1. Inam didie idiọn̄ọ ke utom ukwọrọikọ nnyịn ke ẹda ẹnyan̄a mme owo?

UTOM ukwọrọikọ nnyịn ke ẹda ẹnyan̄a mme owo! Inam didie idiọn̄ọ? Ini Jesus ọkọnọde ewụhọ emi odude ke Matthew 28:19, 20, enye ọkọdọhọ ete: “Ẹka ẹkenam mme owo . . . ẹdi mbet mi, ẹnịm mmọ baptism.” Nso inam baptism edi akpan n̄kpọ? Ntak edi ke ana owo emi oyomde Abasi anyan̄a imọ ana baptism. Ana owo emi oyomde ndina baptism enịm ke n̄kukụre n̄kpọ emi anamde Abasi ekeme ndinyan̄a imọ edi ke Jesus ama akpa ke ibuot nnyịn onyụn̄ eset. Oro akanam apostle Peter ọdọhọ mme Christian ete: “Ẹda [baptism] ẹnyan̄a mbufo . . . oto ke ediset ke n̄kpa Jesus Christ.” (1 Pet. 3:21) Ntre obufa owo ama ana baptism, enye ekeme ndidori enyịn ke ẹyenyan̄a imọ.

2. Udiana Timothy 4:1, 2 owụt ke nso utọ andikpep ke ikpedi?

² Edieke iyomde ndinam mme owo ẹdi mbet Christ, ana inyene “usọ unọ ukpep,” oro ọwọrọ ke ana inen̄ede idiọn̄ọ ndikpep mme owo n̄kpọ. (Kot 2 Timothy 4:1, 2.) Se inamde idọhọ ntre edi ke Jesus ọkọdọhọ nnyịn ete ika ikanam mme owo ẹdi mbet imọ inyụn̄ ikpep mmọ n̄kpọ. Apostle Paul ọkọdọhọ yak ‘isọn̄ọ iyịre’ ke utom oro sia ima inam ntre ‘iyanyan̄a idem nnyịn ye mmọ emi ẹkopde uyo nnyịn.’ Omokụt do ndien se ikanamde Paul ọdọhọ yak ‘ikpeme se ikpepde owo’ kpukpru ini. (1 Tim. 4:16) Sia mînyeneke nte owo edikabarede idi mbet Christ owo mîkpepke enye Bible, oyom inen̄ede idiọn̄ọ ndikpep owo Bible.

3. Nso ke iyom ndineme mban̄a ukpepn̄kpọ Bible ke ibuotikọ emi?

³ Mbon emi ikpepde Bible ke ofụri ererimbot ẹdi ke miliọn ke miliọn. Edi nte ima ikeneneme ke ibuotikọ emi ekebemde enye emi iso, iyom ndidiọn̄ọ nte ikemede ndin̄wam ediwak ke otu oro ẹdina baptism ẹkabade ẹdi mbet Jesus Christ. Ke ibuotikọ emi, imọn̄ ineme n̄kpọ ition en̄wen emi anade kpukpru mbon emi  ẹkpepde owo Bible ẹnam man ẹn̄wam mbon emi mmọ ẹkpepde Bible ẹna baptism.

4. Ntak emi owo emi ekpepde owo Bible mîkpetịn̄ke ikọ awak akaha? (Se n̄ko ikọ idakisọn̄.)

⁴ Sia imade se isikpepde mme owo ke Bible, imekeme nditịn̄ ikọ awak akaha ini ikpepde mme owo n̄kpọ. Edi edide inịm Ukpepn̄kpọ Enyọn̄-Ukpeme, Ukpepn̄kpọ Bible Esop, m̀mê ikpep owo n̄kpọ ke ufọk esie, ikpanaha itịn̄ ikọ awak akaha. Edieke owo oyomde eyen ukpepn̄kpọ esie enen̄ede ekpep n̄kpọ oto Bible, ana enye ekpeme man enye iditịn̄ ikọ awak akaha. Inaha enye etịn̄ kpukpru n̄kpọ emi enye ọdiọn̄ọde aban̄a itie Bible emi mmọ ẹkotde m̀mê ibuotikọ emi mmọ ẹnemede. * (John 16:12) Men se afo ọdiọn̄ọde ke Bible idahaemi domo ye se ọkọdiọn̄ọde nsonso emi anade baptism. Anaedi ini oro, ọkọdiọn̄ọ mme ata akpan n̄kpọ emi Bible ekpepde kpọt. (Heb. 6:1) Akada ediwak isua ọdiọn̄ọ se afo ọdiọn̄ọde mfịn emi, ntre kûdomo ndikpep eyen ukpepn̄kpọ fo kpukpru n̄kpọ ini kiet.

5. (a) Akpa Thessalonica 2:13 owụt ke nso ke ikpanam eyen ukpepn̄kpọ nnyịn okụt? (b) Didie ke ikpan̄wam eyen ukpepn̄kpọ nnyịn etịn̄ nte se ikpepde an̄wan̄ade enye?

⁵ Iyom eyen ukpepn̄kpọ nnyịn okụt ke se enye ekpepde oto Bible. (Kot 1 Thessalonica 2:13.) Idinam didie in̄wam enye okụt? Ọfọn isinam eyen ukpepn̄kpọ etịn̄ nte se enye ekpepde an̄wan̄ade enye. Utu ke ndidi ima ikot Bible nnyịn inam an̄wan̄a enye kpukpru ini, ọfọn idọhọ enye etịn̄ nte ndusụk itie Bible an̄wan̄ade enye. N̄wam eyen ukpepn̄kpọ fo okụt nte se enye okotde ke Bible ebehede enye. Bụp enye mme mbụme emi ẹdinamde itien̄wed oro an̄wan̄a enye, emi ẹdinyụn̄ inamde enye etịn̄ se enye ekerede ye nte enye adade se itien̄wed oro etịn̄de. (Luke 10:25-28) Emekeme ndibụp enye ete: “Didie ke itien̄wed emi an̄wam fi okụt kiet ke otu mme edu Jehovah?” “Didie ke se afo ekpepde ke itien̄wed emi ekeme ndin̄wam fi?” “Okụt didie se ekpepde ke itien̄wed emi?” (N̄ke 20:5) Idịghe se eyen ukpepn̄kpọ ọdiọn̄ọde edi ata akpan n̄kpọ, ata akpan n̄kpọ akam edi adan̄a nte enye amade se enye ekpepde ye adan̄a nte enye anamde se enye ekpepde.

6. Ntak ọfọnde asan̄a ye owo efen emi ọdiọn̄ọde ndikpep Bible ekekpep eyen ukpepn̄kpọ fo n̄kpọ-ọ?

⁶ Ndi akanam amasan̄a ye mbon en̄wen emi ẹdiọn̄ọde ndikpep owo Bible ekekpep eyen ukpepn̄kpọ fo n̄kpọ? Ekpedi amasan̄a, emekeme ndibụp mmọ m̀mê mmọ ẹse didie nte afo ekpepde eyen ukpepn̄kpọ fo n̄kpọ, m̀mê amayak enye enen̄ede ekpep n̄kpọ oto Bible. Ana osụhọde idem edieke oyomde ndidiọn̄ọ ndikpep owo n̄kpọ ọfọn. (Men Utom 18:24-26 domo.) Ẹma ẹkpọn̄  ufọk eyen ukpepn̄kpọ fo, bụp owo emi akasan̄ade kiet m̀mê enye ekere ke Ikọ Abasi ke an̄wan̄a eyen ukpepn̄kpọ fo. Edieke mûdudụhe n̄kpọ nte urua kiet m̀mê iba, emekeme ndidọhọ eyenete emi akasan̄ade ekekpep enye n̄kpọ do ekekpep enye n̄kpọ. Ama anam ntre, urua kiet idibehe eyen ukpepn̄kpọ fo ikpepke n̄kpọ, enye oyonyụn̄ okụt ke ukpepn̄kpọ edi akpan n̄kpọ. Kûda eyen ukpepn̄kpọ fo nte “inyene” fo, ke owo efen ikemeke-keme ndikpep enye n̄kpọ. N̄kọ afo oyom ndin̄wan̄wam enye, oyom enye akaka iso ekpep n̄kpọ.

7. Nso idinam eyen ukpepn̄kpọ fo ama se enye ekpepde?

⁷ Ana eyen ukpepn̄kpọ fo okụt ke afo amama onyụn̄ enịm se Bible ekpepde. (1 Thess. 1:5) Oro ekeme ndinam enye ama se enye ekpepde. Emekeme ndidọhọ enye nte Bible an̄wamde fi. Enye oro ekeme ndinam enye okụt ke nti item emi ẹkemede ndin̄wam imọ mmọdo ọdọn̄ọ ke Bible.

8. Nso efen ke akpanam an̄wam eyen ukpepn̄kpọ fo? Ntak-a?

⁸ Edieke enyenede n̄kpọ emi ọsọn̄de eyen ukpepn̄kpọ fo nditre, ini osụk ekpepde enye n̄kpọ, dọhọ enye mbụk mme owo emi utọ n̄kpọ oro ọkọsọn̄de mmọ nditre, ye se ikan̄wamde mmọ ẹtre ke akpatre. Emekeme ndisan̄a ye eyenete emi ekenyenede ukem mfịna emi enye enyenede ekekpep enye n̄kpọ, onyụn̄ ọdọhọ eyenete oro etịn̄ nte enye akasan̄ade etre n̄kpọ oro. Oro ekeme ndin̄wam eyen ukpepn̄kpọ fo. Mbụk mme owo emi ẹkemede ndin̄wam enye ẹdu n̄ko ke jw.org ke ikpehe emi ẹkotde, “Bible Okpụhọde Mme Owo.” * Mme ibuotikọ ye vidio emi ẹdude do ẹkeme ndin̄wam enye okụt ke Bible ekeme ndin̄wam imọ ikpụhọde.

9. Didie ke ekeme ndin̄wam eyen ukpepn̄kpọ fo esimen se enye ekpepde ekeneme ye mbon ubon esie ye mme ufan esie?

⁹ Ekpedi eyen ukpepn̄kpọ fo edi n̄wan owo m̀mê ebe owo, ndi ebe m̀mê n̄wan esie ke ekpep n̄kpọ n̄ko? Ekpedi ikpepke, dọhọ enye etiene etie ini mbufo ẹkpepde n̄kpọ. N̄wam eyen ukpepn̄kpọ fo yak enye esimen se enye ekpepde ekeneme ye mbon ubon esie ye mme ufan esie. (John 1:40-45) Emekeme ndibụp enye ete: “Didie ke akpanam se afo ekpepde emi an̄wan̄a mbon ubon mbufo?” mîdịghe obụp enye ete: “Ewe itie Bible ke akpada owụt ufan fo ke se afo etịn̄de emi edi akpanikọ?” Nte edisan̄ade in̄wam enye yak ekeme ndikpep owo efen Bible edi emi. Enye ama odot ndien ndidi asuanetop  emi mînaha baptism, enye ekeme nditọn̄ọ ndisan̄a ye nnyịn n̄kwọrọ ikọ. Emekeme ndibụp enye m̀mê enye ọdiọn̄ọ owo efen emi akpamade ndikpep Bible. Enye ama ọnọ fi enyịn̄ owo oro, kûbiat ini ndika mbịne owo oro n̄kọdọhọ enye ke ikpama ndikpep Bible ye enye. Bre vidio emi, Ẹsikpep Owo Bible Didie? nọ enye. *

10. Didie ke owo emi ekpepde owo efen Bible ekeme ndinam se Paul akanamde ke 1 Thessalonica 2:7, 8?

¹⁰ Ana mbon emi ẹkpepde owo Bible ẹwụt nditọ ukpepn̄kpọ Bible mmọ ke imenen̄ede ima mmọ. Da mmọ nte mbon emi ẹdidide nditọete fo ke ini iso. (Kot 1 Thessalonica 2:7, 8.) Imemke utom inọ mmọ nditre nsan̄a ye mbon ererimbot emi ẹkedide ufan mmọ, nnyụn̄ nnam kpukpru se anade mmọ ẹnam man ẹkeme ndikpono Jehovah. Ana in̄wam mmọ ẹnyene nti ufan ke esop. Di ufan ye eyen ukpepn̄kpọ Bible fo, sisio ini neme nneme ye enye ke mme ini efen, yak okûdi ke ini emi mbufo ẹkpepde Bible kpọt. Afo ndikot enye ke fon, ndinọ enye etop, m̀mê ndiwaha nse enye ekpri mbemiso ekemde usen emi oyomde ndifiak n̄kekpep enye n̄kpọ ayanam enye okụt ke afo emenen̄ede ama imọ.

11. Nso ke iyom nditọ ukpepn̄kpọ Bible nnyịn ẹkụt ke esop? Ntak-a?

¹¹ Ẹsidọhọ ke “nnuenubọk kiet isioho idan̄.” Imekeme ndisịn ke uyo oro n̄ko ndọhọ ke owo kiet ke esop ikemeke ndida ikpọn̄ nnam owo edi mbet. Enye anam mbon emi ẹnen̄erede ẹdiọn̄ọ ndikpep owo Bible ẹsinam nditọ ukpepn̄kpọ mmọ ẹdiọn̄ọ mbon en̄wen ke esop, emi ẹkemede ndin̄wam mmọ. Se idinamde enem mmọ ndidian idem ye ikọt Abasi edi oro. Nditọete oro ẹyen̄wam mmọ ẹnen̄ede ẹkpere Jehovah ẹnyụn̄ ẹn̄wam mmọ ini mmọ ẹnyenede mfịna. Iyom eyen ukpepn̄kpọ nnyịn okụt ke nditọete ẹma enye, ke inyụn̄ ida enye nte eyenete nnyịn. Iyom enye n̄ko adian idem ye nditọete. Enye oro edinam emem enye utom ndidian̄ade idem n̄kpọn̄ mbon emi mîdin̄wamke enye ama Jehovah. (N̄ke 13:20) N̄kani ufan esie ẹkpedian̄ade nsan̄a ye enye, idifịnake enye sia enye ọdiọn̄ọ ke imọ imekeme ndinyene nti ufan ke esop Jehovah.—Mark 10:29, 30; 1 Pet. 4:4.

12. Ntak emi ikpenemede iban̄a owo ndiyak idem nnọ Abasi nnyụn̄ nna baptism ye eyen ukpepn̄kpọ nnyịn-e?

¹² Sia edide isikpep owo Bible man in̄wam enye ana baptism edi mbet Christ, ana isiwak ndineme ye nditọ ukpepn̄kpọ nnyịn ntak anade owo ayak idem esie ọnọ Jehovah onyụn̄  ana baptism. Neme n̄kpọ emi ye mmọ ọfiọn̄ ifan̄ ke mmọ ẹma ẹketọn̄ọ ndikpep Bible kpukpru urua, akpan akpan n̄ko ke mmọ ẹma ẹketọn̄ọ ndidụk mbono esop. Akpana mmọ ẹdiọn̄ọ ke se inamde afo ekpep mmọ Bible edi ke afo oyom ndin̄wam mmọ ẹdi Ntiense Jehovah.

13. Tịn̄ nsio nsio n̄kpọ emi anade eyen ukpepn̄kpọ anam man enye odot ndina baptism.

¹³ Enyene nsio nsio n̄kpọ emi anade eyen ukpepn̄kpọ emi oyomde ndina baptism anam. Ana enye ebem iso ọdiọn̄ọ Jehovah, ama enye, onyụn̄ ọbuọt idem ye enye. (John 3:16; 17:3) Ekem enye ọmọn̄ ọtọn̄ọ ndikpere Jehovah ye nditọete ke esop. (Heb. 10:24, 25; Jas. 4:8) Nte ini akade, enye ayatua n̄kpọfiọk aban̄a ndiọi n̄kpọ emi enye ekesinamde onyụn̄ etre ndiọi n̄kpọ oro. (Utom 3:19) Nte enye osụk anamde mme n̄kpọ emi, mbuọtidem emi enye enyenede ke anam enye etịn̄ se enye ekpepde ọnọ mbon en̄wen. (2 Cor. 4:13) Ekem enye ayak idemesie ọnọ Jehovah onyụn̄ ana baptism. (1 Pet. 3:21; 4:2) Usen emi enye anade baptism esidi usen idatesịt ọnọ kpukpru owo! Nte eyen ukpepn̄kpọ osụk anamde mme n̄kpọ emi kiet kiet man enye odot ndina baptism, toro enye ke ofụri esịt nyụn̄ n̄wam enye aka iso anam mme n̄kpọ oro.

14. Ikpanam didie idiọn̄ọ m̀mê eyen ukpepn̄kpọ nnyịn ke anam se akpanade enye anam?

¹⁴ Nte isụk in̄wamde eyen ukpepn̄kpọ nnyịn odot ndiyak idem nnọ Abasi nnyụn̄ nna baptism, edi se inyene ime ye enye. Edi eyenyene ini emi idiyomde usụn̄ idiọn̄ọ m̀mê enen̄ede ọdọn̄ enye ndinam n̄kpọ nnọ Jehovah Abasi. Ndi omokụt n̄kpọ ndomokiet emi owụtde ke eyen ukpepn̄kpọ fo ke odomo ndinam se Jesus eketịn̄de? Mîdịghe, ndi enye onyụn̄ oyom ndidiọn̄ọ Bible kpọt?

15. Nso ye nso ke idida idiọn̄ọ ke eyen ukpepn̄kpọ nnyịn eben̄e idem ndina baptism?

¹⁵ Yak edi anam anam afo ese m̀mê eyen ukpepn̄kpọ fo aka iso iso m̀mê osụk ada ke ebiet emi enye akadade. Emekeme ndibụp idemfo ete: Ndi enye esitịn̄ nte imọ imade Jehovah? Ndi enye esibọn̄ akam ọnọ Jehovah? (Ps. 116:1, 2) Ndi esinem enye ndikot Bible? (Ps. 119:97) Ndi enye ke odụk mbono esop kpukpru ini? (Ps. 22:22) Ndi mmokụt ukpụhọde ndomokiet ke uwem esie emi owụtde ke enye ke anam se enye ekpepde? (Ps. 119:112) Ndi enye ọtọn̄ọ ndimen se enye ekpepde n̄keneme ye mbon ubon esie ye mme ufan esie? (Ps. 9:1) Ata akpan n̄kpọ emi anade afo obụp idemfo edi m̀mê enye  oyom ndidi Ntiense Jehovah. (Ps. 40:8) Edieke eyen ukpepn̄kpọ fo mînamke ndomokiet ke otu se isụk ibatde emi, yom usụn̄ diọn̄ọ se idide ntak nyụn̄ neme n̄kpọ oro ye enye. Ama eneme ye enye, kûnam ikọ ikọ-o, edi kûnyụn̄ utre ndisio akpanikọ ntịn̄ nnọ enye. *

16. Nso ke ikpada idiọn̄ọ ke edi se itre ndikpep owo Bible?

¹⁶ Nte osụk ekpepde owo n̄kpọ aka, sise m̀mê edi se aka iso ekpep enye n̄kpọ. Bụp idemfo: ‘Ndi enye isitịmke idem inọ ukpepn̄kpọ esie? Ndi enye iyomke-yom ndidụk mbono esop? Ndi enye ke enyenyene ndiọi uwem? Ndi enye osụk akaka ufọkabasi mmọ?’ Edieke ibọrọ kpukpru mbụme oro edide ih, afo ndika iso n̄kpep enye n̄kpọ etie nte ndidi owo iyomke mmọn̄ otụk imọ afo ke eyịre ndikpep enye ewọk! Edieke eyen ukpepn̄kpọ mînen̄ekede ima se enye ekpepde inyụn̄ iben̄eke idem ndikpụhọde uwem esie, ufọn ndika iso n̄kpep enye n̄kpọ-ọ?

17. Akpa Timothy 4:16 owụt ke nso ke kpukpru nnyịn emi isikpepde mme owo Bible ikpanam?

¹⁷ Abasi ọnọ nnyịn utom ete inam mme owo ẹdi mbet Christ; nnyịn idaha utom emi ibre mbre, inyụn̄ iyom ndin̄wam nditọ ukpepn̄kpọ Bible nnyịn ẹdot ndina baptism. Ke ntak oro, iyayak eyen ukpepn̄kpọ nnyịn enen̄ede ekpep n̄kpọ oto Bible, inyụn̄ ikpep n̄kpọ ke usụn̄ emi owụtde ke imama inyụn̄ inịm se ikpepde. Iyan̄wam enye edi ufan ye nditọete. Iyonyụn̄ iwak nditịn̄ mban̄a ndiyak idem nnọ Abasi nnyụn̄ nna baptism, ndien anam anam nnyịn ise m̀mê enye ke anam se akpanade enye anam. (Se ekebe emi, “ Nte Ikpan̄wamde Nditọ Ukpepn̄kpọ Bible Nnyịn Ẹdot Ndina Baptism” ke page 13.) Enem nnyịn etieti nte itienede inam utom emi ẹdade ẹnyan̄a mme owo mi! Mbọk ẹyak ibiere ndidomo nte ikekeme ndikpep mme owo Bible yak mmọ ẹdot ndina baptism.