Ediwak owo ifiọkke m̀mê Abasi odu. Ndusụk owo ẹdọhọ ke ibeheke mmimọ m̀mê enye odu m̀mê idụhe. Hervé, emi okokponde ke France, ọdọhọ ete: “Okposụkedi emi mmendọhọke ke Abasi idụhe, mmennyụn̄ ndọhọke ke idụhe eke ọfiọkde m̀mê Abasi odu, ami nnyeneke ini ye Abasi. N̄kere ke ọfọn owo ada ifiọk ibuot esie odu uwem. Ufọn idụhe nditie mfịna idem mban̄a Abasi.”

Ekeme ndinyụn̄ ntie ediwak owo nte etiede John emi odụn̄de ke United States. Enye ọdọhọ ete: “Ete ye eka mi ikenịmke ke Abasi do. Ndien ke ini n̄kedide akparawa, n̄kosụk ndiọn̄ọke m̀mê Abasi odu m̀mê idụhe. Edi mma nsitie n̄kere ndusụk ini m̀mê enye akam odu.”

Ndi akanam emekere m̀mê Abasi odu, ndien edieke edide enye odu, m̀mê nso idi akpan ntak emi nnyịn idude uwem? Ekeme ndidi omokụt ndusụk n̄kpọ emi owo mîkemeke ndinam an̄wan̄a edieke owo mînịmke ke Abasi do. Ke uwụtn̄kpọ, nso inam kpukpru n̄kpọ ẹdu ke nde ke nde ke ekondo nnyịn emi? Nso inam owo, unam, ye eto ẹka iso ẹdu uwem ke isọn̄ emi? Ntak emi n̄kpọ oro mînyeneke uwem mîkemeke ndiman n̄kpọ emi enyenede uwem?—Se ekebe emi “Dụn̄ọde Mme N̄kpọ Emi Ẹwụtde ke Abasi Odu.”

Yak ikere iban̄a se emi ọwọrọde. Mme n̄kpọ oro itịn̄de ke enyọn̄ emi ẹtie nte idiọn̄ọ emi owụtde owo usụn̄. Edieke okụtde n̄kpọ emi anamde afo enịm ke Abasi odu, onyụn̄ etịmde ọdiọn̄ọ enye, afo eyenen̄ede adia ufọn. Se ufọn inan̄ emi edidiade mi.

Edieke edide enyene akpan ntak emi anamde nnyịn idu uwem, ọfọn kpukpru nnyịn ifiọk ntak emi inyụn̄ ise m̀mê imakam idu uwem nte akpanade idu. Edieke edide Abasi do ndien nnyịn idiọn̄ọke, ọwọrọ idu uwem ibuot ibuot—ifiọkke ata akpan n̄kpọ oro akpanade ifiọk.

Bible ọdọhọ ke Abasi okobot kpukpru n̄kpọ. (Ediyarade 4:11) Didie ke ndifiọk emi ekeme ndinam uwem nnyịn ọwọrọ n̄kpọ? Yak ise se Bible etịn̄de aban̄a emi.

Ke ofụri se Abasi okobotde ke isọn̄, idụhe se itiede nte owo. Bible ọdọhọ ke owo kpọt ke Abasi okobot ke mbiet esiemmọ. Emi anam ikeme ndikpebe Abasi. (Genesis 1:27) Bible ọdọhọ n̄ko ke nnyịn imekeme ndinam ufan ye Abasi. (James 2:23) Ndi emekere ke odu se ikponde ke uwem ererimbot emi nte owo ndidi ufan Abasi?

Nso ke ndidi ufan Abasi ọwọrọ? Edieke inamde ufan ye Abasi, nnyịn iyesineme nneme ye enye ini kiet ekededi. Ndien enye ọn̄wọn̄ọ ke iyokop akam nnyịn inyụn̄ in̄wam nnyịn. (Psalm 91:15) Ndinam ufan ye Abasi ayanam nnyịn ifiọk nte enye ekerede n̄kpọ. Ndien emi ayanam nnyịn inen̄ede ifiọk n̄kpọ iban̄a uwem emi.

Ke uwụtn̄kpọ, ọsọsọn̄ ndusụk owo ndinịm ke Abasi odu ke ntak ufen oro mme owo ẹbọde ke ofụri ererimbot emi. Esifịna mmọ ntak emi Ata Ọkpọsọn̄ Abasi akpayakde idiọkn̄kpọ ye ufen aka iso.

Bible ọdọhọ ke Abasi ikoyomke mme owo ẹdibọ ufen. Uwem ama enem etieti ke ini Abasi okobotde owo sia ufen ikodụhe. Abasi ikonyụn̄ iyomke owo akpa. (Genesis 2:7-9, 15-17) Ndi ọsọn̄ fi ndinịm se ẹtịn̄de emi? Ndi emekere ke utọ n̄kpọ emi ikemeke nditịbe? Edieke afo enịmde ke Ata Ọkpọsọn̄ Abasi do ye nte ke enye edi Abasi ima, ndi ukereke ke enye okpoyom ndima nditọ esie ẹkop inemesịt ke nsinsi utu ke ndibọ ufen ntem nnyụn̄ n̄kpan̄a?

Nso ndien isịn kpukpru se iwọrọde nnyịn emi? Bible ọdọhọ ke Abasi ikobotke owo nte ukwakutom emi anamde sụk se ẹkebotde enye ẹnọ, edi ke enye okobot nnyịn ke usụn̄ emi ikemede ndimek se iyomde ndinam. Owo inyịkke-nyịk nnyịn ikop uyo Abasi. Akpa ete ye eka nnyịn ẹma ẹsọn̄ esịt ẹsịn ndinam item Abasi, ẹkabade ẹnam uduak idemmọ. (Genesis 3:1-6, 22-24) Nte ufen nnyịn ọkọtọn̄ọde edi oro.

Ndidiọn̄ọ ke Abasi ikoyomke owo edibọ ufen ekeme ndinam esịt ana nnyịn sụn̄. Edi idụhe owo emi oyomde ndika iso mbọ ufen. Ntre imoyom ndifiọk m̀mê n̄kpọn̄ ọyọfọn.

Ke ndondo oro Adam ye Eve ẹkesọn̄de ibuot ye Abasi, Abasi ama ọn̄wọn̄ọ ke iyosụk inam mme owo ẹdụn̄ ke isọn̄ emi nte imọ ikoyomde. Idụhe se ikemede ndikpan enye ndinam emi sia enye edide Ata Ọkpọsọn̄ Abasi. (Isaiah 55:11) Abasi ọmọn̄ ọdọdiọn̄ kpukpru se nsọn̄ibuot Adam ye Eve akabiatde, onyụn̄ anam isọn̄ emi ye mme owo ẹketie nte enye okoyomde.

Uwem editie didie ini oro? Yak ise iba kpọt ke otu ediwak n̄kpọ oro Bible ọdọhọde nte Abasi edinamde ọnọ nnyịn ke ini iso.

• ẸYESOBO MME IDIỌKOWO ẸFEP, EMEM OYONYỤN̄ ODU KE OFỤRI ISỌN̄. “Ayak esisịt, idiọkowo ididụhe aba; afo oyonyụn̄ etịn̄ enyịn ke ebiet esie, ndien enye ididụhe. Edi mbon nsụkidem ẹyeda isọn̄ ẹnyene, ediwak emem oyonyụn̄ adat mmọ esịt.”—Psalm 37:10, 11.

• UDỌN̄Ọ YE N̄KPA IDIDỤHE ABA. “Baba andidụn̄ kiet ididọhọke ite: ‘Ndọdọn̄ọ.’” (Isaiah 33:24) “Enye eyemen n̄kpa emen ke nsinsi, Jehovah Akakan Ọbọn̄ Andikara oyonyụn̄ ọkwọhọde mmọn̄eyet efep ke iso kpukpru owo.”—Isaiah 25:8.

Ntak emi ikpenịmde kpukpru un̄wọn̄ọ Abasi oro ikụtde ke Bible? Sia ediwak prọfesi Bible ẹsosu. Edi ndidori enyịn ke ufen ididụhe ke ini iso inamke nnyịn itre ndibọ ufen idahaemi. Nso en̄wen ke Abasi anam ọnọ nnyịn?

Abasi eteme nnyịn nte ikemede ndiyọ mme mfịna nnyịn ye nte ikpebierede n̄kpọ ọfọn. Ndusụk se isibierede ẹsidi n̄kpri n̄kpọ, ndusụk ẹsikpon n̄kpọ ẹnyụn̄ ẹfịna nnyịn ke ata anyan ini. Idụhe owo emi ekemede ndinọ nnyịn nti item nte Andibot nnyịn ọnọde nnyịn. Se Jehovah etemede nnyịn ọfọn akan sia enye ọdiọn̄ọ kpukpru n̄kpọ, enye okonyụn̄ obot nnyịn. Ntre enye ọdiọn̄ọ se idifọnde ye nnyịn.

Bible edi Ikọ Jehovah Abasi emi ọkọnọde nsio nsio owo spirit esie ẹda ẹwet. Kop se Jehovah etịn̄de mi ke Bible: “Ami Jehovah, ndi Abasi fo, Enye emi ekpepde fi man afo ọbọ ufọn, Enye emi anamde fi asan̄a ke usụn̄ emi afo akpasan̄ade.”—Isaiah 48:17, 18.

Abasi enen̄ede enyene odudu, ndien enye enyịme ndida odudu esie emi n̄n̄wam nnyịn. Bible ọdọhọ ke Abasi etie nte edima ete emi oyomde-yom ndin̄wam nnyịn. Enye ọdọhọ ete: “Ete mbufo ke heaven [ọyọnọ] mbon oro ẹben̄ede enye edisana spirit.” (Luke 11:13) Abasi ekeme ndida odudu esie emi nsọn̄ọ nnyịn idem nnyụn̄ nda nnyịn usụn̄.

Nso ke akpanam man Abasi ada spirit esie an̄wam fi? Bible ọdọhọ ete: “Ana owo eke asan̄ade ekpere Abasi enịm ete enye odu ye nte ke enye edi andinọ mbon oro ẹnen̄erede ẹyom enye utịp.” (Mme Hebrew 11:6) Edieke oyomde ndifiọk m̀mê Abasi odu, ana odụn̄ọde mme n̄kpọ emi ẹwụtde ke enye odu.

Ndikpep n̄kpọ mban̄a Abasi esida ini, edi afo ayadia ufọn edieke anamde emi. Da Xiujin Xiao ke uwụtn̄kpọ. Enye akamana ke China onyụn̄ odụn̄ idahaemi ke United States. Enye ọdọhọ ete: “Okposụkedi emi n̄kesinịmde ke n̄kpọ okofoforo, mma nyom ndifiọk n̄kpọ mban̄a Bible. Ntre, mma ntọn̄ọ ndikpep Bible ye Mme Ntiense Jehovah. Ke isua oro n̄koyomde ndikụre ufọkn̄wed ntaifiọk, n̄kenyeneke aba ini n̄kpep Bible. Ntre, n̄kokopke inemesịt. Edi ke ini n̄kafiakde ntọn̄ọ ndikpep Bible, mma ntọn̄ọ ndikop inemesịt.”

Ndi afo akpama ndikpep n̄kpọ mban̄a Jehovah Abasi emi okobotde nnyịn? Edieke edide ntre, mbọk da ini kpep Bible.