OWO emi esitịn̄de nte eyo editiede akama ukwakutom okụt ke idiọk oyobio ọmọn̄ etịbe ke mîbịghike ke ikpehe emi ata ediwak owo ẹdụn̄de. Sia enye mîyomke n̄kpọ anam mmọ, enye anam se enye ekekeme man ababak odụri mme owo utọn̄.

Ukem ntre n̄ko, Jehovah ke odụri ubonowo utọn̄ aban̄a “oyobio” emi ọdiọkde akan se ededi emi ẹkpekopde ke mbụk n̄kpọntịbe ẹban̄a nte eyo editiede. Didie ke enye anam emi? Nso inam inen̄ede inịm ke enye ọnọ mme owo ini man ẹnam n̄kpọ ẹban̄a ntọt emi enye ọnọde mmọ? Man ikụt ibọrọ, ẹyak ibem iso ineme ndusụk ini emi Jehovah okodụride mme owo utọn̄ ke eyo Bible.

Ke eyo Bible, Jehovah ama odụri mme owo utọn̄ aban̄a nsio nsio “oyobio” m̀mê ufen emi enye okoyomde ndinọ mbon emi ẹkekoide-koi ẹtre ndinịm ibet esie. (Jer. 30:23) Ke kpukpru ini oro, enye ama esibak odụri mbon emi ẹkesọn̄de ibuot ye enye utọn̄, onyụn̄ ọdọhọ mmọ se mmọ ẹkpenamde man ẹkop uyo esie. (2 Ndi. 17:12-15; Neh. 9:29, 30) Man enye an̄wam mme owo ẹkabade esịt, enye ekesidọn̄ nti mme asan̄autom esie mi ke isọn̄ ẹkedụri mmọ utọn̄ ẹban̄a se enye aduakde ndinam mmọ ẹnyụn̄ ẹn̄wam mmọ ẹkụt ke oyom mmọ ẹsọsọp ẹnam n̄kpọ.—Amos 3:7.

Noah edi owo kiet emi Jehovah akadade odụri mme owo utọn̄. Ke ediwak isua, Noah ama enyene uko odụri mbon emi ẹkenamde oburobụt n̄kpọ ye mbon afai utọn̄ ke eyo esie aban̄a Ukwọ emi edisịmde ofụri isọn̄. (Gen. 6:9-13, 17) Enye ama onyụn̄ ọdọhọ mmọ se mmọ ẹkpenamde man ẹbọhọ. Enye ndikesịn idem n̄kwọrọ ikọ nnọ mmọ akanam ẹdikot enye “ọkwọrọ edinen ido.”—2 Pet. 2:5.

Kpa ye ofụri se Noah eketịmede, mbon eyo esie ikamaha ndinam se Abasi ọkọdọn̄de enye ọkọdọhọ mmọ. Mmọ ẹma ẹwụt ke mmimọ ibuọtke idem ye Abasi ke usụn̄ ndomokiet. Ke ntak oro mmọ ẹma ẹkpan̄a ini “ukwọ [ekedide] edikpọri mmọ kpukpru efep.” (Matt. 24:39; Heb. 11:7) Nte nsobo mmọ akasan̄ade ekpere, mmọ ikpekekemeke ndidọhọ ke Abasi ikodụrike mmimọ utọn̄.

Enyene ini en̄wen emi Jehovah okodụride mme owo utọn̄ esisịt ini mbemiso “oyobio” ufen esie ọtọn̄ọ. Kpa ye oro, enye ama okụt ete ke mbon emi n̄kpọ oro ebehede ẹnyene ini oro ekemde mmọ ndinam n̄kpọ mban̄a ntọt emi enye ọnọde mmọ. Ke uwụtn̄kpọ, enye ama esibak ọnọ ntọt ini enye akanamde Ufen Duop ẹsịm nditọ Egypt. Ini Jehovah okoyomde ndida edịm itiat nnọ mmọ ọyọhọ ufen itiaba, enye ama ọdọn̄ Moses ye Aaron ẹkedụri Pharaoh ye mme asan̄autom esie utọn̄. Sia edịm itiat akanade ọtọn̄ọ edem usen oro, ndi Jehovah ama ọnọ mmọ ini ekem idahaoro ndiyom itie emi mmọ ẹdidịbede ibọhọ? Bible ọdọhọ ete: “Owo ekededi ke otu mme asan̄autom Pharaoh eke ikọ Jehovah anamde enye ndịk anam mme asan̄autom esie ye mme ufene esie ẹfehe ẹdidụk ufọk, edi owo ekededi eke mîdọn̄ke enyịn ke ikọ Jehovah ayak mme asan̄autom esie ye mme ufene esie ẹdu ke in̄wan̄.” (Ex. 9:18-21) Emi owụt ke Jehovah ama ọnọ mmọ ini ekem, oro akanam mbon emi ẹkesọpde-sọp ẹnam n̄kpọ ẹkûbọ utọ ufen emi mbon eken ẹkebọde.

Jehovah ama odụri Pharaoh ye mme asan̄autom esie utọn̄ n̄ko mbemiso enye akamiade mmọ ọyọhọ ufen duop. Edi mmọ ẹma ẹsịme ndisịme ẹsịn ndikop. (Ex. 4:22, 23) Ntre, mmọ ẹma ẹda enyịn mmọ ẹkụt mme akpan mmọ ẹkpan̄ade. Ekedi ata n̄kpọ mmọn̄eyet! (Ex. 11:4-10; 12:29) Ndi mmọ ẹkpekekeme ndinam ntọt emi ẹkenọde  mmọ mbemiso ini ebe akaha? Ẹkpekekeme! Moses ama ọsọsọp odụri nditọ Israel utọn̄ aban̄a ọyọhọ ufen duop oro, onyụn̄ ọdọhọ mmọ se anade ẹnam man ẹnyan̄a ubon mmọ. (Ex. 12:21-28) Ndikop uyo Jehovah ama anam owo miliọn ita m̀mê akande oro ẹwọrọ ke Egypt. Mmọ ẹkedi nditọ Israel ye “akwa mbuaha udịmowo” emi ekesịnede nditọ Egypt ye mbon en̄wen emi mîkedịghe nditọ Israel.—Ex. 12:38.

Mme uwụtn̄kpọ emi ẹwụt ke Jehovah ama esinọ mme owo ini emi ekemde mmọ ndinam n̄kpọ mban̄a ntọt emi enye ọkọnọde mmọ. (Deut. 32:4) Nso ikesinam enye anam ntre? Apostle Peter ọkọdọhọ ke Jehovah ‘iyomke baba owo kiet atak edi oyom kpukpru owo ẹkabade esịt.’ (2 Pet. 3:9) Abasi ama ekere aban̄a mme owo. Enye okoyom mmọ ẹkabade esịt ẹnyụn̄ ẹnam se imọ idọhọde mbemiso ekem ini emi iyomde ndinọ ndiọi owo ufen.—Isa. 48:17, 18; Rome 2:4.

Mfịn n̄ko, ana kpukpru owo ẹnam akpan ntọt emi ẹnọde ke ofụri ererimbot. Ini Jesus okodude ke isọn̄, enye ama ọdọhọ ke ẹyesobo editịm n̄kpọ emi ke ini “akwa ukụt.” (Matt. 24:21) Enye ama etịn̄ prọfesi emi akanamde enen̄ede an̄wan̄a mme mbet se iditịbede ini oro ama asan̄a ekpere. Ini oro ke enye eketịn̄ mme akpan n̄kpọntịbe emi ikụtde mfịn ke ofụri ererimbot.—Matt. 24:3-12; Luke 21:10-13.

Ke ntak prọfesi oro, Jehovah ke ọdọhọ kpukpru owo mfịn ete ẹtuak ibuot ẹnọ imọ ẹnyụn̄ ẹkop uyo imọ. Enye oyom mbon emi ẹkopde item ẹkop inem uwem idahaemi, ndien ama ekem ẹbọ mme edidiọn̄ emi enye ọn̄wọn̄ọde ke obufa ererimbot emi edinen ido edidude. (2 Pet. 3:13) Jehovah oyom ndin̄wam mme owo ẹbuọt idem ke un̄wọn̄ọ esie, oro anam enye ọnọ mmọ etop emi edinyan̄ade mmọ. Etop oro edi “eti mbụk obio ubọn̄” emi Jesus ọkọdọhọde ke ‘ẹyekwọrọ ke ofụri isọn̄ nte ntiense ẹnọ kpukpru mme idụt.’ (Matt. 24:14) Abasi etịm ikọt esie man ẹtie “ntiense” m̀mê ẹkwọrọ etop esie emi. Mmọ ke ẹnam emi ke n̄kpọ nte idụt 240 idahaemi. Jehovah oyom ediwak owo nte ẹkekeme ẹnam ntọt emi ẹnyụn̄ ẹbọhọ “oyobio” nsobo emi enye edidade idi.—Zeph. 1:14, 15; 2:2, 3.

Akpan mbụme emi ikpakam ibụpde idịghe m̀mê Jehovah esinọ mme owo ini ekem ndinam ntọt emi enye ọnọde. Se inemede emi owụt ke enye esinọ. Akpan mbụme emi ikpakam ibụpde edi: Ndi mme owo ẹyenam ntọt emi Abasi ọnọde mmọ idahaemi ini osụk odude mi? Ẹyak nnyịn emi idide mme isụn̄utom Abasi ika iso in̄wam ediwak owo nte ikekeme ẹbọhọ nsobo emi edisịmde editịm n̄kpọ emi.