Sia kpukpru nnyịn idide nditọ Adam, ito ubon kiet. Okposụkedi emi akpanade mbonubon ẹma ẹnyụn̄ ẹkpono kiet eken, utọ ima oro idụhe ke ediwak ubon mfịn. Edima Abasi nnyịn ikoyomke edi ntre.

“Afo enyene ndima mbọhọidụn̄ fo nte idemfo.”—LEVITICUS 19:18.

“Ẹka iso ẹma mme asua mbufo.”—MATTHEW 5:44.

Abasi etịn̄ se ima edide ke 1 Corinth 13:4-7.

“Ima enyenyene anyanime onyụn̄ ọfọn ido.”

Kere ise: Esitie fi didie ke idem ke ini mbon en̄wen ẹmede ime ye afo, ẹfọnde ido ye afo, mînyụn̄ iyatke esịt ke ini anamde ndudue?

“Ima ifịbeke ufụp.”

Kere ise: Esitie fi didie ke idem ke ini mme owo ẹfịbede fi mîdịghe ẹkere ke unamke n̄kpọ ke ofụri esịt?

Ima “iyomke ufọn idemesie.”

Kere ise: Esitie fi didie ke idem ke ini mme owo ẹnyịmede ekikere fo utu ke ndikọn̄ nyịre ke ekikere mmọ?

Ima “ibatke idiọk ibon.”

Kere ise: Abasi esifen ọnọ mbon emi ẹkabarede esịt. Bible ọdọhọ ete: “Enye idikwe ndudue inọ owo kpukpru ini, idinyụn̄ iyatke esịt ke nsinsi.” (Psalm 103:9) Esinem nnyịn ke ini mbon en̄wen ẹfende ẹnọ nnyịn. Ntre akpana isifen inọ mbon oro ẹduede nnyịn.—Psalm 86:5.

Ima “idarake ukwan̄ido.”

Kere ise: Ndi esinem fi edieke mbon en̄wen ẹnemde esịt ke ini idiọk n̄kpọ etịbede ọnọ fi? Ntre, ikpanaha inem esịt ke ini idiọk n̄kpọ etịbede ọnọ mbon en̄wen, ọkpọkọm mbon oro ẹkenamde nnyịn idiọk.

Edieke iyomde Abasi ọdiọn̄ nnyịn, ana ima mme owo nte inemede mi, inamke n̄kpọ m̀mê mmọ ẹdi isua ifan̄, ẹto m̀mọ̀n̄, m̀mê ẹsinyụn̄ ẹka ewe ufọkabasi. Usụn̄ kiet oro ikemede ndinam emi edi ndisin̄wam mme owo.