SE BIBLE ETỊN̄DE ABAN̄A
Nditie N̄kere N̄kpọ
Didie ke ikeme nditie n̄kere n̄kpọ?
“Nyetie n̄kere kpukpru utom fo, nnyụn̄ n̄kere mban̄a mme edinam fo.”—Psalm 77:12.
SE MME OWO ẸTỊN̄DE
Enyene nsio nsio usụn̄ emi mme owo ẹsitiede ẹkere n̄kpọ, ndien ufọkabasi mbon Asia ẹketọn̄ọ ediwak mmọ. Owo kiet emi ekewetde aban̄a n̄kpọ emi ọkọdọhọ ete: “Ana owo osion̄o ofụri se isịnede enye ke esịt efep man ekeme ndikere n̄kpọ ọfọn.” Ikọ esie ọwọrọ ke owo ndision̄o ofụri se isịnede enye ke esịt mfep, nnyụn̄ n̄kere n̄kpọ kiet esinam esịt ana owo sụn̄, onyụn̄ anam n̄kpọ Abasi enen̄ede an̄wan̄a owo.
SE BIBLE ỌDỌHỌDE
Bible ọdọhọ ke nditie n̄kere n̄kpọ enen̄ede enyene ufọn. (1 Timothy 4:15) Edi enye idọhọke owo osion̄o ofụri se isịnede enye ke esịt efep, inyụn̄ idọhọke ke enyene ikọ emi anade ẹtịn̄ ke ini ẹkerede n̄kpọ. Utu ke oro, enye ọdọhọ isitie ikere nti n̄kpọ, utọ nte mme edu Abasi, mme ibet esie, ye mme n̄kpọ emi enye okobotde. Owo Abasi kiet ọkọdọhọ ke akam esie ete: “Mmetie n̄kere kpukpru utom fo; mmenyịme nditie n̄kere utom ubọk fo.” (Psalm 143:5) Enye ama ọdọhọ n̄ko ete: “Ke ini ntide fi ke bed mi, ke mme ini ukpeme okoneyo, nyetie n̄kere fi.”—Psalm 63:6.
Didie ke nditie n̄kere n̄kpọ edin̄wam nnyịn?
“Esịt edinen owo etie ekere man ọbọrọ.” —Mme N̄ke 15:28.
SE BIBLE ỌDỌHỌDE
Nditie n̄kere nti n̄kpọ ayanam inyene nti edu, ikpeme se itịn̄de, imụm idem ikama ke ini n̄kpọ afịnade nnyịn, inyụn̄ idu eti uwem. (Mme N̄ke 16:23) Enye esinam uwem enem owo. Kop se Psalm 1:3 ọdọhọde mi aban̄a owo emi esitiede ekere n̄kpọ Abasi kpukpru ini: “Enye ayakabade etie nte eto eke ẹtọde ke mben ediwak idịm, emi osion̄ode mfri esie ke ini esie ndien ikọn̄ esie iyemekede, enye oyonyụn̄ okụt unen ke kpukpru se enye anamde.”
Nditie n̄kere se ikpepde esinam n̄kpọ ọsọp an̄wan̄a nnyịn esinyụn̄ anam isọp iti n̄kpọ. Ke uwụtn̄kpọ, imesifiọk ediwak n̄kpọ ke ini ikpepde iban̄a n̄kpọ emi Abasi okobotde m̀mê ke ini ikpepde n̄kpọ ke Bible. Edi ke ini itiede ikere se ikpepde emi, enye esinen̄ede an̄wan̄a nnyịn, imesinyụn̄ iti se ima ikekpekpep.
Ndi akpana isitie ikere se ededi oro odụkde nnyịn ibuot?
“Esịt abian̄a akan n̄kpọ efen ekededi onyụn̄ anam n̄kpọ ke mbrenyịn. Anie ekeme ndifiọk enye?” —Jeremiah 17:9.
SE BIBLE ỌDỌHỌDE
“Ndiọi ekikere ẹto ke esịtidem, ke esịt owo, ẹwọn̄ọ: use, inọ, uwotowo, efịbe, edisịn esịt ke n̄kpọ owo, idiọkido, abian̄a, obukpo ido, isịnenyịn, . . . unana ibuot.” (Mark 7:21, 22) Emi ọwọrọ ke ana ikpekpeme se ikerede. Mîdịghe ntre, idiọk ekikere ekeme ndinam idiọk n̄kpọ ọdọn̄ nnyịn, ndien edieke nnyịn mîkpemeke, emi ekeme ndinam inam idiọkn̄kpọ.—James 1:14, 15.
Bible ọdọhọ isitie ikere ‘n̄kpọ ekededi eke edide akpanikọ, enende, asanade, ẹmade, ọwọrọde eti etop, esịnede eti ido, onyụn̄ odotde itoro.’ (Philippi 4:8, 9) Edieke isitiede ikere nti n̄kpọ ntem, iyenyene nti edu, ikọ nnyịn eyesinem, mme owo ẹyenyụn̄ ẹma nnyịn.—Colossae 4:6.
