N̄kamana ke Saxony emi okodude ke idụt emi ẹkesikotde German Democratic Republic. Ima inen̄ede ima inyụn̄ ikpere kiet eken ke ubon nnyịn, ndien ete ye eka mi ẹma ẹkpep mi ndidu eti uwem. Mbon Communist ẹkekara idụt nnyịn, ntre ediwak owo ikesikaha ufọkabasi. N̄kenịmke ke Abasi odu. N̄kukụre se ikebehede mi toto ke ini emi n̄kamanade tutu nsịm isua 18 ekedi ndinam n̄kpọ nte mbon Communist.

Se ikanamde mma ukara Communist edi ke ẹkedọhọ ke ukara emi esida kpukpru owo ukem ukem. N̄ko, n̄kekere ke edieke ẹdemede se idude ke idụt nnyịn ẹnọ kpukpru owo ukem ukem, ke ndusụk owo ididịghe imọ ke adan̄aemi ndusụk owo ẹdide ọkpọkpọi ubuene. Ntre, mma ndụk n̄ka emi mme uyen oro ẹkemade ukara mbon Communist ẹkesiakde. Ke ini n̄kedide isua 14, mma nnen̄ede nsịn idem ke ndutịm oro ẹkenamde man ẹsisan̄a ẹtan̄ babru emi owo mîyomke aba ẹnyụn̄ ẹnam obio asana. Ukara obio Aue ẹma ẹma se n̄kanamde tutu mmọ ẹnọ mi enọ. Kpa ye oro n̄kedide ekpri akparawa ini oro, mma ndiọn̄ọ ikpọ mbon ukara ke idụt nnyịn. N̄kekere ke se n̄kanamde oro ama ọfọn etieti, ke n̄kpọ oyonyụn̄ ọfọn ye ami ke ini iso.

Edi n̄kpọ ama ọtọ etịmede. Ke 1989, ẹma ẹwụri Ibibene Berlin ẹnyụn̄ ẹsuan ikpehe emi ẹkekotde German Democratic Republic. Ama akpa mi idem ndifiọk ke owo ikesinamke n̄kpọ ye kpukpru owo ukem ukem ke idụt nnyịn, ke ẹkenyụn̄ ẹtetịn̄ kpọt. Ke uwụtn̄kpọ, ẹma ẹsisari mbon oro mîkamaha ukara Communist. Mma n̄kere m̀mê utọ n̄kpọ oro akpasasan̄a didie etịbe. Nse nte mbon Communist ẹkedọhọ ke ida kpukpru owo ukem ukem! Okûdi ẹkebabian̄a nnyịn ofụri emi? Esịt ama etịmede mi.

Ntre, mma nsion̄o idem n̄kpọn̄ mbubehe ukara nnyụn̄ ntọn̄ọ ndikpep ikwọ ye ndidrọ n̄kpọ. Mma n̄ka ufọkn̄wed ukpep ikwọ, nnyụn̄ nduak ndika ufọkn̄wed ntaifiọk. Emi ama anam n̄kere ke nyakabade ndi ata ọkwọ-ikwọ ye ewet-ndise. N̄ko, mma mfre mban̄a nti edu oro ete ye eka mi ẹkekpepde mi ini n̄kedide eyenọwon̄. Se ikebehede mi ekedi ndidia uwem nnyụn̄ mma ediwak iban. Edi ndikwọ ikwọ, ndidrọ n̄kpọ, nnyụn̄ ndia uwem ikanamke esịt etre nditịmede mi. Mme ndise oro n̄kesidrọde ama owụt ke ndịk osụk ananam mi. Mma nsitie n̄kere m̀mê n̄kpọn̄ editie didie. Mma nsinyụn̄ n̄kere ntak emi nnyịn idude uwem.

 Ke ini n̄kedide ndifiọk ibọrọ mme mbụme emi ẹkesifịnade mi, idem ama akpa mi. Mbubreyo usen kiet, mma ntie ye nditọ ufọkn̄wed nnyịn nneme n̄kpọ mban̄a ini iso. Mandy * emi ekedide Ntiense Jehovah ekesịne ke otu oro. Mbubreyo usen oro enye ama etịn̄ se n̄kpanamde. Enye ọkọdọhọ mi ete: “Andreas, edieke oyomde ndifiọk ntak emi idude uwem ye nte ini iso editiede, kot Bible.”

N̄kenen̄ekede nnịm se enye eketịn̄de, edi mma ndọhọ yak nse ise se Bible ekpepde. Mandy ama ọdọhọ n̄kot Daniel ibuot 2, ndien se n̄kokotde do ama akpa mi idem. Prọfesi oro owụt nsio nsio idụt emi ẹdikarade ererimbot tutu esịm eyo nnyịn. Mandy ama owụt mi mme prọfesi Bible en̄wen emi ẹtịn̄de nte ini iso editiede. Ke akpatre, mma ndikụt ibọrọ mme mbụme emi ẹkesifịnade mi! Edi mma n̄kere m̀mê anie ekewet mme prọfesi oro, m̀mê anie ikekeme nditịn̄ nnennen nnennen se iditịbede ntre. Okûdi Abasi odu?

Mandy ama ọdọhọ Horst ye Angelika, ebe ye n̄wan emi ẹdide Mme Ntiense Jehovah, ẹdikpep mi Bible. Mmọ ẹkenen̄ede ẹnam Ikọ Abasi an̄wan̄a mi. Mma nsọsọp n̄kụt ke Mme Ntiense Jehovah ẹdi n̄kukụre mbon emi ẹsikotde enyịn̄ Abasi kpukpru ini ẹnyụn̄ ẹnam mme owo ẹdiọn̄ọ ke Abasi ekere Jehovah. (Psalm 83:18; Matthew 6:9) Mma ndifiọk ke Jehovah Abasi ọn̄wọn̄ọ ndinam mme owo ẹdụn̄ ke isọn̄ ke nsinsi ke Paradise. Psalm 37:9 ọdọhọ ete: “Mmọ eke ẹdoride enyịn ke Jehovah ẹyeda isọn̄ ẹnyene.” Ama enem mi ndifiọk ke kpukpru mbon oro ẹdomode ndinam se Bible ọdọhọde ẹkeme ndidu uwem ke nsinsi.

Edi ikememke ndikpụhọde nnyụn̄ ndu uwem nte Bible ọdọhọde. Akana n̄kpep ndisụhọde idem sia mma nsikohode idem ke ntak emi n̄kedide ata ọkwọ-ikwọ nnyụn̄ nnen̄erede ndiọn̄ọ ndidrọ n̄kpọ. Ama ọsọn̄ mi n̄ko ndikpọn̄ oburobụt uwem oro n̄kesidude. Edi esịt enem mi ndikụt nte Jehovah esinyenede ime ye mbon emi ẹdomode ndidu uwem nte Bible ọdọhọde. Enye esitua mmọ mbọm onyụn̄ an̄wam mmọ ẹkpụhọde.

Toto ke ini emi n̄kamanade tutu esịm ini emi n̄kedide isua 18, n̄kenịmke ke Abasi odu, n̄kesinyụn̄ nsịn ibuot nsịn itọn̄ nyom ukara ẹnam n̄kpọ ye kpukpru owo ukem ukem. Edi tọn̄ọ n̄kekpep Bible, enye aka iso ndikpụhọde uwem mi tutu esịm emi. Se n̄kekpepde ama anam n̄kûtịmede esịt aba mban̄a ini iso onyụn̄ anam ndiọn̄ọ se n̄kpadade uwem mi nnam. Ke 1993, mma nna baptism nnyụn̄ n̄kabade ndi Ntiense Jehovah. Ke 2000, mma ndọ Tabitha, Ntiense emi esịnde idem anam n̄kpọ Jehovah. Nnyịn mbiba imesida ini ikpep mme owo Bible. Ediwak mbon emi isikwọrọde ikọ inọ ẹkenyụn̄ ẹtie nte ami, ẹkesikere ke Abasi idụhe, ẹnyụn̄ ẹsịn idem ẹyom ẹnam n̄kpọ ye kpukpru owo ukem ukem. Esịt esinem mi ndinam mmọ ẹfiọk se mmọ ẹkpenamde man ẹdidiọn̄ọ Jehovah.

Ke ini n̄kọtọn̄ọde ndikpep Bible ye Mme Ntiense Jehovah, esịt ama ayat ete ye eka mi etieti. Edi toto ke ini oro, mmọ ẹkụt ke ami ndidi Ntiense Jehovah anam n̄kpụhọde ndu eti uwem. Esịt enem mi etieti ndikụt ke ete ye eka mi ẹsikot Bible idahaemi ẹnyụn̄ ẹdụk mbono esop Mme Ntiense Jehovah.

Ami ye Tabitha an̄wan mi imokop inem ndọ nnyịn sia imesịn idem inam item emi Bible ọnọde ebe ye n̄wan. Ke uwụtn̄kpọ, ndinam item Bible emi ọdọhọde owo okûsabade bed ndọ anam nnyịn inen̄ede idiana kiet.​—Mme Hebrew 13:4.

N̄kopke ndịk aba mban̄a nte uwem mi etiede nnyụn̄ ntịmekede esịt aba mban̄a nte n̄kpọn̄ editiede. Esịt enem mi ndisịne ke otu ikọt Jehovah. Kpa ye oro idude ke nsio nsio itie ke ofụri ererimbot, nnyịn itie nte ubon emi ẹdianade kiet ẹnyụn̄ ẹdude ke emem. Nnyịn isinyụn̄ ida kpukpru owo ukem ukem. Utọ uwem emi ke n̄koyom toto ke ini emi n̄kedide eyenọwọn̄, ndien mmokụt se n̄koyomde.