Abasi ama ọn̄wọn̄ọ ọnọ Abraham ke owo ke ubon esie ọyọdiọn̄ “kpukpru mme idụt isọn̄.” (Genesis 22:18) Anie edidi oro?

N̄kpọ nte isua 2,000 emi ekebede, Abasi ama ọnọ Jesus emi okotode ubon Abraham odudu ndinam ikpọ utịben̄kpọ. Mme utịben̄kpọ oro Jesus akanamde ẹkewụt ke enye edidiọn̄ mme idụt kpa nte Abasi ọkọn̄wọn̄ọde ọnọ Abraham.—Galatia 3:14.

Mme utịben̄kpọ oro Jesus akanamde ẹma ẹnam mme owo ẹdiọn̄ọ ke enye ke Abasi emek ete ọdiọn̄ ubonowo. Mme utịben̄kpọ oro ẹma ẹwụt n̄ko nte Abasi edidade Jesus idiọn̄ mme owo ke nsinsi. Yak ineme nte mme utịben̄kpọ Jesus ẹnamde idiọn̄ọ mme edu esie.

Ekere aban̄a mme owo—Jesus ama anam idem ọsọn̄ mme owo.

Enyene isan̄ kiet emi owo akpamfia ekekpede Jesus ubọk ete anam idem ọsọn̄ imọ. Jesus ama otụk enye onyụn̄ ọdọhọ ete: “Mmama. Sana.” Kpa idaha oro, akpamfia ama okụre enye.—Mark 1:40-42.

Atat ubọk—Jesus ama esinọ mme owo udia.

Jesus ikoyomke biọn̄ owot mme owo. Enye ama ada uyo ye n̄kpri iyak ifan̄ ọnọ ata ediwak owo udia. (Matthew 14:17-21; 15:32-38) Kpukpru owo ẹma ẹdia ẹyụhọ, ediwak onyụn̄ ọyọhọ osụhọ. Idịghe ini kiet kpọt ke enye akanam emi.

Atua owo mbọm—Jesus ama anam mme owo ẹset.

Mbọm ama anam Jesus anam n̄kukụre eyen ebeakpa eset sia mma oro ikenyeneke owo en̄wen emi edisede iban̄a enye.—Luke 7:12-15.