1. Didie ke 2 Corinth 3:1-3 owụt ke edi ata n̄kpọ ukpono ndikpep owo Bible yak ana baptism? (Se ndise ikpædem Enyọn̄-Ukpeme emi.)

ESITIE fi didie ke idem ama okụt owo ke esop mbufo anade baptism? Imenịm ke esinem fi. (Matt. 28:19) Esịt eyenen̄ede enem fi akan oro ekpedi afo ekekpep owo oro Bible yak edina baptism! (1 Thess. 2:19, 20) Mbon emi ẹnade baptism obufa ẹdi “leta itoro” ẹnọ mbon emi ẹkekpepde mmọ Bible, ẹnyụn̄ ẹdi ẹnọ ofụri esop.—Kot 2 Corinth 3:1-3.

2. (a) Ewe akpan mbụme ke ikpetie ikere, ntak-a? (b) Nso idi ukpepn̄kpọ Bible? (Se ikọ idakisọn̄.)

² Ke ufan̄ isua inan̄ emi ebede, imesikpep n̄kpọ nte owo 10,000,000 Bible * kpukpru ọfiọn̄ ke ofụri ererimbot. Enem nnyịn etieti. Ke ufan̄ isua inan̄ oro n̄ko, mbon emi ẹsinade baptism kpukpru isua ẹdidi Mme Ntiense Jehovah ye mbufa mbet Jesus Christ ẹsibe 280,000. Idinam didie in̄wam ediwak mbon en̄wen ke otu miliọn miliọn mbon emi isikpepde Bible do yak ẹdina baptism? Adan̄a nte Jehovah ọnọde mme owo ini yak ẹkabade ẹdi mbet Christ, iyom ndinam kpukpru se ikekeme man in̄wam mme owo ẹdot ndina baptism ata usọp usọp. Ini okụre ama!—1 Cor. 7:29a; 1 Pet. 4:7.

3. Nso ke iyom ndineme ke ibuotikọ emi mban̄a ndikpep owo Bible?

³ Sia enen̄erede edi ata akpan n̄kpọ idahaemi nnyịn ndikpep mme owo n̄kpọ yak ẹna baptism, Otu Emi Ẹsede Ẹban̄a Utom Nnyịn ẹma ẹbụp nsio nsio n̄kọk itieutom se ẹkpenamde  man ẹn̄wam ediwak mbon emi isikpepde Bible ẹna baptism. Ntre ke ibuotikọ emi ye ke enye oro etienede, iyekpep n̄kpọ ito se mme asiakusụn̄, mme isụn̄utom, ye mme esenyịn circuit emi ẹnen̄erede ẹfiọk ndikpep owo Bible ẹtịn̄de. * (N̄ke 11:14; 15:22) Nditọete emi ẹtịn̄ se mbon emi ẹsikpepde owo Bible ye nditọ ukpepn̄kpọ Bible ẹkpenamde man nditọ ukpepn̄kpọ Bible ẹnen̄ede ẹbọ ufọn. Ke ibuotikọ enye emi, iyom ndineme n̄kpọ ition emi kpukpru nditọ ukpepn̄kpọ Bible ẹkpenamde man ẹdot ndina baptism. Nnyịn emi isikpepde mmọ n̄kpọ idin̄wam mmọ ẹnam oro.

4. Ndi ndisida ke enyịnusụn̄ ufọk owo n̄kpep owo Bible ayanam enye odot ndina baptism?

⁴ Ediwak nditọete ẹsikpep owo Bible ekpri ekpri, ndusụk ini ẹda ke enyịnusụn̄ ufọk owo ẹkpep. Kpa ye oro ndinam ntre ekemede ndinam ọdọn̄ owo ndikpep n̄kpọ efen efen ke Bible, utọ ukpepn̄kpọ oro esidi n̄kpọ minit ifan̄ kpọt, ekeme ndinam owo inyụn̄ ikpepke kpukpru urua. Oro esinam ndusụk nditọete ẹbọ utọ owo oro nọmba fon esie man ẹkot enye ẹneme ekpri n̄kpọ ke Bible emi edinamde enen̄ede ọdọn̄ enye ndikpep Bible, mîdịghe ẹnọnọ enye n̄kpọ oro ke etop mbemiso ekem usen emi akanade mmọ ẹfiak ẹkekpep owo oro Bible. Mmọ ẹkeme ndikpep n̄kpọ n̄kpri n̄kpri ntre ke ediwak ọfiọn̄. Edi, ndi eyen ukpepn̄kpọ ndisida minit ifan̄ n̄kpep n̄kpọ enyọn̄ enyọn̄ ntre ayan̄wam enye ayak idem ọnọ Abasi onyụn̄ odot ndina baptism? Ọsọsọn̄.

5. Nso ke Jesus eketịn̄ ke Luke 14:27-33 emi ikemede ndida n̄n̄wam nditọ ukpepn̄kpọ Bible nnyịn?

⁵ Enyene uwụtn̄kpọ kiet emi Jesus ọkọnọde emi owụtde ke enyene se anade owo anam mbemiso enye akabarede edi mbet esie. Enye eketịn̄ aban̄a owo emi oyomde ndibọp tọwa ye edidem emi oyomde ndika ekọn̄. Jesus ọkọdọhọ ke ana owo emi oyomde ndibọp tọwa ‘ebem iso osụhọde etie abat se iditakde,’ man okụt m̀mê enye enyene okụk ndida mbọp mma; ke ana edidem emi oyomde ndika ekọn̄ onyụn̄ ‘ebem iso osụhọde etie ekere’ m̀mê mbonekọn̄ esie ẹyekeme ndin̄wana n̄kan. (Kot Luke 14:27-33.) Ukem ntre n̄ko, Jesus ama ọdiọn̄ọ ke owo emi oyomde ndidi mbet imọ ana ada ini osụhọde etie ekere se anade enye anam. Ima idọhọ mbon emi isikpepde Bible ẹnam nnyịn isikpep mmọ Bible kpukpru urua, imekeme ndin̄wam mmọ ẹtie ẹkere se anade mmọ ẹnam. Iditọn̄ọ didie?

6. Nso ke ikpanam man nditọ ukpepn̄kpọ Bible ẹma ndisikpep n̄kpọ kpukpru urua?

 ⁶ Nam ini emi esikpepde owo oro Bible afiak ọniọn̄ ekpri. Ekpedi esineme itie Bible kiet kpọt, neme yọhọ iba. Ama ọtọn̄ọ emehe enye ndisikpep n̄kpọ mbịghi, bụp enye m̀mê enye ekpenyene ini yak ẹneme n̄kpọ efen ẹdian do. Ekpedi ẹsida ke enyịnusụn̄ ẹkpep, nte ẹsụk ẹkpepde n̄kpọ usen kiet, bụp enye m̀mê itie okpodu se ẹtetie ẹkpep n̄kpọ oro ẹkụre. Se enye ọbọrọde ayanam fi ọdiọn̄ọ m̀mê enye ada ukpepn̄kpọ oro ke akpan n̄kpọ. Ama aka ko, emekeme ndibụp enye m̀mê enye akpama ẹsikpep n̄kpọ ikaba ke urua man enye ọsọp ọdiọn̄ọ Bible. Edi idịghe enye ndikpep n̄kpọ ini kiet m̀mê ikaba ke urua edi n̄kukụre n̄kpọ emi edinamde enye ayak idem ọnọ Abasi onyụn̄ ana baptism.

7. Didie ke ekeme nditịm idem ini ekededi emi oyomde ndikekpep owo Bible?

⁷ Ana afo emi oyomde ndikekpep owo Bible esitịm idem kpukpru ini mbemiso akade ndikpep owo Bible. Kot itie emi oyomde ndikekpep owo oro ye mme itie Bible emi ẹdude do. Yak mme akpan n̄kpọ do ẹnen̄ede ẹn̄wan̄a fi. Tie kere ibuotikọ ukpepn̄kpọ oro, n̄kpri ibuotikọ, mbụme ikpehe kiet kiet, mme itie Bible emi ẹwetde “kot,” mme ndise, ye vidio ekededi emi ekemede ndinam ukpepn̄kpọ oro an̄wan̄a. Kere mmemmem usụn̄ emi edinamde ukpepn̄kpọ oro an̄wan̄a eyen ukpepn̄kpọ man enye anam se enye ekpepde.—Neh. 8:8; N̄ke 15:28a.

8. Se apostle Paul etịn̄de ke Colossae 1:9, 10 owụt ke nso ke ikpeben̄e inọ eyen ukpepn̄kpọ nnyịn?

⁸ Ini osụk etịmde idem ndika n̄kekpep eyen ukpepn̄kpọ fo n̄kpọ, bọn̄ akam sịn enye. Ben̄e Jehovah an̄wam fi yak anam se Bible etịn̄de odụk enye esịt. (Kot Colossae 1:9, 10.) Bụp idemfo m̀mê enyene se mîdisọpke in̄wan̄a enye, m̀mê onyụn̄ enyene se ikemede ndisọn̄ enye ndinịm. Kûfre ke oyom ndin̄wam enye odot ndina baptism.

9. Didie ke afo ekeme ndin̄wam eyen ukpepn̄kpọ fo etịm idem eben̄e ukpepn̄kpọ esie?

⁹ Ọdọn̄ nnyịn ke nte ikpepde eyen ukpepn̄kpọ nnyịn n̄kpọ kwa urua kwa urua ika, ke enye eyedima se Jehovah ye Jesus ẹnamde ẹnọ enye onyụn̄ oyom ndika iso n̄kpep n̄kpọ. (Matt. 5:3, 6) Se idinamde se ikpepde enen̄ede an̄wan̄a eyen ukpepn̄kpọ edi enye ndiyak esịt esie esịne  ke ukpepn̄kpọ oro, idịghe ke ẹkpep enye n̄kpọ enye ke ekere n̄kpọ en̄wen. Ntre nam enye okụt ntak emi edide ata akpan n̄kpọ enye ndisibem iso n̄kot itie emi ẹyomde ndikpep enye, nnyụn̄ ntie n̄kere nte enye akpanamde se enye okotde oro. Didie ke ekeme ndin̄wam eyen ukpepn̄kpọ fo esitịm idem eben̄e ukpepn̄kpọ esie? Tie ye enye tịm ibuot ukpepn̄kpọ kiet. * Wut enye nte enye ekemede ndikụt ibọrọ ke ikpehe, nyụn̄ nam enye ọdiọn̄ọ ke edieke enye esịnde idiọn̄ọ ke ọkpọikọ ifan̄ kpọt, ke oro ayan̄wam enye ọsọp eti ibọrọ oro ama esịm ini ukpepn̄kpọ. Dọhọ enye ọbọrọ mbụme ke ikọ idemesie. Enye ama ọbọrọ mbụme ke ikọ idemesie, afo ọyọdiọn̄ọ m̀mê ukpepn̄kpọ oro enen̄ede an̄wan̄a enye. Edi enyene n̄kpọ en̄wen emi afo ekemede ndidọhọ enye anam.

10. Ntak emi edide akpan n̄kpọ eyen ukpepn̄kpọ ndisikot Bible kpukpru usen-e? Nso ke ana enye anam man se enye okotde oro enyene ufọn ọnọ enye?

¹⁰ Imọdiọn̄ọ ke ndisikpep eyen ukpepn̄kpọ nnyịn n̄kpọ kpukpru urua ayan̄wam enye. Edi enyene ndusụk n̄kpọ emi anade enye anam ke idemesie kpukpru usen. Ana enye esineme nneme ye Jehovah. Edineme didie? Ana enye esitịn̄ ikọ ọnọ Jehovah onyụn̄ akpan̄ utọn̄ okop se Jehovah etịn̄de. Enye ama okot Bible kpukpru usen, ọwọrọ ke okop se Jehovah etịn̄de. (Josh. 1:8; Ps. 1:1-3) Wụt enye nte enye ekemede ndikama “Ndutịm Edikot Bible” emi odude ke jw.org n̄kot Bible kpukpru usen. Enye ekeme ndimịn̄ ndutịm oro nnyene. * Nam enye ọdiọn̄ọ ke se idinamde Bible emi enye okotde enyene ufọn ọnọ enye edi enye nditie n̄kere m̀mê se imọ ikotde oro ekpep imọ nso aban̄a Jehovah, m̀mê didie ke imọ ikeme ndinam se imọ ikotde.—Utom 17:11; Jas. 1:25.

11. Eyen ukpepn̄kpọ edisan̄a didie idiọn̄ọ nnennen usụn̄ emi enye ọkpọbọn̄de akam? Ntak emi edide akpan n̄kpọ enye ndibọn̄ akam nnọ Jehovah kpukpru ini-e?

¹¹ Dọhọ eyen ukpepn̄kpọ fo esibọn̄ akam kpukpru usen sia nte enye edisan̄ade itịn̄ ikọ ye Jehovah edi oro. Ama oyom ndikpep enye n̄kpọ, bọn̄ akam ke ofụri esịt ke ntọn̄ọ ye ke utịt ukpepn̄kpọ oro, nyụn̄ sịn enye ke akam oro. Enye ama okop nte afo esibọn̄de akam, enye eyekpep ndisibọn̄ akam nnọ Jehovah Abasi ke ofụri esịt ke enyịn̄ Jesus Christ. (Matt. 6:9; John 15:16) Eyen ukpepn̄kpọ fo eyenen̄ede  ekpere Jehovah enye ama esikot Bible kpukpru usen man okop se Jehovah etịn̄de, onyụn̄ ọbọn̄ akam kpukpru usen man etịn̄ ikọ ye Jehovah! (Jas. 4:8) Ama emehe enye ndisinam mme n̄kpọ emi, oro ayan̄wam enye anam n̄kpọ en̄wen emi edinamde enye ayak idem ọnọ Jehovah onyụn̄ ana baptism.

12. Ikpanam didie in̄wam nditọ ukpepn̄kpọ Bible nnyịn ẹdi ufan Jehovah?

¹² Yak se afo ekpepde eyen ukpepn̄kpọ fo okûnenem enye kpọt, yak odụk enye esịt. Ntak edi ke isinam se isịnede nnyịn ke esịt. Jesus ama esikpep mme owo n̄kpọ ke usụn̄ emi ọsọpde an̄wan̄a owo, mme owo ẹma ẹsinyụn̄ ẹma se enye ekekpepde mmọ. Edi se ikanamde mme owo ẹtiene enye ekedi ke ukpepn̄kpọ esie ama odụk mmọ esịt. (Luke 24:15, 27, 32) Ana eyen ukpepn̄kpọ fo enen̄ede enịm ke Jehovah mmọdo, ke imọ imekeme ndikpere enye, ida enye nte Ete imọ, Abasi imọ, ye Ufan imọ. (Ps. 25:4, 5) Ini ekpepde enye n̄kpọ, siwak nditịn̄ mban̄a nti edu Abasi nnyịn. (Ex. 34:5, 6; 1 Pet. 5:6, 7) Tịn̄ ban̄a nti edu Jehovah inamke n̄kpọ m̀mê ekpep ewe ibuotikọ. N̄wam enye ama nti edu Jehovah, utọ nte ima, mfọnido, ye mbọm. Jesus ọkọdọhọ ke “n̄kponn̄kan ye akpa ewụhọ” edi “ndima Jehovah Abasi fo.” (Matt. 22:37, 38) Domo ndinam eyen ukpepn̄kpọ fo enen̄ede ama Jehovah.

13. Tịn̄ nte akpan̄wamde eyen ukpepn̄kpọ fo ọdiọn̄ọ nti edu Jehovah.

¹³ Ama eneme nneme ye eyen ukpepn̄kpọ fo, nam enye ọdiọn̄ọ se inamde fi ama Jehovah. Emi ekeme ndin̄wam enye okụt ke edi se imọ n̄ko inen̄ede ikpere Jehovah inyụn̄ ima enye. (Ps. 73:28) Ke uwụtn̄kpọ, ndi enyene udịmikọ ke n̄wed emi ẹdade ẹkpep n̄kpọ m̀mê ke itie Bible emi ẹkotde, emi owụtde nte Jehovah amade nnyịn, enyenede ọniọn̄, ekpede unenikpe, m̀mê enyenede odudu? Ndi ama enem fi? Ekpedi ntre, tịn̄ nọ eyen ukpepn̄kpọ fo, nyụn̄ nam enye ọdiọn̄ọ ke kiet ke otu mme n̄kpọ emi ẹnamde fi enen̄ede ama Ete nnyịn ke heaven edi oro. Edi enyene n̄kpọ en̄wen emi anade kpukpru nditọ ukpepn̄kpọ Bible ẹnam man ẹdot ndina baptism.

14. Nso ke Mme Hebrew 10:24, 25 etịn̄ aban̄a mbono esop emi ekemede ndin̄wam eyen ukpepn̄kpọ nnyịn?

¹⁴ Kpukpru nnyịn iyom nditọ ukpepn̄kpọ Bible nnyịn ẹdot ndina baptism. Akpan n̄kpọ kiet emi ikpanamde edi ndidọhọ  mmọ ẹsidụk mbono esop. Mbon emi ẹnen̄erede ẹfiọk ndikpep owo n̄kpọ ẹdọhọ ke nditọ ukpepn̄kpọ Bible emi mîsibiatke ini nditọn̄ọ mbono esop ẹsisọp ẹna baptism. (Ps. 111:1) Ndusụk nditọete ẹsidọhọ nditọ ukpepn̄kpọ Bible mmọ ke idịghe kpukpru n̄kpọ ke mmimọ idikpep mmọ, ke mmọ ẹdikpep mbon eken ke mbono esop. Kot Mme Hebrew 10:24, 25 ye eyen ukpepn̄kpọ fo, nyụn̄ wụt enye ufọn emi enye edibọde enye ama odụk mbono esop. Bre vidio emi, Nso ke Ẹsinam ke Ufọkmbono Obio Ubọn̄? nọ enye. * N̄wam enye ebiere ke imọ idifiakke mbono esop ndomokiet.

15. Nso ke ikpanam man ọdọn̄ eyen ukpepn̄kpọ nnyịn ndisidụk mbono esop kpukpru ini?

¹⁵ Nso ke akpanam ekpedi eyen ukpepn̄kpọ fo idụkke mbono esop akpa, mîdịghe esidụk ndọn̄ọ ndọn̄ọ? Dọhọ enye se afo ekekpepde ke mbono esop; ama etịn̄, nam enye okụt nte n̄kpọ oro ekenemde fi. Enye ama okụt nte mbono esop esinemde fi, oro ekeme ndinam enye oyom ndidi. Nọ enye Enyọn̄-Ukpeme m̀mê N̄wed Mbono Esop Uwem ye Utom Nnyịn emi ẹkpepde urua oro. Wụt enye se ẹdikpepde ke mbono esop en̄wen, nyụn̄ bụp enye m̀mê ewe ke enye ekpenen̄ede ama ndikop. Se enye edikụtde onyụn̄ okop akpa ini emi enye odụkde mbono esop ayakan se ededi emi enye okụtde onyụn̄ okopde ke ido ukpono efen ekededi. (1 Cor. 14:24, 25) Enye oyokụt mme owo emi enye ekemede ndikpebe nti uwụtn̄kpọ mmọ, emi ẹnyụn̄ ẹkemede ndin̄wam enye odot ndina baptism.

16. Didie ke ikpekpep owo Bible man odot ndina baptism? Nso ke idineme ke ibuotikọ emi etienede?

¹⁶ Didie ke ikpekpep owo Bible man odot ndina baptism? Edi ndin̄wam eyen ukpepn̄kpọ nnyịn anam isikpep enye n̄kpọ kpukpru urua, esinyụn̄ etịm idem ọnọ ukpepn̄kpọ esie man owụt ke imada ukpepn̄kpọ oro ke akpan n̄kpọ. N̄kpọ en̄wen edi ndidọhọ enye esineme nneme ye Jehovah kpukpru usen onyụn̄ edi ufan Jehovah. Ana inyụn̄ inam ọdọn̄ enye ndisidụk mbono esop. (Se ekebe oro “ Se Eyen Ukpepn̄kpọ Bible Akpanamde Man Odot Ndina Baptism” ke page 12.) Edi ke ibuotikọ en̄wen, iyeneme n̄kpọ ition emi mbon emi ẹsikpepde owo Bible ẹkpenamde man ẹn̄wam nditọ ukpepn̄kpọ Bible mmọ ẹdot ndina baptism.