IBUOTIKỌ MAGAZINE EMI | NDI AMAYAK MFỊNA EMEN FI EMEN?
Mfịna: Ndinyene Ata Ediwak N̄kpọ Ndinam
ENYENE se anade ọsọsọp anam ọnọ nditọ fo. Kpa idahaoro, eteutom fo oyom anam n̄kpọ ọnọ imọ. Etise n̄wan m̀mê ebe fo okot ọdọhọ an̄wam imọ anam n̄kpọ. Kpa afo ese aban̄a ete ye eka fo emi ẹdọn̄ọde. Enyịn anan fi koro unyeneke ini unọ idemfo. Emekeme ndikere m̀mê ikpananam didie utọ n̄kpọ emi. Edieke anamde kpukpru se mmọ ẹdọhọde anam, emi idifọnke ye afo idinyụn̄ ifọnke ye mmọ. Nso ke akpanam mbak mfịna emi edimen fi emen?
UWỤTN̄KPỌ KIET KE BIBLE: MOSES
Enyene ini emi Moses ekedide n̄kukụre ebiereikpe ke Israel. Ekeme ndidi enye ekekere ke nte akpanade etie edi oro. Edi ete an̄wan esie ama ọdọhọ enye ete: “Nte afo anamde n̄kpọ ifọnke. Afo udutreke ndikpa mba.” Enye ama ọdọhọ Moses anam iren emi ẹnyenede uko ẹsin̄wam enye ẹbiere ikpe, ndien yak mmọ ẹsida sụk ikpe oro ọsọn̄de ẹsọk enye. Ete an̄wan esie ọkọdọhọ ke edieke enye anamde emi, ke enye “eyekeme ndise mban̄a utom emi, akan oro, mbon emi ẹyenyọn̄ ufọk mmọ ke emem.”
SE DELINA ANAMDE
Nte iketịn̄de ke akpa ibuotikọ, Delina ọdọn̄ọ udọn̄ọ esịp emi ẹkotde dystonia. N̄ko, nditọeka esie ita ẹnyene mfịna ke ibuot, ndien enye esise mmọ enyịn. Enye ọdọhọ ete: “Mmesinam se anade nnam ke nnennen ini, nsinyụn̄ mfịnake idem mban̄a nte n̄kpọn̄ editiede. Emi anam n̄kûnen̄ede ntịmede esịt mban̄a se iwọrọde mi. Nditịn̄ mfịna mi nnọ ebe mi ye mbon en̄wen esinam mmọ ẹn̄wam mi. N̄ko, mmesida ekpri ini kpukpru usenubọk ndiọn̄ flawa, ndien emi esinọ mi inemesịt.”
“Ẹmenịm ini ẹnọ kpukpru n̄kpọ.”
SE AKPANAMDE
Edieke enyenede ata ediwak n̄kpọ ndinam, nam emi ise:
-
Se ise m̀mê mbon en̄wen ẹkeme ndin̄wam fi. Ke uwụtn̄kpọ, edieke nditọ fo ẹdụn̄de ye afo, ndi mmọ ẹkeme ndin̄wam fi? Ndi mme ufan fo ye mbonubon fo emi ẹdụn̄de ẹkpere ẹkeme ndin̄wam fi?
-
Sitịn̄ mfịna fo nọ mme owo. Ke uwụtn̄kpọ, edieke se eteutom fo oyomde anam awakde akaha, tịn̄ mfịna fo nọ enye. Edi emi iwọrọke ke ana ọdọhọ enye ke edieke enye mînamke se imọ iyomde, ke imọn̄ ikpọn̄ utom. Nam enye ọdiọn̄ọ nte n̄kpọ etiede ye afo. Enye ekeme ndinam utom fo afiak efere.
-
Wet se esinyenede ndinam kpukpru urua. Ndi emekeme ndidọhọ mbon en̄wen ẹn̄wam fi ẹnam ndusụk?
-
Idịghe kpukpru usọrọ oro ẹkotde fi ke edika. Edieke idem ememde fi mîdịghe edieke mûnyeneke ini, kûka.
Se Anade Eti: Edieke odomode ndinam kpukpru n̄kpọ, nte ini akade udûkemeke ndinam ndomo n̄kpọ kiet.
Ekeme Ndidi Ayama Mmọ Emi N̄ko
ENYỌN̄-UKPEME
Ke Ini Eyen Fo Ọdọn̄ọde
Se mfịna ita emi udọn̄ọ eyen fo ekemede ndinọ fi ye nte Bible ekemede ndin̄wam fi.
