SE BIBLE ETỊN̄DE: “Yak kpukpru owo ẹkpono ndọ, ẹkûnyụn̄ ẹsabade bed ndọ.” —Mme Hebrew 13:4.

UFỌN ORO IDIDIADE: Ndusụk owo ẹkere ke ikọ emi edi ikọ eset, ke ibeheke nnyịn mfịn. Edi mmọ ẹnam ata akamba ndudue! Efịbe osụk ababiak owo mfịn nte ekesibiakde mme owo ke ini ẹkewetde Bible.—Mme N̄ke 6:34, 35.

Jessie, emi enyenede n̄wan ye nditọ, ọdọhọ ete: “N̄wan mi ikpọn̄ ke mma, mmaha owo en̄wen. Emi etiene anam inen̄ede ikpere kiet eken inyụn̄ ikop inemesịt. Ndidiọn̄ọ ke n̄wan m̀mê ebe fo idikpọn̄ke fi ibịne owo en̄wen esitiene anam ndọ ọfọn. Efịbe isiyakke ẹnyene mbuọtidem ke idem owo”—owo itịn̄ke-tịn̄ iban̄a nte emi esinyụn̄ afịnade nditọ nte ini akade.

Ligaya * ama anam n̄kpọ tutu ndọ esie ekpere ndibiara. Enye ọdọhọ ete: “Mma ntọn̄ọ ndidụk ndụk ye mme idiọkowo. Ntre, mma nsitiene n̄ka usọrọ okoneyo nnyụn̄ nsịn efịbe.” Ndi emi ama anam enye okop inemesịt? Ihih, enye ye ebe esie ẹkesitọtọhọ kpukpru ini, ndien esịt ikenemke enye. Enye ọdọhọ n̄ko ete: “Ke ini ntiede n̄kere utọ ndisịme emi n̄kemende idem n̄kesịn, mmesikụt ke ete ye eka emi ẹma ẹnen ndisidọhọ mi ke ‘idiọk nsan̄a ababiat eti ido.’”—1 Corinth 15:33.

Ligaya aka iso ete: “Mbemiso n̄kpọ abiarade ofụri ofụri, mma ntre ofụri ndisịme oro n̄kesisan̄ade nnam nnyụn̄ n̄kpep Bible. Edi isan̄ emi, mma nnam se n̄kekpepde.” Nso ufọn ke enye akadia? Ndọ esie ama afiak ọfọn, ndien ebe esie ama ọtọn̄ọ ndinen̄ede mma enye nnyụn̄ nnam n̄kpọ ye enye ukpono ukpono. Enye ọdọhọ ete: “Bible okpụhọde uwem mi, ndien ntuaha n̄kpọfiọk nte mmendụhe uwem aba nte n̄kesidude mmenyụn̄ nsan̄ake aba ye mbon oro n̄kekerede ke ẹdi ufan.”