Se nte Bible ọbọrọde mme mbụme emi.

Utom 24:15 ọdọhọ ke “ndinen owo ye mme anam ukwan̄n̄kpọ ẹyeset.” Ndinen owo ẹdi mbon oro ẹkenamde n̄kpọ Abasi mbemiso mmọ ẹkpade, ntre ẹma ẹwet enyịn̄ mmọ ke n̄wed uwem. (Mal. 3:16) Mme anam ukwan̄n̄kpọ ẹsịne mbon oro mîkenen̄ekede inyene ifet ikpep n̄kpọ iban̄a Jehovah mbemiso mmọ ẹkpade, ntre owo ikewetke enyịn̄ mmọ ke n̄wed uwem.

Otu iba emi John 5:28, 29 etịn̄de aban̄a ke Utom 24:15 etịn̄ aban̄a n̄ko. Jesus ọkọdọhọ ke “mbon oro ẹkenamde se ifọnde ẹyeset ke n̄kpa ẹdụk uwem, mbon oro ẹkenamde se idiọkde ẹyeset ke n̄kpa ẹdụk ikpe.” Ndinen owo ẹma ẹnam nti n̄kpọ mbemiso mmọ ẹkpade. Mmọ ẹdiset ẹdidụk uwem, sia enyịn̄ mmọ osụk ododu ke n̄wed uwem. Edi mme anam ukwan̄n̄kpọ ẹkenam ndiọi n̄kpọ mbemiso mmọ ẹkpade. Mmọ ẹdiset ididụk ikpe. Owo iwetke enyịn̄ mmọ kan̄a ke n̄wed uwem; ẹyeda ini ẹdụn̄ọde mmọ, m̀mê ẹtịm ẹse nte mmọ ẹdude uwem. Se mmọ ndiset ndụk ikpe ọwọrọde edi oro. Ini oro, mmọ ẹyenyene ifet ndikpep n̄kpọ mban̄a Jehovah ẹnyụn̄ ẹnam se idinamde ẹwet enyịn̄ mmọ ke n̄wed uwem.

Ediyarade 20:12, 13 anam idiọn̄ọ ke kpukpru mbon oro ẹdinamde ẹset ana ẹnam “mme n̄kpọ eke ẹwetde ke mme n̄wed,” oro edi, mbufa ibet emi Abasi edinọde nnyịn ke obufa ererimbot. Jehovah oyosobo mbon oro ẹdisọn̄de ibuot ye enye.​—Isa. 65:20.

Ẹma ẹtetịn̄ ke Daniel 12:2 nte ke ndusụk mbon oro ẹkpade “ẹyedemede ẹdụk ke nsinsi uwem, ndusụk ẹyedemede ẹdụk ke bụt ye nsinsi esuene.” Itie Bible oro aban̄a akpatre utịp emi ẹdinọde mbon oro ẹdisetde ẹdi; utịp ndusụk owo edidi “nsinsi uwem,” eke ndusụk edidi “nsinsi esuene.” Ntre ke utịt isua 1,000 emi Christ edikarade, ndusụk owo ẹyenyene nsinsi uwem, edi ẹyesobo mbon eken ke nsinsi.​—Edi. 20:15; 21:3, 4.

Se uwụtn̄kpọ mi. Imekeme ndimen otu iba emi ẹdinamde ẹset ndomo ye mbon emi ẹyomde ndika n̄kodụn̄ ke idụt en̄wen. Ndinen owo ẹtie nte mbon oro ẹnọde n̄wedisan̄ emi edinamde mmọ ẹkeme ndinam utom ke idụt oro m̀mê ndidụn̄ ke idụt oro mbịghi, utọ n̄wedisan̄ oro ayanam mmọ ẹkeme ndinam ndusụk se nditọ idụt oro ẹsinamde. Edi mme anam ukwan̄n̄kpọ ẹtie nte mbon oro ẹnọde n̄wedisan̄ emi edinamde mmọ ẹdu ekpri ini ke idụt oro. Ana mbon oro ẹnọde utọ n̄wedisan̄ oro ẹnam se idinamde ẹyak mmọ ẹka iso ẹdu ke obufa idụt oro. Ukem ntre, mme anam ukwan̄n̄kpọ emi ẹdinamde ẹset ana ẹnịm ibet Jehovah ẹnyụn̄ ẹnam n̄kpọ ẹwụt ke idi ndinen owo man ẹkeme ndika iso ndụn̄ ke Paradise. Inamke n̄kpọ m̀mê nso utọ n̄wedisan̄ ke ẹkenọ mbon emi ẹkade ndikodụn̄ ke idụt en̄wen, nte ini akade, ẹkeme ndinam ndusụk mmọ nditọisọn̄ ẹnyụn̄ ẹbịn ndusụk ẹnyọn̄ọ. Nte mmọ ẹdidude uwem ke obufa idụt oro edibiere m̀mê ẹyeyak mmọ ẹka iso ẹdu do. Ukem ntre, nte mbon oro ẹdisetde ẹdi ẹdisọn̄ọde ida ye Abasi ye nte mmọ ẹdidude uwem ke obufa ererimbot ke ẹdida ẹbiere m̀mê ẹyeyak mmọ ẹdu uwem ke nsinsi.

Jehovah Abasi nnyịn edi Abasi mbọm, isitụkke owo, inyụn̄ imaha owo kiet ikan enye eken. (Deut. 32:4; Ps. 33:5) Ima edinam enye anam ndinen owo ye mme anam ukwan̄n̄kpọ ẹset. Edi enye oyoyom kpukpru mmọ ẹma se imọ imade ẹnyụn̄ ẹsua se imọ isuade. Sụk mbon oro ẹdimade enye ẹdinyụn̄ ẹdude uwem nte enye ọdọhọde ke ẹdiyak ẹdu uwem ke nsinsi ke obufa ererimbot.