SE AKPANAMDE MAN ETRE NDISUA OWO
2 | Kûsio Owo Usiene
Se Bible Ọdọhọde:
“Ẹkûda idiọk ẹsio owo usiene idiọk. . . . Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo. Ẹkûsio usiene ẹnọ idem mbufo, . . . koro ẹwet ẹte: ‘Jehovah ọdọhọ ete, usiene enyene mi; ami nyosio usiene.’”—ROME 12:17-19.
Se Itien̄wed Emi Ọwọrọde:
Kpa ye oro esibiakde nnyịn ke ini ẹnamde nnyịn ibak, Abasi ọdọhọ ikûsio owo usiene. Utu ke oro, enye ọdọhọ yak inyene ime ibet ini emi imọ idinamde kpukpru n̄kpọ ọfọn ama.—Psalm 37:7, 10.
Se Akpanamde:
Ke ini isiode owo usiene, oro esinam usua enen̄ede okpon. Ntre, edieke owo eduede fi m̀mê anamde fi ibak, kûsio enye usiene. Domo ndimụm idem n̄kama nnyụn̄ nnam n̄kpọ emem emem ye owo oro. Ndusụk ini, esifọn ifre iban̄a se ẹkenamde nnyịn. (Mme N̄ke 19:11) Edi edieke okụtde ke ifọnke efre aban̄a se iketịbede, ọfọn etịn̄ ọnọ nnennen owo emi edisede iban̄a mfịna oro. Ke uwụtn̄kpọ, edieke owo owode fi, emekeme nditịn̄ nnọ mme bodisi m̀mê mbon ukara en̄wen.
Owo emi osiode owo usiene anam idemesie ibak
Nso ke akpanam edieke odomode ndibiere mfịna emem emem edi ibuot isụk idụhe? Mîdịghe ekere ke amanam ofụri se ekemede, edi mfịna oro osụk akaka iso? Kûsio usiene sia oro edikam inanam mfịna oro okpon akan oro. Nditre ndisio usiene ekeme ndinam usua etre. Nịm ke Abasi eyebiere mfịna oro ke nnennen ini. Bible ọdọhọ ete: “Beri edem ke enye, ndien enye eyese aban̄a fi.”—Psalm 37:3-5.
Ekeme Ndidi Ayama Mmọ Emi N̄ko
BIBLE OKPỤHỌDE MME OWO
N̄koyom Nditre Asari
Rafika ama etiene odụk n̄ka kiet emi ẹkeyomde ukpụhọde man enye ekeme nditre asari. Edi enye ama edikụt ke Bible ọn̄wọn̄ọ ke emem ye unenikpe ẹdidu ke ini Obio Ubọn̄ Abasi edikarade.
