Ntak Emi Usua Okponde Ntem?
Ntak emi usua okponde ntem ke ererimbot? Man idiọn̄ọ ntak, ọfọn idiọn̄ọ se usua edide, se isinamde mme owo ẹtọn̄ọ ndisua owo, ye nte owo kiet esitọn̄ọde ndisua owo etise mbon en̄wen ẹtiene ẹsua.
Se Usua Edide
Usua idịghe ndiyat esịt ye owo ke ekpri ibio ini. Owo ama asua owo, enye isimaha n̄kpọ ndomokiet iban̄a owo oro, esinyụn̄ esịn owo oro ke esịt.
SE ISINAMDE MME OWO ẸTỌN̄Ọ NDISUA OWO
Enyene ediwak n̄kpọ emi ẹsinamde mme owo ẹtọn̄ọ ndisua owo. Ẹsisua ndusụk owo ke ntak itie emi mmọ ẹtode, ọkpọkọm inyeneke se mmọ ẹduede. Ẹkeme n̄ko ndisua mme owo ke ntak emi ẹkerede ke mmọ ẹdi ndiọi owo, ke mmọ ẹkeme ndinam owo ibak, ke mmọ ẹdi ntak mfịna emi odude ke obio, mîdịghe ke mmọ ikemeke ndikpụhọde. Ndusụk ini, owo isibatke utọ mbon emi ke n̄kpọ. Ndusụk owo ẹsisua mbon en̄wen ke ntak emi ẹkenamde mmọ ibak, ẹfịkde mmọ, ẹtụkde mmọ, m̀mê ẹnamde mmọ n̄kpọ en̄wen emi mmọ mîmaha.
OWO KIET ỌTỌN̄Ọ ASUA OWO, MBON EN̄WEN ẸTIENE
Owo ekeme ndisua owo emi edide akanam enye ikwe. Ke uwụtn̄kpọ, owo esisua owo en̄wen ke ntak emi mbonubon esie ye mme ufan esie ẹsuade owo oro. Nte usua esitọn̄ọde ye owo kiet, ekem mbon en̄wen ẹtiene edi oro.
Ima idiọn̄ọ ke owo kiet ama asua owo, ke mbon en̄wen ẹkeme nditiene enye nsua, oro ayanam ikụt ntak emi usua okponde etieti ke ererimbot emi. Edi edieke iyomde ndidiọn̄ọ nte usua edisan̄ade itre, ọkpọfọn idiọn̄ọ nte enye ọkọtọn̄ọde. Bible anam idiọn̄ọ nte usua ọkọtọn̄ọde.
BIBLE ETỊN̄ NTE USUA ỌKỌTỌN̄ỌDE
IDỊGHE OWO ỌKỌTỌN̄Ọ USUA. Usua ọkọtọn̄ọ ke ini angel kiet ke heaven, emi ẹkedide ẹdidiọn̄ọ nte Satan ye Devil, ọkọsọn̄de ibuot ye Abasi. Bible ọdọhọ ke Devil ‘ekedi owotowo toto ke ini emi enye ọkọtọn̄ọde’ nsọn̄ibuot. Sia enye edide “osu nsu ye ete nsu,” enye aka iso ndinam mme owo ẹsua kiet eken ẹnyụn̄ ẹnam n̄kpọ afai afai. (John 8:44; 1 John 3:11, 12) Enye edi ọbọn̄ ibak, okpon iyatesịt, esinyụn̄ anam n̄kpọ afai afai.—Job 2:7; Ediyarade 12:9, 12, 17.
MME OWO ẸSISUA MBON EN̄WEN SIA IKADADA IDIỌKN̄KPỌ IMANA. Adam emi ekedide akpa owo emi Abasi okobotde ama etiene Satan ọsọn̄ ibuot ye Abasi. Sia idide nditọ Adam, kpukpru nnyịn ikadada idiọkn̄kpọ imana. (Rome 5:12) Cain emi ekedide akpa eyen Adam ama asua Abel eyeneka esie tutu owot enye. (1 John 3:12) Imọdiọn̄ọ ke ediwak owo ẹsima owo ẹnyụn̄ ẹtua owo mbọm. Edi ke ntak idiọkn̄kpọ oro ikadade-da imana, ata ediwak owo ẹsikere ẹban̄a idemmọ kpọt, ẹfịbe owo, ẹnyụn̄ ẹtan̄ idem, ndien mme edu ntem esinam mme owo ẹsua owo.—2 Timothy 3:1-5.
OWO EMI MÎMAHA MBON EMI MÎTIEHE NTE ENYE ESISUA OWO. Ndusụk owo ke ererimbot emi isituaha owo mbọm, ẹsinyụn̄ ẹdiọk uwem ye mme owo. Oro anam usua enen̄ede okpon. N̄ko, sia edide Satan akara ofụri ererimbot, ntak edi oro mme owo mîsimaha mbon emi mîtiehe nte mmọ. Oro esinyụn̄ anam mme owo ẹsari owo, ẹsụn̄i owo, ẹfiomo owo, ẹnyụn̄ ẹbiat n̄kpọ owo.—1 John 5:19.
Edi idịghe nte usua ọkọtọn̄ọde kpọt ke Bible etịn̄. Enye etịn̄ n̄ko se idinamde usua etre.
Ekeme Ndidi Ayama Mmọ Emi N̄ko
BIBLE EKEME NDIBỌRỌ MBỤME FO
Ndi Abasi Okobot Devil Ndida Ndomo Nnyịn?
Se Bible ọbọrọde esịne ifiọk onyụn̄ ọdọn̄ owo esịt.
BIBLE EKEME NDIBỌRỌ MBỤME FO
Nso Ikedi Akpa Idiọkn̄kpọ?
Adam ye Eve ẹma ẹsọn̄ ibuot ye Abasi ẹnyụn̄ ẹyak idiọkn̄kpọ ẹnọ kpukpru nditọ mmọ ukem nte ete ye eka ẹsiyakde udọn̄ọ emi esịnede mmọ ke iyịp ẹnọ kpukpru nditọ mmọ.
