IMỌDIỌN̄Ọ ke nsọn̄ibuot akpa ete ye eka nnyịn, Adam ye Eve, akada idiọkn̄kpọ ye n̄kpa ọsọk kpukpru owo. Edi oro ikpụhọkede se Abasi akaduakde aban̄a mme owo. Abasi etịn̄ ediwak ini ke Bible ete ke imọ iyanam se imọ ikaduakde.

• “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.”—Psalm 37:29.

• “Enye eyemen n̄kpa emen ke nsinsi, Jehovah Akakan Ọbọn̄ Andikara oyonyụn̄ ọkwọhọde mmọn̄eyet efep ke iso kpukpru owo.”—Isaiah 25:8.

• “Ẹyesobo n̄kpa ẹfep nte akpatre asua.”—1 Corinth 15:26.

• “N̄kpa idinyụn̄ idụhe aba, mfụhọ m̀mê ntuan̄a m̀mê ubiak idinyụn̄ idụhe aba.”—Ediyarade 21:4.

Didie ke Abasi ‘edimen n̄kpa imen,’ oro edi, didie ke enye edinam n̄kpa etre? Nte ima iketetịn̄, Bible ọdọhọ ke ‘ndinen owo ẹyedụn̄ ke nsinsi.’ Edi Bible etịn̄ n̄ko ke “baba edinen owo kiet idụhe ke isọn̄ eke anamde eti mînyụn̄ inamke idiọkn̄kpọ.” (Ecclesiastes 7:20) Ndi oro ọwọrọ ke Abasi idiyomke aba mme owo ẹnịm ibet esie, nte enye etịn̄de ke Bible, man mmọ ẹkpedu uwem ke nsinsi? N̄wan̄ansa-o! Utọ n̄kpọ oro ikemeke nditịbe sia ‘Abasi ikemeke ndisu nsu.’ (Titus 1:2) Abasi edisan̄a didie ndien inam se enye akaduakde ke ini enye okobotde owo?

Jehovah Abasi ama ọnọ Eyen esie edikpa man afak nnyịn osio ke n̄kpa. Ke ini ikụtde ikọ oro “ufak” ke Bible, enye esiwak ndiwọrọ usiene n̄kpọ emi ẹnọde man ekem ye se ẹkebiatde m̀mê se ẹkpede man ekem ye se ibet ọdọhọde. Sia kpukpru owo ẹdide mme anamidiọk ẹnyụn̄ ẹdotde n̄kpa, oro anam Bible ọdọhọ ete: “Baba owo mmọ kiet ikemeke ndifak eyenete esie, m̀mê ndinọ Abasi ufak ibuot esie; (ndien ekọmurua ufak ukpọn̄ mmọ enen̄ede okpon tutu owo ikemeke ndikpe enye ke nsinsi).”—Psalm 49:7, 8.

Ke ini owo akpade, utịp idiọkn̄kpọ esie kpọt ke enye ekpe oro; enye ikemeke ndifak idemesie inyụn̄ ikemeke ndifak owo en̄wen. (Rome 6:7) Ntre, akana owo emi ọfọnde ama, emi mînamke idiọkn̄kpọ akanam, edikpa man afak nnyịn.—Mme Hebrew 10:1-4.

Se Abasi okonyụn̄ anamde edi oro. Enye ama ọdọn̄ Jesus Eyen esie oto heaven edimana ke isọn̄ nte mfọnmma owo. (1 Peter 2:22) Jesus ọkọdọhọ ke imọ ikedi ererimbot man ‘idinọ ukpọn̄ imọ nte ufak ke ibuot ediwak owo.’ (Mark 10:45) Enye akakpa man ekpe utịp idiọkn̄kpọ nnyịn onyụn̄ akan n̄kpa emi edide asua nnyịn man nnyịn ikpodu uwem ke nsinsi.—John 3:16.

Mfịn, nnyịn idu uwem ke “ndiọkeyo emi ọsọn̄de ndiyọ,” emi Bible ọkọdọhọde ke oyodu ke “mme akpatre usen” idiọk ererimbot emi. (2 Timothy 3:1) Mme akpatre usen emi ẹditre ke “usen ubiereikpe ye usen emi ẹdisobode mmọ eke mîten̄eke Abasi.” (2 Peter 3:3, 7) Edi mbon emi ẹmade Abasi ẹyebọhọ, ndien Abasi ayanam mmọ ẹdu “nsinsi uwem.”—Matthew 25:46.

Abasi ayanam ata ediwak mbon emi ẹkekpade ẹset ẹdidu nsinsi uwem n̄ko. Jesus ama anam owo eset ke ini enye akakade obio emi ẹkotde Nain. N̄kukụre eyen emi ebeakpa kiet ekenyenede ama  akpa, ndien mbọm ama anam Jesus anam eyen oro eset. (Luke 7:11-15) Apostle Paul ọkọdọhọ ete: “Mmenyene idotenyịn ke Abasi . . . nte ke ndinen owo ye mme anam ukwan̄n̄kpọ ẹyeset ke n̄kpa.” Abasi ndidọhọ ke mme akpan̄kpa ẹyeset owụt ke enye enen̄ede ama nnyịn.—Utom 24:15.

Ata ediwak owo ẹdori enyịn ndidu uwem ke nsinsi. Bible ọdọhọ ete: “Ndinen owo ẹyeda isọn̄ ẹnyene, ẹnyụn̄ ẹdụn̄ ke esịt ke nsinsi.” (Psalm 37:29) Ini oro, eyenem ndikụt nte ikọ emi apostle Paul ekewetde n̄kpọ nte isua 2,000 emi ekebede, osude: “N̄kpa, edikan fo enye? N̄kpa, ifọt fo enye?” (1 Corinth 15:55) Ke akpatre, ẹyesobo n̄kpa emi edide asua nnyịn ẹfep!