1. Nso ke mbon emi ẹnamde n̄kpọ Jehovah ke ofụri esịt ẹkeme ndikot enye?

JESUS emi edide “akpan ke otu kpukpru edibotn̄kpọ,” ye udịm mme angel ẹsịne ke ubon Jehovah emi ẹtuakde ibuot ẹnọ enye. (Col. 1:15; Ps. 103:20) Ini Jesus okodude ke isọn̄, enye ama anam mme owo ẹdiọn̄ọ ke mbon emi ẹnamde n̄kpọ Jehovah ke ofụri esịt ẹkeme ndikot Jehovah Ete. Ini Jesus etịn̄de ikọ ye mme mbet esie, enye ọkọdọhọ ke Jehovah edi ‘Ete imọ ye Ete mmọ.’ (John 20:17) Ndien ke ini iyakde idem inọ Jehovah inyụn̄ ina baptism, imetiene isịne ke ubon emi ima odude.—Mark 10:29, 30.

2. Nso ke idineme ke ibuotikọ emi?

² Esisọn̄ ndusụk owo ndida Jehovah nte edima Ete mmọ. Ekeme ndinam ndusụk owo idiọn̄ọke se mmọ ẹkpenamde ẹwụt nditọete mmọ ke imama mmọ. Ke ibuotikọ emi, imọn̄ ikụt nte Jesus an̄wamde nnyịn yak ida Jehovah nte edima Ete nnyịn emi ikemede ndisan̄a n̄kpere. Iyonyụn̄ ikụt nsio nsio usụn̄ emi ikemede ndinam n̄kpọ ye nditọete nnyịn nte Jehovah anamde n̄kpọ ye mmọ.

3. Didie ke Akam Ọbọn̄ anam nnyịn inen̄ede ikpere Jehovah?

³ Jehovah edi edima Ete. Jesus ada Jehovah nte edima ete emi nditọ esie ẹkemede ndineme nneme ye enye ini ekededi, idịghe ete emi ọsọn̄de ido, onyụn̄ etiede-tie ọdọhọ nditọ esie se ẹkpenamde. Jesus oyom ida Jehovah ntre n̄ko. Akam emi enye ekekpepde mme mbet esie ndibọn̄ anam idiọn̄ọ emi. Enye ọkọtọn̄ọ akam oro ye: “Ete nnyịn.” (Matt. 6:9) Ikpakakakke Jesus ndidọhọ nnyịn ikot Jehovah “Ata Ọkpọsọn̄,” “Andibot,” m̀mê “nsinsi Edidem.” Kpukpru oro ẹdi udorienyịn̄ Jehovah, mmọdo ẹnyụn̄ ẹdọn̄ọ ke Bible. (Gen. 49:25; Isa. 40:28; 1 Tim. 1:17) Utu ke oro, Jesus okokot Jehovah “Ete,”  emi owụtde nte ikemede ndikpere Jehovah n̄ketre.

4. Inam didie idiọn̄ọ ke Jehovah oyom nnyịn ikpere imọ?

⁴ Ndi ọsọn̄ fi ndida Jehovah nte edima Ete fo? Esisọn̄ ndusụk nnyịn n̄ko. Ekpedi ata ata ete nnyịn ekesidọdiọk uwem ye nnyịn, ekeme ndisọn̄ ndin̄wan̄a nnyịn nte ete ekemede ndima nditọ esie. Edi enem nnyịn etieti ndidiọn̄ọ ke enen̄ede an̄wan̄a Jehovah nte etiede nnyịn ke idem! Enye oyom ndikpere nnyịn. Oro anam Bible ọdọhọ nnyịn ete: “Ẹsan̄a ẹkpere Abasi, ndien enye ayasan̄a ekpere mbufo.” (Jas. 4:8) Jehovah ama nnyịn onyụn̄ ọn̄wọn̄ọ ke iyakama nnyịn ọfọn akan nte ete en̄wen ekededi akpakamade.

5. Didie ke Jesus ekeme ndin̄wam nnyịn inen̄ede ikpere Jehovah nte ikụtde ke Luke 10:22?

⁵ Jesus ekeme ndin̄wam nnyịn inen̄ede ikpere Jehovah. Jesus enen̄ede ọdiọn̄ọ Jehovah onyụn̄ enen̄ede ekpebe mme edu Esie, oro akanam enye ọdọhọ ete: “Owo eke okụtde mi okụt Ete n̄ko.” (John 14:9) Jesus anam n̄kpọ nte akamba eyeneka; enye ekpep nnyịn ndikpono Ete nnyịn nnyụn̄ n̄kop uyo Esie, nditre ndinam se idiyatde Enye, nnyụn̄ nnam se idinamde Enye ama nnyịn. Edi, nte Jesus ekesinamde n̄kpọ ini enye odude ke isọn̄ enen̄ede anam yak ikụt ke Jehovah ama nnyịn onyụn̄ ọfọn ido. (Kot Luke 10:22.) Se ndusụk uwụtn̄kpọ mi.

6. Tịn̄ nsio nsio ini emi Jehovah okokopde akam Jesus.

⁶ Jehovah esikpan̄ utọn̄ ọnọ nditọ esie. Yak ineme nte Jehovah ekesikpan̄de utọn̄ ọnọ akpa edibon Eyen esie. Ini Jesus okodude ke isọn̄, enye ama esibọn̄ akam ediwak ini, imenen̄ede inịm ke Jehovah ama esikop. (Luke 5:16) Enye ama esikop akam emi Jesus ekesibọn̄de ini enye oyomde ndinam akpan n̄kpọ, utọ nte ini enye okoyomde ndimek mme apostle 12. (Luke 6:12, 13) Ini esịt eketịmerede Jesus yak enye ọbọn̄ akam, Jehovah ama okop n̄ko. Esisịt ini mbemiso Judas ekemende enye ọnọ mme asua, Jesus ama ọbọn̄ akam ọnọ Ete esie aban̄a mme n̄kpọ emi ẹditịbede inọ enye. Jehovah ikonyụn̄ ikopke-kop akam Jesus kpọt idaha, Enye ama ọnọ  angel edisọn̄ọ edima Eyen Esie idem.—Luke 22:41-44.

7. Etie fi didie ke idem ndidiọn̄ọ ke Jehovah esikop akam ikọt esie?

⁷ Jehovah osụk okokop akam ikọt esie mfịn, enye esinyụn̄ ọbọrọ ke nnennen ini ye ke mfọnn̄kan usụn̄. (Ps. 116:1, 2) Sista kiet ke India ama okụt nte Jehovah ọbọrọde akam imọ. Esịt ama esitịmede enye ata etieti, enye ama onyụn̄ ọbọn̄ akam ọdọhọ Jehovah an̄wam imọ. Enye ọdọhọ ete: “Edinam TV nnyịn eke May 2019 akaban̄a se ikpanamde ke ini esịt etịmerede nnyịn. Ata nnennen se n̄koyomde ekedi oro. Jehovah akada oro ọbọrọ akam mi.”

8. Tịn̄ nsio nsio usụn̄ emi Jehovah okowụtde ke imama Jesus.

⁸ Jehovah ama nnyịn onyụn̄ ekere aban̄a nnyịn ukem nte enye akamade Jesus onyụn̄ ekerede aban̄a enye ofụri ini emi enye okodude ke isọn̄. (John 5:20) Enye ama an̄wam Jesus aka iso ọbuọt idem ye enye, ọsọn̄ọ enye idem ini esịt eketịmerede enye, onyụn̄ okụt ete ke Jesus enyene se adade odu uwem. Jehovah ama onyụn̄ ọdọhọ Eyen esie ke imama enye, ke enye onyụn̄ anam esịt enem imọ. (Matt. 3:16, 17) Akananam Jesus ikekereke ke imọ idu ikpọn̄ sia enye ama ọdiọn̄ọ ke edima Ete imọ eke heaven ododu ye imọ kpukpru ini.—John 8:16.

9. Inam didie idiọn̄ọ ke Jehovah ama nnyịn?

⁹ Kpukpru nnyịn imokụt nsio nsio usụn̄ emi Jehovah owụtde ke imama nnyịn ukem nte Jesus okokụtde. Se ndusụk mi: Jehovah ama odụri nnyịn adian idem onyụn̄ ọnọ nnyịn ndima nditọete emi ẹsinamde esịt enem nnyịn, ẹnyụn̄ ẹsọn̄ọde nnyịn idem ke ini inyenede mfịna. (John 6:44) Jehovah ọnọ nnyịn kpukpru se idin̄wamde nnyịn ika iso ibuọt idem ye enye, enye onyụn̄ ọnọ nnyịn se idade idu uwem ke usen ke usen. (Matt. 6:31, 32) Ima ikere nte Jehovah amade nnyịn, oro esinam idọdiọn̄ ima enye.

10. Nte Jehovah esinamde n̄kpọ ye nditọete nnyịn ekpep nnyịn nso?

¹⁰ Jehovah ama nditọete nnyịn. Edi idịghe kpukpru ini ke edimem nnyịn utom ndima mmọ nnyụn̄ nnam mme n̄kpọ emi ẹnamde mmọ ẹkụt ke imama mmọ. Se isinamde etie ntre edi ke ito nsio nsio itie, nte ẹkenyụn̄ ẹbọkde nnyịn idịghe ukem. N̄kpọ en̄wen edi ke kpukpru nnyịn imesinam ndudue emi afịnade mbon en̄wen onyụn̄ ayatde mmọ. Kpa ye oro, kpukpru nnyịn imekeme ndinam ima aka iso odu ke otu nnyịn. Idinam didie? Edi ndima nditọete nnyịn nte Ete nnyịn amade mmọ. (Eph. 5:1, 2; 1 John 4:19) Ẹyak ise se ikemede ndikpep nto Jehovah.

11. Didie ke Jesus akatua mme owo mbọm ukem nte Jehovah?

¹¹ Jehovah enyene “esịt mbọm.” (Luke 1:78) Esifịna owo emi enyenede esịt mbọm ndikụt mme owo ẹbọde ufen, enye esinyụn̄ oyom usụn̄ nte akpan̄wamde mmọ onyụn̄ ọdọn̄de mmọ esịt. Nte Jesus ekesinamde n̄kpọ ye mme owo ama owụt ke mbọm mmọ anam enye nte esinamde Jehovah. (John 5:19) Ini kiet emi enye okokụtde otuowo, ‘mbọm mmọ ama anam enye, koro ẹkefiomode ẹnyụn̄ ẹsuande mmọ nte erọn̄ eke mînyeneke andikpeme.’ (Matt. 9:36) Edi enye ikokopke mmọ mbọm kpọt idaha, enye ama anam n̄kpọ man an̄wam mmọ. Enye ama ọkọk mbon udọn̄ọ onyụn̄ an̄wam mbon emi ‘ẹkekpade utom ẹnyụn̄ ẹbiomde ndodobi mbiomo.’—Matt. 11:28-30; 14:14.

12. Tịn̄ ndusụk usụn̄ emi ikemede ndiwụt ke mbọm nditọete nnyịn anam nnyịn.

¹² Se idin̄wamde nnyịn itua nditọete nnyịn  mbọm edi ndidiọn̄ọ se iwọrọde mmọ. Ke uwụtn̄kpọ, eyenete an̄wan ekeme ndidọn̄ọ ata idiọk udọn̄ọ. Enye isisemeke idem iban̄a udọn̄ọ oro inọ mme owo. Edi ekpenen̄ede enem enye edieke ẹn̄wamde enye. Ekeme ndidi imemke inọ enye ndise mban̄a ubon esie. Ndi imekeme ndin̄wam enye nnam ufọk asana, mîdịghe in̄wam enye item udia? Yak idọhọ ke ẹsio eyenete eren ke utom. Imekeme ndiyom ekpri okụk nnọ enye akama an̄wam idem tutu okụt utom en̄wen. Imakam ikeme nditre ndinam enye ọdiọn̄ọ ke nnyịn inọ enye okụk oro.

13-14. Didie ke ikeme nditat ubọk nte Jehovah?

¹³ Jehovah esitat ubọk. (Matt. 5:45) Nnyịn ikpebetke nditọete nnyịn ẹdọdọhọ in̄wam mmimọ mbemiso in̄wamde mmọ. Imekeme ndinam n̄kpọ nnọ mmọ idem ke ini mmọ mîbụpke nnyịn, ukem nte Jehovah esinamde. Jehovah esinam utịn asiaha ọnọ nnyịn ke usen ke usen idem ke ini nnyịn mîben̄eke enye. Ndien ofụri owo ẹsidia ufọn utịn oro, idem ye mbon emi mîkọmke Jehovah. Ndi ukereke ke Jehovah ndinọ nnyịn se iyomde owụt ke enye ama nnyịn? Imama Jehovah etieti koro enye ọfọn ido onyụn̄ atat ubọk!

¹⁴ Ediwak nditọete nnyịn ẹnam n̄kpọ nte Jehovah, mmọ isitiehe-tie ibet owo ọdọdọhọ mmọ kan̄a ke imoyom un̄wam mbemiso mmọ ẹn̄wamde. Ke uwụtn̄kpọ, ke 2013, ata idiọk oyobio emi ẹkotde Typhoon Haiyan ama abiat n̄kpọ etieti ke Philippines. Ufọk ye inyene ediwak nditọete nnyịn ama atak. Edi nditọete nnyịn ke ofụri ererimbot ẹma ẹsọsọp ẹn̄wam mmọ. Ediwak nditọete ẹma ẹtịp okụk, mîdịghe ẹka ẹketiene ẹn̄wam ẹbọp ẹnyụn̄ ẹdiọn̄ mme ufọk emi oyobio akabiatde. Kpukpru ufọk ama ekpere ndisịm 750, ndien ikesịmke isua kiet ndida nnam kpukpru oro nsio! Mme Ntiense Jehovah ẹma ẹnyụn̄ ẹsịn idem ẹn̄wam nditọete mmọ ke ini udọn̄ọ COVID-19. N̄kpọ kiet emi idade iwụt nditọete nnyịn ke imama mmọ edi ndisisọsọp n̄n̄wam mmọ.

15-16. Luke 6:36 ọdọhọ ke nso idi akpan usụn̄ kiet emi ikpekpebede Jehovah?

¹⁵ Jehovah esitua owo mbọm onyụn̄ efen ọnọ owo. (Kot Luke 6:36.) Idụhe usen emi nnyịn  mîsikwe nte Jehovah atuade nnyịn mbọm. (Ps. 103:10-14) Jesus ama esifen ọnọ mme mbet esie onyụn̄ atua mmọ mbọm kpa ye emi mmọ mîkọfọnke ima. Enye ama akam enyịme ndiwa uwem esie man ẹfen mme idiọkn̄kpọ nnyịn. (1 John 2:1, 2) Ndi nte Jehovah ye Jesus ẹsituade owo mbọm ẹnyụn̄ ẹfende ẹnọ owo inamke ọdọn̄ fi ndinen̄ede n̄kpere mmọ?

¹⁶ Iyọdọdiọn̄ ima nditọete nnyịn ke ini ‘ifende kiet eken ke ofụri esịt.’ (Eph. 4:32) Edi ekeme ndinen̄ede nsọn̄ nnyịn ndifen nnọ owo ndusụk ini, ke ntre ana inen̄ede isịn ukeme. Sista kiet ọdọhọ ke ibuotikọ emi, “Ẹfen Kiet Eken ke Ofụri Esịt” emi ẹkewetde ke Enyọn̄-Ukpeme ama an̄wam imọ isifen inọ owo. * Enye ekewet ete: “Ibuotikọ oro ama an̄wam mi n̄kụt ke edieke mfende nnọ owo, ke edikam ifọn ye ami. Ẹma ẹwet ke afo ndifen nnọ owo iwọrọke ke emenyịme ke inyeneke se enye ekeduede, m̀mê ke se enye akanamde ikabiakke fi. Edi ndifen nnọ owo ọwọrọ ndisio se owo oro akanamde fi ke esịt nnyụn̄ ntre ndidiọk idemfo esịt.” Ima ifen nditọete nnyịn ke ofụri esịt, ida oro iwụt ke imama mmọ, ke imonyụn̄ ikpebe Ete nnyịn Jehovah.

17. Matthew 5:16 owụt ke didie ke ikeme ndikpono Ete nnyịn eke heaven?

¹⁷ Enem nnyịn etieti ndisịne ke otu nditọete emi ẹdude ke ofụri ererimbot ẹnyụn̄ ẹmade idemmọ. Imoyom ndin̄wam adan̄a ediwak owo nte ikpekekeme ẹditiene nnyịn ẹtuak ibuot ẹnọ Jehovah. Ntre yak ikpeme mbak nnyịn idinam n̄kpọ ekededi emi ekemede ndinam mme owo ẹtịn̄ idiọk ẹdian Jehovah m̀mê ikọt Esie. Imesidomo ndinam n̄kpọ ke usụn̄ emi edinamde ọdọn̄ mme owo ndikpep n̄kpọ mban̄a Jehovah nnyụn̄ ndituak ibuot nnọ enye.—Kot Matthew 5:16.

18. Nso ikeme ndin̄wam nnyịn ikwọrọ ikọ uko uko?

¹⁸ Ekeme ndinyene ini emi mme owo ẹsọn̄ọde nnyịn enyịn mîdịghe ẹkọbọ nnyịn ke ntak emi ikopde uyo Ete nnyịn ke heaven. Nso ke ikpanam edieke idem enyekde nnyịn ini ikwọrọde ikọ inọ mme owo? Yak inịm ke Jehovah  ye Eyen esie ẹyen̄wam nnyịn. Jesus ama ọdọhọ mme mbet esie yak mmọ ẹkûnyek idem uban̄a se mmọ ẹditịn̄de ye nte mmọ ẹditịn̄de. Ntak-a? Enye ọkọdọhọ mmọ ete: “Ẹyenọ mbufo se ẹditịn̄de kpa ke hour oro; koro idịghe mbufo ẹtịn̄ ikọ, edi edi spirit Ete mbufo ada mbufo etịn̄ ikọ.”—Matt. 10:19, 20.

19. Siak owo kiet emi ọkọkwọrọde ikọ uko uko.

¹⁹ Yak idọhọ fi se Brọda Robert akanamde. Ini enye ọkọtọn̄ọde-tọn̄ọ ndikpep Bible ke South Africa, enye ama etịn̄ ke esop se inamde imọ ikûnyịme ndidụk ekọn̄. Enye ama etịn̄ uko uko ete ke ima emi imọ imade nditọete imọ anam imọ ikûdụk ekọn̄. Ama enem enye nditiene nsịne ke ubon Jehovah! Ebiereikpe kiet ama obụp enye inikiet inikiet ete: “Mmanie ẹdi nditọete fo?” Robert ikekereke ke ẹkpebụp imọ utọ mbụme oro. Edi enye ama ọsọsọp eti itien̄wed emi enye okokotde usen oro ke Ẹdụn̄ọde N̄wed Abasi ke Usen ke Usen. Itien̄wed oro ekedi Matthew 12:50, emi ọdọhọde ete: “Owo ekededi eke anamde uduak Ete mi emi odude ke heaven, enye oro edi eyeneka mi eren, ye eyeneka mi an̄wan, ye eka mi.” Kpa ye emi Robert ọkọtọn̄ọde-tọn̄ọ ndikpep Bible, spirit Jehovah ama an̄wam enye ọbọrọ mbụme oro ye mme mbụme en̄wen emi ẹkebụpde enye ke unana idotenyịn. Imenịm ke se Robert akanamde oro ama enem Jehovah! N̄kpọ ekpetịbe emi anamde ọsọn̄ nnyịn ndikwọrọ ikọ, imenịm ke esinem Jehovah ndikụt nnyịn iberide edem ke enye man inyene uko ikwọrọ ikọ.

20. Nso ke ikpebiere ndinam? (John 17:11, 15)

²⁰ Ẹyak ika iso ikop inemesịt ndisịne ke ubon ikọt Abasi emi ima odude. Imenyene mfọnn̄kan Ete ye ediwak nditọete emi ẹmade nnyịn. Ẹyak ika iso iwụt ke imama se inyenede emi. Satan ye mbon emi ẹdade ye enye imaha nnyịn. Mmọ ẹsidomo ndinam nnyịn ikere ke Ete nnyịn ke heaven imaha nnyịn, ẹnyụn̄ ẹdomo ndinam nnyịn ikûdiana kiet. Jesus ama eben̄e Ete nnyịn ete ekpeme nnyịn man nnyịn ika iso idiana kiet. (Kot John 17:11, 15.) Jehovah ke ọbọrọ akam oro. Ẹyak inen̄ede inịm ke Ete nnyịn eke heaven ama nnyịn, ke oyonyụn̄ an̄wam nnyịn ukem nte Jesus ekenịmde. Ẹyak ibiere ndika iso ndiana kiet ye nditọete nnyịn n̄kan nte ikesidianade.