STEPHEN akada ke iso mbon ibak ke Sanhedrin. Mme ebiereikpe 71 ẹkesidu ke Sanhedrin emi ekedide n̄kponn̄kan esopikpe ke Israel, ndien mmọ ẹma ẹsịne ke otu mme ọwọrọiso owo ke Israel. Caiaphas emi ekedide akwa oku ọkọdọhọ mmọ ẹbono. Kpa Caiaphas emi eketie ibuot ini ẹkebierede ikpe n̄kpa ẹnọ Jesus ọfiọn̄ ifan̄ emi ekebede. (Matt. 26:​57, 59; Utom 6:​8-12) Nte mme ntiense nsu emi mmọ ẹketan̄de ẹdi ẹdoride Stephen ikọ, mbon Sanhedrin ẹma ẹkụt n̄kpọ emi akakpade mmọ idem. Mmọ ẹma ẹkụt ke iso Stephen “ebiet iso angel.”​—Utom 6:​13-15.

Nso ikanam esịt ana Stephen sụn̄, ndịk okûnyụn̄ unam enye ini enye adade ke iso utọ mbon ibak oro? Edisana spirit ama an̄wam Stephen enen̄ede esịn idem anam utom oro ẹkenọde enye mbemiso ẹkemụmde enye ẹka Sanhedrin. (Utom 6:​3-7) Ini ẹkpede ikpe esie, kpa edisana spirit oro akanam esịt ana enye sụn̄ onyụn̄ anam enye eti se enye ekekpepde. (John 14:16) Nte enye osụk etịn̄de ikọ afan̄a idem uko uko, edisana spirit ama an̄wam enye eti itien̄wed 20 m̀mê akande oro ke N̄wed Abasi Usem Hebrew. Ẹwet mbụk emi ke Utom ibuot 7. (John 14:26) Stephen ama ọdọdiọn̄ ọbuọt idem ye Abasi ini enye okụtde Jesus ke n̄kukụt nte adade ke ubọk nnasia Abasi.​—Utom 7:​54-56, 59, 60.

Ẹkeme ndisịn nnyịn ndịk ke idem usen kiet usen kiet ẹnyụn̄ ẹkọbọ nnyịn. (John 15:20) Edisana spirit ekeme ndin̄wam nnyịn edieke isikotde Bible kpukpru usen inyụn̄ isịnde idem ikwọrọ ikọ. Oro ayanam ika iso iyọ ukọbọ, onyụn̄ anam esịt ana nnyịn sụn̄.​—1 Pet. 4:​12-14.