EDIWAK owo ẹsinyene ukem mfịna emi Frank ye Jerry ẹkenyenede mi. Ke ini owo iba ẹnyenede mfịna, mmọ ẹsiyat esịt ye kiet eken—enye emi ọdọhọ ke enye oko edi ntak, enye oko onyụn̄ ọdọhọ ke enye emi edi ntak. Edieke mmọ ẹkọn̄de ẹyịre ke ekikere mmọ, mmọ ididịghe aba ufan.

Ekeme ndidi enyene ini emi se itịn̄de mi ọkọwọrọde fi. Onyụn̄ ekeme ndidi ukûmaha se iketịbede oro. Ke nditịm ntịn̄, ata ediwak nnyịn imaha mfịna; iyom nditie ke emem ye mme ufan ye mbọhọidụn̄ nnyịn. Edi didie ke ikpanam emi idem ke ini mmọ ẹnamde se iyatde nnyịn? Ndi imekeme ndimụm idem n̄kama ke ini n̄kpọ abiakde nnyịn inyụn̄ ifen inọ owo emi eduede nnyịn? Ndi imekeme ndibiere utọk emem emem?

Kere ban̄a mfịna emi Frank ye Jerry ẹkenyenede do. Enyene mme n̄kpọ emi mmọ mîkanamke ọfọn emi akanamde mmọ ẹtọhọ: (1) Jerry ikekereke iban̄a mbọhọidụn̄ esie, (2) Frank eketịn̄ ikọ ke iyatesịt ye Jerry, (3) mmọ mbiba ẹma ẹkpon esịt, ndien (4) mmọ mbiba ẹkekọn̄ ẹyịre ke ekikere idemmọ.

Edi nte ini akakade, mmọ ẹma ẹsụhọde esịt ẹnyụn̄ ẹtịm ẹkere n̄kpọ emi. Mmọ ẹma ẹfre ẹban̄a se iketịbede ẹnyụn̄ ẹnam emem. Nso ikan̄wam mmọ? Mmọ ẹma ẹnam nti item emi ẹn̄wamde ediwak owo ẹka iso ẹdi ufan idem ke ini mmọ ẹnyenede mfịna ẹnyụn̄ ẹdọdiọn̄ ẹkpere kiet eken ke mmọ ẹma ẹkenam emem.

Nti item emi ẹdu Bible, kpa n̄wed emi ẹnyenede ẹkan ke ofụri ererimbot. Bible ọdọhọ isinyene utọ edu nte ọniọn̄, mbufiọk, mfọnido, ima, ye ime. Mme edu emi ẹsinam itie ke emem ye mme owo inyụn̄ ifen inọ mmọ ke ini mmọ ẹduede nnyịn.—Mme N̄ke 14:29; 1 Corinth 13:4, 5.

Frank ye Jerry ẹdi uwụtn̄kpọ iba kpọt emi ẹwụtde nte Bible ekemede ndikpụhọde  owo. Ediwak uwụtn̄kpọ en̄wen do, esịnede eke mbon oro ẹkekpụhọrede okposụkedi emi ẹkenyenede ndiọi edu emi ama ekememehe mmọ. Ke uwụtn̄kpọ, Robert emi odụn̄de ke Australia ekedi owo ikponesịt, edi nte ini akade enye ama okpụhọde. Nelson, emi odụn̄de ke Timor-Leste, ama osio usua efep ke esịt onyụn̄ anam ufan ye akani asua esie. Didie ke Bible akan̄wam Robert ye Nelson? Mme andiwet Ẹdemede! ẹma ẹnyene nneme ye mmọ man ẹdiọn̄ọ.

ROBERT, mbọk tịn̄ nte n̄kpọ eketiede ke ufọk mbufo ke ini ekedide eyenọwọn̄.

Uwem ikenemke mi. Ke uwụtn̄kpọ, ete mi ekedi owo ikponesịt, ama esinyụn̄ amia mi. Enye ama esimia mi ndusụk ini ọnọ unan, ndusụk ini amia mi tutu nsụhọ. Oro ama anam n̄kpon esịt, nsinyụn̄ nduọ obom. Ke ini n̄kedide isua 16, ẹma ẹmen mi ẹkesịn enyịn̄ ke ufọkn̄wed emi ẹsin̄wamde nditọwọn̄ ẹkpụhọde. Mma n̄ka ufọkn̄wed oro isua iba. Nte ini akakade, mma mbiat ibet ndien ẹmen mi ẹkesịn ke ufọk-n̄kpọkọbi emi owo mîsiyakke owo enyịghede idem. Ke ẹma ẹkesio mi ke ufọk-n̄kpọkọbi, mma n̄wọrọ n̄kodụn̄ ke Australia. N̄koyom ndikọtọn̄ọ uwem obufa do.

Ndi ndiwọrọ n̄kodụn̄ ke ebiet en̄wen ama an̄wam fi?

Idịghe ndiwọrọ n̄kodụn̄ ke ebiet en̄wen ekenen̄ede an̄wam mi. Bible oro n̄kekpepde ye Mme Ntiense Jehovah akan̄wam mi. Kpa ye oro, n̄kosụk n̄kpekpep ndimụm idem n̄kama ke ini ẹnamde se ibiakde mi; ndusụk ini ekesitie mi nte n̄wọrọke n̄kpọ. Edi usen kiet mma ntie n̄kere se Mme N̄ke 19:11 ọdọhọde. Itien̄wed oro ọdọhọ ete: “Ikike owo iyakke enye ọsọp iyatesịt, onyụn̄ eye enye ndifen ndudue.” Sia n̄koyomde ndinyene ikike emi Bible etịn̄de aban̄a mi, mma ntọn̄ọ ndikere se isinamde itịn̄ ikọ nte itịn̄de inyụn̄ inam n̄kpọ nte inamde. Sụn̄sụn̄, mma ndidiọn̄ọ ntak, ndien emi ama anam ntọn̄ọ ndime ime nsinyụn̄ mfen nnọ owo ke ini ẹduede mi.

Mbọk nọ nnyịn uwụtn̄kpọ kiet ise.

Enyene isan̄ kiet emi n̄keduede nnam se iyatde ufan mi, ndien enye aduat mi ke iso kpukpru owo. Inua ikemeke nditịn̄ nte bụt akanamde mi. Edi mma nti item Bible emi ọdọhọde owo ‘okûda idiọk usio owo usiene idiọk,’ ntre mma nsọsọp n̄kpe enye ubọk. (Rome 12:17) Ke esịt ama okosụhọ enye, mma n̄ka mbịne enye nnyụn̄ n̄kokụt ke enyene se iketịbede ke ufọk mmọ emi akanamde enye ayat esịt ntre. Ima inam emem, ndien nte ini akakade enye ama ọnọ mi ediye ọfọn̄edịm. Mmesikọm Abasi ke ini ntiede n̄kere se ikpeketịbede edieke n̄kpakayatde esịt nte n̄kesiyatde ke eset.

Esinam didie n̄kpọ ke ini mfịna odude ke ubon fo?

Mmenyene n̄wan ye eyen emi edide isua 20. Sia mîdụhe ubon emi mîsinyeneke mfịna, nnyịn n̄ko imesinyene mfịna ndusụk ini. Edi mmekpep ediwak n̄kpọ ke Bible, utọ nte ndidọhọ, “Mbọk kûyat esịt.” Edieke ẹkpede owo ubọk ke ofụri esịt, emi ekeme nditre mfịna mîdịghe anam mfịna osụhọde ubọk.

NELSON, afo esitie ufan ufan onyụn̄ asak imam ye kpukpru owo. Edi ẹdọhọ ke enyene ini emi afo ekesisuade mme owo. Ndi ntre?

Ntre ke edi! Ini n̄kedide akparawa, mma ndụk n̄ka mbre ukara emi ẹkesin̄wanade ye ukara. N̄ko, mma nnen̄ede nsua n̄ka mbre ukara emi mîkamaha ndida ye nnyịn. Mma n̄kpep karet man n̄keme ndin̄wana en̄wan ọfọn, mma nsinyụn̄ mmia owo ekededi emi anamde se iyatde mi.

Nso ikanam okpụhọde?

Mma ntọn̄ọ ndikpep Bible nnyụn̄ nnam se n̄kpepde ke Bible. Itie N̄wed Abasi iba ẹkenen̄ede ẹtụk mi. Akpa ọdọhọ ete: “Kpukpru n̄kpọ eke mbufo ẹyomde mme owo ẹnam ye mbufo, ana mbufo n̄ko ẹnam kpasụk ntre ye mmọ.” (Matthew 7:12) Udiana ọdọhọ ete: “Afo enyene ndima mbọhọidụn̄ fo nte idemfo.” (Matthew 22:39) Mma n̄kụt ke Mme Ntiense oro ẹkekpepde mi Bible ẹnyene utọ ima emi, inamke n̄kpọ m̀mê mmọ ẹto m̀mọ̀n̄. Ama ọdọn̄ mi nditie nte mmọ ndien Abasi ama an̄wam mi. Idem ama akpa ndusụk mbon emi ẹkediọn̄ọde mi ndikụt nte ami n̄kpụhọrede. Nte ini akade, mmọ ikefeheke mi aba.

Tọn̄ọ oro, ndi amafiak amia owo?

Ih, edi idịghe ke eferife. Mmeti isan̄ kiet emi esịt akayatde mi tutu mmia n̄wan mi. Ini ekededi emi ntide n̄kpọ emi, esịt esimia mi ufen. Edi n̄wan mi ama efen ọnọ mi, ndien emi ama anam nnen̄ede mbiere ndisimụm idem n̄kama ke ini n̄kpọ abiakde mi.

Ọdọhọ ke mme owo ikefeheke fi aba ke ama okokpụhọde. Mbọk nọ nnyịn uwụtn̄kpọ kiet ise.

Usen kiet mma n̄kosobo ye ọwọrọetop etubom n̄ka mbre ukara oro mîkadaha ye nnyịn. Enye ekekere Augusto. Ke nsonso oro, idem ekenyenyek enye. Edi mma n̄kọm enye idara idara, ndọhọ enye efre aban̄a se iketịbede, nnyụn̄ n̄kot enye ufọk. Enye ama ọdọhọ ke iyedi. Ama akpa enye idem etieti ndikụt nte n̄kpụhọrede tutu enye ke idemesie n̄ko ọtọn̄ọ ndikpep Bible. Ami ye Augusto ididi itai ye aban̄ idahaemi, inyụn̄ ikpono Abasi kiet.

Enyene nsio nsio n̄kpọ emi ẹsinamde mme owo ẹkûtie ke emem. N̄ko, idịghe kpukpru owo ẹsinyịme ndinam emem. Emi anam Bible eteme nnyịn ete: “Edieke usụn̄ odude, adan̄a nte mbufo ẹkekeme, ẹtie ke emem ye kpukpru owo.”—Rome 12:18.

Kpukpru mbon oro inemede ke ibuotikọ emi ẹma ẹkpụhọde. Emi owụt ke edieke iyakde, ke Bible ekeme ndinam nnyịn itre ndiọi edu emi ama ekememehe nnyịn. (2 Corinth 10:4) Mme item emi ẹnamde owo enyene ọniọn̄ ẹyọyọhọ Bible. Kop mi se Mme N̄ke 3:17, 18 etịn̄de aban̄a ọniọn̄: “Usụn̄ esie edi usụn̄ inemesịt, ofụri ọkpọusụn̄ esie onyụn̄ edi emem. Enye edi eto uwem ọnọ mmọ eke ẹmụmde enye ẹkama, ndien mbon oro ẹsọn̄ọde ẹmụm enye ẹkama ẹkop inemesịt.”

Ndi akpama ndikop inemesịt nnyụn̄ ntie ke emem ye mme owo? Edieke afo ye ufan fo ẹnyenede mfịna, ndi akpama ndidiọn̄ọ se akpanamde man ẹka iso ẹdi ufan? Edieke edide ntre, mbọk yak Bible eteme fi se akpanamde.