Ndi akpama ndinen̄ede ndia ufọn ama etie ke idemfo ekpep n̄kpọ? Emekeme ndidomo ndinam n̄kpọ ifan̄ emi idinemede mi man ekeme ndisịn esịt ke se ekpepde:

• Mek eti itie. Domo ndiyom ebiet emi asanade, n̄kpoduoho iwakke ikaha, un̄wana onyụn̄ odu man ekeme ndikụt se okotde yak ọfọn. Emekeme nditie ke okpokoro m̀mê akpakaha, mîdịghe emek itie ke an̄wa emi edifọnde fi ke idem etie.

• Yom itie emi ekemede ndidu ikpọn̄. Jesus ekemek ndibọn̄ akam “tụhi-tụhi usenubọk” ke “ndobo ndobo ebiet.” (Mark 1:35) Edieke mûkwe ebiet emi edide sụk fi sụk idem, emekeme ndidọhọ mbonubon mbufo m̀mê mbon emi odụn̄de kiet ini emi edikpepde n̄kpọ, onyụn̄ ọdọhọ mmọ mbọk ẹkûtịmede fi ini oro.

• Ka iso sịn ekikere ke se ekpepde. Kûyak n̄kpọ ndomokiet etịmede fi. Ekpedi akama fon m̀mê tablet ekpep n̄kpọ, nịme uyo esie mîdịghe afo esịn enye ke airplane mode man iditịmede fi. Ndien edieke edide nte osụk ekpepde n̄kpọ afo eti se okoyomde ndinam, men ekpri n̄wed wet nịm man ama okụre afo akanam. Edieke ọsọn̄de fi ndisịn ekikere ke se osụk ekpepde, daha da san̄a ekpri mîdịghe nen̄ede idem.