Ndi emekere ke nnyịn ikpodu uwem edieke utịn mîkpodụhe? Ndi emekere ke unam ye eto ẹkpedu? Utịn esinam eto osion̄o ikọn̄, flawa, ye mfri. N̄ko, ke ini utịn asiahade, orụn̄ eto esikot mmọn̄ ke isọn̄, ndien mmọn̄ oto do ọdọk ekesịm ikọn̄ eto, oto do ndien ọdọk ikpaenyọn̄.

Edịm edi kiet ke otu nti enọ Abasi. Edịm esinam n̄kpọ etịbe man inyene udia idia. Abasi esinọ nnyịn edịm, ini eduek, ọnọ nnyịn udia barasuene, onyụn̄ anam esịt nnyịn ọyọhọ ye idatesịt.

Ediwak ete ẹsikere nte mmimọ idisan̄ade inyene okụk idep udia ye ọfọn̄ inọ ubon mmimọ. Kop se Bible etịn̄de mi: “Ẹtịm ẹse mme inuen enyọn̄, koro mmọ isuanke n̄kpasịp inyụn̄ idọkke-dọk inyụn̄ itan̄ke n̄kpọ ibon ke ubet ubonn̄kpọ; edi Ete mbufo eke heaven ọbọk mmọ. Nte mbufo isọn̄ke urua ikan mmọ?”—Matthew 6:25, 26.

“Ẹkpep n̄kpọ ẹto ekpon̄idịm ke ikọt, nte mmọ ẹkọride . . . ; edi ndọhọ mbufo nte kpa [Edidem] Solomon ke ofụri ubọn̄ esie ikesịneke n̄kpọ nte kiet ke otu mmọ emi. Edi, edieke Abasi esịnede mbiet ke ikọt n̄kpọ ntem, . . . adan̄a didie akan oro ke enye edisịne mbufo n̄kpọ?”—Matthew 6:28-30.

Sia Abasi ekemede ndinọ nnyịn udia ye ọfọn̄, ọwọrọ enye ekeme n̄ko ndinọ nnyịn mme n̄kpọ eken oro iyomde. Edieke inamde se Abasi ọdọhọde, enye ekeme ndinam in̄wan̄ nnyịn ọfọn n̄kpọ mîdịghe anam inyene utom man inyene okụk idep se iyomde.—Matthew 6:32, 33.

Edieke itiede ikere se Abasi okobotde ye mme n̄kpọ emi enye ọnọde nnyịn, utọ nte utịn, edịm, mme inuen, ye mme flawa, emi ayanam inen̄ede ima enye. Ke ibuotikọ oro etienede, iyokụt nte Abasi esinemede nneme ye mme owo.