ASIAKUSỤN̄ kiet emi ekerede Sylviana edi isua 27. Enye ọdọhọ ete: “Mme ufan mi ẹma ẹka ẹkekwọrọ ikọ ke ebiet emi ẹyomde-yom mme asiakusụn̄. Ke ini mmọ ẹkebụkde nte ekenemde ndikwọrọ ikọ do, eketie nte ami n̄kpobụk oro. Edi n̄kekere ke ndikemeke ndinam.”

Ndi esitie fi nte eketiede Sista Sylviana? Ndi esidọn̄ fi ndika n̄kọkwọrọ ikọ ke ebiet oro ẹyomde-yom mme ọkwọrọikọ edi afo ekere m̀mê eyekeme ndika? Edieke edide ntre, kûfịna. Jehovah an̄wam ediwak nditọete emi ẹkesikerede ke n̄kpọ kiet m̀mê eken idiyakke mmimọ ika ebiet emi ẹyomde-yom mme ọkwọrọikọ. Ẹyak ika Madagascar, ọyọhọ isuo inan̄ emi okponde akan ke ererimbot, ikese nte Jehovah an̄wamde ndusụk mmọ.

Madagascar odu ke Africa; ediwak owo do ẹma ukwọrọikọ ẹnyụn̄ ẹnen̄ede ẹma Bible. Ke ufan̄ isua duop idahaemi, se ibede mme asuanetop ye mme asiakusụn̄ 70 ẹto idụt 11 * ẹkekwọrọ ikọ do. Ediwak nditọete ke isuo emi ẹtiene ẹwọrọ ẹka nsio nsio itie do ẹkekwọrọ eti mbụk Obio Ubọn̄ Abasi ẹnọ mme owo. Yak ise se ndusụk mmọ ẹtịn̄de.

Louis ye Perrine an̄wan esie ẹbe isua 30. Mmọ ẹketo France ẹka Madagascar. Ebịghi mmọ ẹkekere ndiwọrọ n̄ka idụt en̄wen n̄kọkwọrọ ikọ, edi Perrine ama emen̄e ndika. Perrine ọdọhọ ete: “Ndịk esinam mi ndika ebiet oro mmen̄kaha akpa. Mma n̄kere nte ididahade ikpọn̄ ubon, esop, ufọk, ye obio nnyịn oro itịmde imehe, ye mme n̄kpọ emi isimade ndinam. Akana ntre ndifịna idem mban̄a mme n̄kpọ emi man n̄keme ndika idụt en̄wen n̄kọkwọrọ ikọ.” Ke 2012, Perrine ama ebiere ndisan̄a ye ebe esie n̄ka Madagascar n̄kọkwọrọ ikọ. Ndi enye atua n̄kpọfiọk nte mmọ ẹkewọrọde ẹka do? Enye ọdọhọ ete: “Ndikụt nte Jehovah an̄wamde nnyịn tọn̄ọ ikọwọrọ idi mi anam inen̄ede ibuọt idem ye enye.” Ebe esie ọdọhọ ete: “Esịt ama enem nnyịn tutu ndikụt nditọ ukpepn̄kpọ Bible nnyịn duop ẹdụkde Editi oro ẹkenịmde akpa isua oro ikedide mi!”

 Nso ikan̄wam mmọ ẹka iso ẹdu do ẹkwọrọ ikọ ke ini mmọ ẹkenyenede mfịna? Mmọ ẹma ẹbọn̄ akam ẹkpe Jehovah ubọk ẹte anam mmimọ ikeme ndiyọ. (Phil. 4:13) Louis ọdọhọ ete: “Jehovah ama ọbọrọ akam nnyịn onyụn̄ anam inyene ‘emem’ esie. Emi ama anam ika iso ikop inem utom ukwọrọikọ nnyịn. Mme leta ye mme e-mail oro mme ufan nnyịn ke France ẹkesinọde ẹsọk nnyịn ẹma ẹsinyụn̄ ẹsọn̄ọ nnyịn idem.”​—Phil. 4:​6, 7; 2 Cor. 4:7.

Jehovah ama enen̄ede ọdiọn̄ Louis ye Perrine nte mmọ ẹkesọn̄ọde ẹda. Louis ọdọhọ ete: “Ke October 2014, ima ika France ikodụk Ufọkn̄wed Ukpep Bible Eke Mme Christian Oro Ẹdọde Ndọ. * Ufọkn̄wed oro edi enọ kiet emi Jehovah ọnọde nnyịn. Nnyịn idifreke enọ emi tutu amama.” Ke mmọ ẹma ẹkekụre ufọkn̄wed oro, ẹkenọ mmọ ẹfiak ẹnyọn̄ ẹka Madagascar. Ama enem mmọ tutu.

Didier ye Nadine an̄wan esie ẹma ẹbe isua 50 ini mmọ ẹkekpọn̄de France ẹka Madagascar ke 2010. Didier ọdọhọ ete: “Ikọtọn̄ọ ndisiak usụn̄ ini ikedide n̄kparawa. Ekem ima idinyene nditọ ita. Ke nditọ nnyịn ẹma ẹkekponi, ima ikere ndiwọrọ n̄ka idụt en̄wen n̄kọkwọrọ ikọ.” Nadine ọdọhọ ete: “Ikọdọn̄ke mi ndikpọn̄ nditọ mi ndaha n̄ka obio owo. Edi mmọ ẹma ẹdọhọ nnyịn ẹte: ‘Esịt edikam inenem nnyịn edieke ẹkade ẹkekwọrọ ikọ ke idụt emi ẹyomde-yom mme ọkwọrọikọ!’ Se mmọ ẹketịn̄de oro akanam nnyịn iwọrọ idi Madagascar. Esịt esinem nnyịn ndineme nneme ye nditọ nnyịn ke ubọk ke ubọk kpa ye oro idude oyom usụn̄ ọkpọn̄ mmọ.”

Ikememke inọ mmọ ndikpep usem Malagasy. Ntak-a? Nadine ọdọhọ ke isimemke ndida ibuot usọn̄ n̄kpep usem. Edi nso ikan̄wam mmọ? Mmọ ẹkebem iso ẹdu ke esop usem French. Ke mmọ ẹma ẹkeben̄e idem ndikpep usem Malagasy, mmọ ẹma ẹwọrọ ẹka esop usem Malagasy. Nadine ọdọhọ ete: “Ediwak mbon oro isikwọrọde ikọ inọ ẹsima ndikpep Bible. Mmọ ẹsikọm nnyịn nte idide idikwọrọ ikọ inọ mmọ. N̄kpenịmke ke mme owo ẹkpema Ikọ Abasi ntre! Enem mi ndisiak usụn̄ mi. Nsibọbọn̄ akam eyo ọsọp esiere man ndaha ukwọrọikọ!”

Imam esibọhọ Didier enye ama eti ini enye ọkọtọn̄ọde-tọn̄ọ ndikpep usem Malagasy. Enye ọdọhọ ete: “Ke ini n̄kenịmde mbono esop usen kiet, ibọrọ ndomokiet oro nditọete ẹkenọde ikan̄wan̄ake mi. Edi mma n̄kọm kpukpru mmọ ‘sọsọn̄ọ.’ Ke ini n̄kọkọmde Sista kiet ke ibọrọ esie, nditọete oro ẹketiede enye ke edem ẹma ẹfụn̄ ibuot ẹnam ndiọn̄ọ ke ibọrọ Sista oro inenke. Mma nsọsọp n̄kot Brọda en̄wen. N̄kere ke se Brọda oro ọkọbọrọde ama enen.”

Thierry ye Nadia an̄wan esie ẹma ẹtiene ẹse drama oro “Bịne Mme Utịtmbuba Oro Ẹnọde Abasi Ubọn̄.” Ẹkenam drama oro ke akamba mbono 2005. Enye akaban̄a Timothy. Drama oro ama enen̄ede odụk Thierry ye Nadia an̄wan esie esịt tutu ọdọn̄ mmọ  ndika n̄kọkwọrọ ikọ ke ebiet oro ẹyomde-yom mme ọkwọrọikọ. Thierry ọdọhọ ete: “Nte ikosụk ikwakde ubọk ke ini drama oro okụrede, mma nsịn n̄wan mi etap ke utọn̄ nte, ‘M̀mọ̀n̄ ke idika?’ N̄wan mi ama ọdọhọ ke se ikonyụn̄ iyomde ndibụp mi edi oro.” Ibịghike, mmọ ẹma ẹtọn̄ọ ndiben̄e idem. Nadia ọdọhọ ete: “Ima itọn̄ọ ndisat mme n̄kpọ oro inen̄erede iyom. Se ikadade idaha okodụk ekpatisan̄ inan̄!”

Mmọ ẹkesịm Madagascar ke 2006. Tọn̄ọ oro ukwọrọikọ enem mmọ tutu. Nadia ọdọhọ ete: “Mme owo mi ẹma ukwọrọikọ etieti. Emi esinam esịt enen̄ede enem nnyịn.”

Ke mmọ ẹma ẹkedu do isua itiokiet, n̄kpọ ama etịbe. Marie-Madeleine, eka Nadia emi okodụn̄de ke France, ama ọduọ obụn̄ ubọk onyụn̄ ada unan ke ibuot. Nadia ye ebe esie ẹma ẹbụp dokta oro ọkọsọbọde enye idem nte idem esie etiede. Ekem mmọ ẹma ẹdọhọ enye edidụn̄ ye mmimọ ke Madagascar. Kpa ye oro enye ekedide isua 80 ini oro, enye ama enyịme ndidi ndidụn̄ ye mmọ. Etie eka Nadia didie ke idem ndidụn̄ ke obio owo? Enye ọdọhọ ete: “Isimemke ndusụk ini ndimehe ye obufa itie; edi kpa ye oro mma n̄kọsọn̄, nsụk nnyenyene ufọn ke esop. Enem mi ndidụn̄ ye eyen mi ye ebe eyen mi, sia emi ayak mmọ ẹka iso ẹdu mi ẹkwọrọ ikọ.”

Brọda Riana edi isua 22. Enye okokpon ke Alaotra Mangoro emi odude ke edem usiahautịn Madagascar. Isọn̄ Alaotra Mangoro esifọn n̄kpọ etieti. Enye ama ọdiọn̄ọ n̄wed etieti ini odude ke ufọkn̄wed sekọndri, ama onyụn̄ oyom ndika ufọkn̄wed ntaifiọk. Edi ke enye ama ekedikpep Bible, enye ikaduakke ufọkn̄wed ntaifiọk aba. Enye ọdọhọ ete: “Mma nsịn idem n̄kpep n̄kpọ man n̄kụre ufọkn̄wed sekọndri. Mma ndọhọ Jehovah nte ke edieke enye an̄wamde mi mbe akpatre udomo ke ufọkn̄wed sekọndri, ke nyọtọn̄ọ usiakusụn̄.” Ke Riana ama okokụre ufọkn̄wed, enye ama ọtọn̄ọ usiakusụn̄ nte enye ọkọn̄wọn̄ọde. Enye ama aka okodụn̄ ye Brọda kiet emi edide asiakusụn̄. Enye ama enyene utom ibio ini emi akan̄wamde enye enyene ini asiak usụn̄. Enye ọdọhọ ete: “Ata eti n̄kpọ ke n̄kebiere ndinam emi.”

Edi ikan̄wan̄ake ubon mmọ ntak emi enye mîkamaha ndika ufọkn̄wed ntaifiọk. Enye ọdọhọ ete: “Ete mi, eyeneka ete mi, ye eyeneka eka ete mi ẹma ẹkpe mi ubọk ẹte n̄ka ufọkn̄wed ntaifiọk. Edi n̄koyomke n̄kpọ ndomokiet anam mi ntre utom usiakusụn̄.” Nte ini akakade, ama ọdọn̄ Riana ndika n̄kọkwọrọ ikọ ke ebiet emi ẹyomde-yom mme ọkwọrọikọ. Nso ikanam ọdọn̄ enye ndika? Enye ọdọhọ ete: “Mme inọ ẹma ẹbụn̄ ufọk nnyịn ẹdụk ẹyịp ediwak n̄kpọ mi. Oro ama anam nti ikọ Jesus emi ọdọhọde ‘ibon n̄kpọuto nnyịn ke heaven.’ Mma nnen̄ede mbiere ndisịn idem nnam n̄kpọ Abasi.” (Matt. 6:​19, 20) Enye ama ọwọrọ okodụn̄ ke usụk usụk Madagascar emi edịm mîsisọpke idep. To do sịm ebiet oro enye okodụn̄de akpa edi itiat 800 m̀mê kilomita 1,300. Mbon Antandroy ẹdụn̄ọ do. Nso ikada enye ika do?

Ọfiọn̄ kiet mbemiso inọ ẹkedụkde ẹyịp n̄kpọ esie, enye ama ọtọn̄ọ ndikpep iren Antandroy iba Bible, onyụn̄ ada ufan̄ oro ekpep ndusụk ikọ ke usem mmọ. Enye ama ekere aban̄a ediwak mbon Antandroy emi owo mîkwọrọke ikọ inọ akpa. Enye ọdọhọ ete: “Mma mbọn̄ akam nnọ Jehovah nte an̄wam mi n̄wọrọ n̄kodụn̄ ke n̄kan̄ oro ẹsemde usem Tandroy.”

Riana ama ọwọrọ okodụn̄ do, edi ikememke inọ enye. Enye ikekemeke ndinyene utom. Ete kiet ama obụp enye ete: “Nso ida fi idi mi, okûdi utom-o? Mme owo ẹsikam ẹtoto mi ẹka n̄kan̄ mbufo ẹkeyom utom!” Ke urua iba ẹbede, okụk esie ama ekpere ndikụre. Kpa ye oro enye mîkọfiọkke se akpanamde, enye ama adaha aka akamba mbono. Ke akpatre usen mbono, Brọda kiet ama ofụt okụk esịn ke ekpat kod esie. Okụk oro ama awak ekem se enye adade ekpe usụn̄ afiak ọnyọn̄ Antandroy, onyụn̄ ekem se adade ọtọn̄ọ ekpri mbubehe unyam yogurt. Riana ọdọhọ ete: “Jehovah ama an̄wam mi ke nnennen ini. Mma n̄keme ndidu do n̄kwọrọ ikọ nnọ mbon oro akanam mîkopke n̄kpọ iban̄a Jehovah!” Enye ama onyụn̄ enyene ediwak utom ndinam ke esop. Enye ọdọhọ ete: “Mma nsinọ utịn̄ikọ kpukpru urua iba. Jehovah akada esop esie ekpep mi n̄kpọ.” Riana ke osụk ọkọkwọrọ ikọ ọnọ ediwak mbon Antandroy emi ẹyomde ndifiọk Jehovah.

Jehovah ọn̄wọn̄ọ ke imọ iyọdiọn̄ owo ekededi oro anamde n̄kpọ imọ. (Isa. 65:16) Jehovah ọyọdiọn̄ nnyịn edieke nnyịn mîyakke n̄kpọ ndomokiet akpan nnyịn ndika n̄kọkwọrọ ikọ ke ebiet emi ẹyomde-yom mme ọkwọrọikọ. N̄kọ emeti Sylviana oro ikasiakde ke ntọn̄ọ ntọn̄ọ ibuotikọ emi? Enye oto Madagascar. Enye ekekere ke imọ idikemeke ndika n̄kọkwọrọ ikọ ke ebiet emi ẹyomde-yom mme ọkwọrọikọ. Nso ikanam enye ekere ntre? Enye ọdọhọ ete: “Ukot nnasia mi ọniọn̄ ekpri akan eke ufien. Ntre isan̄ esisọp akak mi sia nsikpọkpọi nsan̄a.”

Edi ke 2014, Sylviana ama asan̄a ye Sylvie Ann, ekpri n̄kaiferi emi edide asiakusụn̄ ke esop mmọ, ọwọrọ aka ekpri obio-in̄wan̄ kiet. To ke obio emana mmọ sịm obio-in̄wan̄ oro edi itiat 53 m̀mê kilomita 85. Kpa ye oro mîmemke inọ enye, esịt enem enye ke enye ama osụk ekeme ndiwọrọ n̄ka ebiet emi ẹyomde-yom mme ọkwọrọikọ. Jehovah ọdiọn̄ enye etieti! Enye ọdọhọ ete: “Isua kiet kpọt tọn̄ọ n̄kọwọrọ ndi mi, Doratine, ekpri ekaeyen emi nsikpepde n̄kpọ, ama ana baptism ke mbono circuit nnyịn.”

Se nditọete oro ẹkekade ẹkekwọrọ ikọ ke ebiet oro ẹyomde-yom mme ọkwọrọikọ ẹtịn̄de owụt ke edieke nnyịn mîyakke n̄kpọ ndomokiet akpan nnyịn nditiene n̄wọrọ n̄ka, ke Jehovah iditreke ndin̄wam nnyịn. Enye ọdọhọ ete: “Ami nyọsọn̄ọ fi idem. Ami nditreke ndin̄wam fi.” (Isa. 41:10) Iyetetịm ikpere Jehovah ke ini ikụtde nte enye an̄wamde nnyịn. Ke ini inyịmede ndikọkwọrọ ikọ ke ebiet oro ẹyomde-yom mme ọkwọrọikọ, edide ke idụt nnyịn m̀mê ke idụt en̄wen, ọwọrọ imeben̄e idem ndinam utom ekededi oro Abasi edinọde nnyịn ke obufa ererimbot. Didier ọdọhọ ete: “Ndikọkwọrọ ikọ ke ebiet oro ẹyomde-yom mme ọkwọrọikọ eben̄e nnyịn idem ọnọ ini iso!” Akam nnyịn edi yak ediwak ikọt Abasi ẹtiene ẹkekwọrọ ikọ ke ebiet oro ẹyomde-yom mme ọkwọrọikọ!