̄ mme akpan n̄kpọ emi anade mme Christian eyo mme apostle oro ẹnam man Jehovah enyịme se mmọ ẹnamde ẹnọ enye. Se enye eketịn̄de ke mme etop oro ebehe kpukpru ikọt Abasi mfịn. Nso ke oro ekpep nnyịn? Ekpep nnyịn ke Christ Jesus emi edide Adausụn̄ nnyịn enen̄ede ọdiọn̄ọ m̀mê nnyịn imenen̄ede ikpere Jehovah m̀mê ikpereke. Jesus ke ada nnyịn usụn̄ onyụn̄ ekpeme nnyịn; n̄kpọ ndomokiet idịbeke enye. Enye ọdiọn̄ọ se nnyịn ikpanamde man Jehovah aka iso ama nnyịn. Nso ke enye ọkọdọhọ ẹnam emi anade itiene inam?

6. (a) Se Jesus eketịn̄de ke Ediyarade 2:​3, 4 owụt ke nso ikenen̄ede idi mfịna esop ke Ephesus? (b) Nso ke ikpep?

⁶ Kot Ediyarade 2:​3, 4. Inaha itre ndima Jehovah nte ikamade ke ntọn̄ọ. Etop emi Jesus ọkọnọde ẹsọk esop ke Ephesus owụt ke mmọ ẹma ẹyọ se ikọwọrọde mmọ ẹnyụn̄ ẹsọn̄ọ ẹda ẹnam n̄kpọ Abasi kpa ye kpukpru mfịna emi mmọ ẹkenyenede. Edi mmọ ikamaha Jehovah aba nte mmọ ẹkemade ke ntọn̄ọ. Akana mmọ ẹfiak ẹma enye nte mmọ ẹkemade ke ntọn̄ọ, mîdịghe ntre kpukpru se mmọ ẹnamde ẹnọ enye ẹditatak. Nnyịn n̄ko inyene ndiyọ se iwọrọde nnyịn, edi ikụreke ke oro. Ana inyene nti ntak emi ẹnamde iyọ. Idịghe se inamde kpọt ebehe Jehovah, ntak emi inamde n̄kpọ ebehe enye n̄ko sia enye oyom nnyịn inam n̄kpọ inọ enye ke ntak emi inen̄erede ima enye ye se enye anamde ọnọ nnyịn.​—N̄ke 16:2; Mark 12:​29, 30.

7. (a) Ke Ediyarade 3:​1-3, Jesus ọkọdọhọ ke nso idi mfịna nditọete ke Sardis? (b) Nso ke ikpanam?

⁷ Kot Ediyarade 3:​1-3. Inaha ikpa mba, inyụn̄ inaha iyak n̄kpọ ndomokiet osio nnyịn ekikere ọkpọn̄ n̄kpọ Abasi. Mfịna mme owo ke esop ke Sardis ekedi n̄kpọ efen. Kpa ye emi mmọ ẹkesisakde nte ikan̄ ke n̄kpọ Abasi ke ntọn̄ọ ntọn̄ọ, mmọ ẹma ẹtọn̄ọ ndibịt. Ntre Jesus ama ọdọhọ mmọ ‘ẹdemede.’ Nso item ke nnyịn ida ke se iketịbede oro? Imọdiọn̄ọ ke Jehovah idifreke se inamde inọ enye. (Heb. 6:10) Edi inaha idọhọ ke ima isinyụn̄ isịn idem ke n̄kpọ Abasi, yak edi tebede tebede idahaemi. Ekeme ndinyene  mme n̄kpọ emi mîdiyakke inen̄ede inam n̄kpọ Abasi nte ikesinamde akpa. Kpa ye oro, ana ika iso isịn idem ke “utom Ọbọn̄,” ikûkpa mba, ikûnyụn̄ uyak n̄kpọ ndomokiet osio nnyịn ekikere ọkpọn̄ n̄kpọ Abasi tutu utịt edi.​—1 Cor. 15:58; Matt. 24:13; Mark 13:33.

8. Se ẹketịn̄de ye nditọete ke Laodicea ke Ediyarade 3:​15-17 ekpep nnyịn nso?

⁸ Kot Ediyarade 3:​15-17. Ana inen̄ede isịn idem ke utom Abasi inyụn̄ inam ke ofụri esịt. Mfịna en̄wen ke Jesus akasiak ke etop emi enye ọkọnọde ẹsọk esop ke Laodicea. Nditọete oro ẹkenam n̄kpọ Abasi “ndebe ndebe.” Oro akanam Jesus ọdọhọ mmọ ke mmọ ẹdi ‘mbon nditaha, ẹnyụn̄ ẹnyene mbọm.’ Akana mmọ ẹnen̄ede ẹma Jehovah ẹnyụn̄ ẹsịn idem ẹnam n̄kpọ esie. (Edi. 3:19) Nso ke ikpep? Edieke ikụtde ke imọtọn̄ọ ndision̄o ikan̄ ke nte inamde n̄kpọ Abasi, ana inam se idin̄wamde nnyịn inen̄ede ima kpukpru se Jehovah ye esop esie ẹnamde ẹnọ nnyịn. (Edi. 3:18) Ikpanaha imen ofụri ini nnyịn in̄wana n̄kpọ man ikop inem uwem tutu edidi se inamde n̄kpọ Abasi ini inyenede ufan̄.

9. Se Jesus eketịn̄de ye mme Christian ke Pergamum ye Thyatira owụt ke ikpekpeme idem ye nso?

⁹ Inaha inịm se mbon mfiakedem ẹkpepde. Jesus ama asua ọnọ ndusụk nditọete ke Pergamum nte mmọ ẹketọde ubahade ke esop ẹnyụn̄ ẹsiakde nsio nsio n̄ka. (Edi. 2:​14-16) Enye ama otoro nditọete ke Thyatira emi mîkoyomke ndidiọn̄ọ n̄kpọ ndomokiet mban̄a “mme ntotụn̄ọ n̄kpọ Satan,” onyụn̄ ọdọhọ mmọ ‘ẹsọn̄ọ ẹmụm akpanikọ emi mmọ ẹkekpepde ẹkama.’ (Edi. 2:​24-26) Nditọete emi mîkesịnke ofụri esịt mmọ ke n̄kpọ Abasi ke mme esop oro ẹma ẹtọn̄ọ ndinịm mme nsunsu ukpepn̄kpọ, ndien akana mmọ ẹkabade esịt. Nso ke ana nnyịn inam mfịn? Inaha inyịme ukpepn̄kpọ ekededi emi mîkemke ye se Jehovah oyomde. Mbon mfiakedem ẹkeme nditie nte mbon emi ‘ẹten̄ede Abasi,’ edi uwem mmọ owụt ke mmọ iten̄eke enye. (2 Tim. 3:5) Edieke isisịnde idem ikpep Ikọ Abasi, idisọn̄ke nnyịn ndidiọn̄ọ nsunsu ukpepn̄kpọ, idinyụn̄ isọn̄ke nnyịn ndisịn utọ ukpepn̄kpọ oro.​—2 Tim. 3:​14-17; Jude 3, 4.

10. Nso efen ke ikeme ndikpep nto se Jesus eketịn̄de ye nditọete ke Pergamum ye Thyatira?

 ¹⁰ Inaha inam oburobụt ido ekededi, inaha idian idem ye mbon emi ẹnamde enye, m̀mê ndidop uyo ima ikụt nte ẹnamde ke esop. Mfịna efen ama odu ke esop Pergamum ye Thyatira. Jesus ama asua ọnọ ndusụk owo ke mme esop oro sia mmọ ikasuaha oburobụt ido. (Edi. 2:​14, 20) Nso ke ikpep? Ekpededi ebịghi ikọtọn̄ọ ndinam n̄kpọ Jehovah, inyụn̄ inyene ikpọ utom ke esop, inaha ikere ke ima inam oburobụt ido ke Jehovah eyemen iso efep. (1 Sam. 15:22; 1 Pet. 2:16) Ekpededi ererimbot ẹda oburobụt ido nte n̄kpọ mbre, Jehovah osụk oyom nnyịn idu uwem nte imọ idọhọde.​—Eph. 6:​11-13.

11. Nso ke ikpep? (Se n̄ko ekebe emi “ Se Ikpepde.”)

¹¹ Nso ke ikpep? Imekpep ke ana inam n̄kpọ Jehovah ke usụn̄ emi enye edinyịmede. Edieke ikụtde ke se inamde ọmọn̄ anam Jehovah okûda se inamde inọ enye, ọfọn isọsọp itre n̄kpọ oro. (Edi. 2:​5, 16; 3:​3, 16) Edi enyene n̄kpọ efen emi Jesus eketịn̄de ke etop emi enye ọkọnọde ẹsọk mme esop. Nso idi oro?

12. Nso ke Jesus eketịn̄ ye nditọete ke Smyrna ye Philadelphia emi ekpebehede nnyịn? (Ediyarade 2:10)

¹² Ẹyak ikere se Jesus eketịn̄de ye esop ke Smyrna ye ke Philadelphia. Enye ama ọdọhọ nditọete do yak mmọ ẹkûfehe ukọbọ sia Abasi ọyọdiọn̄ mmọ edieke mmọ ẹsọn̄ọde ẹda ẹyọ ẹsịm akpatre. (Kot Ediyarade 2:10; 3:10) Nso ke ikpep? Ana idiọn̄ọ ke ẹyekọbọ nnyịn, inyụn̄ inyịme ndiyọ ukọbọ. (Matt. 24:​9, 13; 2 Cor. 12:10) Ntak emi ikọ Jesus oro edide akpan n̄kpọ?

13-14. Nso iwọrọ ikọt Abasi ke ntak se Ediyarade ibuot 12 etịn̄de?

¹³ N̄wed Ediyarade anam idiọn̄ọ ke ẹyekọbọ ikọt Abasi ke “usen Ọbọn̄,” ndien ini nnyịn emi edi “usen Ọbọn̄” oro. N̄wed Ediyarade ibuot 12 ọdọhọ ke ndondo emi Jesus ọtọn̄ọde ukara ke heaven, ke ekọn̄ ama asiaha do. Michael ye udịmekọn̄ esie ẹma ẹn̄wana ye Satan ye mme demon esie. Jesus edi Michael oro. (Edi. 12:​7, 8) Ẹma ẹkan Satan ye mme demon esie emi ẹdide mme asua Abasi ẹnyụn̄ ẹsio mmọ ẹduọn̄ọ ke isọn̄. Inua ikemeke ndibụk ufen emi mmọ ẹmende ẹbịne isọn̄ ye mbon emi ẹdụn̄de ke esịt. (Edi. 12:​9, 12) Nso iwọrọ ikọt Abasi ke ntak oro?

¹⁴ N̄wed Ediyarade etịn̄ se Satan anamde sia enye mîkemeke ndifiak n̄ka  heaven aba. Enye an̄wan̄a iyatesịt esie ofụk nyọhọ-nsụhọ mbon oro ẹyetde aran, emi ẹdade ke ibuot ukara Abasi ke isọn̄, ẹnyụn̄ “ẹnyenede utom editie ntiense mban̄a Jesus.” (Edi. 12:17; 2 Cor. 5:20; Eph. 6:​19, 20) Didie ke prọfesi enye emi osu?

15. ‘Ntiense iba’ emi ẹtịn̄de ẹban̄a ke Ediyarade ibuot 11 ẹda ẹban̄a mmanie? Nso iketịbe inọ mmọ?

¹⁵ Satan ama anam mme asua Abasi ẹtọn̄ọ mfịna ye nditọete emi ẹkeyetde aran, emi ẹkedade usụn̄ ke utom ukwọrọikọ. ‘Ntiense iba’ oro n̄wed Ediyarade ọdọhọde ke ẹma ẹwot ẹda ẹban̄a nditọete oro. * (Edi. 11:​3, 7-11) Ke 1918, ẹma ẹdori nditọete itiaita ke otu oro ikọ ẹdọhọ ke mmọ ẹdue ibet, ẹnyụn̄ ẹbiere n̄kpọkọbi uwak isua ẹnọ mmọ. Ediwak owo ẹkekere ke utom nditọete emi ẹyetde aran do etre.

16. Ewe n̄kpọ n̄kpaidem iketịbe ke 1919? Edi nso ke Satan aka iso anam tọn̄ọ oro?

¹⁶ Prọfesi n̄wed Ediyarade ibuot 11 ama ọdọhọ n̄ko ke ekpri ini ama ebe, ke ‘ntiense iba’ oro ẹyeset. Se nte prọfesi oro okosude mi. Ke ntọn̄ọ ntọn̄ọ 1919, n̄kpọ emi akpade owo idem ama etịbe. Ikọyọhọke isua kiet tọn̄ọ ẹkemụm nditọete oro ẹkekọbi, ẹma ẹsana mmọ ẹyak. Nte ini akade, ẹma ẹbiat kpukpru se ẹkedoride mmọ ẹfep. Inikiet inikiet, nditọete oro ẹma ẹtọn̄ọ ndifiak nda usụn̄ ke utom ukwọrọikọ ye ke ndikpep mme owo Ikọ Abasi. Edi oro ikanamke Satan etre mfịna ye ikọt Abasi. Ọtọn̄ọde ke ini oro, Satan anam ukọbọ oto esa ye enen ọtọ ebịne kpukpru ikọt Abasi nte “akpa mmọn̄.” (Edi. 12:15) Enen̄ede oyom nnyịn owo kiet kiet ‘iyọ inyụn̄ inyene mbuọtidem.’​—Edi. 13:10.

17. Kpa ye emi ikọt Abasi ẹdide iso ekọn̄ Satan, didie ke un̄wam esito ebiet emi owo mîkodorike enyịn esịm mmọ?

¹⁷ Ediyarade ibuot 12 owụt ke un̄wam oyoto itie emi ikọt Abasi mîkodorike enyịn esịm mmọ. Itien̄wed oro owụt ke editie nte “isọn̄” atat inua emen kpukpru ukọbọ emi ọkọtọde ebịne mmọ nte ‘akpa mmọn̄.’ (Edi. 12:16) Se isitịbede edi oro. Ndusụk ini, ndusụk esopikpe ererimbot  Satan emi ẹsifak ikọt Abasi ẹsio mme asua mmọ ke ubọk. Ediwak ini, ikọt Jehovah ẹsikan ikpe emi an̄wamde mmọ ẹnyene ifụre ekpri ẹnam n̄kpọ Abasi. Mmọ ẹsida ifụre oro ẹnen̄ede ẹsịn idem ẹnam utom emi Jehovah ọkọnọde mmọ ẹnam. (1 Cor. 16:9) Utom emi esịne nso ye nso?

18. Nso idi akpan utom nnyịn ke mme akpatre usen emi?

¹⁸ Jesus ama ọdọhọ ke mme mbet imọ ‘ẹyekwọrọ eti mbụk obio ubọn̄ Abasi’ ke ofụri isọn̄ mbemiso utịt edide. (Matt. 24:14) Nte mmọ ẹsụk ẹkwọrọde, mme angel ẹsin̄wam mmọ. Mme angel oro ke Bible ọdọhọ ke ẹnyene “nsinsi eti mbụk nditan̄a nte etop idatesịt nnọ mbon emi ẹdụn̄de ke isọn̄, ye kpukpru mme idụt ye esien ye usem ye obio.”​—Edi. 14:6.

19. Ewe etop efen ke ana mbon emi ẹmade Jehovah ẹkwọrọ?

¹⁹ Idịghe eti mbụk Obio Ubọn̄ Abasi kpọt ke ikọt Abasi ẹdikwọrọ. Ana mmọ ẹdian ubọk ye mme angel ẹnam se Ediyarade ibuot 8 esịm 10 ọdọhọde nte mme angel ẹnamde. Mme angel oro ke ẹtịn̄ nsio nsio n̄kpọ emi ẹditịbede ẹnọ mbon emi mînyịmeke ukara Abasi. Ntre Mme Ntiense Jehovah ke ẹkwọrọ etop emi etiede nte “edịm itiat ye ikan̄,” ke ẹnam mme owo ẹdiọn̄ọ se Abasi edinamde nsio nsio ikpehe idiọk ererimbot Satan emi. (Edi. 8:​7, 13) Ana mme owo ẹdiọn̄ọ ke utịt ekpere man mmọ ẹkpụhọde ẹnyụn̄ ẹbọhọ usen iyatesịt Jehovah. (Zeph. 2:​2, 3) Sia etop emi mînemke mme owo ke utọn̄, ana inyene uko man ikeme ndikwọrọ enye. Ke ini akwa ukụt, etop ubiomikpe emi idikwọrọde oyodobi akan se ikwọrọde idahaemi.​—Edi. 16:21.

20. Nso ke idineme ke ibuotikọ iba emi ẹtienede?

²⁰ Enen̄ede ọfọn inam se “ntịn̄nnịm ikọ emi” ọdọhọde sia imetiene inam se ẹtịn̄de ke n̄wed Ediyarade osu. (Edi. 1:3) Edi nso idin̄wam nnyịn isọn̄ọ ida iyọ ukọbọ inyụn̄ ika iso ikwọrọ etop emi uko uko? N̄kpọ iba ẹdin̄wam nnyịn. Akpa edi se ẹtịn̄de ẹban̄a mme asua Abasi ke n̄wed Ediyarade, ọyọhọ iba edi nti n̄kpọ emi Abasi ọn̄wọn̄ọde ndinam nnọ nnyịn edieke isọn̄ọde ida ye enye isịm akpatre. N̄kpọ iba oro ke idineme ke ibuotikọ iba emi ẹtienede.