Ke April 2010, ikan̄ ama obụbede ke itie usio aran ke Mexico anam akpakịp aran ọduọhọ ọdọn̄ọ inyan̄ ke n̄kpọ nte ọfiọn̄ ita. Ke n̄kpọ nte ọfiọn̄ iba ye ubak ẹma ẹkebe, ntaifiọk oro ẹkenọde ẹkenam ndụn̄ọde ke inyan̄ oro ẹkedọhọ ke mmimọ ikekwe aba aran ọfiọrọde ke inyan̄ oro. Mmọ ẹkekere ke n̄kpri unam mmọn̄ ẹma ẹdia aran emi. Edi ndusụk ntaifiọk inyịmeke ye mmọ. Mmọ ẹkere ke aran emi ama ọnyọn̄ isọn̄ mmọn̄ ọkọdiọhọ.

N̄wedmbụk n̄kpọntịbe kiet ke Russia ọdọhọ ke ndụn̄ọde oro ẹkenamde owụt ke n̄kpọ nte owo 59 ke otu kpukpru owo 100 emi ẹdide n̄kpọ nte isua 18 esịm 35 ẹdọhọ ke “mbemiso owo edi n̄kpọ ke ererimbot emi, ke ana enye anam se enye ọdiọn̄ọde ke ifọnke ndusụk ini.”—Rossiiskaya Gazeta.

Ata n̄kani n̄kpotụk ibokpot oro ẹkụtde ke Peru (nte enye emi okụtde ke enyọn̄ emi) ẹwụt ke mbon edem edere Peru ẹketọn̄ọ ndisan̄ ibokpot nnyụn̄ nda enye nnam ndomuyo ke n̄kpọ nte isua 3,000 emi ẹkebede.

Lucio Soravito De Franceschi, bishop ufọkabasi Catholic ke Adria-Rovigo ọdọhọ ke akpana isisan̄a ke ufọk ke ufọk ikwọrọ ikọ inọ mme owo. Enye ọdọhọ “ke utu ke ndimia n̄kanika ufọkabasi, ke ikpakam ikamia n̄kanika ufọk owo.”

 

Sia ẹdade nnụk unam emi okụtde ke ndise mi ẹsọbọ ndusụk udọn̄ọ, ndusụk owo ẹnyam enye n̄kpọ nte ₦10,000,000 ke kilogram kiet kpọt. Idịghe nte ukara ẹdọhọde ẹnyam edi oro. Ke 2011, mme atautop ẹkewot unam emi 448 ke South Africa kpọt. Mbon n̄wo ẹsibụn̄ ẹdụk itie ubon n̄kpọeset ye mme ufọkurua ke obio mbakara ẹyom nnụk unam emi. Emi ọwọrọ ke nte ini akade, ke owo idikwe aba mmọ ke mme itie ubọkunam do.