Paul: Ke November 1985, ima idụk ubomofụm man ika akpa itie emi akanade idu inam utom isụn̄utom ke Liberia ke West Africa. Esịt ama enem nnyịn eti-eti. Ubomofụm nnyịn ama ebehe kan̄a ke Senegal. Anne ama ọdọhọ ete: “Hour kiet kpọt ayak, idikụt idem ke Liberia!” Ekem ima ikop nte ẹtọtde: “Mbon emi ẹyomde ndika Liberia ana ẹwọrọ ke ubomofụm. Ke ẹn̄wana do ẹdomo ndibọ ukara. Ntre nnyịn idikemeke ndibehe do.” Tọn̄ọ usen oro tutu usen duop ẹbe, ikodụn̄ ye mme isụn̄utom ke Senegal. Ima isikpan̄ utọn̄ ikop mbụk emi otode Liberia. Ima ikop ke ẹdọn̄ okpo mme owo ke trọk ke trọk, ke ukara ẹdọhọ owo okûwọrọ ke ufọk mbubreyo, ke ẹma ẹtop mbon emi ẹkekụtde ke an̄wa mbubreyo.

Anne: Nnyịn idịghe mbon emi ẹdide ikpokop nte ẹbrede ibịt, imesịm do inikiet inikiet. Okịm, tọn̄ọ ke ekpri ẹkesikot mi Anne-Esịt-Ndịk. Ekpri n̄kpọ nte ndibe ke usụn̄ mbakara esinyenyek mi idem! Edi ima ibiere ke ọkpọkọm edi didie ke imọn̄ isịm ebiet emi esop Abasi ẹkenọde nnyịn ika.

Paul: Ami ye Anne ikamana ke edem usoputịn England. To ke edem nnyịn sịm edem mmọ ekedi n̄kpọ nte kilomita itiaita kpọt. Ekedi nnyịn mbiba ikụre ufọkn̄wed sekọndri, nnyịn itọn̄ọ utom usiakusụn̄. Ete ye eka mi ye eka Anne ẹkenam inam utom oro. Mmọ ẹma ẹnen̄ede ẹberi nnyịn edem yak inam utom ofụri ini inọ Abasi. Ini ndide isua 19, mma n̄kodu ke Bethel. Anne ama onyụn̄ etiene mi edidu do ke ima ikanam ndọ ke 1982.

Anne: Ima ima Bethel, edi ama esidọn̄ nnyịn ndikodu ke ebiet emi ẹyomde-yom mme ọkwọrọ-ikọ. Nte ikesinamde utom ye nditọ-ete ke Bethel emi ẹma ẹkededi isụn̄utom akanam enenen̄ede ọdọn̄ nnyịn ndika do. Ima isịn n̄kpọ oro ke akam kpukpru okoneyo ke ofụri isua ita. Ntre ini ẹdikotde nnyịn Ufọkn̄wed Gilead ọyọhọ klas 79 ke 1985, esịt ama enem nnyịn tutu! Ikokụre, ẹma ẹnọ nnyịn ika Liberia ke West Africa.

Paul: Ini isụk idude ke Senegal, akpa ini emi ikopde ke ubomofụm ọmọn̄ aka Liberia, ima idụk ika. Mme owo ẹkekọhọ nsia ke ubọk, owo ikosụk iyakke ẹwọrọ ke ufọk ke mbubreyo. Mme owo ẹkpeda ke urua ndien moto anam uyom inikiet inikiet, an̄wa ayatara. Kpukpru mbubreyo, ima isikot mme ufan̄ikọ ke n̄wed Psalm man esịt ana nnyịn sụn̄. Ima inen̄ede ima ebiet emi ẹkenọde  nnyịn ikanam utom Abasi. Anne ekedi isụn̄utom emi mînamke utom ke Bethel, ami n̄kanam utom ke Bethel ye John Charuk. a John ama odụn̄ ebịghi ke Liberia onyụn̄ enen̄ede ọdiọn̄ọ n̄kpọ aban̄a nditọ-ete. Mma n̄kpep n̄kpọ eti-eti nto enye.

Anne: Akadaha didie yak edi ekpri ini emi idude ke Liberia, nnyịn ima enye ntre? Nditọ-ete ẹkenam. Mmọ ẹma ẹma nnyịn eti-eti, ẹtie mbre mbre, ẹnyụn̄ ẹda ikpat iba ye Jehovah. Ima inen̄ede ikpere kiet eken. Ikeditie nte ubon. Uwak item mmọ ẹma ẹsọn̄ọ nnyịn idem. Ukwọrọ-ikọ ama enem akpa. Mûtiehe ke ufọk owo ubịghi nte enyene-ufọk oyomde, enye ayayat esịt! Oyokụt nte mme owo ẹdade ke inụk efak ẹneme Ikọ Abasi. Emekeme ndisan̄a n̄kesịn uyo, owo itọhọke. Mbon emi ikesikpepde Bible ẹma ẹwak tutu ọsọn̄ nnyịn ndikpep Bible ye kpukpru mmọ. Mfịna ekedi oro-o. Edi mfịna enye oro ekenenem nnyịn!

Paul: Ke emem ama okodu ke isua inan̄, ke 1989 ekọn̄ ama etịbe, kpukpru n̄kpọ ọtọ etịmede. Ke July 2, 1990, mme itie emi ẹkekande Bethel ẹkụk ẹkedisịne ke ubọk mbon emi ẹken̄wanade ẹyom ndibọ ukara. Ke ofụri ọfiọn̄ ita, nnyịn ikokopke n̄kpọ ndomokiet ito owo ke idụt en̄wen, esịnede mbonubon nnyịn ye ibuot itie-utom Mme Ntiense Jehovah. En̄wan, ntịme, ndutịme okodu ke kpukpru ebiet, ẹdan̄ iban ke n̄kanubọk, udia onyụn̄ anana. Kpukpru oro ama aka iso ke isua 14 onyụn̄ esịm kpukpru ebiet ke idụt oro.

Anne: Mme owo ke ndusụk ekpụk ẹma ẹn̄wana ye mbon ekpụk en̄wen ẹnyụn̄ ẹwot mmọ. Mbon en̄wan emi ẹkesan̄ade ye ikpọ ọdiọn̄ọ-idem ikan̄ ẹnyụn̄ ẹsịnede esen esen ọfọn̄ ẹkebiet ntan ke efak, ẹsidụk ufọk kiet kiet, se mmọ ẹmama do, ẹtan̄. Ndiwot owo eketie ndusụk mmọ nte ndiwot unen. Ikokop ntre ke inua mmọ. Ke itie emi mmọ ẹkenịmde n̄kpọ ke usụn̄ ẹda ẹkpeme, okpo owo ọkọyọyọhọ, ẹtan̄ ẹkọk nte ẹkọk ifia. Ndusụk mme itie ntre ẹma ẹdu ẹkpere n̄kọk itie-utom. Ẹma ẹwot ndusụk nditọ-ete nnyịn, ndima isụn̄utom nnyịn iba ẹkesịne ke ibat oro.

Nditọ-ete ẹma ẹnam n̄kpọ emi ekedide edue-ukot-akpa-itọn̄. Mmọ ẹma ẹsidịp mbon ekpụk en̄wen emi mbon ntịme ẹkesan̄ade ẹyom ndimụm n̄wot. Mme isụn̄utom ye mbon Bethel ẹkenam ukem oro. Ke Bethel, ndusụk nditọ-ete nnyịn emi ẹkefehede ẹkpọn̄ ufọk ẹkesina ke ufọkisọn̄, mbon en̄wen ẹdụn̄ ye mbonubon Bethel en̄wen ke mme ubet emi ẹkedude ke enyọn̄. Ami ye ebe mi ye owo itiaba efen ikodụn̄ ke ubet nnyịn.

Paul: Kpukpru usen, mbon en̄wan ẹma ẹsidomo ndidụk n̄kọk itie-utom ndise m̀mê ke idịp mme owo do. Mmọ ẹma ẹdi ntre, owo iba ẹyewọrọ ẹka inua-otop an̄wa oro, owo iba ẹda ke window ẹse se ikade iso. Edieke mbon emi ẹkewọrọde ẹka ẹbonde ubọk mbiba ke iso, ọwọrọ mfịna idụhe. Edi mmọ ẹkpewan̄ ubọk ke edem,  ọwọrọ mbon en̄wan oro ẹdi ntịme. Mbon emi ẹdade ke window ẹyesọsọp ẹtan̄ nditọ-ete nnyịn ẹkedịp.

Anne: Ke ediwak urua ama ekebe, mbon ntịme en̄wen emi ẹkesan̄ade ye ifịk ẹdi ẹma ẹdiberi nditọ-ete oro ẹduọk, ẹdụk esịt Bethel. Mma n̄kọbi idemmi ye sista kiet nsịn ke itie uyere mmọn̄. Kọbọd emi okodude do ama enyene ekpri itie emi ẹkemede ndidụk ndịbe, sista oro ama odụk afaha do. Mbon en̄wan oro ẹma ẹdọk ẹdi ubet enyọn̄ emi n̄kodude, ẹkama mme otop-idem-ikpọn̄-ikan̄. Mmọ ẹma ẹtuak udọk nnyịn nte ẹyom ndiwowụbede. Paul ama ekpe mmọ ubọk ete ẹkûdụk ẹdi ke ndu ke itie uyere mmọn̄. Ini mberide itie emi sista oro ekedịbede, n̄kpọ oro ama anam uyom, ama onyụn̄ ada mi ini mbemiso n̄kemede nditan̄ se n̄kadade ndịp sista oro mbon. Mma nnịm ke mbon en̄wan oro ẹyekere m̀mê nso ke nnanam. Ndịk ama anam mi tutu ofụri idemmi enyek. Ndinam didie mberede usụn̄ ye utọ nnyekidem emi? Mma mbọn̄ akam ke esịt nnọ Jehovah nnyụn̄ n̄kpe enye ubọk nte an̄wam mi, ekem mberede usụn̄ nnyụn̄ n̄kọm mmọ sụn̄sụn̄. Owo kiet ama eberi mi osio ke usụn̄, ebe nnennen aka ebiet emi sista oro ekedịbede, eberede kọbọd oro ọtọn̄ọ ndisuan se n̄kobonde do. Ama akpa enye idem nte enye mîkekwe n̄kpọ ndomokiet do. Enye ye mbon mmọ eken ẹma ẹdụk mme ubet eken, ẹnyụn̄ ẹdọk ekpri ubet emi okodude ke ọkọm ẹyom mme owo. Edi mmọ ikekwe owo ndomokiet.

Paul: Ke ediwak ọfiọn̄, udia emi okodude se idiade ekedi ata ekpri. Edi Ikọ Abasi ama enịm nnyịn uwem. Akam usenubọk ke Bethel ekedi n̄kukụre “udia usenubọk” emi ikesidiade, ima inyụn̄ ima nte enye ekesisọn̄ọde nnyịn idem yak iyọ.

Ekpedi ata ata udia ye mmọn̄ ama okụre fap-fap tutu edi se nnyịn ye mbon eken ikpọn̄de Bethel, ana-edi ẹkpekewot kpukpru mbon emi ẹkedịbede do. Ndusụk ini, ini emi Jehovah ekesinamde inyene se ikoyomde ye nte ikesisan̄ade inyene ekedi utịben̄kpọ. Jehovah ama anam inyene se idade idu uwem, onyụn̄ anam esịt ana nnyịn sụn̄.

Ekedi eyo esiere, ntre ke mme owo ẹkenen̄ede ẹnana idotenyịn. Edi akpanikọ ke akanam inyene idotenyịn. Ediwak ini, nditọ-ete nnyịn irenowo ye iban ẹma ẹsifehe man ẹnyan̄a itọn̄uwem mmọ. Edi mmọ ẹkekaka iso ẹbuọt idem ye Jehovah, esịt onyụn̄ ana mmọ sụn̄ kpa ye kpukpru mfịna emi ẹkesịmde mmọ. Ndusụk mmọ ẹkedọhọ ke se ikọwọrọde mmimọ ke ini ekọn̄ oro “eketịm mmimọ idem eben̄e akwa ukụt.” Mbiowo ye mme brọda nnyịn emi ẹkedide n̄kparawa ẹma ẹnyene uko ẹnam se ẹkekeme ẹn̄wam nditọ-ete. Nditọ-ete nnyịn ẹma ẹfehe ẹkpọn̄ ufọk ẹka itie en̄wen, mmọ ẹma ẹsin̄wam kiet eken, ẹtọn̄ọ ukwọrọ-ikọ do, se ededi emi mmọ ẹkụtde ke esịt akai, ẹmen ẹbọp Ufọkmbono Obio Ubọn̄. Ini oro, mbono esop ye ukwọrọ-ikọ ẹkesinam nditọ-ete nnyịn ẹnyene idotenyịn onyụn̄ ọsọn̄ọ mmọ idem. Ima imen udia ye mme n̄kpọ ntre isọk mmọ, ama esinem nnyịn ndikop nte mmọ ẹdọhọde ẹnọ mmimọ ekpat ukwọrọ-ikọ utu ke ọfọn̄. Mbon emi ẹkefụhọde, emi ata enyenendịk n̄kpọ okonyụn̄ etịbede ọnọ mmọ ke ntak ekọn̄ oro ẹma ẹma ndikpan̄ utọn̄ n̄kop eti mbụk. Ama esikpa mmọ idem ndikụt nte nditọ-ete nnyịn ẹkopde inemesịt inyụn̄ itịmekede esịt. Nditọ-ete nnyịn ẹkeyama nte un̄wana kpa ye ekịm ye unana idotenyịn okofụkde mme owo ke idụt oro. (Matt. 5: 14-16) Ifịk emi mmọ ẹkesịnde ẹkwọrọ ikọ ama anam ndusụk mbon en̄wan emi ẹkedide ata mbon ibak, ẹkabade ẹdi Mme Ntiense.

Paul: Ndusụk ini akana ifehe ikpọn̄ idụt oro. Ikata, imọkpọn̄ ke ekpri ini ekem ifiak inyọn̄ idi. Enyene ini emi ikọkpọn̄de ke ofụri isua kiet. Enye oro eketịbe ikaba. Se se sista kiet emi edide isụn̄utom eketịn̄de ndiwụt nte eketiede nnyịn ke idem mi: “Ẹkekpep nnyịn ke Gilead ẹte isịn esịt ke ebiet emi ẹnọde nnyịn ikodu inam n̄kpọ Abasi, ima inyụn̄ inam ntre. Ntre nnyịn ndikpọn̄ nditọ-ete nnyịn ke utọ ini mfịna emi etie nte owo asiak nnyịn ikpanesịt owụbede esịt osio.” Enem nnyịn eti-eti nte ikekemede ndidu ke mme idụt en̄wen emi ẹkekperede Liberia n̄n̄wam nditọ-ete nnyịn ke esịt Liberia.

Anne: Ke May 1996, ami ye ebe mi ye owo iba en̄wen ima idụk moto n̄kọk itie-utom iyom ndiwat n̄ka ebiet en̄wen ke obio oro, emi ntịme mîkenen̄ekede isọn̄ ubọk. To ke edem nnyịn sịm do ekedi kilomita 16. Ediwak n̄wed emi ẹkewetde mme akpan n̄kpọ ẹban̄a utom nnyịn ke Liberia mmọdo ẹkedọn̄ọ ke esịt moto oro. Ndondo emi iyomde ndidaha, en̄wan ama etịbe ke edem nnyịn oro. Mbon en̄wan emi esịt okofụtde ẹma ẹtop ikan̄ ke enyọn̄ ẹdọhọ ituak ida, ẹdụri nnyịn owo ita ẹsio ke moto oro, ẹmen moto ye Paul ke esịt ẹwat ẹdaha. Ima idop ida oro nte ubobot itiat. Ekebiet idadaba. Edi itise, idikụt Paul asan̄ade edi ke otu-owo, iyịp ke ọwọrọ enye ke ọkpọ-iso. Ke ini ndutịme oro, ikekere ke ẹma ẹtop enye. Edi, ima idikere ke ekpedi ekedi ntre, enye ikpekemeke ndisan̄a ke ukot esie ndi! Se idude edi ke mbemiso ẹkenụkde enye ẹsio ke moto oro, owo en̄wan kiet ama ofụt ubọk ọtọ enye iso. Ima ikọm Abasi ke unan emi ẹkenọde enye ikokponke.

Moto ekọn̄ emi esimende mme owo mmọdo akada ekpere, mme owo emi ndịk ama okowot ẹdọn̄ọ ẹyọhọ. Ima ifrọ ikọn̄ọ ke mben, iyom se imụmde ikama. Itise draiva awat adaha inikiet inikiet. Ayak nsịn̄ ikpọkọkọn̄ọde ididuọ. Ima ikpe enye ubọk ite atuak ada, edi ndịk ikayakke. Ima ikọn̄ọ do tutu idisịm ebiet emi ẹketuakde ẹda. Ikosụhọde, ubọk ama akai nnyịn; idem ke atuak nnyịn ke ntak ndịk.

Paul: N̄kukụre se owo okokụtde nnyịn ke idem ekedi mbabari n̄waha ọfọn̄. Ima imenede enyịn ise idem nnyịn, akpa nnyịn idem nte nnyịn mîkakpaha. Ikana ke mbiet ikpere helikopta emi itiat ikan̄ ama eketịp, enye etie nte akpada nnuenubọk otụk ọmọn̄ owụre. Helikopta oro ekemen nnyịn edem usen aka Sierra Leone. Ima ikọm Abasi nte nnyịn mîkakpaha. Edi ima ikpa ekikere m̀mê n̄kpọ etetie didie ye nditọ-ete nnyịn ke Liberia.

Anne: Ini isịmde Bethel ke Freetown ke Sierra Leone n̄kpọ ikanamke nnyịn, ẹma ẹnyụn̄ ẹtịm ẹse nnyịn enyịn. Edi se mmen̄kodorike enyịn ama etịbe. Ekesidi mma ntie ntie, ndiọi n̄kpọ emi ẹketịbede ke Liberia ẹdụk mi ekikere inikiet inikiet. Uwemeyo, ndịk ama anam idem inaha mi sụn̄, sia okosụk etie mi nte n̄kpọ ọmọn̄ etịbe. Ibuot okoyoyon̄ mi, n̄kemeke ndikere n̄kpọ ọfọn. Kpukpru n̄kpọ ẹketie mi ndap ndap. Okoneyo, nyotop ndemede inikiet inikiet, ndisi ibibiak ofụk mi idem, nyenyek tuak-tuak-tuak. Eketie mi nte idiọk n̄kpọ ọmọn̄ etịbe idaha-oro. Ibifịk ayababa mi, Paul oyomụm mi akama ọbọn̄ akam ye ami. Ima isikwọ mme ikwọ Obio Ubọn̄ tutu idem odobo mi ana. Eketie mi nte ibuot oyom ndibebe mi, ke ndikemeke ndinam utom isụn̄utom aba.

Ndifreke se iketịbede ke oro ama ekebe. Kpa urua oro, ima ibọ magazine iba. Kiet ekedi Ẹdemede! Ikọmbakara eke June 8, 1996, emi ekenyenede ibuotikọ emi, “Coping With Panic Attacks.” Ibuotikọ oro ama anam se ikọwọrọde mi an̄wan̄a mi. Ọyọhọ iba ekedi Enyọn̄-Ukpeme May 15, 1996, emi ekenyenede ibuotikọ emi, “Mmọ Ẹda Odudu Mmọ Ẹto M̀mọ̀n̄?” Ke Enyọn̄-Ukpeme oro, ndise ọfọn̄ekpo emi mba ama ekesịbe odu. Ibuotikọ oro ọkọdọhọ ke ọfọn̄ekpo esikeme ndika iso ndia udia nnyụn̄ mfe, idem ke n̄kpọ ama ekesịbe enye mba idiọk idiọk. Ke ukem usụn̄ oro, spirit Jehovah ekeme ndin̄wam nnyịn ika iso in̄wam mbon en̄wen, idem ke n̄kpọ emi eketịmerede nnyịn idiọk idiọk ama eketịbe. Ibuotikọ iba emi Jehovah akanamde ẹwet do ama ọsọn̄ọ mi idem, okonyụn̄ edi ke nnennen ini. (Matt. 24:45) Mma nsikot n̄kpọ mban̄a n̄kpọ oro nnyụn̄ nnyene ebiet emi n̄kesitan̄de mme ibuotikọ emi ẹnemede n̄kpọ oro mbon. Mmọ ẹma ẹn̄wam mi eti-eti. Nte ini akakade, mme n̄kpọ emi ẹkesidụkde mi ekikere ẹtịmede mi ikedinen̄ekede ifịna mi aba.

Paul: Ini ekededi emi ifiakde inyọn̄ Liberia, esịt ama esinem nnyịn. Utịt utịt 2004 ekedi n̄kpọ nte isua 20 tọn̄ọ nte ikodu ke Liberia inam n̄kpọ Abasi. Ekọn̄ ama etre. Ẹma ẹnyụn̄ ẹtọn̄ọ ndinam ndutịm yak ẹbọp n̄kọk itie-utom. Edi itise, ẹdọhọ idika ikanam n̄kpọ Abasi ke ebiet en̄wen.

Ama ọsọn̄ ye nnyịn eti-eti. Ima inen̄ede ikpere nditọ-ete nnyịn ke Liberia. Idinanam didie utọ n̄kpọ emi? Ini  ikọkpọn̄de mbonubon nnyịn emi ikamade eti-eti ika Gilead, ima ikụt nte Jehovah ọdiọn̄de nnyịn ke ntak emi ikayakde idem isịn enye ke ubọk. Ke ntak oro, ima inyịme obufa utom emi ẹkenọde nnyịn. Ẹkedọhọ ika Ghana emi mîkoyomke usụn̄ ikpọn̄ Liberia.

Anne: Ima itua eti-eti ini ikpọn̄de Liberia. Oro akanam idem akpa nnyịn ini akamba brọda kiet emi ekenyenede ọniọn̄ onyụn̄ ekerede Frank ọkọdọhọde nnyịn: “Ana mbufo ẹfre ẹban̄a nnyịn!”. Ekem enye ama etịn̄ se ikọ esie ọkọwọrọde ete: “Imọdiọn̄ọ ke tutu amama mbufo idikemeke ndifre nnyịn. Edi ana ẹsịn ofụri esịt mbufo ke obufa utom emi ẹnọde mbufo. Jehovah ọnọ mbufo utom oro, ntre ẹnen̄ede ẹma nditọ-ete do.” Ikọ oro ama ọsọn̄ọ nnyịn idem ndikọtọn̄ọ uwem ke ebiet emi ediwak owo mîdiọn̄ọke nnyịn, emi kpukpru n̄kpọ ẹditiede nnyịn obufa obufa.

Paul: Edi ikebịghike ima idima nditọ-ete nnyịn ke Ghana. Mme Ntiense Jehovah do ẹma ẹwak eti-eti. Mmọ ẹma ẹsọn̄ọ ẹda ye Jehovah ẹnyụn̄ ẹnen̄ede ẹbuọt idem ye enye. Ima ikpep ediwak n̄kpọ ito mbufa ufan nnyịn oro. Ke ima ikodu ke Ghana isua 13, n̄kpọ n̄kpa-idem efen ama etịbe. Ẹma ẹdọhọ idika n̄kọk itie-utom East Africa ke Kenya ikodu inam n̄kpọ Abasi. Kpa ye edide nditọ-ete nnyịn ke Liberia ye Ghana ẹma ẹdọn̄ nnyịn itọn̄ eti-eti, ima isọsọp itọn̄ọ ndima nditọ-ete nnyịn ke Kenya. Isụk idodu ke akamba efakutom emi ẹyomde-yom mme ọkwọrọ-ikọ inam n̄kpọ Abasi.

Anne: Ke uwem mi, mme n̄kpọ ẹnyen̄e mi, mme n̄kpọ ẹnyụn̄ ẹnyek mi idem. Ikpodụn̄ ke ebiet emi edide edue-ukot-akpa-itọn̄, mîdịghe edi se ẹkọhọde nsia ke ubọk kpukpru ini, ekeme ndinam nnyịn idọn̄ọ, mîdịghe ima itie itie, nnyịn idịghe. Jehovah isikpanke utọ mme n̄kpọ oro ndisịm nnyịn-o. Se ndodu emi, n̄kpokop nte ẹtopde ikan̄ m̀mê n̄kop nte bọm ọduọde, idịbi obụhọde mi, ubọk odoro mi ibikpai. Edi mmekpep ndida kpukpru se Jehovah anamde ọnọ mi nsọn̄ọ idemmi idem, ndien oro esịne un̄wam emi nditọ-ete ẹsin̄wamde mi. N̄kpọ en̄wen edi ke mmokụt ke ima ika iso ikpep Ikọ Abasi, ibọn̄ akam, ika mbono esop, inyụn̄ ikwọrọ ikọ, ke Jehovah ayan̄wam nnyịn isọn̄ọ idu ke itie emi enye ọdọhọde idu inam n̄kpọ inọ enye.

Paul: Ndusụk owo ẹkeme ndibụp ẹte: “Ndi amama utọ utom emi osụk anamde mi?” Idụt ekeme ndiye, edi mfịna ekeme nditịmede idụt oro enye akabade ebiet emi ekemede ndida owo ibuot. Ntre, nso ke ima ikan idụt emi idude inam n̄kpọ Abasi? Edi ndima nditọ-ete nnyịn emi ẹtiede nte ubon nnyịn, emi nnyịn mîdaha ibre mbre. Kpa ye emi kpukpru nnyịn mîtoho ukem itie, inyene ekikere kiet. Ikekere ke Jehovah ọdọn̄ nnyịn ikọsọn̄ọ mmọ idem, edi se idude edi ke mmọ ẹkabade ẹsọn̄ọ nnyịn idem.

Ini ekededi emi ikade obufa idụt, nditọ-ete do ẹsitie nte mbonubon nnyịn. Utịben̄kpọ emi ikụtde nte Jehovah anamde ke eyo nnyịn emi edi oro. Adan̄a nte ikade iso isịne ke esop Abasi, imenyene ubon-o, imenyene ebiet emi idụn̄de idu ke emem. Imenịm ke edieke ikade iso iberi edem ke Jehovah, ke enye ọyọsọn̄ọ nnyịn idem yak iyọ se ededi.​—Phil. 4:13.