N̄kamana ke 1983. N̄kesidọn̄ọke ntịme ntịme-o. Edi ini ndide isua duop, mma ntọn̄ọ ndikop ọkpọsọn̄ ubiak ke ofụri idem mi. Ke n̄kpọ nte isua iba ama ekebe, mma ndemede usenubọk usen kiet n̄kemeke ndidaha nda, ntịme ntịme n̄kak ukot inyịghekede, odudu ndomokiet isịneke ke ukot mi mbiba. Tọn̄ọ usen oro, n̄kemeke ndisan̄a aba; udọn̄ọ oro ikayakke n̄kọri aba. Tutu mfịn emi nsụk ntie ekpri ekpri nte eyenọwọn̄.

Iban Ntiense Jehovah iba ẹma ẹdi ndikwọrọ ikọ nnọ mi. Owo mmọ kiet ekekere Florence. Ini mmọ ẹdide, mmesesịne kan̄a ke ufọk ọfiọn̄ ifan̄ n̄wọrọke an̄wa. Ekesidi esenowo ama edi nyom usụn̄ ndịbe, edi usen oro mma nyak iban oro ẹneme nneme ye ami. Ini mmọ ẹsụk ẹtịn̄de ẹban̄a Paradise, mma nti n̄kpọ emi n̄kokopde ini n̄kedide n̄kpọ nte isua ition. Ini oro, isụn̄utom kiet ama esito Suriname edi obio nnyịn ini kiet ke ọfiọn̄ edikpep ete mi Bible. Isụn̄utom oro ekekere Jethro. Jethro ama ọfọn uwem ye ami etieti. Mma mma enye tutu. Ete ete mi ye eka ete mi ẹma ẹsidụk mbono esop emi Mme Ntiense Jehovah ẹkesinịmde ke obio nnyịn. Ndusụk ini, mmọ ẹma ẹsimen mi ẹka. Ntre ini Florence obụpde m̀mê n̄kpama ndinen̄ede ndiọn̄ọ n̄kpọ mban̄a Paradise, mma ndọhọ enye ih.

Florence ama akasan̄a ye Justus ebe esie edikpep mi Bible. Ke ini mmọ ẹkụtde ke ndiọn̄ọke ndikot n̄wed, mmọ ẹma ẹkpep mi ndikot n̄wed. Ikebịghike, mma ntọn̄ọ ndikot n̄wed ke idemmi. Usen kiet Florence ye ebe esie ẹma ẹdọhọ mi ke ẹdọhọ mmimọ ikọkwọrọ ikọ ke Suriname. Ikodụhe owo ndomokiet ke Orealla se ikade iso ikpep mi Bible aba. Edi Jehovah ikefreke mi.

Ke mme Florence ẹma ẹkekpọn̄ Orealla, ikebịghike asiakusụn̄ kiet emi ekekerede Floyd ama edi. Enye okokụt mi ini enye osụk ọkwọrọde ikọ ke ufọk ke ufọk. Ini enye obụpde mi m̀mê n̄kpama ndikpep Bible, mma ntuak inua imam. Enye ama obụp mi m̀mê nso inam ntuak inua imam. Mma ndọhọ enye ke mma n̄kụre n̄wed Nso ke Abasi Oyom Oto Nnyịn?, ke mma nnyụn̄ ntọn̄ọ ndikpep n̄wed Ifiọk Oro Adade Osịm Nsinsi Uwem. * Mma ndọhọ enye se ikanam ntre ndikpep n̄kpọ. Floyd ama ekpep mi n̄wed Ifiọk oro ama. Edi ẹma ẹtiene ẹnọ enye ọkọkwọrọ ikọ ke itie en̄wen. Se iketịbede akpa akafiak etịbe oro; n̄kenyeneke owo se ikpepde mi Bible aba.

Edi ke 2004, ẹma ẹnọ akpan asiakusụn̄  iba ẹdi Orealla. Kiet ekekere Granville, kiet ekere Joshua. Nte mmọ ẹsụk ẹkwọrọde ikọ ke ufọk ke ufọk, mmọ ẹma ẹkụt mi. Ini mmọ ẹbụpde mi m̀mê n̄kpama ndikpep Bible, mma ntuak inua imam. Mma ndọhọ mmọ ẹkpep mi n̄wed Ifiọk tọn̄ọ ke akpa ibuot. Se ikanamde ndọhọ mmọ ntre edi ke n̄koyom ndise m̀mê mmọ ẹyekpep mi se ẹma ẹkekpekpep mi. Granville ama ọdọhọ mi ke ẹnịm mbono esop ke obio nnyịn. Ama ọdọn̄ mi ndika kpa ye edide ama ekpere isua duop n̄wọrọke ke ufọk. Granville ama emen mi etem ke n̄kpọitie mbon n̄kpọnnam ewere aka Ufọkmbono Obio Ubọn̄.

Nte ini akakade, Granville ama ọdọhọ mi nsịn enyịn̄ ke Ufọkn̄wed Utom Ukara Abasi. Enye ọkọdọhọ ete: “Mmọdiọn̄ọ ke ukemeke ndisan̄a, edi emekeme nditịn̄ ikọ. Usen kiet ọyọnọ utịn̄ikọ ofụri owo. Mmenịm ke ayanam.” Ikọ esie oro ama ọsọn̄ọ mi idem.

Mma ntọn̄ọ ndisan̄a ye Granville n̄kwọrọ ikọ. Edi ediwak usụn̄ ke obio nnyịn ikọfọnke se ẹwatde n̄kpọitie mbon n̄kpọnnam. Ntre mma ndọhọ Granville emen mi esịn ke wheelbarrow awat isan̄a ikwọrọ ikọ. Ama ọfọn etieti. Mma nna baptism ke April 2005. Ibịghike ke mma n̄kana baptism, nditọete ẹma ẹkpep mi ndise mban̄a n̄wed ke esop ye nte n̄kpesede mban̄a ukwak utịn̄ikọ ke Ufọkmbono Obio Ubọn̄.

Ekem n̄kpọ mmọn̄eyet ama etịbe ke 2007. Ete mi ama ọwọrọ ke ubom ọduọ odụk mmọn̄, fan engine ubom onyụn̄ ọnọ enye unan idiọk idiọk. Enye ama akpa ke usen ifan̄ ebede. N̄kpọ oro ama enyen̄e ubon nnyịn etieti. Granville ama edibọn̄ akam ye nnyịn onyụn̄ okot mme itie Bible ọdọn̄ nnyịn esịt. N̄kpọ mmọn̄eyet en̄wen ama etịbe ke isua iba ebede. Isan̄ enye emi, Granville akakpa ke mmọn̄.

Esop nnyịn ẹma ẹtua enye etieti; idem n̄kpọ nnyịn ikawakke-wak. Asan̄autom unamutom kiet kpọt okodu, ebiowo ikodụhe aba. N̄kpa Granville ama abiak mi ata etieti. Enye ekedi ata ufan mi. Tọn̄ọ n̄kọdiọn̄ọ enye, enye ama an̄wam mi n̄kpere Jehovah onyụn̄ ese aban̄a mi. Ami n̄kenyene ndikot ikpehe Enyọn̄-Ukpeme ke akpa mbono esop emi ẹkenịmde ke enye ama akakpa. Ke mma n̄kokot akpa ye udiana ikpehe, mma ntọn̄ọ nditua. Mma ntua tutu n̄kemeke ndimụm idem n̄kama, edidi se nsụhọrede ke mbot utịn̄ikọ.

Ama afiak ọtọn̄ọ ndinem mi ke idem ini nditọete ẹketode esop en̄wen ẹdin̄wam nnyịn ke Orealla. Esop Abasi ẹma ẹnyụn̄ ẹnọ akpan asiakusụn̄ kiet emi ekekerede Kojo edi esop nnyịn. Eka mi ye ekpri eyeneka mi erenowo ẹma ẹtọn̄ọ ndikpep Bible, ekem ẹna baptism; esịt ama enem mi etieti. Ndien ke March 2015, ẹma ẹmek mi asan̄autom unamutom. Ke ekpri ini ama ekebe, mma nnọ utịn̄ikọ ofụri owo. Usen oro, mma nti se Granville eketịn̄de ye ami ediwak isua emi ekebede ete: “Usen kiet ọyọnọ utịn̄ikọ ofụri owo. Mmenịm ke ayanam.” Mma ntuak inua imam, mmọn̄eyet onyụn̄ ọwọrọ mi ke enyịn.

Se ẹsisiode ke Edinam TV Mme Ntiense Jehovah anam mi n̄kụt nditọete emi mbiet n̄kpọ emi ọwọrọde mi onyụn̄ ọwọrọde mmọ. Kpa ye emi mmọ ẹbiomode ndo, mmọ ẹkeme ndinam ediwak n̄kpọ ẹnyụn̄ ẹkop inemesịt. Ami ke idemmi ke nsụk n̄kekeme ndinam ndusụk n̄kpọ. N̄kodụk utom usiakusụn̄ sia n̄koyom ndimen ofụri odudu emi nnyenede nnam n̄kpọ Jehovah. Ke September 2019, ẹma ẹdọhọ mi n̄kpọ emi mmen̄kodorike-dori enyịn ndikop! Ọfiọn̄ oro ke ẹkedọhọ mi ke ẹmek mi ebiowo ke esop nnyịn. Idi n̄kpọ nte mme asuanetop 40 ke esop nnyịn.

Mmenen̄ede n̄kọm ndima nditọete emi ẹkekpepde mi Bible ẹnyụn̄ ẹn̄wamde mi nnam n̄kpọ Jehovah. Edi Jehovah ke n̄kọm n̄kan sia enye ikefreke mi.