NDI esisọn̄ fi ndikpep Bible kpukpru urua? Ndi ndusụk ini esitie fi nte inemke fi ndikpep? Esitie kpukpru nnyịn ntre n̄ko ndusụk ini. Edi kere ban̄a mme n̄kpọ en̄wen emi isinamde kpukpru ini, utọ nte ndiyere mmọn̄. Uyere mmọn̄ esịne utom. Ọyọduọk mmọn̄ ke idem, ada kusa otụk, onyụn̄ adarade. Ama okụre, oyokop nte enemde fi ntem ke idem! Ndikpep Bible etie nte owo ndida “ikọ Abasi nte mmọn̄ [nyet]” idemesie. Ama ekpep ama, eyenem fi ukem nte esinemede owo enye ama eyere mmọn̄ ama. (Eph. 5:26) Se ndusụk n̄kpọ emi ẹkemede ndin̄wam fi mi:

• Mek akpan ini emi edisikpepde n̄kpọ. Owo nditie ke idemesie n̄kpep Bible esịne ke “se idide akpan n̄kpọ ikan” emi anade Christian anam. (Phil. 1:10) Man udûfre ini emi edikpepde n̄kpọ, wet ini oro ke ekpri pepa dian ke ebiet emi edisọpde ikụt, utọ nte ke fridge fo m̀mê ke obukpọk emi esidiande mme n̄kpọ ntre emi oyomde nditi. Mîdịghe n̄kpọ en̄wen emi ekemede ndin̄wam fi edi afo ndinam n̄kanika ke fon fo man edi ekpri ini mbemiso ini ukpepn̄kpọ fo, enye amia onyụn̄ eti fi.

• Nam se idin̄wamde fi ekeme ndisịn ekikere ke se ekpepde. Ewe idin̄wam fi esịn ekikere ke se ekpepde, ndi edi nditie mbịghi n̄kpep ini kiet mîdịghe ekpep idaha-emi, ekpri ini afo afiak ekpep? Afo enen̄ede ọdiọn̄ọ nte n̄kpọ etiede ye afo. Ke ntak oro, mek se idifọnde ye afo, edide nditie anyan ini n̄kpep m̀mê ndikpep n̄kpri n̄kpri. Ekpesịm ini emi edikpepde n̄kpọ enye ọmiọn̄ọ fi, emekeme ndibiere ndikpep ke minit duop kpọt. Ekpekpep ke minit duop oro kpọt, ayadia ufọn akan ekpedi ukûkpepke-kpep. Ama ọtọtọn̄ọ ndikpep ntem, ekeme ndinem fi tutu afo ọdọhọ yak ikpep ika.​—Phil. 2:13.

• Babak mek se edikpepde. Ekpedi ama osụhọde etie oyom ndikpep n̄kpọ, ini oro ndien ke afo ọtọn̄ọ ndikere m̀mê idikpekpep nso, ekeme ndidi udûdaha ini emi okosiode enịm do ndida n̄kpep n̄kpọ unam se idide akpan n̄kpọ ikan. (Eph. 5:16) Emekeme ndiwet mme n̄kpọ emi akpamade ndikpep enịm. Ini ekededi emi mbụme emi esifịnade fi odụkde fi ekikere, wet nịm. Ndien ke utịt ukpepn̄kpọ kiet kiet, emekeme ndiwet mme n̄kpọ efen esịn ke otu mme n̄kpọ emi edimade ndikpep.

• Ekpedi se okpụhọde n̄kpọ, kpụhọ. Kûyak ndikpep n̄kpọ etie nte se ẹsidọhọde ẹte, ‘Se ẹma ẹkewewet, ẹwet; owo ikpụhọkede.’ Ekpedi se adiande m̀mê osiode urua ke ini, nam ntre. Okponyụn̄ edi se okpụhọde se okoyomde ndikpep, kpụhọ. Se idide akpan n̄kpọ ikan edi afo ndikpep n̄kpọ kpukpru urua, idịghe ini emi ekpepde, m̀mê emetie ekpep yak ebịghi m̀mê ibịghike, m̀mê nso ke onyụn̄ ekpep.

Imesinen̄ede idia ufọn ima ikpep n̄kpọ kpukpru urua. Imesitetịm ikpere Jehovah, ikpep ndibiere n̄kpọ yak ọfọn, inyụn̄ isọn̄ọ idem nnyịn idem.​—Josh. 1:8.