1, 2. Ewe edinam ke ididiana kiet inam ke 2018, ndien ntak-a? (Se akpa ndise ibuotikọ emi.)

KE UTỊN ama okosop ke March 31, 2018, Mme Ntiense Jehovah ke ofụri ererimbot ye isenowo ẹyedụk edinam Udia Mbubreyo Ọbọn̄ emi ẹsinịmde ini kiet kpọt ke isua. Edinam oro ayanam iti nte Jesus akakpade ọnọ nnyịn. Idụhe edinam ndomokiet emi mme owo ẹsidianade kiet ẹnam kpukpru isua ke ofụri ererimbot nte Editi n̄kpa Christ!

² Esinem Jehovah ye Jesus ndikụt mme owo ke kpukpru itie ke ofụri ererimbot ẹnamde edinam emi ke Nisan 14. Bible ama etetịn̄ ke “akwa otuowo, emi baba owo kiet mîkemeke ndibat, eke ẹtode kpukpru idụt ye esien ye obio ye usem,” ẹyefiori ẹte: “Edinyan̄a oto Abasi nnyịn, emi etiede ke ebekpo, onyụn̄ oto Eyenerọn̄.” (Edi. 7:​9, 10) Esinen̄ede enem nnyịn ndikụt ẹtorode Jehovah ye Jesus kpukpru isua ke ini Editi!

3. Mbụme ewe ke idibọrọ ke ibuotikọ emi?

³ Enyene mbụme inan̄ emi idibọrọde ke ibuotikọ emi. (1) Didie  ke nnyịn owo kiet kiet ikeme ndiben̄e idem nnọ Editi, ndien nso ke ikpanam man ibọ ufọn? (2) Didie ke Editi an̄wam kpukpru ikọt Abasi ẹdiana kiet? (3) Nso ke ikpanam man ika iso idiana kiet? (4) Ndi oyodu ini emi nnyịn mîdinịmke Editi aba? Ekpedi ntre, ini ewe ke edidi?

4. Nso idi akpan ntak emi nnyịn mîkpokohokoi ifiak Editi?

⁴ Ntak emi ọfọnde isidụk Editi? N̄kọ ọmọfiọk ke isika mbono esop man ikokpono Jehovah. Idụhe mbono esop emi okponde akan Editi n̄kpa Christ. Ntre imenen̄ede inịm ke esinem Jehovah ye Jesus ndikụt mme owo ẹdomode ukeme ẹdụk Editi kpukpru isua. Iyom Jehovah ye Jesus ẹkụt ke nnyịn iditreke ndidụk Editi, ibọhọke n̄kpọ emi nnyịn mîkemeke ndinyan̄a etịbe. Kiet ke otu n̄kpọ emi edinamde Jehovah esịn enyịn̄ nnyịn ke “n̄wed editi” esie edi edieke enye okụtde ke nnyịn idaha mbono esop ibre mbre. Ediyarade 20:15 okot n̄wed emi “n̄wed uwem,” do ke Jehovah ewet enyịn̄ kpukpru mbon oro enye oyomde ndinam ẹdu uwem ke nsinsi.​—Mal. 3:16.

5. Didie ke ikeme ndida urua ifan̄ mbemiso Editi ‘ndomo nse m̀mê ke idodu ke mbuọtidem’?

⁵ Urua ifan̄ mbemiso Editi, imekeme ndisio ini nnen̄ede mbọn̄ akam nnyụn̄ ntie n̄kere m̀mê imenen̄ede ikpere Jehovah. (Kot 2 Corinth 13:5.) Apostle Paul ọkọdọhọ nditọete ke Corinth ete: “Ẹka iso ẹdomo ẹse m̀mê mbufo ẹdu ke mbuọtidem.” Didie ke ikeme ndinam se enye eketịn̄de oro? Imekeme ndibụp idem nnyịn ite: ‘Ndi mmenen̄ede nnịm ke n̄kukụre esop emi Jehovah adade anam uduak esie edi emi? Ndi mmesịn ofụri ukeme mi n̄kwọrọ eti mbụk Obio Ubọn̄ Abasi nnyụn̄ n̄kpep mme owo n̄kpọ? Ndi nte nsinamde n̄kpọ owụt ke mmenen̄ede nnịm ke idu ke mme akpatre usen, ndien ke ukara Satan ọmọn̄ ebebe efep? Ndi ke mbọbuọt idem ye Jehovah ye Jesus nte n̄kọbuọtde ini n̄kayakde idem nnọ Jehovah Abasi?’ (Matt. 24:14; 2 Tim. 3:1; Heb. 3:14) Ndikere mban̄a mme ibọrọ mbụme emi ayan̄wam nnyịn ‘ika iso iwụt se nnyịn idide.’

6. (a) Nso ke ana inam man idu uwem ke nsinsi? (b) Didie ke ebiowo kiet esiben̄e idem ọnọ Editi kpukpru isua, ndien didie ke afo ekeme ndikpebe enye?

⁶ Kot mme ibuotikọ emi ẹnemede ufọn emi Editi anamde ọnọ nnyịn nyụn̄ tie kere se okotde. (Kot John 3:16; 17:3.) Nnyịn idikemeke ndidu uwem ke nsinsi edieke nnyịn mîfiọkke Jehovah inyụn̄ ibuọt idem ye Jesus. Ke ini afo eben̄ede idem ọnọ Editi, emekeme ndimek ndikpep mme n̄kpọ oro ẹdin̄wamde fi enen̄ede ekpere Jehovah ye Jesus. Se Brọda kiet emi edide ebiowo ke ediwak isua esinamde edi oro. Ke ini enye okụtde mme ibuotikọ Enyọn̄-Ukpeme emi ẹnemede n̄kpọ ẹban̄a Editi ye nte Jehovah ye Jesus ẹmade nnyịn, enye esisat mmọ obon. Enye anam ntre ke ediwak isua idahaemi. Ndien urua ifan̄ mbemiso Editi, enye esifiak okot mme ibuotikọ emi onyụn̄ etie ekere ufọn oro Editi anamde ọnọ nnyịn. Ndusụk ini enye esidian ibuotikọ kiet m̀mê iba en̄wen do. Brọda oro ọdọhọ ke imọ imesikpep mbufa n̄kpọ kpukpru isua ke ini ifiakde ikot mme ibuotikọ oro, ye ke ini ikotde mme itie Bible emi ẹsidọhọde ikot ke ini Editi inyụn̄ itiede ikere se ikotde. Enye ọdọhọ ke ata akpan n̄kpọ edi ke oro esinam imọ idọdiọn̄ ima Jehovah ye Jesus. Ndikpep n̄kpọ ntre ekeme ndin̄wam fi etetịm ama Jehovah ye Jesus onyụn̄ enen̄ede ọbọ ufọn oto Editi.

7. (a) Nso ke Jesus ekeben̄e Jehovah okoneyo oro enye ekenịmde akpa Udia Mbubreyo Ọbọn̄? (b) Nso iwụt ke Jehovah ọbọrọ akam Jesus oro?

⁷ Okoneyo oro Jesus ọkọtọn̄ọde akpa Udia Mbubreyo Ọbọn̄, enye ama eben̄e Jehovah ete anam mme mbet imọ ẹdiana kiet ukem nte imọ ye enye idianade kiet. (Kot John 17:​20, 21.) Jehovah ama ọbọrọ akam oro edima Eyen esie ọkọbọn̄de do, ndien ata ediwak owo ẹnịm ke Jehovah ọkọdọn̄ Jesus edi isọn̄. Idụhe mbono esop en̄wen emi owụtde ke Mme Ntiense Jehovah ẹdiana kiet nte Editi. Mme owo emi ẹtode nsio nsio idụt, mfia ye mbubịt, ẹsisop idem ọtọkiet ẹnịm Editi ke ofụri ererimbot. Ke ndusụk itie, imemke utom ndikụt mme owo emi ẹtode nsio nsio orụk ẹsopde idem ọtọkiet ẹkpono Abasi. Ndusụk owo ẹsikam ẹkpan̄a nsa ke ini ẹkụtde utọ n̄kpọ oro. Edi, esikam eyeye Jehovah ye Jesus ndikụt nnyịn idianade kiet ntre ke ini Editi!

8. Nso ke Jehovah ọkọdọhọ Ezekiel anam?

⁸ Sia idide ikọt Jehovah, idem ikpaha nnyịn ndikụt nte idianade kiet. Jehovah ama etetịn̄ ke ikọt imọ ẹyediana kiet. Enye ama ọdọhọ prọfet Ezekiel emen eto iba, “eke Judah” ye “eke Joseph,” adian kiet man mmọ ẹdi eto kiet. (Kot Ezekiel 37:​15-17.) Ẹma ẹnam se prọfesi emi ọwọrọde an̄wan̄a ke “Mme Mbụme Oro Mme Andikot Ẹbụpde” ke Enyọn̄-Ukpeme July 2016. Enyọn̄-Ukpeme oro ọkọdọhọ ete: “Jehovah ama anam prọfet Ezekiel etịn̄ prọfesi ete ke ikọt imọ ẹyenyọn̄ ẹdi Isọn̄ Un̄wọn̄ọ ẹnyụn̄ ẹfiak ẹdiana kiet nte idụt kiet. Prọfesi oro owụt n̄ko ke ikọt Abasi ẹyediana kiet ẹtuak ibuot ẹnọ enye ke mme akpatre usen emi.”

9. Didie ke Editi oro isinịmde kpukpru isua esinam ikụt nte prọfesi Ezekiel osude?

⁹ Ọtọn̄ọde ke 1919, Jehovah ama ọtọn̄ọ ndifiak ntịm ikọt esie oro ẹyetde aran idem man ẹnam n̄kpọ esie onyụn̄ anam mmọ ẹfiak ẹdiana kiet. Mmọ ẹketie nte ‘eto eke Judah.’ Mbon oro ẹdoride enyịn ndidu uwem mi ke isọn̄ ẹda ẹban̄a ‘eto eke Joseph.’ Nte ini akakade, mmọ ẹma ẹtọn̄ọ ndidiana ye mbon oro ẹyetde aran, ndien otu mbiba emi ẹma “ẹkabade ẹdi otuerọn̄ kiet.” (John 10:16; Zech. 8:23) Jehovah ọkọdọhọ ke imọ iyanam eto iba oro ẹkabade ẹdi eto kiet ke ubọk imọ. (Ezek. 37:19) Otu mbiba emi ke ẹdiana kiet ẹkpono Jehovah mfịn. Mmọ ẹnyene Edidem kiet, oro edi Jesus Christ, emi prọfesi Ezekiel okotde “David asan̄autom” Abasi. (Ezekiel 37:​24, 25) Mbon oro ẹyetde aran ye “mme erọn̄ en̄wen” ẹsidiana kiet ẹnịm Editi n̄kpa Christ kpukpru isua. Esiye etieti ndikụt ikọt Abasi ẹdianade kiet ntem kpa nte Ezekiel ọkọdọhọde. Edi nso ke nnyịn owo kiet kiet ikeme ndinam man ika iso idiana kiet?

10. Nso ke ikpanam man ika iso idiana kiet?

¹⁰ N̄kpọ kiet oro edin̄wamde nnyịn idiana kiet edi ndisụhọde idem. Ke ini Jesus okodude ke isọn̄, enye ama ọdọhọ mme mbet esie ke ana mmọ ẹsụhọde idem. (Matt. 23:12) Edieke isụhọrede idem, nnyịn idikereke ke imedi n̄kpọ ikan mbon en̄wen nte ererimbot ẹsinamde. Nsụhọdeidem ayan̄wam nnyịn isụk ibuot inọ mbon oro ẹdade usụn̄ ke esop Abasi, ndien oro ayanam ika iso idiana kiet. N̄kponn̄kan n̄kpọ edi ke Jehovah ayama nnyịn sia enye “ọbọbiọn̄ọ mbon ntan̄idem, edi enye ọnọ mbon nsụhọdeidem  mfọnido eke owo mîdotke.”​—1 Pet. 5:5.

11. Didie ke nditie n̄kere se uyo ye wine Editi ẹdade ẹban̄a edin̄wam nnyịn idiana kiet?

¹¹ Ọyọhọ n̄kpọ iba emi ikpanamde man ika iso idiana kiet edi nditie n̄kere se uyo eke leaven mîdụhe ye ndatndat wine Editi ẹdade ẹban̄a. Ọfọn inam emi mbemiso usen Editi, ye akpan akpan ke usen oro. (1 Cor. 11:​23-25) Uyo ada aban̄a mfọnmma idem Jesus oro enye akawade ọnọ nnyịn, ke ini wine adade aban̄a iyịp esie. Edi ikụreke ke nnyịn ndifiọk se mme n̄kpọ emi ẹdade ẹban̄a. N̄kọ ọmọfiọk ke uwa ufak Christ anam nnyịn iti ke idụhe owo emi amade nnyịn nte Jehovah ye Jesus. Jehovah ama nnyịn ke ndikọnọ eyen esie edikpa ọnọ nnyịn, ndien Jesus ndikenyịme ndidi ndikpa nnọ nnyịn owụt ke enye ama nnyịn n̄ko. Nditie n̄kere nte mmọ ẹmade nnyịn ayanam ima mmọ n̄ko. Emi oyonyụn̄ anam nnyịn idiana kiet, sia ima oro nnyịn owo kiet kiet imade Jehovah etie nte urụk oro ọbọpde nnyịn adian kiet.

12. Didie ke uwụtn̄kpọ oro Jesus ọkọnọde owụt ke Jehovah oyom nnyịn isifen inọ nditọete nnyịn?

¹² Ọyọhọ n̄kpọ ita emi ikpanamde man ika iso idiana kiet edi ndifen kiet eken ke ofụri esịt. Ke ini ifende inọ owo, iwụt ke imama nte Jehovah ọkọnọde Jesus edikpa man ẹfen mme idiọkn̄kpọ nnyịn. Mbọk kot uwụtn̄kpọ emi Jesus ọkọnọde ke Matthew 18:​23-34 nyụn̄ bụp idemfo ete: ‘Ndi mmama ndinam se Jesus ekekpepde? Ndi mmesime ime ye nditọete mi? Ndi mmeben̄e idem ndifen mbon oro ẹduede mi?’ Imọfiọk ke idiọkn̄kpọ ye idiọkn̄kpọ idịghe ukem, ke esinyụn̄ ọsọn̄ ndifen ndusụk idiọkn̄kpọ sia nnyịn mîfọnke ima. Kpa ye oro, uwụtn̄kpọ oro Jesus ọkọnọde mi owụt se Jehovah oyomde nnyịn inam. (Kot Matthew 18:35.) Jesus anam enen̄ede an̄wan̄a ke Jehovah idifenke inọ nnyịn edieke nnyịn mîfenke nditọete nnyịn ke ini mmọ ẹnen̄erede ẹkabade esịt. Akpana itịm itie ikere n̄kpọ emi! Iyaka iso idiana kiet ye nditọete nnyịn edieke isifende inọ mmọ nte Jesus ekekpepde.

13. Didie ke nnyịn ndinam emem edin̄wam nnyịn idiana kiet?

 ¹³ Edieke ifende inọ nditọete nnyịn, iyodu ke emem ye mmọ. N̄kọ emeti ke apostle Paul ọkọdọhọ nnyịn ‘isịn ifịk in̄wana ndimụm edidianakiet eke spirit n̄kama, inyụn̄ idu ke mbọbọ emem.’ (Eph. 4:3) Ke ini Editi emi, akpan akpan ke usen oro ẹdinịmde Editi, tịm tie kere nte afo esinamde n̄kpọ ye mme owo. Bụp idemfo ete: ‘Ndi mbon oro ẹdiọn̄ọde mi ẹkeme ndidọhọ ke nsisịnke owo ke esịt? Ndi mme owo ẹkụt ke mmesidomo ofụri ukeme mi ndinam emem ye mbon oro ẹkeduede mi nnyụn̄ n̄ka iso ndiana ye mmọ?’ Nti mbụme ẹdi emi-o! Ọfọn ibụp idem nnyịn mme mbụme emi ke ini Editi emi.

14. Didie ke ikeme ndiwụt ke ‘imọyọ kiet eken ke ima’?

¹⁴ Ọyọhọ n̄kpọ inan̄ oro edin̄wamde nnyịn idiana kiet edi ndima kiet eken nte Jehovah amade nnyịn. (1 John 4:8) Nnyịn ikpọdọhọke ite, “Nyonyụn̄ nyọ nditọete nte ẹdọhọde, edi oro iwọrọke ke mmama mmọ.” Edieke idọhọde ntre, ọwọrọ nnyịn inamke se Paul ọkọdọhọde ete ‘iyọ kiet eken ke ima.’ (Eph. 4:2) Omokụt ke apostle Paul ikọdọhọke ‘iyọ kiet eken’ kpọt, edi ọkọdọhọ ‘iyọ kiet eken ke ima.’ Nsio nsio orụk owo ẹdu ke esop nnyịn kiet kiet, ndien Jehovah odụri kpukpru mmọ adian idem. (John 6:44) Enyene eti n̄kpọ emi Jehovah okụtde ama ke idem mmọ mbemiso enye odụride mmọ adian idem. Edieke Jehovah amade nditọete nnyịn, nnyịn idi mmanie emi mîkpamaha mmọ? Ikpanaha itre ndima nditọete nnyịn nte Jehovah ọdọhọde.​—1 John 4:​20, 21.

15. Inam didie ifiọk ke ini ke edi emi nnyịn mîdinịmke Editi aba?

¹⁵ Usen kiet usen kiet, iyenịm akpatre Editi. Inam didie ifiọk? Ini Paul ekewetde akpa leta esie ọnọ nditọete oro ẹyetde aran ke Corinth aban̄a Editi n̄kpa Christ oro ẹsinịmde ke isua ke isua, enye ama ọdọhọ mmọ ete: “Mbufo ẹkwọrọ n̄kpa Ọbọn̄, tutu enye edisịm.” (1 Cor. 11:26) Ke prọfesi oro aban̄ade utịt ini, Jesus ama etịn̄ n̄ko aban̄a ini emi imọ idisan̄ade ke obubịt enyọn̄ ‘idi.’ Kop se Jesus eketịn̄de mi aban̄a akwa ukụt oro enen̄erede ekpere: “Idiọn̄ọ Eyen owo ọyọwọrọ owụt idem ke enyọn̄, ndien ekem kpukpru mme esien ke isọn̄ ẹyeyịbi idemmọ ke eseme, ndien mmọ ẹyekụt Eyen owo asan̄ade ke obubịt enyọn̄ edi ye odudu ye akwa ubọn̄. Ndien [Jesus] oyosio mme angel esie ọdọn̄ ye akwa uyom obukpon̄, mmọ ẹyenyụn̄ ẹtan̄ ndimek ikọt esie ke ikpehe ofụm mbinan̄ ẹbon ọtọkiet, ọtọn̄ọde ke utịt ikpaenyọn̄ kiet tutu esịm utịt eken.” (Matt. 24:​29-31) Jesus ‘editan̄ ndimek ikọt esie ibon’ ke ini enye emende kpukpru mbon oro ẹyetde aran emi ẹsụk ẹdude ke isọn̄ aka heaven. Emi editịbe ke akwa ukụt ama ọkọtọn̄ọ, edi mbemiso Armageddon. Ekem kpukpru owo 144,000 ẹyediana ye Jesus ẹn̄wana ẹkan ndidem isọn̄ emi. (Edi. 17:​12-14) Editi emi ẹdinịmde mbemiso ẹtan̄ mbon oro ẹyetde aran ẹnyọn̄ heaven edidi akpatre Editi, sia Jesus ‘eyedi’ ini oro.

16. Ntak emi mûyomke ndifiak Editi isua emi?

¹⁶ Ẹyak kpukpru nnyịn ibiere ndidụk Editi ke March 31, 2018. Ẹyak inyụn̄ iben̄e Jehovah ite an̄wam nnyịn inam mme n̄kpọ emi ẹdin̄wamde nnyịn ika iso idiana kiet. (Kot Psalm 133:1.) Ti ke iyenịm akpatre Editi usen kiet usen kiet. Tutu esịm ini oro, ẹyak isidomo ofụri ukeme nnyịn itiene idụk Editi man iwụt ke imama nte idianade kiet ke ofụri ererimbot.