N̄kamana ke ediye obio Ciudad Mante emi odude ke Tamaulipas ke Mexico. Mbon obio nnyịn ẹsitat ubọk ẹnyụn̄ ẹfọn ido. Edi sia nditọ inọ ẹkeyọhọde-yọhọ obio nnyịn, obio ekesitie ntịme ntịme.

Ete ye eka mi ẹkenyene nnyịn nditọ irenowo inan̄, ndien ami n̄kedi udọ. Mmọ ẹma ẹnam ẹduọk mi mmọn̄ ke Ufọkabasi Catholic, ekem mma ntiene ndụk n̄ka ikwọ. Mma nnen̄ede nyom ndinam se inemde Abasi esịt sia mmen̄koyomke ndika hell.

Ete mi ama ọwọrọ ọkpọn̄ nnyịn ke ini n̄kedide isua ition. Mma nnen̄ede mfụhọ, uwem onyụn̄ odorode mi. N̄kọdiọn̄ọke ntak emi ete mi ọkpọwọrọde ọkpọn̄ nnyịn ke ini edide ima inen̄ede ima enye. Eka mi ama esinam utom ediwak hour ke usen man enyene okụk ada ese aban̄a mi ye nditọeka mi ita eken.

Sia enye mîkesidụhe ke ufọk, mma nsifiak n̄wed n̄kodụk ndụk ye ikpọ nditọwọn̄. Mmọ ẹma ẹkpep mi ndisisụn̄i owo, ndin̄wọn̄ sika, ndiyịp n̄kpọ, ye nditọ owo ita. Mma n̄kpep nditop ita, ndin̄wana mbọk, ndin̄wana karet, ye ndikama n̄kpọ-en̄wan n̄n̄wana en̄wan sia n̄kesimade ndikakara mme owo. N̄kesinam n̄kpọ afai afai. Mma nsiwak ndikama ikan̄ n̄n̄wana en̄wan. Ndusụk ini, ẹma ẹsitop mi, ami nduọ nna ke efak, ndien ẹdaha ẹkpọn̄ mi ẹkere ke mmakpa. Esịt ama esiduọ eka mi ke ini enye okụtde nte nnade ke efak ntre. Enye ama esimen mi efehe aka ufọkibọk.

Ke ini n̄kedide isua 16, Jorge emi ikedide ufan ke ini ikedide ekpri, ama edi ufọk nnyịn. Enye ama ọdọhọ nnyịn ke imọ idi Ntiense Jehovah ndien ke enyene akpan n̄kpọ emi ikpamade nditịn̄ nnọ nnyịn. Enye ama ada Bible eneme se enye enịmde ke akpanikọ. N̄kesikotke Bible mbemiso ini oro, ntre ama enen̄ede enem mi ndifiọk enyịn̄ Abasi ye se enye aduakde ndinam. Jorge ama ọdọhọ ke ikpama ndikpep nnyịn Bible. Ima inyịme enye esidi edikpep nnyịn.

Esịt ama enen̄ede enem mi ndifiọk ke Bible idọhọke ke mme owo ẹdika ikan̄ hell. (Psalm 146:4; Ecclesiastes 9:5) Ke mma n̄kọfiọk oro, n̄kesikopke ndịk mban̄a Abasi aba. Utu ke oro, n̄kada enye nte Ete emi amade nditọ esie onyụn̄ oyomde n̄kpọ ọfọn ye mmọ.

Nte n̄kosụk n̄kpepde Bible, mma ndikụt ke ana n̄kpụhọde. Akana nsụhọde idem nnyụn̄ ntre afai. Akpa Corinth 15:33 ama enen̄ede an̄wam mi. Itien̄wed oro ọdọhọ ete: “Idiọk nsan̄a ababiat eti ido.” Mma ndikụt ke edieke nyomde ndikpụhọde, ke ana ntre ndidụk nsan̄a ye mme idiọkowo. Ntem, mma ntre ndidian idem ye n̄kani ufan mi nnyụn̄ n̄kabade nnam ufan ye mme owo ke esop, sia mmọ ẹsida Bible ẹbiere mfịna utu ke ndin̄wana en̄wan m̀mê ndiduọ obom.

Itie N̄wed Abasi efen oro ekenen̄erede an̄wam mi edi Rome 12:17-19. Itie oro ọdọhọ ete: “Ẹkûda idiọk ẹsio owo usiene idiọk. . . . Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo. Ẹkûsio usiene ẹnọ idem mbufo, . . . koro ẹwet ẹte: ‘Jehovah ọdọhọ ete, usiene enyene mi; ami nyosio usiene.’” Mma ndifiọk ke Jehovah eyetre kpukpru ufịk ye utụk ke edikem ini esie. Sụn̄sụn̄, mma n̄keme nditre afai.

Ndifreke se iketịbede mbubreyo usen kiet. N̄ka emi ikesin̄wanade ye mmọ ẹma ẹkụt mi ke usụn̄ ẹnyụn̄ ẹtọn̄ọ ndimia mi. Etubom mmọ ama eyịbi mi ke edem onyụn̄ ọdọhọ ete, “Nam se oyomde ndinam ise.” Mma mbọn̄ akam mben̄e Jehovah an̄wam mi. Kpa ye oro ekenen̄erede ọdọn̄ mi ndin̄wana ye mmọ, mma nsan̄a ndaha. Ke ndan̄nsiere, mma n̄kụt etubom n̄ka oro nte asan̄ade ikpọn̄. Esịt ama afiak ayat mi, edi mma mfiak mbọn̄ akam mben̄e Jehovah an̄wam mi mmụm idem n̄kama. Idem ama akpa mi ndikop enye ọdọhọde mi ete: “Mbọk kûyat esịt ke se ikanamde fi n̄kpọn̄. N̄kpama nditie nte afo. Mmoyom ndikpep Bible.” Esịt ama enen̄ede enem mi nte n̄kekemede ndimụm idem n̄kama ke ini esịt akayatde mi. Oro akanam enye oyom ndikpep Bible. Ntre, enye ama ọtọn̄ọ ndikpep Bible.

Ndusụk owo ke ubon nnyịn ẹma ẹtre ndikpep Bible ini oro. Edi mma mbiere ke ndiyakke owo m̀mê n̄kpọ ndomokiet anam mi ntre ndikpep Bible. Mma ndiọn̄ọ ke ndidian idem ye ikọt Abasi ọyọdọn̄ mi esịt onyụn̄ anam nnyene mbon emi ẹnyụn̄ ẹtiede nte ubon nnyịn. Mma n̄ka iso nsịn idem n̄kpep Bible, ndien ke 1991, mma nna baptism n̄kabade ndi Ntiense Jehovah.

N̄kedi owo iyatesịt ye owo afai, n̄kesinyụn̄ ntie ukara ukara. Edi Ikọ Abasi anam n̄kpụhọde. Idahaemi, mmesikwọrọ etop emem emi odude ke Bible nnọ mme owo. Mmada ofụri ini mi nnam n̄kpọ Abasi ke isua 23 idahaemi.

Enyene ini emi n̄ketienede n̄n̄wam ke utom ke ọfis Mme Ntiense Jehovah ke Mexico. Do ke n̄kokụt Claudia, edima eyenete an̄wan emi eyede ido etieti, ndien ima inam ndọ ke 1999. Mmọkọm Jehovah ke enye ndinọ mi utọ eti an̄wan emi.

Ima idu ke esop usem idiọn̄ọ Mexico inyụn̄ in̄wam mme inan ẹdikpep n̄kpọ ẹban̄a Jehovah. Ekem ẹma ẹdọhọ ika Belize ikekpep mme owo Bible ke idụt oro. Kpa ye oro nnyịn mînyeneke n̄kpọ nte ikesinyenede, imenyene kpukpru se inamde ikop inemesịt. Nnyịn ituaha n̄kpọfiọk ke usụn̄ ndomokiet.

Nte ini akakade, eka mi ama afiak ọtọn̄ọ ndikpep Bible onyụn̄ ana baptism. Akpaneka mi, n̄wan esie, ye nditọ esie n̄ko ẹdi Mme Ntiense Jehovah. Ndusụk n̄kani ufan mi emi n̄kọkwọrọde ikọ nnọ ẹdidi Mme Ntiense Jehovah idahaemi.

Edi ndusụk mbonubon nnyịn oro mîkamaha nditre afai ẹma ẹkpan̄a. Ekpedi mma ntiene mmọ, ekeme ndidi n̄kponyụn̄ ntiene n̄kpa. Mmọkọm Jehovah nte enye anamde ndifiọk enye nnyụn̄ mfiọk ikọt esie emi ẹkenyenede ime ẹkpep mi ndidu uwem nte Bible etemede.