Ntak emi ọdọn̄de mme owo ndidu uwem ke nsinsi? Bible owụt ke nte Abasi okobotde nnyịn anam esidọn̄ nnyịn ndidu uwem ke nsinsi. (Ecclesiastes 3:11) Bible ọdọhọ n̄ko ke “Abasi edi ima.” (1 John 4:8) Ndi emekere ke Abasi emi amade nnyịn ekeme ndinam esidọn̄ nnyịn ndidu uwem ke nsinsi edieke enye mîkoyomke nnyịn idu uwem ke nsinsi?

Idụhe owo emi amade n̄kpa. Bible akam okot n̄kpa “asua.” (1 Corinth 15:26) Ndusụk owo ẹsikpa nsek, ndusụk ẹsọn̄ ndien ẹkpa. Edi se idude edi ke owo ayakpa usen kiet usen kiet. Idem esinyek ediwak owo ke ini mmọ ẹkerede ke imekeme ndikpa ini ekededi. Ndi enyene ini emi n̄kpa mîdidụhe aba? Ndi utọ n̄kpọ oro ekeme nditịbe?

Abasi ikoyomke mme owo ẹkpa. Ndi akpa fi idem ndifiọk oro? N̄wed Genesis owụt ke Abasi okoyom mme owo ẹdu uwem ke isọn̄ ke nsinsi. Jehovah Abasi ama ada ini anam isọn̄ emi onyụn̄ ọdọn̄ kpukpru n̄kpọ emi ẹdinamde mme owo ẹkop inemesịt. Ekem enye ama obot Adam onyụn̄ emen enye ekesịn ke Paradise emi ẹkekotde In̄wan̄ Eden. Ke Abasi ama akanam kpukpru emi ama, enye ama “okụt kpukpru se enye akanamde, ndien sese! ẹfọn etieti.”—Genesis 1:26, 31.

Abasi okobot Adam ke mbiet esie, Adam ama onyụn̄ ọfọn ama. (Deuteronomy 32:4) Eve an̄wan esie n̄ko ama ọfọn ama anana ndo. Jehovah ọkọdọhọ  mmọ ete: “Mbufo ẹtọt ẹnyụn̄ ẹwak ẹnyụn̄ ẹyọhọ ke isọn̄ ẹnyụn̄ ẹkan enye, ẹnyụn̄ ẹkara iyak ke inyan̄ ye mme edibotn̄kpọ emi ẹfede ke enyọn̄ ye kpukpru mme odu-uwem edibotn̄kpọ eke ẹnyọnide ke isọn̄.”—Genesis 1:28.

Nditọt nyọhọ isọn̄ idịghe n̄kpọ isua ifan̄. Akana Adam ye Eve ẹnyene nditọ, nditọ mmọ ẹnyụn̄ ẹnyene nditọ tutu mme owo ẹyọhọ ofụri isọn̄ nte Abasi okoyomde. (Isaiah 45:18) Ndi Abasi ọkpọkọnọ Adam ye Eve utọ utom emi edieke enye okoyomde mmọ ẹdu uwem isua ifan̄ kpọt, ẹkụt nditọ ye nditọ nditọ mmọ, ekem ẹkpa?

Ti n̄ko ke Abasi ọkọdọhọ mmọ ẹkara mme unam. Abasi ama ọdọhọ Adam osio mme unam enyịn̄, ndien oro ama ada ini. (Genesis 2:19) Edi akana Adam odu ye mme unam ebịghi onyụn̄ ọfiọk nte enye ekpesede aban̄a mmọ man ekeme ndikara mmọ. Ntre, ndikara unam akpakada ata anyan ini.

Ntre, Abasi ndikọdọhọ Adam ye Eve ẹtọt ẹyọhọ isọn̄ ẹnyụn̄ ẹkara mme unam owụt ke enye okoyom mmọ ẹdu uwem ẹbịghi. Adam ama onyụn̄ odu uwem ebịghi.

Bible owụt ke ndusụk owo ẹma ẹdu uwem enen̄ede ebịghi akan nte idude uwem mfịn. Bible ọdọhọ ete: “Ofụri isua uwem Adam edi isua ikie usụkkiet ye edịp ye duop.” Bible asiak owo itiokiet en̄wen emi ẹkedude uwem ẹbe isua 900, oro edi, Seth, Enosh, Kenan, Jared, Methuselah, ye Noah. Kpukpru mmọ ẹkedu uwem mbemiso Ukwọ eyo Noah, ndien Noah ama ododu uwem isua 600 mbemiso Ukwọ oro. (Genesis 5:5-27; 7:6; 9:29) Nso ikanam mmọ ẹdu uwem ẹbịghi ntre?

Kpukpru mmọ ẹkedu uwem ẹkpere ini emi Adam ye Eve ẹkefọnde ẹma. Etie nte se ikanamde mmọ ẹdu uwem ẹbịghi edi oro. Edi mfọnmma asan̄a nso ye owo ndidu uwem mbịghi? Ẹdisan̄a didie inam mme owo ẹkûkpa aba? Edieke iyomde ndifiọk ibọrọ mme mbụme emi, ana ibem iso idiọn̄ọ ntak emi mme owo ẹsisọn̄de ẹnyụn̄ ẹkpade.