1, 2. (a) Nso utịp ke ikọt Abasi ẹdori enyịn ndibọ? (b) Nso isin̄wam nnyịn isịn esịt ke utịp oro Jehovah enịmde ọnọ nnyịn? (Se akpa ndise ibuotikọ emi.)

NDITỌETE oro ẹyetde aran mfịn ẹnen̄ede ẹdori enyịn ndibọ “utịp ikot eke heaven oro Abasi okokotde” mmọ, kpa nte apostle Paul ọkọbọde. (Phil. 3:14) Ọdọn̄ mmọ nditiene Jesus Christ n̄kara ke Obio Ubọn̄ esie ke heaven nnyụn̄ ntiene nnam mme owo ke Paradise ẹfọn ẹma. (Edi. 20:6) Idụhe se ifọnde ntem! Amaedi mme erọn̄ en̄wen, mmọ ẹdori enyịn ndidu uwem mi ke isọn̄ ke nsinsi. Etie nte emi ekpetịbe mfịn!​—2 Pet. 3:13.

² Apostle Paul ama etịn̄ se idin̄wamde nditọete oro ẹyetde aran ẹka iso ẹnam n̄kpọ Abasi tutu ẹbọ utịp. Enye ọkọdọhọ mmọ ete: “Ẹwụk ekikere mbufo ke mme n̄kpọ enyọn̄.” (Col 3:2) Akana mmọ ẹsịn esịt ke ikot eke heaven oro Abasi okokotde mmọ. (Col. 1:​4, 5) Ke ini ikọt Abasi ẹtiede ẹkere kpukpru se Jehovah ọn̄wọn̄ọde ndinam nnọ mmọ, emi esinam  mmọ ẹsịn esịt ke utịp oro Jehovah enịmde ọnọ mmọ, edide ke heaven m̀mê ke Paradise isọn̄.​—1 Cor. 9:24.

3. Nso ke Paul akanam nditọete oro ẹyetde aran ẹfiọk?

³ Apostle Paul ama anam nditọete oro ẹyetde aran ẹfiọk se ikemede ndinam mmọ ẹkûbọ utịp mmọ. Ke uwụtn̄kpọ, enye ama ewet nditọete ke esop Colossae aban̄a mme Christian nsu emi ẹkekerede ke ndinịm Ibet Moses edinam Abasi ama mmọ utu ke ndibuọt idem ke Christ. (Col. 2:​16-18) Enye ama etịn̄ aban̄a mme n̄kpọ oro ẹkemede ndinam nnyịn n̄ko ikûbọ utịp oro Abasi enịmde ọnọ nnyịn. Enye ama etịn̄ n̄ko se ikpanamde mbak oburobụt n̄kpọ ididọn̄ nnyịn, se ikpanamde ke ini inyenede mfịna ye nditọete nnyịn, m̀mê ke ubon nnyịn. Item esie ekeme ndinen̄ede n̄n̄wam nnyịn. Ẹyak ise ndusụk item oro Paul ọkọnọde nditọete ke esop Colossae.

4. Nso ikeme ndinam nnyịn ikûbọ utịp oro Jehovah enịmde ọnọ nnyịn?

⁴ Ke apostle Paul ama eketi nditọete esie oro ẹyetde aran aban̄a ikot eke heaven oro Jehovah okokotde mmọ, enye ama ọdọhọ ete: “Ẹwot mme ndido idem mbufo emi ẹdude ke isọn̄ man ẹtre use, mbubiam ido, ọkpọsọn̄ udọn̄ idan̄, idiọk udọn̄, ye edisịn esịt ke n̄kpọ owo.” (Col. 3:5) Oburobụt n̄kpọ ekeme ndinen̄ede ndọn̄ owo tutu enye akanam idiọkn̄kpọ edue Jehovah inyụn̄ ibọhọ utịp oro Jehovah enịmde ọnọ nnyịn. Eyenete kiet emi ọkọkpọn̄de esop ke ntak use ọkọdọhọ ntem ke ama akafiak edi: “Oburobụt n̄kpọ ama ọdọn̄ mi tutu n̄kanam idiọkn̄kpọ.”

5. Nso idin̄wam nnyịn ikûnam oburobụt n̄kpọ?

⁵ Ọfọn inen̄ede ikpeme idem ye mme n̄kpọ oro ẹkemede ndinam nnyịn inam oburobụt n̄kpọ. Ke uwụtn̄kpọ, ọkpọfọn eren ye n̄wan oro ẹyomde ndidọ kiet eken ẹbabak ẹbiere se mmọ ẹdinamde ye se mmọ mîdinamke ke utọ n̄kpọ nte ndimụm kiet eken ubọk, ndifat kiet eken, nditịm inua, ẹnyụn̄ ẹbiere m̀mê ini ewe ye m̀mọ̀n̄ ke mmimọ mbiba mîdidụhe ikpọn̄. (N̄ke 22:3) Ọfọn eyenete emi esiwakde ndikpọn̄ n̄wan m̀mê ebe esie n̄ka mbubehe, m̀mê emi anamde utom ye owo emi mîdịghe ebe m̀mê n̄wan esie enen̄ede ekpeme mbak enye idinam oburobụt n̄kpọ. (N̄ke 2:​10-12, 16) Mbak udûnam oburobụt n̄kpọ, nam ẹdiọn̄ọ ke afo edi Ntiense Jehovah, kpono idemfo, nyụn̄ ti ke ndibre ndisịme mbre ekeme ndida afanikọn̄ ndi. Ọfọn inen̄ede ikpeme n̄ko ke ini ifụhọde m̀mê ikopde ndobo, sia utọ ini ntem ke isiyom owo ọdọn̄ nnyịn esịt. Imekeme ndiyom ndọn̄esịt ke mbrenyịn tutu iyak idem inọ owo ekededi. Edieke utọ n̄kpọ emi ọwọrọde fi, bọn̄ akam nọ Jehovah nyụn̄ sịk kpere nditọete ke esop man ekeme ndibọ utịp oro Jehovah enịmde ọnọ fi.​—Kot Psalm 34:18; Mme N̄ke 13:20.

6. Ntak emi ikpekpemede se idade inem idem esịt?

⁶ Edieke ikpemede se idade inem idem esịt, oburobụt n̄kpọ ididọn̄ke nnyịn. Ediwak n̄kpọ oro mme owo ẹdade ẹnem idem esịt mfịn anam ererimbot emi etie nte Sodom ye Gomorrah. (Jude 7) Ediwak ikwọ, fim, ye mme n̄wed ererimbot emi ẹnam mme owo ẹnịm ke use ye efịbe idiọkke. Ntre, ọfọn inen̄ede ikpeme se idade inem idem nnyịn esịt, sia edieke idade oburobụt n̄kpọ inem idem esịt, imekeme ndibiat ibet Abasi inyụn̄ ibọhọ se enye ọn̄wọn̄ọde ndinọ nnyịn.​—N̄ke 4:23.

7. Nso mfịna ikeme ndidu ke esop?

⁷ Enen̄ede enem kpukpru nnyịn ndidu ke esop Abasi. Nnyịn imesikpep Ikọ Abasi ke ini idụkde mbono esop, imesin̄wam inyụn̄ isọn̄ọ kiet eken idem. Emi esin̄wam nnyịn ika iso itie ibet se Jehovah ọn̄wọn̄ọde. Edi ndusụk ini, n̄kpri n̄kpri n̄kpọ ẹkeme ndinam itọhọ ye nditọete nnyịn. Edieke nnyịn mîsọpke-sọp ikọk mfịna emi, oro ekeme ndinam isịn mmọ ke esịt.​—Kot 1 Peter 3:​8, 9.

8, 9. (a) Mme edu ewe idin̄wam nnyịn ibọ utịp oro Abasi enịmde ọnọ nnyịn? (b) Nso idin̄wam nnyịn idu ke emem ye nditọete ke ini mmọ ẹduede nnyịn?

⁸ Nso ke ikpanam mbak idiyak mfịna oro inyenede ye nditọete nnyịn anam ikûbọ utịp oro Abasi enịmde ọnọ nnyịn? Kop se Paul ọkọdọhọde nditọete ke esop Colossae mi: “Nte ndimek ikọt Abasi, emi ẹsanade ẹnyụn̄ ẹmade, ẹmen esịt ima emi asan̄ade ye mbọm ẹsịne ọkọrọ ye mfọnido ye nsụhọdeidem ye ifụre ifụre ido ye anyanime. Ẹka iso ẹyọ kiet eken ẹnyụn̄ ẹfen kiet eken ke ofụri esịt edieke owo ekededi enyenede ntak nditọhọ ye owo. Kpa nte Jehovah ekefende mbufo ke ofụri esịt, ẹfen mbon en̄wen kpasụk ntre. Edi, ke adianade ye kpukpru emi, ẹmen ima ẹsịne, koro enye edi mfọnmma mbọbọ edidianakiet.”​—Col. 3:​12-14.

⁹ Ima ye mfọnido ayan̄wam nnyịn ikeme ndifen nnọ nditọete nnyịn. Ke uwụtn̄kpọ, edieke eyenete etịn̄de m̀mê anamde se ibiakde nnyịn, ọfọn iti ke nnyịn n̄ko imesitịn̄ m̀mê inam n̄kpọ emi abiakde owo. Ndi esịt ikenemke nnyịn ke ini eyenete oro ikeduede ekefende nnyịn? (Kot Ecclesiastes 7:​21, 22.) Enen̄ede enem nnyịn nte Christ anamde idiana kiet ikpono Jehovah. (Col. 3:15) Kpukpru nnyịn ikpono Jehovah, ikwọrọ Obio Ubọn̄ esie, ediwak mfịna nnyịn onyụn̄ edi ukem. Edieke imade inyụn̄ ifọnde ido ye nditọete nnyịn, emi ayanam idiana kiet inyụn̄ ika iso itie ibet se Jehovah ọn̄wọn̄ọde ọnọ nnyịn.

10, 11. (a) Ntak emi ufụp ọdiọkde? (b) Nso ke ikpanam mbak idiyak ufụp anam nnyịn ikûbọ utịp oro Jehovah enịmde ọnọ nnyịn?

¹⁰ Mme mbụk Bible ẹwụt ke ufụp ekeme ndinam nnyịn ikûbọ utịp oro Jehovah enịmde ọnọ nnyịn. Ke uwụtn̄kpọ, ufụp ama anam Cain owot Abel eyeneka esie. Korah, Dathan, ye Abiram ẹma ẹfịbe Moses ẹnyụn̄ ẹsọn̄ ibuot ye enye. Ufụp okonyụn̄ anam Edidem Saul oyom ndiwot David. Ntak edi oro Ikọ Abasi ọdọhọde ete: “Ebiet emi ufụp ye ndomoidem ẹdude, do ke ndutịme ye kpukpru mbukpo ido ẹdu.”​—Jas. 3:16.

¹¹ Edieke imade nditọete nnyịn inyụn̄ ifọnde ido ye mmọ, nnyịn idifịbeke mmọ. Ikọ Abasi ọdọhọ ete: “Ima enyenyene anyanime onyụn̄ ọfọn ido. Ima ifịbeke ufụp.” (1 Cor. 13:4) Edieke isede n̄kpọ nte Jehovah esede, inyụn̄ itide ke kpukpru nnyịn idi nditọete, nnyịn idifịbeke nditọete nnyịn. Mbọm mmọ oyonyụn̄ anam nnyịn, sia Ikọ Abasi ọdọhọ ete: “Edieke ndido kiet okụtde ukụt, kpukpru ndido eken ẹtiene enye ẹkụt ukụt; mîdịghe edieke ẹnọde ndido kiet ubọn̄, kpukpru ndido eken ẹtiene enye ẹdara.” (1 Cor. 12:​16-18, 26) Edieke n̄kpọ ọfọnde nditọete nnyịn, ọfọn itiene mmọ idara utu ke ndifịbe mmọ. N̄kọ emeti ke Jonathan eyen Edidem Saul ikefịbeke David ufụp ke ini Jehovah ekemekde David edidem Israel utu ke ndimek enye. Enye akakam ọsọsọn̄ọ David idem. (1 Sam. 23:​16-18) Ndi nnyịn imekeme ndima nnyụn̄ mfọn ido ye nditọete nnyịn ukem nte Jonathan?

12. Ewe item N̄wed Abasi idin̄wam kpukpru owo ke ubon ẹbọ utịp oro Abasi enịmde ọnọ mmọ?

¹² Ke ini kpukpru owo ke ubon ẹnamde se Bible etịn̄de, emem ye inemesịt oyodu ke ubon, ubon ẹyenyụn̄ ẹkeme ndibọ utịp oro Jehovah enịmde ọnọ mmọ. Kop item oro apostle Paul ọkọnọde mme ubon ke esop Colossae mi: “Mbufo iban, ẹsụk ibuot ẹnọ mme ebe mbufo, nte odotde ke Ọbọn̄. Mbufo mme ebe, ẹka iso ẹma iban mbufo, ẹkûnyụn̄ ẹnen̄ede ẹyat esịt ye mmọ. Mbufo nditọ, ẹkop uyo ẹnọ mme ete ye eka mbufo ke kpukpru n̄kpọ, koro emi etịmde enem Ọbọn̄ esịt. Mbufo mme ete, ẹkûfiomo nditọ mbufo, mbak esịt ediduọ mmọ.” (Col. 3:​18-21) Edieke mme ebe, iban, ye nditọ ẹnamde item itien̄wed emi, n̄kpọ ayasan̄a ọfọn ke ubon mmọ.

13. Didie ke eyenete an̄wan ekeme ndinam ebe esie edikpono Jehovah?

¹³ Nso ke akpanam edieke ekerede ke ebe fo oro mîdịghe Ntiense Jehovah ikamake fi ọfọn? Ndi nditọhọ nnyụn̄ nyat esịt ye enye ayanam n̄kpọ ọfọn? Idem edieke enye anamde se afo oyomde ke ntak emi afịnade enye uwem, ndi oro ayanam enye edikpono Jehovah? Etie nte idinamke. Edi edieke okponode enye ke ntak emi enye edide ibuotufọk, emi ekeme ndinam emem odu, anam ẹtoro Jehovah, onyụn̄ ekeme ndinam ebe fo edikpono Jehovah. Afo ye ebe fo emekeme  ndibọ utịp oro Jehovah enịmde ọnọ mbufo.​—Kot 1 Peter 3:​1, 2.

14. Nso ke ebe oro n̄wan esie mîdịghe Ntiense Jehovah akpanam man n̄wan esie okpono enye?

¹⁴ Nso ke akpanam edieke ekerede ke n̄wan fo oro mîdịghe Ntiense Jehovah ikponoke fi? Ndi afo ndifiori n̄kpo nnyụn̄ nti enye kwa ini kwa ini ke imọ idi ibuotufọk ayanam enye enen̄ede okpono fi? Idinamke! Jehovah oyom fi ekpebe Jesus onyụn̄ edi ibuotufọk oro anamde n̄kpọ ke ima ima usụn̄. (Eph. 5:23) Jesus emi edide ibuot esop esinam n̄kpọ ke ima ima usụn̄ onyụn̄ enyene ime. (Luke 9:​46-48) Edieke afo ekpebede Jesus, emekeme ndinam n̄wan fo edikpono Jehovah.

15. Didie ke ebe okpowụt ke enye ama n̄wan esie?

¹⁵ Ikọ Abasi ọdọhọ mme ebe ete: “Ẹka iso ẹma iban mbufo, ẹkûnyụn̄ ẹnen̄ede ẹyat esịt ye mmọ.” (Col. 3:19) Ebe oro amade n̄wan esie esikpono n̄wan esie ke ndikpan̄ utọn̄ n̄kop ekikere esie nnyụn̄ nnam enye ọfiọk ke imada se enye etịn̄de ke akpan n̄kpọ. (1 Pet. 3:7) Kpa ye oro ebe mîdinamke kpukpru se n̄wan esie ọdọhọde, edieke enye akpan̄de utọn̄ okop ekikere n̄wan esie, emi ekeme ndin̄wam enye ebiere n̄kpọ emi edifọnde ye kpukpru owo ke ubon. (N̄ke 15:22) Eti ebe isinyịkke-nyịk n̄wan okpono enye, edu uwem esie esinam n̄wan okpono enye. Edieke ebe amade n̄wan ye nditọ esie, emi ekeme ndinam enem mmọ ndinam n̄kpọ Jehovah nnyụn̄ mbọ utịp oro Jehovah enịmde ọnọ mmọ.

16, 17. Nso idin̄wam fi okûyat esịt ke ini ete ye eka fo ẹnọde fi item?

¹⁶ Edieke afo edide uyen, ndi emesikere ke uwem fo in̄wan̄ake ete ye eka fo emi ẹdide Ntiense Jehovah m̀mê ke mmọ iyakke fi anam se akpamade ndinam? Emi ekeme ndinam fi ekere ke ndinam n̄kpọ Jehovah idinọhọ imọ ifụre. Edieke utọ n̄kpọ emi ọwọrọde fi, kûyak oro anam fi etre ndinam n̄kpọ Jehovah, sia ete ye eka fo ye nditọete ke esop ẹnen̄ede ẹma fi.

¹⁷ Edieke edide akanam ete ye eka fo inọhọ fi item, ndi ekpekere ke mmọ ẹma fi? (Heb. 12:8) Ekeme ndidi usụn̄ oro ete ye eka fo ẹtụnọde fi esinam esịt ayat fi. Utu ke ndiyat esịt mban̄a usụn̄ oro mmọ ẹsitụnọde fi, domo ndifiọk ntak emi mmọ mîyakke anam ndusụk n̄kpọ oro akpamade ndinam. Simụm idem kama, kûsusọp uyat esịt ke ini mmọ ẹnọde fi item. Ikọ Abasi ọdọhọ ete: “Owo ekededi eke afarade ke ikọ esie enyene ifiọk, owo mbufiọk onyụn̄ enyene ifụre ifure edu.” (N̄ke 17:27) Kpep ndinam n̄kpọ nte ọdiọn̄ọ-idem-owo; sisụhọde idem bọ item oro ete ye eka fo ẹnọde fi nyụn̄ nam se mmọ ẹdọhọde. Kûsufịna idem uban̄a usụn̄ oro mmọ ẹnọde fi item. (N̄ke 1:8) Inyeneke se inemde nte ndinyene ete ye eka emi ẹnamde n̄kpọ Jehovah. Mmọ ẹyom ndin̄wam fi enyene nsinsi uwem.

18. Ntak emi mûkpayakke n̄kpọ ndomokiet anam fi okûbọ utịp?

¹⁸ Idụhe se nnyịn ikemede ndimen ndomo ye utịp oro Jehovah edinọde nnyịn, edide ndikara ye Jesus ke heaven m̀mê ndidu uwem ke nsinsi ke Paradise isọn̄. Jehovah iditreke-tre ndinam se enye ọn̄wọn̄ọde. Kop se enye etịn̄de aban̄a Paradise isọn̄ mi: “Ifiọk Jehovah ọyọyọhọ isọn̄.” (Isa. 11:9) Jehovah eyekpep kpukpru owo oro ẹdidụn̄de ke Paradise n̄kpọ. Ifọnke iyak utọ n̄kpọ emi atak nnyịn. Ntre, kûfre kpukpru se Jehovah ọn̄wọn̄ọde ndinam nnọ fi, kûnyụn̄ uyak n̄kpọ ndomokiet anam fi okûbọ utịp oro enye enịmde ọnọ fi!