1. Nso idi akpan n̄kpọ emi anade kpukpru owo ẹmek?

 AKPAN n̄kpọ emi anade kpukpru owo ẹmek edi m̀mê iyada inọ Jehovah Abasi emi enyenede unen ndikara ofụri ekondo, m̀mê idida inọ Satan emi edide ata idiọk asua Jehovah. Ana kpukpru owo ẹyom n̄kan̄ kiet ẹda ẹnọ, idịghe n̄kpọ emi owo ọdọhọde ke imọ inyeneke n̄kan̄ emi idade inọ. Ndien se owo emekde ayanam Jehovah ọnọ enye nsinsi uwem mîdịghe osobo enye. (Matt. 25:​31-33, 46) Ke ini “akwa ukụt,” ẹyenịm mbon emi ẹsọn̄ọde ẹda ye Jehovah idiọn̄ọ ẹnọ edinyan̄a. (Edi. 7:14; Ezek. 9:​4, 6) Edi ẹyesobo mbon emi ẹkebọde idiọn̄ọ idiọk unam oro.​—Edi. 14:​9-11.

2. (a) Mme Hebrew 10:​35-39 ọdọhọ inam nso? (b) Didie ke n̄wed Ediyarade ekeme ndin̄wam nnyịn?

² Kot Mme Hebrew 10:​35-39. Ekpedi afo emek ndida nnọ ukara Jehovah, mfọnn̄kan n̄kpọ ke emek oro. Ọdọn̄ fi ndin̄wam mbon en̄wen ẹtiene ẹmek nnennen n̄kpọ. Emekeme ndida se idude ke n̄wed Ediyarade n̄n̄wam mmọ. N̄wed oro etịn̄ se iditịbede inọ mbon emi ẹbiọn̄ọde Jehovah ye edidiọn̄ emi mbon oro ẹsọn̄ọde ẹda ẹnọ ukara Jehovah ẹdibọde. Ọfọn yak ida ini ikpep mme akpan n̄kpọ emi. Ndinam oro ayan̄wam nnyịn inen̄ede ibiere ndisọn̄ọ nda ye Jehovah. Imonyụn̄ ikeme ndida se ikpepde n̄n̄wam mbon en̄wen ẹmek nnennen n̄kpọ ẹnyụn̄ ẹsọn̄ọ ẹda ke se mmọ ẹmekde oro.

3. Nso ke idikpep ke ibuotikọ emi?

³ Iyọbọrọ mme mbụme emi ke ibuotikọ emi: Nso iditịbe inọ mbon emi ẹdade ẹnọ ukara Abasi? Nso iditịbe inọ mbon emi ẹmekde ndida nnọ ididuot idiọk unam emi ẹtịn̄de ẹban̄a ke n̄wed Ediyarade?

4. Ewe otu ke apostle John okụt ye Jesus ke heaven?

⁴ Ke n̄kukụt emi ẹkewụtde apostle John, enye ama okụt otu iba emi ẹdade ẹnọ ukara Jehovah onyụn̄ okụt nte Jehovah anamde mmọ ẹdu uwem ke nsinsi. Otu kiet ẹdi owo 144,000. (Edi. 7:4) Ẹmek mmọ ẹsio ke isọn̄ yak ẹkediana ye Jesus ẹkara ke heaven nte ndidem. Mmọ ẹyediana ye enye ẹkara isọn̄ emi. (Edi. 5:​9, 10; 14:​3, 4) John okụt mmọ ke n̄kukụt nte ẹdade ye Jesus ke Obot Zion ke heaven.​—Edi. 14:1.

5. Ke mîbịghike, nso iditịbe inọ mbon emi ẹyọhọde ẹsụhọ ke otu owo 144,000?

⁵ Ọtọn̄ọde ke eyo mme apostle tutu esịm mfịn, Jehovah emek ediwak tọsịn mme owo esịn ke otu 144,000. (Luke 12:32; Rome 8:17) Edi ẹma ẹdọhọ John ke ekpri ibat ke otu mmọ ẹdidu uwem ke mme akpatre usen. Mbemiso akwa ukụt ọtọn̄ọde, ẹyefịk ‘mbon oro ẹyọhọde ẹsụhọ’ ke otu mmọ idiọn̄ọ emi owụtde ke Jehovah enyịme mmọ. (Edi. 7:​2, 3; 12:17) Ndien ke ini akwa ukụt oro, ẹyemen mbon emi ẹyọhọde ẹsụhọ do ẹka heaven mmọ ẹkediana ye mbon eken ke otu owo 144,000 emi ẹkesọn̄ọde ẹda ye Jehovah, emi ẹma ẹkekpakpan̄a ẹka heaven. Mmọ ẹyekediana ye Jesus ẹkara ke Obio Ubọn̄ Abasi.​—Matt. 24:31; Edi. 5:​9, 10.

6-7. (a) Tịn̄ otu en̄wen emi John okụtde ye se idiọn̄ọde iban̄a mmọ. (b) Ntak emi ọkpọdọn̄de mbon emi ẹyetde aran ye “akwa otuowo” ndikụt nte se idude ke Ediyarade ibuot 7 osude?

⁶ Ke John ama okokụt otu emi ẹdikade heaven, enye ama okụt “akwa otuowo.” Otu emi ẹdikade heaven ẹdi owo 144,000, edi owo ikemeke ndibat ọyọhọ otu iba emi. (Edi. 7:​9, 10) Nso ke idiọn̄ọ iban̄a ọyọhọ otu iba emi? Ẹma ẹdọhọ John ẹte: “Mmọ ẹdi mbon emi ẹketode akwa ukụt ẹwọn̄ọ, ndien mmọ ẹyet ọfọn̄idem mmọ ẹnam afia ke iyịp Eyenerọn̄.” (Edi. 7:14) Ke ini “akwa otuowo” ẹbọhọde akwa ukụt, Jehovah ayanam mmọ ẹdu uwem ke nsinsi ndien edidiọn̄ emi enye edidiọn̄de mmọ ididịghe ekpri.​—Ps. 37:​9-11, 27-29; N̄ke2:​21, 22; Edi. 7:​16, 17.

⁷ Edide ẹmek nnyịn yak itiene ika heaven m̀mê ididu mi ke isọn̄, ndi imenịm ke iyokụt nte mme n̄kpọ emi ẹtịn̄de ke n̄wed Ediyarade ibuot 7 ẹsude? Akpana inịm. Ini oro eyenem otu mbiba emi ata etieti! Eyenen̄ede enem nnyịn nte ikemekde ndida nnọ ukara Jehovah. Nso en̄wen ke ẹtịn̄ ẹban̄a akwa ukụt ke n̄wed Ediyarade?​—Matt. 24:21.

8. Akwa ukụt editọn̄ọ didie? Nso ke ata ediwak owo ẹdinam?

⁸ Nte iketịn̄de ke ọyọhọ ibuotikọ iba, ukara ererimbot emi, emi ẹnọde Esop Edidiana Mme Idụt odudu ẹmọn̄ ẹsọp ndiwọn̄ọde n̄n̄wana ye Akwa Babylon emi edide kpukpru nsunsu ido ukpono. (Edi. 17:​16, 17) Ntọn̄ọ akwa ukụt edidi oro. Ndi oro ayanam yak mme owo ẹfen̄e ẹdikpono Jehovah? Idinamke. Ediyarade ibuot 6 owụt ke mbon emi mîdaha ye Jehovah ẹdikoyom ubọhọ ito ukara ye mbon ikpọ mbubehe ererimbot emi Bible okotde mme obot. Sia mmọ mîdaha inọ ukara Abasi, Jehovah edida ke mmọ ẹdi mme asua imọ.​—Luke 11:23; Edi. 6:​15-17.

9. Nso ke ikọt Jehovah ẹdida ẹkpụhọde ye kpukpru owo eken ke ini akwa ukụt? Nso ke oro edida idi?

 ⁹ Ini akwa ukụt idimemke, edi mbon emi ẹsọn̄ọde ẹda ye Jehovah ẹdidi ata isio isio. Mmọ ẹdisụk ẹdi n̄kukụre mbon emi ẹnamde n̄kpọ Jehovah mi ke isọn̄, mînyụn̄ idaha ye “idiọk unam oro.” (Edi. 13:​14-17) Mmọ ndisọn̄ọ nda ye Jehovah ayanam esịt ayat mme asua Jehovah. Ndien mme idụt ẹyediana kiet ẹdaha ẹka en̄wan ye ikọt Jehovah ke ofụri isọn̄. En̄wan oro ke Bible okot en̄wan Gog isọn̄ Magog.​—Ezek. 38:​14-16.

10. Ediyarade 19:​19-21 ọdọhọ ke Jehovah edinam nso iban̄a en̄wan emi ẹdimende ẹbịne ikọt esie?

¹⁰ Nso ke Jehovah edinam iban̄a utọ enyene-ndịk en̄wan emi ẹdimende ẹbịne ikọt esie do? Enye ọdọhọ ke imọ iyayat esịt ata idiọk idiọk. (Ezek. 38:​18, 21-23) Ediyarade ibuot 19 ọdọhọ ke iyatesịt oro ayanam Jehovah osio Eyen Esie ọdọn̄ yak akan̄wam ikọt imọ onyụn̄ akan mme asua mmọ. “Mme udịmekọn̄ oro ẹdude ke heaven,” oro edi nti angel ye owo 144,000, ẹyetiene Jesus ẹka en̄wan oro. (Edi. 17:14; 19:​11-15) Mmọ ẹyesobo kpukpru owo ye esop emi ẹbiọn̄ọde Jehovah ẹfep ke nsinsi.​—Kot Ediyarade 19:​19-21.

11. Ke otu mme n̄kpọ emi n̄wed Ediyarade ọdọhọde nte ẹditịbede, ewe idi akpan n̄kpọ ikan?

¹¹ Kere nte editiede mbon emi ẹsọn̄ọde ẹda ye Jehovah ini mmọ ẹdibọhọde nsobo emi ẹdisobode mme asua Abasi! Idara oyokpon ata etieti! Mme heaven ẹyesio n̄kpo idara nte ẹsobode Akwa Babylon ẹfep. Edi enyene n̄kpọ en̄wen emi edinamde esịt enen̄ede enem mmọ. (Edi. 19:​1-3) N̄kpọ oro edi akpan n̄kpọ akan ke n̄wed Ediyarade, oro edi “ndọ Eyenerọn̄.”​—Edi. 19:​6-9.

12. Ediyarade 21:​1, 2 owụt ke ndọ Eyenerọn̄ edidi ini ewe?

¹² Ndọ Eyenerọn̄ edidi ini ewe? Esisịt ini mbemiso ekọn̄ Armageddon an̄wanade, kpukpru owo 144,000 ẹyekem ibat ke heaven. Edi, ndọ Eyenerọn̄ ididịghe ini oro. (Kot Ediyarade 21:​1, 2.) Ndọ Eyenerọn̄ edidi ke ekọn̄ Armageddon ama okokụre yak ẹsobo kpukpru mme asua Abasi ẹfep.​—Ps. 45:​3, 4, 13-17.

13. Nso iditịbe ke ndọ Eyenerọn̄?

¹³ Nso iditịbe ke ndọ Eyenerọn̄? Ukem nte ndọ esinamde erenowo ye n̄wan ẹdiana kiet, ndọ Eyenerọn̄ ayanam Jesus Christ emi edide Edidem adiana ye owo 144,000 emi ẹdide “n̄wanndọ” esie. Ata akpan edinam oro ayanam owo 144,000 ẹdiana ye Jesus ẹtọn̄ọ ndikara isọn̄ ke isua tọsịn kiet.​—Edi. 20:6.

14-15. Ediyarade ibuot 21 emen owo 144,000 odomo ye nso? (Se ndise ikpaedem Enyọn̄-Ukpeme emi.)

¹⁴ Ediyarade ibuot 21 emen owo 144,000 odomo ye obio emi eyede anana mbiet. Obio oro ekere “Obufa Jerusalem.” (Edi. 21:​2, 9) Obio oro enyene itiat idakisọn̄ 12, ẹnyụn̄ ẹwet “enyịn̄ mme apostle Eyenerọn̄ duopeba” ke mme itiat oro. Nso inam yak ikpehe n̄kukụt enye emi enen̄ede enem John? Sia enye okụt enyịn̄ esie ke kiet ke otu mme itiat oro. Ata akwa n̄kpọ ukpono edi oro!​—Edi. 21:​10-14; Eph. 2:20.

¹⁵ Idụhe obio emi etiede nte Obufa Jerusalem. Akwa efak esie edi ata gold,  ẹda pearl ẹnam mme inuaotop 12 esie, ẹda mme ata ọsọn̄urua itiat ẹbana ibibene ye mme itiat idakisọn̄ esie, ‘uniọn̄ ye ubom ye ukon̄ esie ẹnyụn̄ ẹdi ukem ukem.’ (Edi. 21:​15-21) Edi John okụt ke enyene se mîdụhe ke obio oro. Enye ọdọhọ ete: “N̄kekwe temple ke esịt esie, koro Jehovah Abasi Ata Ọkpọsọn̄, ye Eyenerọn̄ ẹdide temple esie. Obio oro inyụn̄ iyomke utịn m̀mê ọfiọn̄ ndiyama nnọ enye, koro ubọn̄ Abasi ọnọde enye un̄wana, ndien utuenikan̄ esie ekedi Eyenerọn̄.” (Edi. 21:​22, 23) Emi owụt ke Obufa Jerusalem, oro edi owo 144,000, ẹyekụt Jehovah iso ye iso. Ke ntre mmọ idiyomke temple aba. (Edi. 22:​3, 4) Jesus ayada mmọ usụn̄ yak ẹnam n̄kpọ ẹnọ Jehovah sia etisịm ini oro, Jesus ama ededi akwa oku ke heaven. (Heb. 7:27) Nte Jehovah ye Jesus ẹsan̄ade ẹdi temple obio oro edi oro.

16. Nso iditịbe inọ ubonowo ke ini tọsịn isua ukara Christ?

¹⁶ Esinem mbon emi ẹyetde aran ata etieti ndikere mban̄a obio emi. Edi akpana obio emi etiene enem mbon emi ẹdidude uwem mi ke isọn̄. Ke ini tọsịn isua ukara Christ, Obufa Jerusalem ayanam edidiọn̄ emi inua mîkemeke nditịn̄ esịm ubonowo. John ama okụt mme edidiọn̄ oro ẹwetde nte “akpa mmọn̄ uwem.” Enye ama okụt “mme eto uwem” ke edem akpa mbiba, mme eto oro ẹnyụn̄ ẹsion̄o ikọn̄ emi ẹdade “ẹkọk mme idụt udọn̄ọ.” (Edi. 22:​1, 2) Mme edidiọn̄ oro ẹyesịm kpukpru mbon emi ẹdidude uwem ke isọn̄ ini oro. Sụn̄sụn̄ sụn̄sụn̄, kpukpru mbon emi ẹkopde item ẹnọ Jehovah ẹyefọn ẹma. Udọn̄ọ ididụhe aba, ubiak ididụhe aba, owo idinyụn̄ ituaha aba.​—Edi. 21:​3-5.

17. Ediyarade 20:​11-13 owụt ke mmanie ẹdibọ ufọn ke ini Obio Ubọn̄ Abasi edikarade ke isua tọsịn kiet?

¹⁷ Mmanie ẹdibọ kpukpru edidiọn̄ emi? Akpa edi mbon emi ẹdibọhọde Armageddon ye nditọ emi ẹdimanade ke obufa ererimbot. Ediyarade ibuot 20 ọdọhọ n̄ko ke mme owo ẹyeset. (Kot Ediyarade 20:​11-13.) “Ndinen owo” emi ẹkesọn̄ọde ẹda ye Jehovah mbemiso mmọ ẹkpade, ye “mme anam ukwan̄n̄kpọ”  emi mîkenyeneke ifet ndikpep n̄kpọ mban̄a Jehovah, ẹyeset ẹdidu uwem ke isọn̄. (Utom 24:15; John 5:​28, 29) Ndi emi ọwọrọ ke kpukpru mbon emi ẹkekpade ẹyeset ke ini Obio Ubọn̄ Abasi edikarade ke isua tọsịn kiet? Iwọrọke ntre. Mbon emi mîkamaha ndikpono Jehovah mbemiso mmọ ẹkpade idisetke. Mmọ ikamaha ndinam n̄kpọ n̄wụt ke imoyom ndidu uwem ke Paradise ini mmọ ẹkenyenede ifet ndinam ntre.​—Matt. 25:46; 2 Thess. 1:9; Edi. 17:8; 20:15.

18. Mme owo ẹditie didie ke utịt tọsịn isua kiet?

¹⁸ Ke utịt tọsịn isua, ẹyenam kpukpru mbon emi ẹdude uwem ke isọn̄ ẹfọn ẹma. Idiọkn̄kpọ emi ikadade ito Adam idisịneke owo ndomokiet ke idem aba. (Rome 5:12) Kpukpru owo ẹyebọhọ isụn̄i idiọkn̄kpọ Adam. Emi ọwọrọ ke utịt tọsịn isua ke ẹdidọhọ ke mbon emi ẹdude ke isọn̄ ‘ẹdu uwem’ sia mmọ ẹyefọn ẹma.​—Edi. 20:5.

19. Ntak emi anade ẹdomo mme owo akpatre udomo?

¹⁹ Imọfiọk ke Jesus ama ọsọn̄ọ ada ye Jehovah idem ke ini Satan okodomode enye. Edi ndi kpukpru mbon emi ẹfọnde ẹma ẹyesọn̄ọ ẹda ye Abasi n̄ko edieke Satan odomode mmọ? Owo kiet kiet oyowụt m̀mê imọsọn̄ọ ida ye Jehovah ini ẹdisanade Satan iyak ke utịt tọsịn isua kiet. (Edi. 20:7) Mbon emi ẹdisọn̄ọde ida ye Jehovah ẹyedu uwem ke nsinsi ẹnyụn̄ ẹdu ke ata ifụre. (Rome 8:21) Edi amaedi mbon emi ẹdisọn̄de ibuot ye Jehovah, ẹyedian mmọ ye Satan ye mme demon esie ẹsobo ke nsinsi.​—Edi. 20:​8-10.

20. Etie fi didie ke idem ndidiọn̄ọ mme prọfesi emi ẹdude ke n̄wed Ediyarade?

²⁰ Etie fi didie ke idem ndidiọn̄ọ ekpri se ikpepde emi ke n̄wed Ediyarade? Ndi inemke fi ndikụt idemfo nte etienede odu ini mme prọfesi emi ẹsude? Ndi oro inamke ọdọn̄ fi ndikot mbon en̄wen ẹditiene ẹtuak ibuot ẹnọ Jehovah ke usụn̄ emi enye enyịmede? (Edi. 22:17) Enem nnyịn etieti ndidiọn̄ọ mme utịbe utịbe n̄kpọ emi ẹditịbede ke ini iso mi. Oro anam itiene itịn̄ se apostle John eketịn̄de ete: “Amen! Di, Ọbọn̄ Jesus.”​—Edi. 22:20.