Ndusụk n̄kparawa ye n̄kaiferi ẹsikpọn̄ ufọk ẹkedụn̄ ikpọn̄, ekem n̄kpọ ọsọn̄ ye mmọ tutu mmọ ẹfiak ẹkedụn̄ ye ete ye eka mmọ. Ndi se iwọrọde fi edi emi?

Ọkpọkọm ama ete ye eka fo didie, ekeme ndisọn̄ fi ndifiak nnyọn̄ n̄kodụn̄ ye mmọ. Ke uwụtn̄kpọ, eyenan̄wan kiet emi ekerede Sarah * ọdọhọ ete: “Ini emi n̄kodụn̄de ikpọn̄, eketie mi ke idem nte ndi akwa owo sia ami n̄kese mban̄a idemmi. Edi ke ini nnyọn̄de n̄kodụn̄ ye ete ye eka mi, eketie mi ke idem nte mfiak ndi eyenọwọn̄.” Nte eketiede akparawa kiet emi ekerede Richard edi emi n̄ko. Enye ọdọhọ ete: “N̄koyomke ndifiak nnyọn̄ mbịne ete ye eka mi, edi n̄kekemeke ndise mban̄a idemmi aba. Eketie mi nte ndi owo atahade.”

Edieke utọ n̄kpọ emi ọwọrọde fi, se ẹnemede ke ibuotikọ emi ayan̄wam fi.

Okụk okụre ọkpọn̄ fi. Mme uyen isidiọn̄ọke ke n̄kpọ ọsọn̄ tutu mmọ ẹma ẹwọrọ ẹkedụn̄ ikpọn̄. Ini oro ke enyịn esin̄wan̄a mmọ. Richard emi iketịn̄de iban̄a ke ntọn̄ọ ntọn̄ọ ọdọhọ ete: “Nte n̄kosụk n̄n̄wanade ndise mban̄a idemmi, kpukpru okụk emi n̄kenyenede ama okụre.” N̄kaiferi kiet emi ekerede Shaina, emi ọkọkpọn̄de ufọk ke ini edide isua 24 ama afiak ọnyọn̄ ufọk ke isua kiet ye ubak ama ekebe. Enye ọdọhọ ke imọ ikọdiọn̄ọke ndikama okụk. Enye adian do ete: “N̄kenyeneke okụk ini n̄kọwọrọde n̄kpọn̄ ufọk, edi n̄kasan̄a ye akamba isọn nnyọn̄ ndi.” *

Unana utom. Unana utom ekeme ndinam n̄kpọ ọsọn̄ idem ye owo emi ama eketịm ekere nte imọ idisede iban̄a idem imọ ikpọn̄. Se ikọwọrọde Shaina edi emi. Enye ọdọhọ ete: “N̄kekpep utom ufọkibọk. Ke mma n̄kokụre, mma nsịn enyịn̄ ke n̄ka kiet emi ẹken̄wamde mi nnyene utom. Ke ini ẹkesiode mi ke utom, enyịn ama anan mi sia n̄kodụn̄ ke obio-in̄wan̄ emi mmendikemeke ndikụt utom ufọkibọk nnam.”

N̄kpọ itiehe nte ekekerede. Ndusụk uyen emi ẹdụkde utom isidiọn̄ọke ke oyom ẹnam utom ọkpọsọn̄ man ẹkeme ndise mban̄a idemmọ. Ntre, mmọ ẹsidikụt ke utom esịne n̄kpọ onyụn̄ ọsọn̄ akan nte mmimọ ikekerede. Mmọ ẹsidikụt n̄ko ke ndidụn̄ ikpọn̄ imemke utom.

Neme kan̄a ye ete ye eka fo mbemiso afiakde ọnyọn̄ ufọk. Neme adan̄a nte edibịghide ye mmọ, se edisinọde man ẹdian ẹdep n̄kpọ ke ufọk adan̄a nte osụk odude ye mmọ, utom emi edin̄wamde mmọ inam ke ufọk, ye se edinamde man ekeme ndifiak nse mban̄a idemfo. Inamke n̄kpọ m̀mê afo edi isua ifan̄, ti ke afo ọnyọn̄ edidụn̄ ke ufọk ete ye eka fo. Ntre, udûnamke n̄kpọ ke ufọk oro nte amama, edinam nte mmọ ẹdọhọde.—Se se Bible etịn̄de ke Exodus 20:12.

Kpep nditịm okụk n̄kama. N̄wed kiet emi aban̄ade nte mme uyen ẹkpekamade okụk ọdọhọ ete: “Nte afo esibiatde okụk oyowụt m̀mê okụk ekeme ndisịne fi ke ubọk mbịghi. . . . Akpan n̄kpọ emi anade ọdiọn̄ọ edi ke inaha abiat okụk ke n̄kpọ emi mîdịghe akpan n̄kpọ.”—Se se Bible etịn̄de ke Luke 14:28.

Nyịme ndikpep n̄kpọ. Ete fo, eka fo, m̀mê akwa owo en̄wen ekeme ndikpep fi nte ekpesidepde n̄kpọ, nte akpabiatde okụk, nte ekpesikpede okụk ikan̄ m̀mê okụk mmọn̄, ye nte ekpesịnde okụk fo ke ban̄k. N̄kaiferi kiet emi ekerede Marie ọdọhọ ete: “Mma mfiak ntọn̄ọ uwem. Ufan mi ama anam mi ntie n̄wet se idide akpan n̄kpọ ye se mîdịghe akpan n̄kpọ. Ama akpa mi idem ndikụt ke ndusụk n̄kpọ emi n̄kesidepde m̀mê nnamde ikedịghe akpan n̄kpọ! Mma n̄kụt ke ana n̄kpep ndisimụm itọn̄ n̄kama man n̄keme ndise mban̄a idemmi ke ini ndụn̄de ikpọn̄.”—Se se Bible etịn̄de ke Mme N̄ke 13:10.

Sịn idem yom utom. Da ini emi mûnyeneke utom yom utom. Edi kpeme-o, sia ndusụk owo ẹkeme ndidọhọ okûnyịme utom emi okụtde, yak oyom utom emi edinemde fi. Edieke adade ebet utom emi edinemde fi, udûsọpke unyene utom, udûnyụn̄ ukwe ke utom ọyọyọhọ fi idem! Ntre, kûsasat utom ukaha! Ti ke se ikam idide akpan n̄kpọ ikan utom emi anamde edi afo ndinen̄ede ndiọn̄ọ se anamde. Ndụn̄ọde emi ẹnamde owụt ke edieke owo enen̄erede ọdiọn̄ọ utom esie, utom oro eyenem enye. Idịghe tutu afo anam utọ utom emi esịnede fi ke esịt mbemiso afo ama utom oro!