KPUKPRU isua, ndima erọn̄ Jehovah emi ẹsifiakde ẹda ẹsịn ke esop ẹsiwak. Kere nte idara esikponde ke heaven ini owo mmọ kiet kiet afiakde ọnyọn̄ ebịne Jehovah! (Luke 15:7, 10) Ekpedi afo esịne ke otu mbon emi ẹfiakde ẹda ke esop, nen̄ede nịm ke enem Jesus, mme angel, ye Jehovah ke idemesie ndikụt fi ọnyọn̄de edi. Ana afo anam n̄kpọ man afiak enen̄ede ekpere Jehovah. Edi enyene mme n̄kpọ emi ẹkemede ndibiọn̄ọ fi. Nso idi ndusụk mmọ? Nso ke akpanam mbak mmọ ẹdibiọn̄ọ fi?

Esịt esisụk etetịmede ediwak nditọete idem ke ẹma ẹkefiak ẹda mmọ ke esop. Ekeme ndidi an̄wan̄a fi nte eketiede Edidem David ke idem. Idem ke Jehovah ama ekefen ọnọ enye, enye ama ọdọhọ ete: “Uwak ndudue mi ẹfụk mi.” (Ps. 40:12; 65:3) Bụt ekeme ndisụk nnam eyenete, enye onyụn̄ ekeme ndika iso nduọhọ idemesie idem ke ediwak isua ama ekebe tọn̄ọ ẹkefiak ẹda enye. Ama ebe isua 20 mbemiso ẹfiakde ẹda Isabelle ẹsịn ke esop. * Enye ọkọdọhọ ete: “Ama ọsọn̄ mi ndinịm ke Jehovah ekeme ndifen nnọ mi.” Edieke esịt ọduọde fi, oro ekeme ndinam fi afiak adian̄ade ọkpọn̄ Jehovah. (N̄ke 24:10) Mbọk kûyak utọ n̄kpọ oro etịbe.

Idem esinyek ndusụk owo ke mmimọ idikemeke ndinam kpukpru se anade inam man ifiak ikpere Jehovah. Brọda Antoine ọkọdọhọ ntem ke ẹma ẹkefiak ẹda enye: “Eketie mi nte mmefre kpukpru se n̄kesinamde m̀mê se n̄kekpepde ini owo mîkosioho mi ke esop.” Utọ ekikere emi ekeme ndikpan ndusụk owo ndifiak nnen̄ede nsịn idem ke esop.

Ke uwụtn̄kpọ, edieke oyobio abiatde ufọk owo idiọk idiọk, ibuot ekeme ndiyon̄ enyeneufọk oro enye ama ada ekere utọ utom emi esịnede ke ndifiak ndiọn̄ ufọk oro, enye onyụn̄ ekeme ndikere  m̀mê idida m̀mọ̀n̄ ini inam kpukpru oro. Ukem ntre n̄ko, ekpedi akwa idiọkn̄kpọ akadian̄ade fi ọkpọn̄ Jehovah, ekeme nditie fi nte ke ndifiak n̄kpere Jehovah idịghe ekpri utom. Edi enyene se ikemede ndin̄wam fi.

Jehovah ọdọhọ nnyịn ete: “Mbufo ẹdi nnyịn inen̄ede mme n̄kpọ ke ufọt nnyịn.” (Isa. 1:18) Afo emesesịn idem anam n̄kpọ man ‘enen̄ede n̄kpọ’ obono. Jehovah ama fi ke ntak oro. Afo ndinyọn̄ mbịne Jehovah anam Jehovah okụt se adade ọbọrọ Satan emi odoride enye ikọ!—N̄ke 27:11.

Afo ndinyọn̄ mbịne Jehovah owụt ke ọmọtọtọn̄ọ ndinen̄ede n̄kpere enye, enye ọn̄wọn̄ọ n̄ko ke iyenen̄ede ikpere fi. (Jas. 4:8) Enem nditọete ndikụt fi afiakde ọnyọn̄ edi esop Abasi. Edi enyene n̄kpọ en̄wen emi anade anam. Ana aka iso anam se idin̄wamde fi enen̄ede ekpere Jehovah emi edide Ete fo ye Ufan fo. Nso idin̄wam fi?

Yom usụn̄ mek mme n̄kpọ emi afo edinamde emi mîdisọn̄ke ikan fi. Anaedi ke eteti mme akpan n̄kpọ emi ekekpepde aban̄a Jehovah ye se enye ọn̄wọn̄ọde ndinam ke ini iso. Edi ana afiak anam mme n̄kpọ emi ekesinamde, utọ nte ndisikwọrọ ikọ, ndidụk mbono esop, nnyụn̄ ndian idem ye nditọete. Se ndusụk se ekemede ndimek ndinam mi.

Sineme nneme ye Jehovah ke ubọk ke ubọk. Ete fo ọdiọn̄ọ ke edieke esịt akade iso amia fi ufen, ke ekeme ndisọn̄ fi ndibọn̄ akam nnọ imọ. (Rome 8:26) Kpa ye oro, ‘kọbọ ke akam,’ dọhọ Jehovah ke emenen̄ede oyom ndidi ufan esie. (Rome 12:12) Andrej eti nte eketiede enye ke idem ini ẹkefiakde ẹda enye. Enye ọdọhọ ete: “Esịt ama esimia mi ufen ata etieti, bụt onyụn̄ enen̄ede anam mi. Edi ini ekededi emi mbọn̄de akam mma, ikesinen̄ekede itie mi ntre ke idem aba. Esịt ama esina mi sụn̄.” Mûdiọn̄ọke se ekpeben̄ede Jehovah, akam emi David ọkọbọn̄de ke Psalm 51 ye 65 ini enye akakabarede esịt ekeme ndin̄wam fi.

Sikpep Bible kpukpru ini. Oro ayan̄wam fi enen̄ede ọbuọt idem ye Jehovah onyụn̄ enen̄ede ama enye. (Ps. 19:7-11) Felipe ọdọhọ ete: “Ami ndiketre ndisisio ini n̄kpep Bible akanam mi n̄kûkpere Jehovah aba, nnyụn̄ n̄kanam se enye asuade. Ntre mma mbiere ndisịn idem n̄kpep Bible man an̄wam mi.” Afo emekeme ndinam ntre n̄ko. Edieke ọsọn̄de fi ndidiọn̄ọ mme ibuotikọ emi ekpekpepde, emekeme ndidọhọ ufan fo emi enen̄erede ekpere Jehovah an̄wam fi.

Fiak nen̄ede dian idem ye nditọete. Esịt esitịmede ndusụk mbon emi ẹfiakde ẹda ke esop ke nditọete idinemke esịt ye mmimọ. Larissa ọdọhọ ete: “Bụt ama anam mi ata etieti. Eketie mi nte mma ntọ nditọete mi edem ke isọn̄. Ama ada ini mbemiso kpukpru oro ẹtre.” Nen̄ede nịm ke mbiowo ye nditọete en̄wen ẹnen̄ede ẹyom ndin̄wam fi afiak ekpere Jehovah. (Se ekebe emi “ Nso ke Mbiowo Ẹkpenam?”) Enem mmọ nte afo ọnyọn̄de edi, mmọ ẹnyụn̄ ẹyom esịt enem fi!—N̄ke 17:17.

Nso ke akpanam man enen̄ede adian idem ye nditọete? Tiene sịn idem nam se nditọete ẹnamde—dụk mbono esop nyụn̄ ka ukwọrọikọ kpukpru ini. Didie ke oro edin̄wam fi? Felix ọdọhọ ete: “Nditọete ẹketetie ẹbet nnyọn̄ ndi esop Abasi. Mma n̄kụt ke mmọ ẹma mi tutu. Mmọ ẹma ẹn̄wam mi n̄kụt ke mmafiak ndi eyenete mmọ, ke Jehovah efen ọnọ mi, ke mmonyụn̄ n̄keme ndika iso nnam n̄kpọ esie.”—Se ekebe emi “ Nso ke Afo Akpanam?”

Nte osụk odomode ndifiak nnen̄ede n̄kpere Jehovah, Satan ayaka iso emen mfịna ebịne fi man ese m̀mê iyekeme ndinam idem emem fi. (Luke 4:13) Sịn idem nam se idin̄wamde fi enen̄ede ekpere Jehovah man ikpat ọsọn̄ fi ke isọn̄.

Kop mi se Jehovah ọn̄wọn̄ọde ndinam nnọ mme erọn̄ esie. Enye ọdọhọ ete: “Nyoyom enye emi okosopde, nnyụn̄ nda enye emi ẹkebịnde ẹfep mfiak ndi, nyọbọp enye emi obụn̄ọde nnyụn̄ nsọn̄ọ enye emi ọdọn̄ọde idem.” (Ezek. 34:16) Jehovah an̄wam ata ediwak owo ẹfiak ẹkpere enye. Nen̄ede nịm ke enye oyom ndin̄wam fi aka iso anam mme n̄kpọ emi ẹdin̄wamde fi enen̄ede ekpere imọ.