Ke uwụtn̄kpọ, oyobio ama abiat ata ediwak inyene Sally * emi odụn̄de ke United States. Enye ọkọdọhọ ete: “N̄kekere ke edieke n̄kpọ en̄wen ọwọrọde mi adian do, ke okịm okụre. Ediwak usen ekesitie nte ke ndidụhe uwem eyo esiere.”

Akamba mfịna en̄wen emi mme owo ẹsobode edi owo mmọ ndikpa. Janice emi odụn̄de ke Australia ọdọhọ ete: “Ke ini nditọiren iba oro n̄kenyenede ẹkekpade, kpukpru n̄kpọ ke uwem mi ama ọtọ etịmede. Mma mben̄e Abasi nte: ‘Mbọk, n̄kemeke ndiyọ aba! Yak n̄kpa ndien. Mbọk kûnam ndemede aba mma nde.’”

Mfịna emi akanamde ibuot oyon̄ Daniel ekedi n̄wan esie ndiwọrọ n̄kama owo en̄wen. Enye ọdọhọ ete: “Ke ini n̄wan mi ọkọdọhọde ke imesidịbe iwọrọ ikama owo en̄wen, inua ikemeke nditịn̄ nte n̄kpọ emi akabiakde mi. Eketie nte ẹsio ikwa ẹkịm mi esịt, ndien okosụk ababiak mi idem ke ediwak ọfiọn̄ ama ekebe.”

Enyọn̄-Ukpeme emi ayanam ọfiọk ntak emi mûkpayakke uwem odorode fi idem ke ini

• Afanikọn̄ etịbede

• Owo fo akpade

• N̄wan m̀mê ebe fo ọwọrọde akama owo en̄wen

• Ọdọn̄ọde idiọk udọn̄ọ

• Etiede nte n̄kpa fo ọfọn akan uwem

Yak itọn̄ọ ye se akpanamde ke ini afanikọn̄ etịbede.