NDUSỤK OWO ẸDỌHỌ KE IKEMEKE. Dọkta kiet ọkọdọhọ ke ndikere ke Bible ekeme ndin̄wam nnyịn mfịn etie nte owo ndida se ntaifiọk ẹkewetde ẹban̄a mmọn̄ibọk n̄kpọ nte isua 100 emi ekebede n̄kpep nditọwọn̄ n̄kpọ mfịn ke ufọkn̄wed. Owo ekeme ndidọhọ ke ndikot Bible man ifiọk nte ikpodude uwem mfịn etie nte ndida n̄wed kọmputa emi ẹkesiode ke ata eset ndomo ndifiọk nte ẹkpedade kọmputa eyomfịn ẹnam n̄kpọ. Emi ọwọrọ ke ndusụk owo ẹkere ke Bible edi n̄wed eset emi mîkemeke ndin̄wam nnyịn mfịn.

Nso ikpanam owo ekere ke n̄wed emi ẹkewetde ke ata eset ekeme ndin̄wam owo ke eyo ntatenyịn emi? Kamse, ẹwet ata ediwak n̄kpọ ẹdọn̄ ke Intanet ke usen ke usen ẹban̄a se owo akpanamde ye nte ẹkpedude uwem. Mbon emi ẹkpepde n̄kpọ ẹban̄a nte mme owo ẹkpedude uwem ẹnyụn̄ ẹkamade idem ẹsinọ mme owo item ediwak ini ke TV. Ẹnyụn̄ ẹwet nsio nsio n̄wed ẹban̄a nte mme owo ẹkemede ndinam nsio nsio n̄kpọ ke idemmọ, ndien ata ediwak owo ẹsima ndidep utọ n̄wed emi. Oro anam mbon oro ẹwetde mme n̄wed emi ye mbon oro ẹnyamde mmọ ẹnen̄ede ẹforo.

Ndi Bible emi ẹkewetde ẹkụre ke n̄kpọ nte isua 2,000 emi ekebede osụk ekeme ndin̄wam nnyịn, kpa ye oro inyenede ediwak n̄wed ye mme ọnọ-item mfịn? Ndi enen ndidọhọ ke Bible etie nte n̄wed kọmputa emi ẹkesiode ke ata eset? Inenke. Se ntaifiọk ẹkpepde mfịn okpụhọde ye se mmọ ẹkekpepde ke eset, edi se mme owo ẹkeyomde ke eset ikpụhọkede ye se mme owo ẹyomde mfịn. Mme owo ẹsụk ẹyoyom ndidu eti uwem, ndidu ke emem, n̄kop inemesịt ke ubon, nnyụn̄ nnyene nti ufan.

Kpa ye oro ẹkewetde Bible ke eset, enye etịn̄ nte ikemede ndinyene mme n̄kpọ emi, onyụn̄ etịn̄ ediwak n̄kpọ en̄wen. Abasi ọkọnọ spirit esie ẹda ẹwet Bible, ndien enye ekeme ndin̄wam nnyịn ke se ededi oro inamde ye ke mfịna ekededi oro isobode. (2 Timothy 3:​16, 17) N̄ko Bible edisụk ikaka iso in̄wam mme owo; idụhe ini emi enye mîdinyeneke ufọn aba. Mme Hebrew 4:12 ọdọhọ ke “ikọ Abasi enyene uwem.”

Ndi edi akpanikọ ke Bible ekeme ndin̄wam nnyịn ntem? Ndi enye ke enyenyene ufọn? Ndi enye ọfọn akan ke otu kpukpru n̄wed emi ẹdude mfịn? Enyọn̄-Ukpeme emi ayan̄wam fi ọfiọk ibọrọ mbụme emi. Enye edi akpa ke otu san̄asan̄a Enyọn̄-Ukpeme oro idisiode.