Ndi emenyịme se owo emi etịn̄de emi? Ukem nte Samantha, enyene mme ini emi kpukpru nnyịn isisobode mfịna emi ekemede ndinam nnyịn iyom ndisu nsu. Se nnyịn inamde ke utọ ini ntem ekeme ndiwụt utọ owo emi nnyịn idide. Ke uwụtn̄kpọ, edieke isinamde se ededi mbak nnyịn ididia bụt, nnyịn ididaha nsu nte idiọkn̄kpọ. Edi ke ini ẹyararede nsu, emi esiwak ndida mme mfịna en̄wen ndi. Se ndusụk mfịna oro nsu esidade edi mi.

Owo iba emi ẹdide ufan ẹsinyene mbuọtidem ke idem kiet eken. Edi emi esitọn̄ọ sụn̄sụn̄. Se nte esitọn̄ọde mi: Mmọ ẹsima ndidu kiet, ẹneme nneme ke ofụri esịt, idịpke kiet eken n̄kpọ, ẹnyụn̄ ẹnam n̄kpọ ẹnọ kiet eken. Mmọ isikopke ndịk ke ini ẹdude kiet sia mmọ ẹdiọn̄ọ ke ufan idinamke ufan ibak. Edi nsu kiet ekeme ndibiat kpukpru emi. Ndien ke ini emi etịbede, esisọn̄ ndifiak nnyene mbuọtidem ke idem owo emi okosude nsu nnyụn̄ mfiak ndi ufan esie.

Ndi akanam owo emi ekekerede ke edi ata ufan fo abian̄a fi? Edieke edide ntre, eketie fi didie ke idem? Anaedi ama enen̄ede abiak fi sia idụhe nte utọ n̄kpọ emi mîkpabiakke owo. N̄kọ omokụt do ke nsu esibiat ufan.

Ndụn̄ọde oro Robert Innes, prọfesọ ke Ufọkn̄wed Ntaifiọk California, akanamde owụt ke “nsu ekeme ndibe owo.” Nsu etie nte idiọk udọn̄ọ emi esibede owo. Edieke odụkde ndụk ye owo nsu, emekeme ndikabade ndi owo nsu n̄ko.

Nso ke akpanam mbak udûtiene udi owo nsu? Nso ikeme ndin̄wam fi edi owo akpanikọ? Bible ekeme ndin̄wam fi. Yak ineme mme item Bible emi ẹkemede ndin̄wam fi. Mbọk kot man etiene ọbọ ufọn.