IDỊGHE mfịn ke ikọt Abasi ẹketọn̄ọ ndiwa uwa nnọ enye. Nditọ Israel ẹkesiwa unam ẹnọ Abasi, edi ikọt Abasi mfịn ẹwa “uwa ekọm.” Edi odu mme uwa en̄wen emi enen̄erede enem Abasi esịt. (Heb. 13:​15, 16) Mbon oro ẹsiwade mme utọ uwa emi ẹsikop inemesịt ẹnyụn̄ ẹbọ edidiọn̄ Abasi.

Ke uwụtn̄kpọ, Hannah emi ekedide asan̄autom Abasi ke eset ama enen̄ede oyom eyen, edi ikenyeneke sia enye ekedi ada. Enye ama ọbọn̄ akam ọdọhọ Jehovah ke edieke enye ọnọde imọ eyeneren, ke imọ ‘iyayak eyen oro inọ Jehovah ke ofụri usen uwem esie.’ (1 Sam. 1:​10, 11) Ekem Hannah ama oyomo onyụn̄ aman Samuel. Ke enye ama okosio Samuel ke eba, enye ama emen enye aka tent utuakibuot nte enye ọkọn̄wọn̄ọde. Jehovah ama ọdiọn̄ Hannah ke se enye akanamde oro, onyụn̄ ọnọ enye nditọ ition en̄wen. Samuel ama edikabade edi prọfet onyụn̄ etiene ewet Bible.​—1 Sam. 2:21.

Ikọt Abasi mfịn ẹkeme ndida uwem mmọ nnam n̄kpọ nnọ Abasi kpa nte Hannah ye Samuel ẹkenamde. Jesus ama ọdọhọ ke Jehovah ọyọdiọn̄ nnyịn ke se ededi oro iyakde atak man ika iso inam n̄kpọ Jehovah.​—Mark 10:​28-30.

Ke eyo mme apostle, ẹma ẹnen̄ede ẹdiọn̄ọ Dorcas ke ntak “nti edinam ye mme enọ mbọm” oro enye ekesinọde nditọete. Edi usen kiet enye ‘ama ọdọn̄ọ onyụn̄ akpa.’ Nditọete ẹma ẹtua etieti. Ke ini mme mbet ẹkekopde ke Peter odu ke mbọhọ oro, mmọ ẹma ẹkpe enye ubọk ẹte ọsọsọp edi. Kere nte esịt ekenemde nditọete oro ini Peter ekedide edinam Dorcas eset! Akpa ini emi apostle Jesus akanamde owo eset ekedi oro. (Utom 9:​36-41) Abasi ikefreke nti n̄kpọ oro Dorcas akanamde. (Heb. 6:10) Abasi ama anam ẹwet ẹsịn ke Bible nte Dorcas ekesinọde nditọete n̄kpọ man ikeme ndikpebe enye.

Apostle Paul ama enịm uwụtn̄kpọ n̄ko ọnọ nnyịn. Enye ama esida ini esie an̄wam nditọete. Enye ọkọdọhọ nditọete ke Corinth ete: “Koro ami mmenen̄ede n̄kop idatesịt ndiyak kpukpru se nnyenede nnọ nnyụn̄ nyak idem mi ofụri ofụri nnọ ukpọn̄ mbufo.” (2 Cor. 12:15) Paul ama ọfiọk ke ndinam n̄kpọ nnọ mbon en̄wen esinam owo okop inemesịt, ndien akakan n̄kpọ edi ke Jehovah esidiọn̄ onyụn̄ ama mbon oro ẹsinọde owo n̄kpọ.​—Utom 20:​24, 35.

Se inemede emi owụt ke esịt esinen̄ede enem Jehovah ke ini idade ini ye odudu nnyịn inam n̄kpọ Obio Ubọn̄ esie inyụn̄ in̄wamde nditọete nnyịn. Ndi odu n̄kpọ en̄wen emi ikpanamde man itiene in̄wam ẹka iso ẹkwọrọ eti mbụk Obio Ubọn̄? Ih odu! Ke adianade ye ndida ini ye odudu nnyịn nnam n̄kpọ Abasi, imekeme ndinọ enọ imaesịt ẹda ẹnam n̄kpọ esie. Enọ imaesịt nnyịn esin̄wam ẹka iso ẹkwọrọ ikọ ke ofụri ererimbot ẹnyụn̄ ẹse ẹban̄a mme isụn̄utom ye mbon oro ẹnamde san̄asan̄a utom uyọhọ ini. Enye ke ẹsinyụn̄ ẹda ẹmịn̄ mme n̄wed ẹnyụn̄ ẹda ẹnam mme vidio ke nsio nsio usem, ẹda ẹn̄wam nditọete ke ini afanikọn̄ etịbede, ẹnyụn̄ ẹda ẹbọp mbufa Ufọkmbono Obio Ubọn̄. Imenen̄ede inịm ke Jehovah ọyọdiọn̄ mbon oro ẹtatde ubọk. Ke ini inọde inyene nnyịn ẹda ẹnam n̄kpọ Jehovah, nnyịn iwụt ke imokpono enye.​—N̄ke 3:9; 11:25.