Eyen fo emi edide isua inan̄ esiyom ọsọn̄ ke uyo imọ kpukpru ini, ndien etie nte afo emesinyụn̄ enyịme ọnọ enye.

• Ke ini ọdọhọde enye anam n̄kpọ emi enye mîmaha, enye ibọrọke fi ikọ.

• Ke ini ọdọhọde enye okûnam se enye oyomde ndinam, enye ọtọn̄ọ ntịme.

Afo onyụn̄ ekere m̀mê ekpedi ido eyenọwọn̄, m̀mê akpana ision̄o idem ikpọn̄, ke enye eyetre utọ ido emi nte ini akade.

Emekeme ndikpep eyen fo ndisikop uyo fo. Edi mbemiso inemede nte akpanamde emi, se n̄kpọ kiet emi ekemede ndidi enye esinam eyen fo okûkop uyo fo.

Ke ini eyen fo ekedide nsek, afo ekesikpekpeme enye onyụn̄ ededek enye akama. Ekesidi enye ama atatua, afo efehe ekese se ifịnade enye. Ama esinam se ededi oro enye oyomde. Se ekesinamde oro ama ọfọn ini oro sia esiyom ẹsese nsekeyen enyịn kpukpru ini.

Edi ke ediwak ọfiọn̄ ama ekebe, eyen fo ọtọn̄ọ ndinam nte imọ idi ọbọn̄, ete ye eka imọ ẹdi nditọufọk imọ. Edi ke ini eyen emi esịmde isua iba, do ndien ke enyịn esin̄wan̄a enye. Enye esidifiọk ke imọ idịghe ọbọn̄; ke ete ye eka imọ idinamke aba se imọ iyoyom, ke mmọ ẹdikabade iyom imọ inam se mmimọ idọhọde. Emi esinam ndusụk nditọwọn̄ ẹtọn̄ọ ntịme. Nditọwọn̄ eken ẹsitọn̄ọ nsọn̄ibuot.

Idahaemi ndien ke ana ete m̀mê eka ọtọn̄ọ ndinam eyen oro ọdiọn̄ọ ke ana enye esinam se imọ idọhọde. Edi nso ke akpanam edieke eyen fo mîmaha ndinam se ọdọhọde, nte iketịn̄de ke ntọn̄ọ?

Wụt ke afo ada usụn̄. Eyen fo ididiọn̄ọke ke afo ada usụn̄ ibọhọke afo ananam owụt. Ntre, okposụkedi emi mûdutiehe ukara ukara, nam enye ọdiọn̄ọ ke ana enye osụk ibuot ọnọ fi. Ke ndondo emi, ndusụk owo ẹnam etie nte ifọnke ndidọhọ nditọ ẹsụk ibuot ẹnọ ete ye eka mmọ. Owo kiet ọkọdọhọ ke ọdiọk ete m̀mê eka ndidọhọ eyen osụk ibuot ọnọ imọ. Edi ndiyak nditọwọn̄ ẹnam se mmọ ẹmama ekeme nditịmede nnyụn̄ mbiat mmọ. Emi isiyakke nditọ ẹkpon ẹkabade nti owo.—Se se Bible etịn̄de ke Mme N̄ke 29:15.

Sitụnọ eyen fo. N̄wed kiet ọdọhọ ke ntụnọ edi “ukpep emi esinamde owo okop item mîdịghe omụm idem akama ke n̄kpọ, ndien ke ẹsiwak ndinọ ibet ẹnyụn̄ ẹtịn̄ ufen oro ẹdinọde edieke ẹbiatde ibet oro.” Edi inaha ẹtụnọ eyenọwọn̄ ebe ubọk m̀mê ẹfofiomo enye. Ntre, ke ini otụnọde eyen fo, nam enye ọdiọn̄ọ ntak emi otụnọde enye. Edieke eyen fo mîdiọn̄ọke ntak emi otụnọde imọ, enye edisan̄a didie ikpụhọde?—Se se Bible etịn̄de ke Mme N̄ke 23:13.

Tịn̄ nnennen se oyomde eyen fo anam. Ndusụk mme ete ye eka ẹsisesịn eben̄e ẹnọ nditọ mmọ ẹte ẹkop uyo mmimọ. (“N̄kpama anam ubet fo asana. N̄kọ ayanam?”) Ekeme ndidi mmọ ẹsikere ke eti ido edi emi. Edi utọ ido oro ekeme ndinam etie nte ete m̀mê eka akabade osụk ibuot ọnọ eyen esie. Ndien ke ini enye anamde emi, eyen emi esise m̀mê se enye eben̄ede emi ọfọn ye imọ onyụn̄ ebiere m̀mê iyanam. Utu ke emi, tịn̄ nnennen se oyomde enye anam, edi kûtịn̄ nte esịn eben̄e.—Se se Bible etịn̄de ke 1 Corinth 14:9.

Nam se ekebierede. Edieke ọdọhọde eyen fo okûnam n̄kpọ, da ke uyo oro. Da ye n̄wan m̀mê ebe fo nam se ẹkebierede. Edieke ọkọdọhọde eyen fo ke iyọnọ enye ufen edieke enye mînamke se ọdọhọde, nam oro. Kûsio urua ke ufen oro okoyomde ndinọ enye, kûnyụn̄ utak ke nditịn̄ ntak emi afo ekebierede n̄kpọ ntre. Ọyọfọn ye eyen fo—oyonyụn̄ ọfọn ye afo—edieke ‘ayakde Ih fo edi Ih, Ihih fo onyụn̄ edi Ihih.’—James 5:12.

Wụt ke amama eyen fo. Ubon itiehe nte ukara emi kpukpru owo ẹnyenede unen nditiene mbiere n̄kpọ inyụn̄ itiehe nte ukara ufịk. Ubon edi eti ndutịm emi Abasi anamde man mme ete ye eka ẹn̄wam nditọ mmọ ẹkpon ẹkabade ẹdi nti owo. Kiet ke otu n̄kpọ emi Abasi oyomde mme ete ye eka ẹnam edi ndikpep eyen mmọ ndisikop uyo mmọ nnyụn̄ nnam enye ọfiọk ke ẹmema enye.