SE BIBLE ETỊN̄DE ABAN̄A
Mme Unam
Idụhe owo emi mîdiaha ufọn unam. Ndi nte inamde n̄kpọ ye mme unam ebehe Abasi?
Ẹkpenam n̄kpọ didie ye mme unam?
SE MME OWO ẸDỌHỌDE
Ndusụk owo ẹdọhọ ke ẹkeme ndinam n̄kpọ ye mme unam nte ẹmama. Edi mbon en̄wen ẹdọhọ ke ẹkpenam n̄kpọ ye mme unam nte ẹnyụn̄ ẹnamde ye mme owo.
-
Owo kiet emi esinen̄erede oyom ẹnam n̄kpọ ọfọn ye mme unam ọkọdọhọ ke akpana “ẹnọ mme unam unen emi mîdiyakke ẹnyam m̀mê ẹwot mmọ ẹta.” Enye ama ọdọhọ n̄ko ete: “Ana nnyịn itre ndida unam nte inyene nnyịn.”
-
Mma kiet emi ekerede Leona Helmsley ama anam n̄kpọ emi akakpade ediwak owo idem. Enye ama enịm n̄kpọ nte biliọn naira iba ọnọ ebua esie onyụn̄ ewet esịn ke n̄wed ete ebua oro ama akpa, yak ẹbụk enye ekpere imọ.
Kere ise: Afo ekere ke mme owo ẹkpenam n̄kpọ didie ye mme unam?
SE BIBLE ỌDỌHỌDE
Jehovah Abasi emi okobotde kpukpru n̄kpọ ọkọdọhọ mme owo “ẹkara iyak ke inyan̄ ye mme edibotn̄kpọ emi ẹfede ke enyọn̄ ye kpukpru mme odu-uwem edibotn̄kpọ eke ẹnyọnide ke isọn̄.” (Genesis 1:28) Emi owụt ke mme owo ẹsọn̄ urua ke enyịn Abasi ẹkan mme unam.
Se Bible etịn̄de ke Genesis 1:27 owụt ke emi enen̄ede edi akpanikọ. Itie oro ọdọhọ ete: “Abasi obot owo ke mbiet esie, ke mbiet Abasi ke obot enye; eren ye n̄wan ke enye obot mmọ.”
Sia ẹkebotde owo “ke mbiet Abasi,” oro anam nnyịn ikeme ndikpebe enye. Imekeme n̄ko ndikpep n̄kpọ nto ọniọn̄, unenikpe, ye ima Abasi. Nnyịn mme owo imekeme ndinam se inende nnyụn̄ n̄kpono Abasi. Mme unam ikemeke ndinam mme n̄kpọ emi koro owo ikobotke mmọ “ke mbiet Abasi.” Unam ye owo idịghe ukem, ntre inaha ẹnam n̄kpọ ye mme unam nte ẹnamde ye mme owo.
Ndi oro ọwọrọ ke ẹkeme ndinam n̄kpọ ye mme unam nte ẹmama? Ihih.
-
Ke Ibet oro Abasi ọkọnọde nditọ Israel, enye ama ọdọhọ mmọ ẹnam mme unam ẹduọk odudu, ẹnọ mmọ udia, ẹse ẹban̄a mmọ, ẹkûnyụn̄ ẹyak mmọ ẹda unan. —Exodus 23:4, 5; Deuteronomy 22:10; 25:4.
“Nam utom fo ke usen itiokiet; edi ke ọyọhọ usen itiaba afo enyene nditre utom, man ayara enan̄ fo ye ass fo ẹduọk odudu.” —Exodus 23:12.
Ndi ọdiọk ndiwot unam?
SE MME OWO ẸDỌHỌDE
Ndusụk mme atautop ye mme ọkọiyak ẹsiwot unam ye iyak ẹda ẹbre mbre m̀mê ẹda ẹtan̄ ase. Ewetn̄wed oro ekerede Leo Tolstoy, emi otode Russia, ekewet ete ke ndiwot m̀mê ndita unam edi “ata idiọkn̄kpọ.” Ndusụk owo ẹdọhọ ke enye enen.
SE BIBLE ỌDỌHỌDE
Abasi enyịme ẹwot unam emi ẹkụtde ke ekeme ndiwot owo onyụn̄ enyịme ẹwot unam ẹda ẹnam ọfọn̄. (Exodus 21:28; Mark 1:6) Bible ọdọhọ n̄ko ke ẹkeme ndiwot unam nda nnam udia. Genesis 9:3 ọdọhọ ete: “Kpukpru unam eke ẹnyọnide emi ẹdude uwem ẹyedi udia mbufo.” Jesus ama akam an̄wam mme mbet esie ẹmụm iyak ẹketa.—John 21:4-13.
Kpa ye oro, Bible ọdọhọ ke Abasi “asasua owo ekededi eke amade afai.” (Psalm 11:5) Emi owụt ke Abasi imaha owo owot unam ke ntak emi esinemde-nem enye ndinam ntre m̀mê man ada ebre mbre.
Bible owụt ke uwem unam ọsọn̄ urua ke enyịn Abasi.
-
Bible etịn̄ aban̄a ini oro Abasi okobotde n̄kpọ ete: “Abasi obot unam ikọt ke orụk mmọ ye ufene ke orụk mmọ ye kpukpru unam eke ẹnyọnide ke isọn̄ ke orụk mmọ. Ndien Abasi okụt ke ọfọn.”—Genesis 1:25.
-
Bible ọdọhọ ke Jehovah “ọnọ mme unam udia mmọ.” (Psalm 147:9) Nte Abasi okobotde isọn̄ anam mme unam ẹnyene udia barasuene ẹnyụn̄ ẹnyene ebiet emi mmọ ẹdụn̄de.
-
Edidem David ke Israel ọkọdọhọ ntem ke akam: “O Jehovah, afo amanyan̄a owo ye unam.” (Psalm 36:6) Ke uwụtn̄kpọ, ke ini Jehovah akadade Ukwọ osobo ndiọi owo, enye ama anyan̄a owo itiaita ye nsio nsio orụk unam.—Genesis 6:19.
Kpukpru emi owụt ke Jehovah ama mme unam emi enye okobotde, inyụn̄ iyomke mme owo ẹbak mmọ ibak.
‘Edinen owo ese aban̄a ufene esie.’ —Mme N̄ke 12:10.
Ekeme Ndidi Ayama Mmọ Emi N̄ko
Nso Idi Etop Bible?
Andibot Ọnọ Ubonowo Paradise
Bible ọdọhọ ke ẹkebot owo didie? Nso ke Abasi ọkọdọhọ ata akpa owo iba emi ẹkedude uwem ke isọn̄ emi?
