“NKEDI isua 15 ke ini n̄kanade baptism. Mma ntọn̄ọ utom usiakusụn̄ unọ un̄wam ke ọfiọn̄ itiokiet ama ekebe. Mma nnyụn̄ ntọn̄ọ utom usiakusụn̄ ofụri ini ke isua kiet ebede. Ke mma n̄kokụre ufọkn̄wed sekọndri, mma nyom ndikọkwọrọ ikọ ke ebiet emi ẹnen̄erede ẹyom mme ọkwọrọikọ. N̄koyom ndikọkwọrọ ikọ ke ebiet en̄wen man n̄wọrọ n̄kpọn̄ ekaeka mi emi mîkedịghe Ntiense Jehovah. Mma mfụhọ etieti ke ini esenyịn circuit ọkọdọhọde ke obio emana mi edidi efakutom mi! N̄kayakke enye ọdiọn̄ọ ke n̄kpọ emi inemke mi esịt. Ke ini n̄kọkpọn̄de esenyịn circuit, mma ntọn̄ọ ndikere nte ndinamde utọ n̄kpọ emi. Mma ndọhọ eyenete an̄wan oro ikasan̄ade kiet ikwọrọ ikọ nte: ‘Etie nte nnam n̄kpọ nte Jonah. Edi Jonah ama osụk aka Nineveh ke akpatre. Nyọkwọrọ ikọ ke ebiet emi ẹdọhọde n̄kwọrọ.’

“Mmasiak usụn̄ ke obio emana mi ke isua inan̄ idahaemi, mmonyụn̄ n̄kụt ke ọfọn nte n̄kanamde se ẹkedọhọde mi nnam. N̄kekere ke ndikemeke ndikwọrọ ikọ ke obio emana mi, edi enen̄ede enem mi ndikwọrọ ikọ mi. Ke ọfiọn̄ kiet, mma nnịm ukpepn̄kpọ Bible 24! Mma n̄kam ntọn̄ọ ndikpep n̄kpọ ye ekaeka mi emi ekesibiọn̄ọde mi. Mmenen̄ede n̄kọm Jehovah nte enye an̄wamde mi.”

Akana eyen ukpepn̄kpọ Bible kiet emek m̀mê ikpaka akamba mbono m̀mê ikpetiene ebe imọ ika usọrọ usen emana owo mmọ. Ebe esie ama enyịme enye aka mbono. Enye ama ọdọhọ ebe esie ke iyedi usọrọ oro ima inyọn̄ mbono. Edi ke ini enye ọkọnyọn̄de mbono, enye ama ekere ke ikpanaha imọ idụk usọrọ ekededi emi mîdinemke Jehovah esịt. Ntre enye ikakaha usọrọ oro.

Ke itie usọrọ oro, ebe esie ama ọdọhọ mbon mmọ ke an̄wan imọ eyedi usọrọ oro ke ama ọkọnyọn̄ “mbono ufọkabasi” mmọ. Edi mmọ ẹma ẹdọhọ ebe esie ẹte: “N̄wan fo ididịghe, sia Mme Ntiense Jehovah isinamke usọrọ usen emana!” *

Ebe esie ama enem esịt etieti ke n̄wan imọ anam se enye ekpepde ke Bible inyụn̄ inamke n̄kpọ emi edinamde esịt afịna enye. Nte ini akade, emi ama an̄wam enye ekeme ndikwọrọ ikọ nnọ ebe esie ye mbon en̄wen. Ebe esie ama enyịme ẹkpep imọ Bible onyụn̄ ọtọn̄ọ nditiene enye ndụk mbono esop.