Se ẹtịn̄de ke itien̄wed oro anam owo ekere n̄kpọ. Itie oro ọdọhọ ete: “Edieke okụtde nte ẹfịkde ubuene ẹnyụn̄ ẹdade afai ẹyụrọde ikpe ye se inende ke ikpehe obio ukara, kûyak n̄kpọ emi akpa fi idem, koro enye emi okon̄de akan akwa owo emi ke ese, ndien odu mbon oro ẹkon̄de ẹkan mmọ.”—Eccl. 5:8.

Edieke ikotde itien̄wed oro enyọn̄ enyọn̄ ntre ibe, editie nte ẹtịn̄ ẹban̄a mbon ukara kpọt. Edi ikpetịm ise, iyokụt ke itien̄wed oro etịn̄ ata akpan n̄kpọ kiet aban̄a Jehovah. Se ẹtịn̄de oro akpana ọdọn̄ nnyịn esịt onyụn̄ ọsọn̄ọ nnyịn idem.

Ecclesiastes 5:8 etịn̄ aban̄a andikara emi efịkde mme ubuene, emi mînyụn̄ ikpehe unenikpe inọ mmọ. Akpana andikara oro eti ke anaedi owo emi okponde itie akan imọ do ke ese imọ. Akam ekeme ndidi enyene mbon emi ẹkponde itie ẹkan mmọ mbiba oro. Se idiọkde ke ukara owo edi ke kpukpru mbon ukara emi ẹkeme ndibiara, ndien ana mme owo ẹbọ ufen ke ntak emi mmọ mîkarake mme owo ọfọn.

Kpa ye emi ekemede nditie nte ke usụn̄ unyan̄a ndomokiet idụhe, isọn̄esịt nnyịn edi ke Jehovah ke ese ikpọ owo ukara emi. Imekeme ndikpe Jehovah ubọk ite an̄wam nnyịn, inyụn̄ itịn̄ kpukpru se ifịnade nnyịn inọ enye. (Ps. 55:22; Phil. 4:6, 7) Imọdiọn̄ọ ke “enyịn Jehovah [ke asan̄a] akanade ofụri isọn̄ man enye owụt odudu esie ke ufọn mbon oro ẹnamde n̄kpọ ẹnọ enye ke ofụri esịt.”—2 Chron. 16:9.

Kpukpru se itịn̄de emi ọwọrọ ke Ecclesiastes 5:8 anam nnyịn ikụt nte ukara owo etiede, ke enyene owo emi edisụk ikponde itie ikan owo. Se idide akpan n̄kpọ ikan oro edi ke itien̄wed oro eti nnyịn ke Jehovah edi Akakan Andikara, ke idụhe andikara emi okponde itie akan enye. Jesus Christ Eyen esie edi Edidem Obio Ubọn̄ Esie, Jehovah ke onyụn̄ ada Eyen esie oro akara idahaemi. Ata Ọkpọsọn̄ Abasi ke okụt kpukpru n̄kpọ; enye isinamke asari isinyụn̄ ikpehe ukwan̄ikpe. Eyen esie onyụn̄ etie ntre n̄ko.