Ini Emi Usua Mîdidụhe Aba!
Imekeme nditre ndisua owo, edi nnyịn idikemeke ndinyịk mbon en̄wen ẹtre ndisua owo. Ata ediwak owo ke ẹbọ ufen ke ntak usua. Ntre, anie ekeme ndinam usua etre ofụri ofụri ke ererimbot emi?
Jehovah Abasi ikpọn̄ ekeme ndinam usua etre ofụri ofụri. Ndien Bible ọdọhọ ke se enye ọn̄wọn̄ọde ndinam edi oro.—Mme N̄ke 20:22.
ABASI OYOSIO KPUKPRU SE ISINAMDE ẸSUA OWO EFEP
-
1. SATAN. Satan emi ọkọsọn̄de ibuot ye Abasi enen̄ede anam usua okpon ke ererimbot emi. Abasi oyosobo Satan ye kpukpru mbon oro ẹtienede enye ẹsua owo.—Psalm 37:38; Rome 16:20.
-
2. IDIỌK ERERIMBOT SATAN. Abasi oyosio kpukpru se inamde ẹsua owo ke ererimbot emi efep. Emi esịne mbon ukara ye ikpọ owo ufọkabasi emi ẹnamde mme owo ẹka iso ẹsua owo. Enye n̄ko oyosobo mbon mbubehe emi ẹdiọkde itọn̄ ẹnyụn̄ ẹtụkde mme owo.—2 Peter 3:13.
-
3. IDIỌKN̄KPỌ ORO IKADADE-DA IMANA. Bible ọdọhọ ke kpukpru nnyịn ikadada idiọkn̄kpọ imana, ndien oro esinam ikere inyụn̄ inam ndiọi n̄kpọ. (Rome 5:12) Idiọkn̄kpọ oro ikadade-da imana do esinyụn̄ anam isua mbon en̄wen. Abasi ayanam itre ndisikere m̀mê ndinam ndiọi n̄kpọ, ndien oro ayanam usua etre ke nsinsi.—Isaiah 54:13.
BIBLE ỌDỌHỌ KE INI KE EDI EMI USUA MÎDIDỤHE ABA
-
1. UTỤK YE UFỊK IDIDỤHE ABA. Obio Ubọn̄ Abasi edikara ofụri isọn̄. Ẹditie ke heaven ikara, ndien utụk ye ufịk ididụhe aba ini oro. (Daniel 2:44) Asari ye ubahade idinyụn̄ idụhe aba. Abasi eyese aban̄a kpukpru mbon oro ẹkebọde ufen ke ntak utụk ye ufịk.—Luke 18:7.
-
2. KPUKPRU OWO ẸDIDU KE EMEM. Owo ndomokiet idibọhọ ufen ke ntak afai m̀mê ekọn̄. (Psalm 46:9) Mfịna ndomokiet ididụhe ke ofụri isọn̄ sia mbon emem kpọt ẹdidu ini oro.—Psalm 72:7.
-
3. KPUKPRU OWO ẸYEDU UWEM KE NSINSI INYỤN̄ INYENEKE MFỊNA NDOMOKIET. Kpukpru mbon emi ẹdidude uwem ini oro ẹyema kiet eken. (Matthew 22:39) Owo ndomokiet idinyeneke mfịna, idinyụn̄ itịghi n̄kpọ ndomokiet emi edinamde esịt etịmede enye. (Isaiah 65:17) Sia usua mîdidụhe aba, emem oyodu ke ofụri isọn̄, mme owo ẹyenyụn̄ ẹkop idatesịt.—Psalm 37:11.
Ndi ọdọn̄ fi nditiene ndu uwem ke utọ ini oro? Idem idahaemi, se ediwak oro ẹkpepde ke Bible an̄wam mmọ ẹtre ndisua owo. (Psalm 37:8) Se Mme Ntiense Jehovah ke ofụri ererimbot ẹnamde edi oro. Kpa ye oro mmọ ẹtode nsio nsio idụt, mmọ ẹma kiet eken ẹnyụn̄ ẹdiana kiet nte nditọeka.—Isaiah 2:2-4.
Mme Ntiense Jehovah ẹyema ndiwụt fi se mmọ ẹkpepde ke Bible oro ekemede ndin̄wam fi ọdiọn̄ọ se akpanamde ke ini ẹtụkde fi m̀mê ẹsaride fi. Se afo edikpepde ayanam ama mme owo utu ke ndisasua mmọ. Eyekpep n̄ko nte ekemede ndifọn ido ye kpukpru owo, esịnede mbon oro ẹsisuade owo m̀mê mbon oro mîsikọmke owo ke ini ẹnamde n̄kpọ ẹnọ mmọ. Oro ayanam enen̄ede okop idatesịt onyụn̄ enyene nti ufan. Se ifọnde ikan edi ke se afo edikpepde ayanam ekeme ndidu uwem ke nsinsi ke ini emi ukara Abasi edinamde usua etre ofụri ofụri.—Psalm 37:29.
Ekeme Ndidi Ayama Mmọ Emi N̄ko
ENYỌN̄-UKPEME
Nso ke Obio Ubọn̄ Abasi Edinam?
Jesus ama ọdiọn̄ọ ke Obio Ubọn̄ Abasi edi n̄kukụre ukara emi edinamde n̄kpọ ọfọn ke ofụri isọn̄. Nso ke Obio Ubọn̄ Abasi anam emi anamde inịm ke enye ayanam mme n̄kpọ en̄wen ke ini iso?
