Eyen fo ke ebre mbre ke esịt ufọk. Etise afo esịne ke ubet en̄wen okop n̄kpọ ọduọde asuana ke isọn̄. Afo efehe aka okokụt ke n̄kpọ usịn flawa obomo, ndien eyen fo do ada. Nte enye akamade iso anam ọdiọn̄ọ ke enye obom n̄kpọ oro.

Afo obụp ke iyatesịt m̀mê enye okobom n̄kpọ oro, enye ọsọsọp ọdọhọ ke idịghe imọ. Idịghe akpa ini omụmde eyen fo emi edide isua ition nte osude nsu edi emi. Ndi akpana ayak emi enen̄ede afịna fi?

Idụhe nsu emi mîdiọkke. Bible ọdọhọ ke Jehovah Abasi asasua “edeme nsu.” (Mme N̄ke 6:16, 17) Ke Ibet oro Abasi ọkọnọde nditọ Israel, enye ama ọdọhọ mmọ ẹkûbian̄a owo.—Leviticus 19:11, 12.

Ndusụk nsu ẹdiọk ẹkan ndusụk. Ndusụk owo ẹsisu nsu man ẹnam owo en̄wen ibak. Ndusụk ẹsu ke ntak ndịk, sia mîyomke ndidia esuene m̀mê ndibọ ufen. (Genesis 18:12-15) Imọdiọn̄ọ ke kpukpru nsu ẹdiọk, edi ndusụk nsu ẹdiọk ẹkan ndusụk. Edieke eyen fo osude nsu, kere m̀mê enye edi isua ifan̄ nyụn̄ kere se ikpanamde enye osu utọ nsu oro.

Tọn̄ọ idahaemi nam eyen fo etre ndisu nsu. Dr. David Walsh ọdọhọ ete: “Enen̄ede ọfọn ẹkpep nditọwọn̄ ndisitịn̄ akpanikọ, idem ke ini ọsọn̄de ndinam emi. Mme owo isinyeneke mbuọtidem ke idem owo emi esisude nsu isinyụn̄ ikpereke utọ owo oro.” *

Kûyak idem enyek fi. Eyen fo ndisu nsu iwọrọke ke enye ọmọn̄ ọsọp abiara. Kûfre ke Bible ọdọhọ ke “ndisịme ido eyịre ke esịt eyenọwọn̄.” (Mme N̄ke 22:15) Nsu edi kiet ke otu ndisịme ido emi, ndien ndusụk nditọwọn̄ ẹsisu nsu mbak owo edimia mmọ ufen. Ntre, oyom ekpeme nte anamde n̄kpọ.

Domo ndifiọk ntak emi eyen fo osude nsu. Ndi enye osu nsu sia mîyomke ọnọ imọ ufen? Okûdi enye iyomke afo ọfiọk ke imanam ndudue mbak uduyat esịt ye enye? Edieke eyen fo etịbide mbụk obụk ọnọ mme ufan esie, ọkpọfọn etịm ekere ntak emi enye akpanamde utọ n̄kpọ oro. Okûdi enye ikponke kan̄a ikem ndidiọn̄ọ ke n̄ke okpụhọde ye n̄kpọ emi eketịbede? Edieke ọdiọn̄ọde se inamde eyen fo osu nsu, eyekeme ndinen̄ede n̄n̄wam enye.—Se se Bible etịn̄de ke 1 Corinth 13:11.

Sitịn̄ se itịbede ndusụk ini utu ke ndibụp mbụme. Ke uwụtn̄kpọ oro ikọnọde ke ntọn̄ọ ibuotikọ emi, eka eyen oro ama ọdiọn̄ọ ke eyen esie okobom n̄kpọ usịn flawa oro, edi enye obụp m̀mê enye obom. Eyen oro ama osu nsu mbak esịt ediyat enye. Mma emi akpakakam ososio etịn̄ ke enye okobom n̄kpọ oro. Ndinam emi akpakanam eyen esie etịn̄ akpanikọ. Mbụme oro enye okobụpde do ọkọnọ eyen emi ifet ndisu nsu.—Se se Bible etịn̄de ke Colossae 3:9.

Toro eyen fo ke ini enye etịn̄de akpanikọ. Nditọwọn̄ ẹsimama ndinam se inemde ete ye eka mmọ, ntre nam eyen fo ọdiọn̄ọ ke afo oyom enye esitịn̄ akpanikọ. Enye oyodomo ndinam emi man enem fi esịt.—Se se Bible etịn̄de ke Mme Hebrew 13:18.

Nam eyen fo ọdiọn̄ọ ke nsu isiyakke ẹnyene mbuọtidem ke idem owo. Nditoro enye ke ini enye etịn̄de akpanikọ ayanam enye esika iso etịn̄. Ke uwụtn̄kpọ, emekeme ndidọhọ enye ete, “Esinem mi tutu ndikụt nte afo etịn̄de akpanikọ.”

Nịm eti uwụtn̄kpọ. Ukemeke ndikere ke eyen fo eyesitịn̄ akpanikọ edieke afo ọdọhọde enye ọdọhọ owo emi okotde fi ke fon ke imọ idụhe ke ufọk ke ini edide afo mmọdo m̀mê ndidọhọ ke udọn̄ọ anam afiak utom ke ini edide onyụn̄ ọfọfiọk etie ke ufọk ọduọk odudu.—Se se Bible etịn̄de ke James 3:17.

Da Bible kpep eyen fo ndisitịn̄ akpanikọ. Bible ọdọhọ isitịn̄ akpanikọ, ndien mbụk ndusụk owo ke Bible owụt ke nsu ifọnke. N̄wed Mme Ntiense Jehovah emi Kpep N̄kpọ to Akwa Andikpep ekeme ndin̄wam fi ekpep eyen fo Ikọ Abasi. Ọyọhọ ibuot 22 ọdọhọ ete, “Ntak Emi Nnyịn Mîkposụho Nsu.” (Se ndusụk se ẹnemede ke ibuotikọ oro ke ekebe emi “ N̄wed Emi Edin̄wamde Eyen Fo.”)