Bible owụt ke mme angel ẹma ẹsikpeme ikọt Abasi ndusụk ini man ẹkeme ndinam uduak esie. (Psalm 34:7) Ke uwụtn̄kpọ:

• Ke ini Jehovah okosobode obio Sodom ye Gomorrah, mme angel ẹma ẹn̄wam Lot ye ubon esie ẹfehe ẹwọrọ.​—Genesis 19:​1, 15-26.

• Ke Babylon eset, ẹma ẹtop n̄kparawa Hebrew ita emi ẹkesọn̄ọde ẹda ye Abasi ẹsịn ke akwa ikan̄, edi Abasi ama ‘ọdọn̄ angel esie akanyan̄a mmọ.’​—Daniel 3:​19-28.

• Ke Daniel ama ekesịne ke obube ekpe ke ofụri okoneyo edi ekpe itaha enye, enye ọkọdọhọ ke ‘Abasi imọ ọkọdọn̄ angel esie edikịbi mme ekpe inua.’​—Daniel 6:​16, 22.

Ndusụk ini, Abasi ama esidọn̄ mme angel esie ẹka ẹken̄wam mme Christian eyo mme apostle man ẹka iso ẹnam uduak esie. Ke uwụtn̄kpọ:

• Angel Abasi ama eberede usụn̄ ufọk-n̄kpọkọbi emi ẹkesịnde mme apostle, onyụn̄ ọdọhọ mmọ ẹwọrọ ẹkekwọrọ ikọ ke temple.​—Utom 5:​17-21.

• Angel Abasi ama ọdọhọ Philip aka usụn̄ desat emi otode Jerusalem osụhọde aka Gaza, ọkọkwọrọ ikọ ọnọ owo Ethiopia emi ọkọnyọn̄de ndikokpono Abasi ke Jerusalem.​—Utom 8:​26-33.

• Ke ini Abasi ekenyịmede mbon emi mîdịghe mme Jew ẹkabade ẹdi Christian, angel Abasi ama ọdọhọ Cornelius, akwa owoekọn̄ Rome, ọdọn̄ ẹka ẹkekot apostle Peter edi ufọk imọ.​—Utom 10:​3-5.

• Ke ini ẹkesịnde apostle Peter ke ufọk-n̄kpọkọbi, angel ama aka okosio enye ke n̄kpọkọbi.​—Utom 12:​1-11.

Idụhe n̄kpọ emi owụtde ke Abasi esinam mme angel esie ẹn̄wam mme owo mfịn ke utịbe utịbe usụn̄ nte enye ekesinamde ke eset. Edi kop se Jesus eketịn̄de aban̄a ini nnyịn mi: “[Ẹyekwọrọ] eti mbụk obio ubọn̄ emi ke ofụri isọn̄ nte ntiense ẹnọ kpukpru mme idụt; ndien adan̄aoro ke utịt edidi.” (Matthew 24:14) Ndi ama ọfiọk ke mme angel ẹsin̄wam mme mbet Jesus ẹnam utom emi?

N̄wed Ediyarade owụt ke mme angel ẹn̄wam mme owo ke ofụri isọn̄ ẹkpep n̄kpọ ẹban̄a Jehovah ẹnyụn̄ ẹfiọk se enye aduakde ndinam nnọ nnyịn. Apostle John ọkọdọhọ ete: “Ndien n̄kụt angel efen efede ke ufọt enyọn̄, enye onyụn̄ enyene nsinsi eti mbụk nditan̄a nte etop idatesịt nnọ mbon emi ẹdụn̄de ke isọn̄, ye kpukpru mme idụt ye esien ye usem ye obio, ọdọhọde ke ọkpọsọn̄ uyo ete: ‘Mbufo ẹbak Abasi ẹnyụn̄ ẹnọ enye ubọn̄, koro ekem ini ikpe esie, mmọdo ẹtuak ibuot ẹnọ Enye emi akanamde enyọn̄ ye isọn̄ ye inyan̄ ye idịm mmọn̄.’ ” (Ediyarade 14:​6, 7) Nte ndusụk owo ẹsan̄ade ẹdifiọk Abasi mfịn owụt ke mme angel ẹn̄wam ke utom ukwọrọikọ emi ẹnamde ke ofụri ererimbot. Bible ọdọhọ ke ‘idatesịt esidu ke otu mme angel Abasi’ ke ini anamidiọk kiet akabarede esịt etiene Jehovah.​—Luke 15:10.

Edi nso ke mme angel ẹdinam ke ẹma ẹkekwọrọ ikọ ke ofụri isọn̄ nte Abasi oyomde? Bible ọdọhọ ke mme angel “oro ẹdude ke heaven” ẹyetiene Jesus Christ, emi edide Edidem ndidem, ẹn̄wana “ekọn̄ akwa usen Abasi Ata Ọkpọsọn̄” emi ẹkotde Armageddon. (Ediyarade 16:​14-16; 19:​14-16) Mme angel ẹyetiene Jesus Christ ẹsobo ndiọi owo ke ini “enye adade usiene ọsọk . . . mmọ eke mîsụkke ibuot inọ eti mbụk Ọbọn̄ nnyịn Jesus.”​—2 Thessalonica 1:​7, 8.

Ntem, fiọk ke mme angel ẹnen̄ede ẹkere ẹban̄a fi. Mmọ ẹnen̄ede ẹyom ndin̄wam mbon oro ẹkpemade ndinam n̄kpọ Abasi, ndien Jehovah esidọn̄ mmọ ẹdin̄wam ẹnyụn̄ ẹkpeme mbon oro ẹnamde n̄kpọ esie mi ke isọn̄.​—Mme Hebrew 1:14.

Ntre ana nnyịn owo kiet kiet ibiere m̀mê iyakpan̄ utọn̄ ikop eti mbụk emi ẹkwọrọde ke ofụri ererimbot inyụn̄ inam se ẹkwọrọde. Mme Ntiense Jehovah ke edem mbufo ẹyekop inemesịt ndin̄wam fi etiene adia ufọn utom emi mme angel ẹnamde.