1. Nso inam inen̄ede inịm ke Ikọ Abasi enyene odudu? (Se akpa ndise ibuotikọ emi.)

IKỌT Jehovah ẹnen̄ede ẹnịm ke Ikọ Abasi, oro edi, etop emi Abasi ọnọde mme owo, “enyene uwem onyụn̄ enyene odudu.” (Heb. 4:12) Ediwak nnyịn imokụt odudu oro Ikọ Abasi enyenede ke uwem nnyịn ye ke uwem mbon en̄wen. Mbemiso ndusụk nditọete nnyịn ẹkedụkde esop Abasi, mmọ ẹma ẹsiyịp inọ, ẹda n̄kpọsọn̄ ibọk, ẹnam use mîdịghe ẹsịn efịbe. Mbon eken ẹma ẹwọrọ etop m̀mê ẹnyene n̄kpọ etieti, edi eketie mmọ nte ke enyene n̄kpọ emi anamde uwem okûnen̄ede unem mmọ. (Eccl. 2:3-11) Bible an̄wam ediwak mbon oro uwem ama okodorode, emi ẹma ẹkenyụn̄ ẹduọk idotenyịn ke uwem ẹfiak ẹdinyene idotenyịn. Anaedi esinem fi ndikot mbụk utọ mme owo emi ke Enyọn̄-Ukpeme, ke ibuotikọ emi “Bible Okpụhọde Mme Owo.” Idem ke ima ikana baptism, Ikọ Abasi an̄wam nnyịn ika iso isọn̄ọ ida inam n̄kpọ Abasi.

2. Didie ke Ikọ Abasi akan̄wam nditọete nnyịn ke eyo mme apostle ẹkpụhọde?

² Ndi akpana idem akpa nnyịn ke ini ikụtde nte Ikọ Abasi okpụhọrede mbon oro mme owo ẹkekerede ke mmọ ikemeke-keme ndikpụhọde? Ikpanaha akpa. Ikọ Abasi ama okpụhọde nditọete nnyịn ke eyo mme apostle, emi  ẹkedoride enyịn ndika heaven. (Kot 1 Corinth 6:9-11.) Ke apostle Paul ama akasiak utọ mbon oro mîdidaha Obio Ubọn̄ Abasi inyene, enye ama ọdọhọ ete: “Edi ndusụk mbufo ẹketie ntem.” Ikọ Abasi ye edisana spirit ẹma ẹn̄wam mmọ ẹkpụhọde. Idem ke ndusụk mmọ ẹma ẹkena baptism, mmọ ẹkesụk ẹnanam akwa idiọkn̄kpọ. Bible ọdọhọ ke ẹma ẹsio eyenete kiet oro ẹkeyetde aran ẹfep ke esop eyo mme apostle, ekem ẹma ẹfiak ẹda enye. (1 Cor. 5:1-5; 2 Cor. 2:5-8) Ndi inemke nnyịn ndifiọk ke Ikọ Abasi ama an̄wam nditọete nnyịn ẹtre ndiọi n̄kpọ oro mmọ ẹkesinamde?

3. Nso ke idineme ke ibuotikọ emi?

³ Ikọ Abasi enen̄ede enyene odudu. Sia Jehovah anamde nnyịn inyene Ikọ esie, ana inam mme owo ẹkụt odudu oro Ikọ esie enyenede. (2 Tim. 2:15) Ke ibuotikọ emi, iyeneme nte ikemede ndinam mme owo ẹkụt odudu oro Ikọ Abasi enyenede (1) ke uwem nnyịn, (2) ke ini ikwọrọde ikọ, ye (3) ke ini inọde utịn̄ikọ. Edieke inamde emi, nnyịn iwụt ke imama edima Ete nnyịn Jehovah emi ekpepde nnyịn n̄kpọ man ibọ ufọn, ke imonyụn̄ ima se enye anamde ọnọ nnyịn.—Isa. 48:17.

4. (a) Nso ke ikpanam man Ikọ Abasi enyene odudu ke uwem nnyịn? (b) Afo esinam didie enyene ini okot Bible?

⁴ Edieke iyomde Ikọ Abasi enyene odudu ke uwem nnyịn, ana idomo ndisikot enye kpukpru usen. (Josh. 1:8) Imọdiọn̄ọ ke ediwak nnyịn inyeneke ini. Kpa ye oro, ikpanaha iyak n̄kpọ ekededi anam nnyịn ikûkot Bible. (Kot Ephesus 5:15, 16.) Ediwak ikọt Jehovah ẹdep ifet man ẹkeme ndikot Bible kpukpru usen, edide usenubọk, uwemeyo, m̀mê mbubreyo. Onyụn̄ etie mmọ nte eketiede andiwet Psalm 119, emi ọkọdọhọde ke ufan̄ikọ 97 ete: “Mmama ibet fo didie ntem! Enye ke ntie n̄kere ofụri usen.”

5, 6. (a) Ntak emi ọfọnde itie ikere se ikotde ke Bible? (b) Didie ke ikeme nditie n̄kere se ikotde ke Ikọ Abasi man odụk nnyịn esịt? (c) Nso ufọn ke afo ọbọ ke ndisikot Bible nnyụn̄ ntie n̄kere se okotde?

⁵ Ọfọn isitie ikere n̄ko se ikotde ke Bible. (Ps. 1:1-3) N̄kukụre se idin̄wamde nnyịn inanam se ikotde edi oro. Edide ikot Bible oro ẹmịn̄de-mịn̄, m̀mê ikot ke fon m̀mê ke tablet, akpana iyak se ikotde odụk nnyịn esịt.

⁶ Didie ke ikeme nditie n̄kere se ikotde ke Ikọ Abasi man odụk nnyịn esịt? Esidi ediwak owo ẹma ẹkot ufan̄ikọ ifan̄ ke Bible mmọ ẹtuak ẹda ẹbụp idemmọ ẹte: ‘Nso ke emi ekpep mi aban̄a Jehovah? Ndi mmesinam se n̄kotde ke itie  N̄wed Abasi emi? Ndi enyene se n̄kpokpụhọde ke uwem mi?’ Ke ini inen̄ede itie ikere se ikotde ke Ikọ Abasi, emi ayan̄wam nnyịn inanam se ikotde. Ke ini inamde emi, Ikọ Abasi eyenen̄ede enyene odudu ke uwem nnyịn.—2 Cor. 10:4, 5.

7. Didie ke ikeme ndinam mme owo ẹkụt odudu oro Ikọ Abasi enyenede ke ini ikwọrọde ikọ?

⁷ Nso idin̄wam nnyịn inam mme owo ẹkụt odudu oro Ikọ Abasi enyenede ke ini ikwọrọde ikọ inọ mmọ? Akpana isima ndikot Bible ke ini ikwọrọde ikọ inyụn̄ ikpepde mme owo n̄kpọ. Eyenete kiet ọkọdọhọ ete: “Edieke akpasan̄ade ye Jehovah ọkwọrọ ikọ ke ufọk ke ufọk, ndi ekpemen kpukpru ikọ etịn̄ ikpọn̄, mîdịghe, ndi akpayak enye etiene etịn̄?” Se ikọ esie ọwọrọde edi emi: Ke ini ikotde Bible inọ owo oro ikwọrọde ikọ inọ, ọwọrọ imayak Jehovah etịn̄ ikọ ọnọ owo oro. Ndikot nnennen itie N̄wed Abasi nnọ owo ọfọn akan se ededi oro ikpetịn̄de. (1 Thess. 2:13) Bụp idemfo ete: ‘Ndi mmesidomo ndikot Ikọ Abasi nnọ mme owo ini ekededi oro n̄kwọrọde ikọ?’

8. Ntak emi ndikot Bible kpọt nnọ mbon oro ikwọrọde ikọ inọ mîkemke?

⁸ Ndikot Bible kpọt nnọ mbon oro ikwọrọde ikọ inọ ikemke. Nso inam idọhọ ntre? Sia Bible in̄wan̄ake ediwak owo. Bible ikonyụn̄ in̄wan̄ake ediwak owo ke eyo mme apostle. (Rome 10:2) Ntre, nnyịn ikpekereke ke ima isụk ikokot Bible inọ owo ke se ikotde ayan̄wan̄a enye. Ana inam enye okụt akpan n̄kpọ oro odude ke itien̄wed oro ikotde. Imekeme ndinam ntre ke ndifiak n̄kot ọkpọikọ ke itie N̄wed Abasi oro inyụn̄ inam an̄wan̄a. Emi ayanam Ikọ Abasi enen̄ede odụk esịt mbon oro ikwọrọde ikọ inọ.—Kot Luke 24:32.

9. Nso ke ikpanam mbemiso ikotde itie N̄wed Abasi inọ owo? Nọ uwụtn̄kpọ.

 ⁹ Se itịn̄de mbemiso ikotde itie N̄wed Abasi ekeme ndinam mme owo ẹnen̄ede ẹma Bible. Ke uwụtn̄kpọ, mbemiso ikotde itie N̄wed Abasi, imekeme ndidọhọ: “Yak ise se Andibot nnyịn etịn̄de aban̄a n̄kpọ emi.” Ke ini iyomde ndikot Bible nnọ owo emi mîdịghe Christian, imekeme ndidọhọ: “Yak ise se Edisana N̄wed emi etịn̄de.” Edi, edieke iyomde ndikot Bible nnọ owo emi mîsikaha ufọkabasi, imekeme ndidọhọ: “Ndi akanam omokop utọ ikọ emi?” Idịghe se itịn̄de ye owo kiet ke iditịn̄ ye owo en̄wen sia owo ye owo idịghe ukem.—1 Cor. 9:22, 23.

10. (a) Tịn̄ se iketịbede ini eyenete kiet okokotde Ikọ Abasi ọnọ ete kiet. (b) Tịn̄ nte okokụtde odudu oro Ikọ Abasi enyenede ini ọkọkwọrọde ikọ?

¹⁰ Ediwak nditọete ẹkụt ke ndikot Bible nnọ mme owo ke ini ikwọrọde ikọ inọ mmọ esinen̄ede ọfọn. Ke uwụtn̄kpọ, eyenete kiet ama emen obufa Enyọn̄-Ukpeme ọsọk akanieren kiet emi esikotde magazine nnyịn ke ediwak isua. Utu ke ndinyụn̄ nyak magazine oro nnọ enye nnyọn̄ nte enye esinamde, enye ama okot itien̄wed kiet oro odude ke Enyọn̄-Ukpeme oro ọnọ enye. Enye okokot 2 Corinth 1:3, 4, emi ọdọhọde ke Jehovah emi edide ‘Ete mbọm ye Abasi kpukpru ndọn̄esịt esidọn̄ nnyịn esịt ke kpukpru ukụt nnyịn.’ Itien̄wed oro ama enem ete oro tutu enye ọdọhọ eyenete nnyịn afiak okot. Ete oro ama ọdọhọ ke imọ ye n̄wan imọ imenen̄ede iyom ndọn̄esịt. Itien̄wed oro ama anam enye oyom ndifiọk n̄kpọ en̄wen emi Bible ekpepde. Omokụt do ke ọfọn ikot Ikọ Abasi inọ mme owo ke ini ikwọrọde ikọ sia Ikọ Abasi enyene odudu.—Utom 19:20.

11. Nso ke nditọete oro ẹsinọde utịn̄ikọ ẹkpeti?

¹¹ Esinem nnyịn ndidụk mbono esop ye n̄kpri ye ikpọ mbono. Isika mbono ye mbono esop man ikokpono Jehovah. Ikọ Abasi emi isikpepde do esin̄wam nnyịn etieti. Edi ata n̄kpọ ukpono ndinọ utịn̄ikọ ke mbono esop ye n̄kpri ye ikpọ mbono. Ntre nditọete oro ẹnyenede utịn̄ikọ ke mbono esop ye ke mme mbono ikpadaha enye ntre ntre. (Jas. 3:1) Ana mmọ ẹkụt ẹte ke ida se ikpepde ito Bible. Edieke afo enyenede utịn̄ikọ, nso ke akpanam man mme owo ẹkụt odudu oro Ikọ Abasi enyenede?

12. Nso ke etịn̄ikọ ekeme ndinam man ekpep mme owo se isịnede ke Bible?

¹² Ke ini ọnọde utịn̄ikọ, kûfre ke ata akpan n̄kpọ edi ndikpep mme owo se isịnede ke Bible. (John 7:16) Didie ke afo ekeme ndinam emi? Kûyak ifiọkutom m̀mê uwụtn̄kpọ oro ọnọde, m̀mê nte afo etịn̄de ikọ anam mme owo ẹfre akpan n̄kpọ emi odude ke itie N̄wed Abasi oro okokotde. Kûfre n̄ko ke ndida Bible n̄kpep mme owo n̄kpọ iwọrọke ndikot ediwak itie N̄wed Abasi. Edieke okotde itien̄wed awak akaha, oro ekeme ndinam mme owo itịghi itien̄wed ndomokiet oro okokotde. Ntre, mek mme itien̄wed Abasi oro edikotde, kûkot itọk itọk, nam se okotde an̄wan̄a, nọ uwụtn̄kpọ man se okotde an̄wan̄a, nyụn̄ wụt nte mme owo ẹkemede ndinam se itien̄wed oro etịn̄de. (Neh. 8:8) Edieke edikamade n̄wed utịn̄ikọ esop Abasi inọ utịn̄ikọ, da ini se n̄wed utịn̄ikọ oro ye mme itien̄wed oro ẹdọn̄de. Se nte mme itie N̄wed Abasi oro ẹsiakde ẹsịn asan̄ade ye se ẹtịn̄de ke n̄wed utịn̄ikọ. Ekem mek mme itie N̄wed Abasi oro ẹdinamde se afo etịn̄de an̄wan̄a owo. (N̄kpọ en̄wen emi ekemede ndin̄wam fi odu  ke ọyọhọ ukpepn̄kpọ 21 esịm 23 ke n̄wed Bọ Ufọn to Ukpepn̄kpọ Ufọkn̄wed Utom Ukara Abasi.) Ti ke idụhe se ifọnde nte afo ndibọn̄ akam mben̄e Jehovah an̄wam fi ekpep mme owo se isịnede ke Ikọ esie.—Kot Ezra 7:10; Mme N̄ke 3:13, 14.

13. (a) Didie ke itien̄wed kiet oro ẹkenamde an̄wan̄a ke mbono esop okotụk eyenete an̄wan kiet? (b) Tịn̄ ufọn emi afo ọbọde ke ntak emi ẹkenamde itie N̄wed Abasi an̄wan̄a ke mbono esop m̀mê ke mbono.

¹³ Itie N̄wed Abasi kiet oro ẹkenamde an̄wan̄a ke mbono esop ama enen̄ede otụk eyenete an̄wan kiet ke Australia. Nsio nsio n̄kpọ ẹma ẹwọrọ enye ke ini enye ekedide ekpri. Enye ama edikpep n̄kpọ aban̄a Jehovah onyụn̄ ana baptism. Edi enye ikosụk inịmke ke Jehovah ama imọ. Nte ini akakade, enye ama edinịm ndien ke Jehovah ama imọ. Nso ikanam enye enịm? Enye ama etie ekere itie N̄wed Abasi kiet emi ẹkenamde an̄wan̄a ke mbono esop onyụn̄ ese nte ẹnamde itien̄wed oro an̄wan̄a ke mme n̄wed nnyịn. Oro ama anam enye okokụt mme itien̄wed en̄wen emi ẹwụtde ke Jehovah ama enye. * Ndi enyene itie N̄wed Abasi emi ẹkenamde an̄wan̄a ke mbono esop ye ke n̄kpri ye ikpọ mbono emi ekenen̄erede otụk fi?—Neh. 8:12.

14. Didie ke ikeme ndiwụt ke imama Ikọ Abasi?

¹⁴ Ndi esịt inemke nnyịn nte Jehovah ọnọde nnyịn Ikọ esie? Ikọ esie aka iso odu kpa nte enye ọkọn̄wọn̄ọde. (1 Pet. 1:24, 25) Ntre, ọfọn ikot Ikọ Abasi kpukpru usen, inam se ikotde, inyụn̄ ida enye in̄wam mbon en̄wen. Nnyịn ndinam emi oyowụt ke imama Ikọ Abasi, ke imonyụn̄ inen̄ede ima Jehovah Abasi emi ọkọnọde nnyịn Bible.