1. Nso inam ediwak owo mîdiọn̄ọke se ẹkpenamde?

IDO ukpono awak etieti mfịn, emi ẹdọhọde ke idi mme Christian, ke Abasi onyụn̄ ama usụn̄ emi mmimọ ikponode enye. Imosụk ise nte ediwak owo mîdiọn̄ọke se ẹkpenamde! Mmọ ẹsibụp m̀mê Abasi enyịme kpukpru ido ukpono, mîdịghe m̀mê nnennen ido ukpono kiet kpọt odu. Ndi imenen̄ede inịm ke nnyịn Mme Ntiense Jehovah ikpep akpanikọ, n̄ko ke nte ituakde ibuot inọ Jehovah edi n̄kukụre usụn̄ emi enye enyịmede? Ndi enyene se ikpanamde owo enen̄ede enịm utọ n̄kpọ oro? Yak ise ise.

2. Nso ikanam apostle Paul enen̄ede enịm ke imokụt akpanikọ? (1 Thessalonica 1:5)

² Apostle Paul ama enen̄ede enịm ke imokụt akpanikọ. (Kot 1 Thessalonica 1:5.) Idịghe nte akpanikọ ekenemde enye akanam enye enịm. Paul ama esitịn̄ enyịn ekpep N̄wed Abasi. Enye ama enịm ke “Abasi ọkọnọ odudu spirit ẹda ẹwet ofụri N̄wed Abasi.” (2 Tim. 3:16) Nso ke enye okokụt ini enye ekpepde N̄wed Abasi? Enye ama okụt mme n̄kpọ emi ẹwụtde ke Jesus edi Messiah emi ẹken̄wọn̄ọde nte ẹwọrọde ẹna ntem in̄wan̄-in̄wan̄. Mme adaiso ido ukpono mme Jew ẹma ẹkụt mme n̄kpọ oro n̄ko, edi imaha ndinịm. Mmọ ẹkedi mbubịk; ẹkedọhọ ke ikpep mme owo akpanikọ emi aban̄ade Abasi, edi mmọ ẹsan̄a ẹnam se Abasi asuade. (Titus 1:16) Paul iketiehe nte mmọ. Enye ikasatke-sat n̄kpọ inịm ke N̄wed Abasi, ekenịm kpukpru. Enye ama ada ofụri N̄wed Abasi odu uwem onyụn̄ ekpep mme owo.—Utom 20:27.

3. Ndi ana inyene ibọrọ inọ kpukpru mbụme nnyịn mbemiso inen̄erede inịm ke imokụt akpanikọ? (Se n̄ko ekebe emi “ Se Jehovah Anamde ye Se Enye Ekerede ‘Ẹwak Ẹkan Nte Ikemede Ndibụk.’ ”)

³ Ndusụk owo ẹkere ke akpana nnennen ido ukpono ẹkeme  ndibọrọ kpukpru mbụme, idem ye mbon oro Bible mîtịn̄ke n̄kpọ iban̄a nnennen nnennen. Ndi utọ n̄kpọ oro ekeme nditịbe? Yak Paul an̄wam nnyịn ise. Enye ama ọdọhọ nditọete yak “ẹdụn̄ọde kpukpru n̄kpọ ẹfiọk,” edi enye ama ọdọhọ n̄ko ke enyene ediwak n̄kpọ emi imọ mîdiọn̄ọke. (1 Thess. 5:21) Enye ekewet ke 1 Corinth 13:9, 12 ete: “Nnyịn inyene ifiọk ubak ubak . . . nnyịn ikụt n̄kpọ mbukpọn̄ mbukpọn̄ ke ukụtiso ukwak.” Idịghe kpukpru n̄kpọ akan̄wan̄a Paul, idịghe kpukpru onyụn̄ an̄wan̄a nnyịn n̄ko. Edi Paul ama ọdiọn̄ọ mme akpan n̄kpọ emi akpanade owo ọdiọn̄ọ aban̄a Jehovah. Se enye ọkọdiọn̄ọde oro ama ekem ndinam enye enịm ke imokụt akpanikọ!

4. Nso idin̄wam nnyịn inen̄ede inịm ke imokụt akpanikọ? Nso ke idikpep iban̄a ata mme Christian?

⁴ N̄kpọ kiet emi edin̄wamde nnyịn inen̄ede inịm ke imokụt akpanikọ edi ndimen nte Mme Ntiense Jehovah ẹkponode Abasi ndomo ye nte Jesus ekesikponode. Ke ibuotikọ emi, iyokụt ke ata mme Christian (1) ẹsituak ibuot ẹnọ Jehovah kpọt, (2) ẹkpono enyịn̄ Jehovah, (3) ẹma akpanikọ, ẹnyụn̄ (4) ẹnen̄ede ẹma kiet eken.

5. Didie ke Jesus anam ikụt nnennen usụn̄ emi ikpokponode Abasi? Didie ke ikpanam se enye ekekpepde?

⁵ Jesus ama ama Jehovah ata etieti, oro akanam enye atuak ibuot ọnọ Jehovah kpọt ini enye odude ke heaven ye ini enye edide isọn̄. (Luke 4:8) Enye ama onyụn̄ ekpep mme mbet esie ete ẹtuak ibuot ẹnọ Jehovah kpọt. Jesus ikakamake mbiet n̄kpọ ndomokiet ituak ibuot inọ Abasi, mme mbet esie ikonyụn̄ ikamake. Sia nnyịn mîsikwe Abasi, owo ndomokiet ikemeke ndibot n̄kpọ ekededi emi ebietde enye! (Isa. 46:5) Edi enyene mme owo emi ndusụk owo ẹdọhọde ke ẹdi ndisana  owo. Ndi ọdiọk ndibot mbiet utọ mme owo oro nsibọn̄ akam nnọ? Ke otu Ibet Duop emi Jehovah ọkọnọde, enye ọkọdọhọ ke ọyọhọ iba ete: “Kûnam edisọi mbiet unọ idemfo m̀mê mbiet n̄kpọ ekededi eke odude ke heaven ke enyọn̄ m̀mê eke odude ke isọn̄ ke idak . . . Kûnụhọ unọ mmọ.” (Ex. 20:4, 5) An̄wan̄a mbon emi ẹyomde ndinam se Abasi amade ke enye iyomke mmimọ ibot mbiet n̄kpọ ndomokiet ida ituak ibuot inọ imọ.

6. Mme Ntiense Jehovah ẹda usụn̄ ukpono Abasi mmọ ẹto m̀mọ̀n̄?

⁶ Mbon emi ẹsiwetde mbụkeset ẹtịn̄ ke mme Christian eyo mme apostle ẹkesituak ibuot ẹnọ Jehovah kpọt. Ke uwụtn̄kpọ, n̄wed emi ẹkotde History of the Christian Church ọdọhọ ke mme Christian eyo mme apostle ikpakamaha-ma ndikop ẹdọhọde yak ẹbot mbiet n̄kpọ ndomokiet ẹkebono ke mme itie emi mmọ ẹsidude ẹtuak ibuot ẹnọ Abasi. Mme Ntiense Jehovah ẹtiene se mme Christian eyo mme apostle ẹkenamde oro. Nnyịn isibọn̄ke akam inọ mbiet “ndisana owo,” isibọn̄ke inọ mme angel, isikam ibọn̄ke inọ Jesus. Nnyịn isinyụn̄ ikọmke ọfọn̄ etakubom m̀mê ndinam n̄kpọ ekededi emi owụtde ke ituak ibuot inọ ukara. Ekpedi mme owo ẹnam se ẹnanam, imebiere ndinam se Jesus ọkọdọhọde ete: “Jehovah Abasi fo ke ana afo atuak ibuot ọnọ.”—Matt. 4:10.

7. Siak mme n̄kpọ emi Mme Ntiense Jehovah ẹnen̄erede ẹda ẹkpụhọde ye mme ido ukpono eken.

⁷ Ediwak owo mfịn ẹsima ndikpan̄ utọn̄ nnọ mme adaiso ido ukpono emi ẹnen̄erede ẹwọrọ etop. Mmọ ẹsinen̄ede ẹma utọ mme adaiso ido ukpono oro tutu ẹkpere ndituak ibuot nnọ mmọ. Mme owo ẹsiwak ke ufọkabasi mmọ nte urua, ẹdep mme n̄wed emi mmọ ẹsion̄ode, ẹsinyụn̄ ẹnọ mmọ ediwak okụk mîdịghe ẹtịp okụk ẹda ẹn̄wam mme n̄ka emi mmọ ẹnyenede ubọk. Se mme adaiso ido ukpono oro ẹkpetetịn̄, ndusụk mmọ ẹnam. Mme aka ido ukpono oro ẹma ẹkụt mmọ, esitie nte ẹkụt Jesus! Ata ikọt Abasi itiehe ntre, mmọ isitieneke owo ndomokiet. Kpa ye emi isikponode mbon emi ẹdade usụn̄, isinam se Jesus eketịn̄de emi ete: “Kpukpru mbufo ẹdi nditọete.” (Matt. 23:8-10) Nnyịn isituakke ibuot inọ owo ndomokiet, m̀mê enye edi adaiso ido ukpono m̀mê edi owo ukara. Nnyịn isinyụn̄ itịpke okụk ẹda ẹn̄wam ke se mmọ ẹnamde. Edi isida ata san̄asan̄a inyụn̄ isịnke ubọk ke n̄kpọ ererimbot ndomokiet. Mme n̄kpọ emi ke inen̄ede ida ikpụhọde ye mme ido ukpono eken emi ẹdọhọde ke idi mme Christian.—John 18:36.

8. Inam didie idiọn̄ọ ke Jehovah oyom ẹnọ enyịn̄ esie ubọn̄ ẹnyụn̄ ẹnam kpukpru owo ẹdiọn̄ọ enyịn̄ oro?

⁸ Enyene ini emi Jesus ọkọbọn̄de akam ete: “Ete, nọ enyịn̄ fo ubọn̄.” Jehovah ama etie ke heaven ọbọrọ ke ọkpọsọn̄ uyo ete ke imọ iyọnọ enyịn̄ imọ ubọn̄. (John 12:28) Jesus ama ọnọ enyịn̄ Ete esie ubọn̄ ke ofụri ini emi enye okodude ke isọn̄ ọkwọrọ ikọ. (John 17:26) Ke ntre, ndi ukereke ke ekpenenem ata mme Christian ndikot enyịn̄ Abasi nnyụn̄ nnam mme owo ẹdiọn̄ọ enyịn̄ oro?

9. Nso ke mme Christian eyo mme apostle ẹkenam ẹwụt ke imokpono enyịn̄ Abasi?

⁹ Esisịt ini ke ẹma ẹketọn̄ọ esop mme Christian ke eyo mme apostle, Jehovah ama “[ọwọn̄ọde] ntịn̄enyịn esie ọnọ mme idụt ndisio mme owo ke otu mmọ nnọ enyịn̄ esie.” (Utom 15:14) Ekenenem mme Christian oro ndisikot enyịn̄ Abasi nnyụn̄ nnam mbon en̄wen ẹdiọn̄ọ enyịn̄ oro. Mmọ ẹma ẹsikwọrọ ẹban̄a enyịn̄ oro ẹnyụn̄ ẹsịn enyịn̄ oro ke mme n̄wed Bible emi mmọ ẹkewetde. *  Mmọ ẹma ẹnen̄ede ẹwụt ke mmimọ ke Jehovah osio ọnọ enyịn̄ esie.—Utom 2:14, 21.

10. Nso iwụt ke Mme Ntiense Jehovah ke Jehovah osio ọnọ enyịn̄ esie?

¹⁰ Ndi Mme Ntiense Jehovah ke Jehovah osio ọnọ enyịn̄ esie? Se se iwụtde mi ke nnyịn ke edi. Mfịn, ediwak mme adaiso ido ukpono ẹdomo ofụri ubom ye uniọn̄ mbak mme owo ẹkûdiọn̄ọ ke Abasi enyene enyịn̄. Mmọ ẹsisio enyịn̄ oro ẹfep ini mmọ ẹkabarede Bible, ndien ndusụk mmọ isiyakke ẹkot enyịn̄ oro ke ufọkabasi mmọ. * Anie ọkpọdọhọ ke idịghe Mme Ntiense Jehovah kpọt ẹkpono enyịn̄ Abasi nte akpanade ẹkpono? Idụhe ido ukpono ndomokiet emi anamde mme owo ẹdiọn̄ọ enyịn̄ Abasi nte Mme Ntiense Jehovah! Imesidomo ofụri ukeme nnyịn nditie ntiense nnọ Jehovah nte enyịn̄ nnyịn ọdọhọde. (Isa. 43:10-12) Edisana N̄wed Abasi—Edikabade Eke Obufa Ererimbot emi imịn̄de ebe miliọn 240. Ẹdọn̄ enyịn̄ Abasi ke Bible oro ke mme itie emi mme andikabade Bible eken ẹsion̄ode ẹfep. Imesisịn n̄ko enyịn̄ Jehovah ke mme n̄kpọ Ikọ Abasi emi ision̄ode ke se ibede usem 1,000!

11. Nso ke mme Christian eyo mme apostle ẹkenam ẹwụt ke imama akpanikọ?

¹¹ Jesus akamama akpanikọ, oro edi, akpanikọ emi aban̄ade Abasi ye kpukpru se Abasi aduakde ndinam. Nte enye okodude uwem ama owụt ke enye ọdiọn̄ọ  akpanikọ oro, ama onyụn̄ emen akpanikọ oro ekpep mbon en̄wen. (John 18:37) Ata mme mbet Jesus ẹma ẹnen̄ede ẹma akpanikọ n̄ko. (John 4:23, 24) Apostle Peter okokot ido ukpono mme Christian “usụn̄ akpanikọ.” (2 Pet. 2:2) Ke ntak emi mme Christian eyo mme apostle ẹkenen̄erede ẹma akpanikọ, mmọ ikenyịmeke se ẹkpepde ke ido ukpono, se ẹsinamde ke obio, ye se mme owo ẹtịn̄de emi ọwọrọde ọkpọn̄ akpanikọ. (Col. 2:8) Ukem ntre n̄ko, ata mme Christian ẹsitịn̄ enyịn ẹnam kpukpru se mmọ ẹkpepde ẹnyụn̄ ẹnamde ẹdi ukem ukem se idude ke Bible. Mmọ ẹsinam oro man ẹkụt ẹte ke ‘imaka iso isan̄a ke akpanikọ.’—3 John 3, 4.

12. Nso ke mbon emi ẹdade usụn̄ ẹsinam ke ini mmọ ẹkụtde ke edi se ikpụhọrede se inịmde? Nso inam mmọ ẹsinam ntre?

¹² Mme Ntiense Jehovah idọhọke ke kpukpru n̄kpọ ke Bible an̄wan̄a mmimọ. Ndusụk ini, mmọ ẹsidikụt ke se mmimọ ikọdọhọde nte ndusụk itie Bible ẹwọrọde ikenenke, mîdịghe ẹkụt ke nte iketịmde n̄kpọ ke esop ikenenke. Ikpanaha oro akpa nnyịn idem. Bible ama owụt ke edidi nte eyo esierede aka, ntre ke Ikọ Abasi enen̄ede an̄wan̄a ikọt Jehovah. (Col. 1:9, 10) Jehovah esiyarade akpanikọ ọnọ ikọt ese sụn̄sụn̄ sụn̄sụn̄, ndien ana iben̄e idem ndinyene ime mbet tutu akpanikọ enen̄ede an̄wan̄a nnyịn. (N̄ke 4:18) Ke ini mbon emi ẹdade nnyịn usụn̄ ẹkụtde ke edi se ẹkpụhọrede se ikesinịmde m̀mê nte ikesinamde n̄kpọ, mmọ isibiatke ini ndinam oro. Ediwak ufọkabasi emi ẹdọhọde ke idi mme Christian ẹma ẹkpụhọde n̄kpọ, esidi man enem mbon ufọkabasi mmọ, m̀mê man mmọ ẹkûnen̄ede udi isio ye ererimbot. Edi esop Abasi ẹma ẹkpụhọde n̄kpọ, esidi man inen̄ede ikpere Jehovah inyụn̄ ituak ibuot inọ enye nte Jesus ekesinamde. (Jas. 4:4) Ke ini ikpụhọrede n̄kpọ, isitoho ke ntak emi iyomde yak okodụk ye nte ẹnamde n̄kpọ idahaemi ke ererimbot, esidi ke ntak emi Bible enen̄erede an̄wan̄a nnyịn akan akpa. Imama akpanikọ!—1 Thess. 2:3, 4.

13. Efe idi n̄kponn̄kan edu emi akpanade ata mme Christian ẹnyene? Didie ke Mme Ntiense Jehovah ẹwụt ke imenyene edu oro?

¹³ Ke otu kpukpru edu emi ẹkedade ẹdiọn̄ọ mme mbet Jesus ke eyo mme apostle, n̄kponn̄kan ekedi ima. Jesus ọkọdọhọ ete: “Edieke mbufo ẹnyenede ima ke otu idem mbufo, kpukpru owo ẹyeda emi ẹfiọk ẹte mbufo ẹdi mbet mi.” (John 13:34, 35) Mfịn, Mme Ntiense Jehovah ẹma idemmọ ke ofụri ererimbot ẹnyụn̄ ẹdiana kiet. Nnyịn ibietke ido ukpono en̄wen ekededi sia itie nte ubon kiet inamke n̄kpọ m̀mê ito m̀mọ̀n̄ m̀mê inyụn̄ idi nso. Ama odụk mbono esop nnyịn ye mme mbono nnyịn, oyokụt ata ima. Emi esidọdiọn̄ anam inen̄ede inịm ke Jehovah ama usụn̄ emi ituakde ibuot inọ enye.

14. Colossae 3:12-14 owụt ke nso idi akpan usụn̄ kiet emi ikpowụtde ke imenen̄ede ima kiet eken?

¹⁴ Bible ọdọhọ yak ‘inyene ufiop ufiop ima inọ kiet eken.’ (1 Pet. 4:8) Usụn̄ kiet emi iwụtde utọ ima emi edi ndisifen nnọ nditọete nnyịn ke ini mmọ ẹduede nnyịn nnyụn̄ nyọ mmọ ke ini mmọ ẹnamde ndusụk n̄kpọ ke ntak emi mmọ mîfọnke ima. Usụn̄ en̄wen edi ndisiyom usụn̄ nnọ kpukpru owo ke esop nnyịn n̄kpọ nnyụn̄ mfọn ido ye mmọ, idem ye mbon oro ẹkeduede nnyịn. (Kot Colossae 3:12-14.) Utọ ima oro ke ẹnen̄ede ẹda ẹdiọn̄ọ ata mme Christian.

15. Siak mme usụn̄ en̄wen emi ikpebede mme Christian eyo mme apostle.

¹⁵ Enyene mme usụn̄ en̄wen emi ikpebede mme Christian eyo mme apostle. Ke  uwụtn̄kpọ, imenyene mme esenyịn oro ẹsan̄ade-san̄a, mbiowo, ye mme asan̄autom unamutom nte mmọ ẹkenyenede n̄ko. (Phil. 1:1; Titus 1:5) N̄kpọ en̄wen edi ke ukem nte mme Christian eyo mme apostle, imokpono ibet emi Jehovah ọnọde aban̄a idan̄, ndọ, ye iyịp; imesinyụn̄ inam n̄kpọ man mme anamidiọk emi mîmaha ndikabade esịt ẹkûbiat esop.—Utom 15:28, 29; 1 Cor. 5:11-13; 6:9, 10; Heb. 13:4.

16. Ephesus 4:4-6 ekpep nnyịn nso?

¹⁶ Jesus ama ọdọhọ ke ediwak owo ẹyedọhọ ke idi mme mbet imọ, edi ke idịghe kpukpru mmọ ẹdidi ata mbet imọ. (Matt. 7:21-23) Bible ama ọdọhọ n̄ko ke ama esịm ke mme akpatre usen, ke ediwak owo ‘ẹyenyene enyọn̄ enyọn̄ ido uten̄e Abasi.’ (2 Tim. 3:1, 5) Edi Bible enen̄ede anam yak idiọn̄ọ ke “mbuọtidem kiet” kpọt, oro edi, ido ukpono kiet kpọt, ke Abasi enyịme.—Kot Ephesus 4:4-6.

17. Mmanie ẹkpono Abasi ke nnennen usụn̄?

¹⁷ Mmanie ẹkpono Abasi ke nnennen usụn̄ mfịn? Imetịn̄ mme n̄kpọ emi ikpadade idiọn̄ọ. Imese nte Jesus ekesituakde ibuot ọnọ Jehovah ye nte mme Christian eyo mme apostle ẹkesinamde. Imokụt ke Mme Ntiense Jehovah kpọt ẹdi nnennen ido ukpono. Edi ata n̄kpọ ukpono nditiene ndi Ntiense Jehovah nnyụn̄ ndiọn̄ọ nnennen se Bible etịn̄de aban̄a Jehovah ye mme n̄kpọ emi enye aduakde ndinam! Ntre yak inen̄ede inịm ke imokụt akpanikọ inyụn̄ idomo ofụri ukeme nnyịn ndimụm enye n̄kama.